Yet ispitzkꞌa yaꞌ Moisés
2
Yinh huneꞌ tiempo tuꞌ, ay huneꞌ naj titna yinh yaꞌ Leví, mohyi naj yebꞌ huneꞌ ix yinhtikꞌapaxo yaꞌ Leví pohchanatij. 2 Ispitzkꞌati nichꞌan winaj unin yinh ix. Haxa yet yapni istiempohal ispitzkꞌa nichꞌan unin, kaw xin kꞌulchꞌan jilni, yuxin ebꞌalaxto oxebꞌ ixahaw. 3 Yajaꞌ yet yilni ismam yebꞌ ismiꞌ tato matxa chu yebꞌalaxtoj iswatxꞌen ix huneꞌ teꞌ xuk, yaniko ix qꞌol yinh ej isholanil teꞌ yunhe machi okto ha haꞌ yul teꞌ, yanayto ix nichꞌan neneꞌ tuꞌ yul teꞌ, isto ix yanokano istiꞌ haꞌ niman Nilo, xol teꞌ ah. 4 Yok huneꞌ yanabꞌ nichꞌan unin tuꞌ istanhenoj, yajaꞌ nahat el ix, chilni ix nichꞌan unin tuꞌ.5 Haxa yinh hunxa tzꞌayik xin, yayapno iskutzꞌin naj faraón axhno bꞌey tuꞌ, yebꞌ hunteqꞌanxa ebꞌix qꞌopo. Haxa yet lanhan yekꞌ ix yebꞌ ebꞌix qꞌopo tuꞌ, yilnito ix huneꞌ xuk tuꞌ, ischejni ix huneꞌ ix qꞌopo yinohti teꞌ tuꞌ xol haꞌ. 6 Hayet yinilo ix ismajil teꞌ xin, yilni ix ta hilanayto nichꞌan unin tuꞌ yul teꞌ, kaw xin chiꞌoqꞌ nichꞌan neneꞌ tuꞌ. Istzꞌaykanh iskꞌul ix yinh, yalni ix hakaꞌ tiꞌ:
—Nichꞌan unin tiꞌ, yet ebꞌix hebrea, xhi ix.
7 Ishitziko ix yanabꞌ nichꞌan neneꞌ tuꞌ, yalni ix tet iskutzꞌin naj rey tuꞌ hakaꞌ tiꞌ:
—¿Chimhawoche chiwawtehan hunu ix hebrea chiꞌaqꞌni yim nichꞌan neneꞌ tiꞌ, kat yok ix yilno tawet? xhi ix. 8 Istaqꞌwi iskutzꞌin naj rey tuꞌ:
—Kꞌultikꞌa, xhi ix. Isto yanabꞌ nichꞌan neneꞌ tuꞌ yalno tet ismiꞌ, yul ix miꞌe tuꞌ bꞌay ay nichꞌan neneꞌ tuꞌ, 9 yalni iskutzꞌin naj rey tet ismiꞌ nichꞌan neneꞌ tuꞌ:
—Ito nichꞌan neneꞌ tiꞌ, kat hawaqꞌni chꞌibꞌo wetan, chaxhintolahan, xhi ix.
Yinito ix miꞌe nichꞌan neneꞌ tuꞌ, yaqꞌni chꞌibꞌo ix. 10 Haxa yet walxa nichꞌan unin tuꞌ, yaqꞌni ix tet iskutzꞌin naj rey tuꞌ. Yaniko ix yuninoj, Moisés yako ix isbꞌiho nichꞌan unin tuꞌ, yalni ix hakaꞌ tiꞌ: «Nichꞌan unin tiꞌ, xol ha haꞌ wihtijan,» xhi ix.a
Yet yelkanh yaꞌ Moisés sat txꞌotxꞌ Egipto
11 Hayet anmaxa yaꞌ Moisés tuꞌ xin, yok yinh isnabꞌal yaꞌ yelto yilno yet konhobꞌ Israel; yilni yaꞌ tato kaw chiꞌekꞌyaꞌ yet konhobꞌ yaꞌ tuꞌ yinh munil yu ebꞌnaj Egipto. Yilnipaxo yaꞌ ismaqꞌlax huneꞌ yet konhobꞌ yu huneꞌ naj Egipto. 12 Yekꞌ tꞌanhtꞌon yaꞌ Moisés tuꞌ, hayet yilni yaꞌ tato machi mak chiꞌilni, ispotxꞌnikamo yaꞌ naj Egipto tuꞌ, ismujni yaꞌ naj xol arena. 13 Haxa yinh hunxa tzꞌayik xin, yelto yaꞌ yilaꞌ yet konhobꞌ tuꞌ hunelxa, yilni yaꞌ yaqꞌlen howal kawanh yet konhobꞌ, isqꞌambꞌen yaꞌ tet naj chimaqꞌni hunxa naj tuꞌ hakaꞌ tiꞌ:
—¿Mak makaxhaniko yahawil maka juesal jinhanh? ¿Tom chawoche chinhapotxꞌkamojan hakaꞌ yu hapotxꞌnikamo naj Egipto? xhi naj.
Hayet yabꞌen yaꞌ Moisés yalni naj hakaꞌ tuꞌ, isxiwkanh yaꞌ. Istxumnilo yaꞌ tato xaꞌabꞌelaxiloj tato ispotxꞌkamo yaꞌ naj Egipto.
15 Hayet yabꞌenilo naj faraón huneꞌ tuꞌ, yoche naj ispotxꞌoꞌkamo yaꞌ Moisés, yajaꞌ xin elkanh yaꞌ tet naj rey tuꞌ, isto yaꞌ bꞌey txꞌotxꞌ Madián.
16 Hayet yapni yaꞌ bꞌey tuꞌ, yay tzꞌonhno yaꞌ istiꞌ huneꞌ kꞌuh, ay xin hujwanh iskutzꞌin naj sacerdote ay bꞌey txꞌotxꞌ Madián, apni ebꞌix iqꞌoti haꞌ yu isnohtzen ebꞌix teꞌ hukubꞌ bꞌay chukꞌ haꞌ ismeꞌ ismam ebꞌix. 17 Yajaꞌ xin apni hunteqꞌanxa ebꞌnaj tanhem meꞌ, istzumbꞌento ebꞌnaj ebꞌix. Hayet yilni yaꞌ Moisés huneꞌ tuꞌ, yahwano yaꞌ, iskolni yaꞌ ebꞌix, yok yaꞌ yinohti ha haꞌ, yaqꞌni yaꞌ haꞌ tet noꞌ meꞌ. 18 Lahwi tuꞌ, ismeltzo ebꞌix bꞌey yatut ismam, haꞌ ton naj Reuel, isqꞌambꞌen naj tet ebꞌix:
—¿Tzet yinh xin kaw pet makexhulnahi? xhi naj.
19 Istaqꞌwi ebꞌix tet ismam:
—Ay huneꞌ naj ah Egipto makonhkolnihanh tet hunteqꞌan ebꞌnaj tanhem meꞌ, mayinipaxahti naj ha haꞌ, mayaqꞌni naj haꞌ yukꞌuꞌ noꞌ meꞌ, xhi ebꞌix tet ismam.
20 Yalni naj Reuel tet ebꞌix:
—¿Bꞌaytuꞌwal xin ay naj? ¿Tzet yinh yuxin maxebꞌejkano naj? ¡As awteweti naj waꞌoj! xhi naj mame.
21 Hak tuꞌ yu isjeni yaꞌ Moisés, iskankano yaꞌ eho bꞌey yatut naj Reuel tuꞌ. Haxa yet yekꞌto hayebꞌ tzꞌayik xin, yaqꞌni naj Reuel huneꞌ iskutzꞌin yixalo yaꞌ Moisés tuꞌ, haꞌ ton ix Séfora.
22 Ispitzkꞌa huneꞌ yuninal yaꞌ Moisés yebꞌ yixal tuꞌ, Gersón yako yaꞌ isbꞌihoj, yalni yaꞌ hakaꞌ tiꞌ: «Nan konhobꞌal hinan sat huneꞌ txꞌotxꞌ tiꞌ,» xhi yaꞌ.
23 Haxa yet yekꞌto hayebꞌ tiempo xin, iskam naj rey faraón, wal ebꞌnaj Israel kaw ip islahniko yekꞌyaꞌ yanma ebꞌnaj yu munil, kaw xin chꞌoqꞌ yanma ebꞌnaj yu isyaꞌtajil. Yilni Komam Dios isyaꞌtajil chaqꞌle ebꞌnaj. 24 Yabꞌenpaxo Komam yel yaw ebꞌnaj yu isyaꞌtajil, isnahniti Komam Dios tzet tꞌinhbꞌabꞌilkano yu tet yaꞌ Abraham, tet yaꞌ Isaac yebꞌ tet yaꞌ Jacob. 25 Yil Komam isyaꞌtajil chaqꞌle ebꞌnaj Israel, isnahniti Komam ebꞌnaj.