Yet yawtelax yaꞌ Moisés yu Komam Dios
3
Yokkano yaꞌ Moisés istanheno ismeꞌ ismam yixal, haꞌ ton naj Jetro, naj sacerdote yul konhobꞌ Madián. Yet huneꞌ tzꞌayik xin, yito yaꞌ Moisés noꞌ meꞌ tuꞌ istanheꞌ bꞌey txꞌotxꞌ desierto, masanta apni yaꞌ bꞌey witz chiyij Horeb, bꞌey huneꞌ witz tuꞌ isyeh isbꞌa Komam tet yaꞌ.a 2 Hayet ay yaꞌ bꞌey tuꞌ, isyeni isbꞌa yángel Komam Dios xol xaj qꞌa qꞌaꞌ chiꞌah xol hun hobꞌan teꞌ txꞌix. Istꞌanhxito yaꞌ Moisés yinh teꞌ txꞌix tuꞌ, kaw chiꞌah xaj qꞌaꞌ xol teꞌ, yajaꞌ xin maxhtikꞌa chitzꞌato teꞌ yu xaj qꞌaꞌ tuꞌ. 3 Hayet yilni yaꞌ huneꞌ tuꞌ, yalni yaꞌ: «Hitzojinikojan kat kam wilnihan huneꞌ chisye isbꞌa yinh sajsatil wettiꞌan, kat wilnihan tzet yinh xin mach chitzꞌato teꞌ txꞌix tiꞌ yu qꞌaꞌ,» xhi yaꞌ Moisés. 4 Hayet yilni Komam ishitziko yaꞌ, yu yilni yaꞌ huneꞌ xaj qꞌaꞌ tuꞌ, yawten Komam yaꞌ xol xaj qꞌa qꞌaꞌ, yalni Komam hakaꞌ tiꞌ.
—Moisés, Moisés, xhi Komam. Istaqꞌwi yaꞌ:
—Ayinan Mamin, xhi yaꞌ.
5 Yalni Komam tet yaꞌ:
—Mach chaxhhitzikoj, ilo haxanhabꞌ, yuto txꞌotxꞌ bꞌay ayach tiꞌ kaw txahul yu ayinikꞌojan bꞌey tiꞌ, xhi Komam.
6 Yalnipaxo Komam:
—Hanintiꞌan isDiosal ebꞌyaꞌ hawichmam wehan; isDiosal yaꞌ Abraham, isDiosal yaꞌ Isaac, yebꞌ xin isDiosal yaꞌ Jacob, xhi Komam. Wal yaꞌ Moisés tuꞌ yako yaꞌ yenhel issat, yuto xiwkanh yaꞌ yilni Komam Dios.
7 Yalnipaxo Komam hakaꞌ tiꞌ:
—Kaw chiwilan isyaꞌtajil chaqꞌle inkonhobꞌan yul konhobꞌ Egipto. Chiwabꞌenpaxojan yel yaw ebꞌnaj yet chiꞌetalax ebꞌnaj yu ebꞌnaj yahaw. Sunil isyaꞌtajil chaqꞌle ebꞌnaj tuꞌ kaw wohtajan. 8 Yuxin makin ayilojan yu inkolnilojan ebꞌnaj yul isqꞌabꞌ ebꞌnaj Egipto. Chiwiltijan ebꞌnaj yul konhobꞌ Egipto tuꞌ, kat winitojan ebꞌnaj bꞌey huneꞌ txꞌotxꞌ kaw nimajal yebꞌ kaw kꞌul, bꞌay chꞌel yojomal noꞌ lech yebꞌ noꞌ kabꞌ. Haꞌ txꞌotxꞌ chiwaltiꞌan, haꞌ ton txꞌotxꞌ bꞌay ay anma cananeo, anma hitita, anma amorreo, anma ferezeo, anma heveo yebꞌ xin anma jebuseo. 9 Sunil isyaꞌtajil chaqꞌle anma Israel tuꞌ, xaꞌahapno yinh insatan, xawilpaxojan hanta chiꞌekꞌyaꞌ yanma ebꞌnaj yu ebꞌnaj ah Egipto. 10 Wal tinanh chachtohi, chachwatojan sata naj rey faraón, kat hawinilti inkonhobꞌ Israelan sat txꞌotxꞌ Egipto tuꞌ, xhi Komam tet yaꞌ Moisés.
11 Istaqꞌwi yaꞌ Moisés tet Komam hakaꞌ tiꞌ:
—Hanintiꞌan mach wetwanojan wokan sata naj faraón tuꞌ, kat winiltijan ebꞌnaj Israel sat txꞌotxꞌ Egipto, xhi yaꞌ tet Komam.
12 Istaqꞌwi Komam tet yaꞌ:
—Hanintiꞌan, chinokan hawetbꞌihoj, haꞌ huneꞌ tiꞌ chiꞌok yecheloj tato haninan chaxhinchejtojan. Hayet xahawilti inkonhobꞌ Israelan sat txꞌotxꞌ Egipto tuꞌ, haꞌ bꞌey huneꞌ witz tiꞌ chiyiyo isbꞌa wetan, yu yaniko inmayan, xhi Komam.
13 Istaqꞌwi yaꞌ Moisés tet Komam:
—Hayet chinapnihan kat walnihan tet wet Israel tuꞌan: “Haꞌ isDiosal ebꞌyaꞌ komam icham makinchejnitijan teyet, ta kinchihan,” taka xin chisqꞌambꞌe ebꞌnaj wetan: “¿Tzet xin isbꞌi mak kach chejnhe tuꞌ?” ta xhi ebꞌnaj wetan; ¿tzet chiwute walnihan? xhi yaꞌ.
14 Istaqꞌwi Komam Dios tet yaꞌ:
—Hanintiꞌan Ayintikꞌahan yuxin hak tiꞌ chawute hawalni tet hawet Israelal: Haꞌ mak Aynhetikꞌa haꞌ makinchejnitijan teyet, xhi Komam.b
15 Yalnipaxo Komam:
—Kat hawalni tet ebꞌnaj hawet Israelal tuꞌ: “Haꞌ Komam isDiosal ebꞌyaꞌ hemam icham, isDiosal yaꞌ Abraham, yaꞌ Isaac yebꞌ yaꞌ Jacob, haꞌ makinchejnitijan teyet,” kachi tet ebꞌnaj. Hak tuꞌ inbꞌihan yinh sunilbꞌal tiempo, yu inbꞌitiꞌan chinnalaxtijan yinh sunilbꞌal tiempo. 16 Wal tinanh chaxhtohi, kat hakutxbꞌaniko ebꞌnaj ichamta winaj Israel, kat hawalni tet ebꞌnaj hakaꞌ tiꞌ: “Haꞌ Komam isDiosal ebꞌyaꞌ hemam icham, isDiosal yaꞌ Abraham, yaꞌ Isaac yebꞌ yaꞌ Jacob, isye isbꞌa wetan, yalni hakaꞌ tiꞌ: Yinh kaw yeli kexintuklehan wilnihan tzet chexutelax bꞌey Egipto tiꞌ. 17 Yuxin xawalan ta chexinkolilojan yalanh isyaꞌtajil bꞌey Egipto, kat kexwinitojan sat txꞌotxꞌ bꞌay ay anma cananeo, anma heteo, anma amorreo, anma ferezeo, anma heveo, yebꞌ anma jebuseo; txꞌotxꞌ tuꞌ hakaꞌta lech yebꞌ kabꞌ chꞌel yojomal sat txꞌotxꞌ,” kachi tet ebꞌnaj. 18 Hayet chawalni hakaꞌ tuꞌ, chabꞌe ebꞌnaj tzet chawala, yuxin chaxhto yebꞌ ebꞌnaj sata naj rey faraón bꞌey Egipto, kat hawalni tet naj: “Haꞌ Komam Dios, koDiosalanh hanhonh Israelonh tiꞌanh maꞌisye isbꞌa jetanh, yuxin oxebꞌ tzꞌayik chonhbꞌelwitojanh sat txꞌotxꞌ desierto, haꞌ tuꞌ chijaqꞌanh koxahanbꞌalanh tet Komam Dios, koDiosalanh,” hak tuꞌ chu hawalni tet naj faraón. 19 Yajaꞌ xin kaw wohtajan tato naj faraón tuꞌ, mach chexischahti naj yinh haknhetiꞌ. 20 Yuxin chinyelo wipan, chiwanayojan isyaꞌtajil yibꞌanh anma Egipto tuꞌ yu sunil ej kꞌaybꞌalkꞌule chinwatxꞌehan bꞌey tuꞌ, hak tuꞌ xin chu kexischahniti naj. 21 Kat wanikojan yinh isnabꞌal ebꞌnaj tato kaw ay heyelapnoj, yuxin hayet chexel sat txꞌotxꞌ Egipto, kaw ay tzet iqꞌbꞌil heyu chexeli. 22 Wal xin hunun ebꞌix ah Israel chisqꞌan tzetaj ye tuꞌ tet ebꞌix ah Egipto ay yul yatut, maka tet ebꞌix ayayo iskawilal yatut. Hayet chisqꞌanni ebꞌix ah Israel tuꞌ, chiꞌaqꞌlax tzetaj ye tuꞌ plata yebꞌ oro yebꞌ xilqꞌape cheyako yinh heyuninal; kaw xin txꞌiꞌal tzet ye tuꞌ cheyitij yet chexel bꞌey Egipto, xhi Komam tet yaꞌ Moisés.