—Machim chabꞌe ebꞌnaj tzet chiwalan yebꞌ xin machim chayto ebꞌnaj yul yanma, katmi yalni ebꞌnaj wetan: “Tonhem chawala, mach isye isbꞌa Komam tawet,” xhim ebꞌnaj wetan, xhi yaꞌ Moisés tet Komam.

2 Istaqꞌwi Komam Dios tet yaꞌ:

—¿Tzet iqꞌbꞌil yul haqꞌabꞌ tuꞌ? Xhi Komam. Istaqꞌwi yaꞌ:

—Huneꞌ qꞌojoch, xhi yaꞌ.

3 Yalni Komam tet yaꞌ:

—Qꞌojayo haqꞌojoch tuꞌ sat txꞌotxꞌ, xhi Komam tet yaꞌ. Hayet isqꞌojnayo yaꞌ isqꞌojoch tuꞌ, ismeltzoko teꞌ labꞌahil. Hayet yilni yaꞌ Moisés huneꞌ tuꞌ, yel lemna yaꞌ tet noꞌ. 4 Yalni Komam tet yaꞌ:

—Tzabꞌ isnhe noꞌ labꞌa tuꞌ, xhi Komam. Hayet istzabꞌni yaꞌ isnhe noꞌ, ismeltzoko noꞌ qꞌojochal hunelxa.

5 Yalni Komam tet yaꞌ:

—Hayet chilni ebꞌnaj huneꞌ tuꞌ, chayto ebꞌnaj yul yanma tato inye hinbꞌahan tawet, Hanin isDiosal hawichmam, yaꞌ Abraham, yaꞌ Isaac yebꞌ yaꞌ Jacob, xhi Komam.

6 Yalnipaxo Komam:

—Wal tinanh ayto haqꞌabꞌ yinh istxam hakꞌul, xhi Komam. Yanayto yaꞌ isqꞌabꞌ yinh istxam iskꞌul, haxa yet yilni yaꞌ isqꞌabꞌ, ayxako lepra yinh, sajwakwoxanhe jilni, hakaꞌ chꞌen chew. 7 Yalnipaxo Komam tet yaꞌ:

—Apaxayto haqꞌabꞌ yinh istxam hakꞌul hunelxa, xhi Komam. Yanayto yaꞌ isqꞌabꞌ yinh istxam iskꞌul, haxa yet yilniti yaꞌ isqꞌabꞌ tuꞌ, kꞌulxa ye isqꞌabꞌ yaꞌ hakaꞌxa isnimanil.

8 Yalnipaxo Komam tet yaꞌ:

—Ta mach chisyije ebꞌnaj tzet chawala yebꞌ ta mach chayto ebꞌnaj yul yanma yu huneꞌ bꞌabꞌel kꞌaybꞌalkꞌule chaye tet ebꞌnaj, haxa yu huneꞌ iskabꞌ kꞌaybꞌalkꞌule chayto ebꞌnaj yul yanma. 9 Yajaꞌ ta mach chayto ebꞌnaj yul yanma yu kabꞌebꞌ yechel tiꞌ yebꞌ ta mach chabꞌeto ebꞌnaj tzet chawala, chawihti ha haꞌ yul haꞌ niman Nilo, kat hatxinayo haꞌ sat txꞌotxꞌ, kat ismeltzoko haꞌ chikꞌal sat txꞌotxꞌ, xhi Komam.

10 Istaqꞌwi yaꞌ Moisés tet Komam:

—Ay Mamin, hanintiꞌan mach kꞌulo intzotelan, maxhnhetaj ewi maka tinanh yet chaxhtzotel wettiꞌan, wal xin yettax inchꞌibꞌtijan, hanin hachejabꞌ intiꞌan, hak tuꞌ intzotelan, hanintiꞌan chilekta intiꞌan, xhi yaꞌ.

11 Yajaꞌ xin taqꞌwi Komam tet yaꞌ:

—¿Mak aqꞌnhe istiꞌ naj winaj hawalni? ¿Mak chu yaqꞌni sukbꞌo iskꞌul hunu maka? ¿Mak chu ismajchen istxikin hunu maka? ¿Mak chu yaqꞌni tzꞌopbꞌo sat hunu maka? ¿Mak chu yaqꞌni hajlo sat hunu mak mach chu yilni? ¿Tom maxhtaj hinan, hanin Yahawilintiꞌan? 12 Asiꞌ bꞌay chaxhinchejtotiꞌan, haninan chinokan hawetbꞌihoj yet chaxhtzoteli, kat kach inkuynihan yinh tzet chu hatzoteli, xhi Komam.

13 Istaqꞌwi yaꞌ tet Komam:

—Mamin, estam nan mak chawatoj, xhi yaꞌ.

14 Kaw tit ishowal Komam yinh yaꞌ Moisés yet yalni yaꞌ hakaꞌ tuꞌ, yalni Komam tet yaꞌ:

—Yuxin ay hawuxhta Aarón yaꞌ levita, hawohtaj tato kaw helan yaꞌ istzoteli, yuxin haꞌ yaꞌ chiꞌeloti kaxhischanoj yet chachapni bꞌey Egipto, kaw xin chitzala yaꞌ yet chaxhyilnoj. 15 Tzotelanh tet yaꞌ kat hawalni sunil tzet chawoche, haꞌ yaꞌ xin chalni, hanintiꞌan chinokan yetbꞌiho yaꞌ yebꞌ xin hawetbꞌihoj yet chextzoteli, kat inyenojan yinh tzet wal hewatxꞌeni. 16 Hayet chaxhtzotel tet yaꞌ Aarón tuꞌ, lahan hakaꞌto haninan chintzotelan tet yaꞌ; haxa xin yaꞌ chihalni tet konhobꞌ tzet chawal tet yaꞌ. 17 Ito haqꞌojoch tiꞌ, kaw txꞌiꞌal kꞌaybꞌalkꞌule chaye yu teꞌ, xhi Komam tet yaꞌ.

18 Lahwi tuꞌ, ismeltzo yaꞌ Moisés bꞌey yatut naj Jetro, ismam yixal yaꞌ, yalni yaꞌ tet naj hakaꞌ tiꞌ:

—Wal tinanh chinmeltzohan bꞌey txꞌotxꞌ Egipto, bꞌay ay ebꞌnaj wet konhobꞌan; chintohan wilaꞌan tato aytokꞌo ebꞌnaj bꞌey tuꞌ, xhi yaꞌ. Istaqꞌwi naj Jetro tet yaꞌ:

—Kꞌultikꞌa, asiꞌ yinh tzalahilal, kaw chawil habꞌa, xhi naj. 19 Hayet aytokꞌo yaꞌ Moisés sat txꞌotxꞌ Madián tuꞌ, yalni Komam Dios tet yaꞌ:

—Meltzanhto bꞌey txꞌotxꞌ Egipto, yuto xakam sunil ebꞌnaj choche kaxhispotxꞌoꞌ, xhi Komam tet yaꞌ.

20 Lahwi tuꞌ xin, yok yaꞌ Moisés yinh bꞌel, yinito yaꞌ yixal yebꞌ yuninal, yanahto yaꞌ yuninal tuꞌ yibꞌanh noꞌ burro; yinipaxto yaꞌ isqꞌojoch, teꞌ yal Komam ta chiyito yaꞌ. 21 Yalnipaxo Komam tet yaꞌ:

—Hayet chachapni bꞌey Egipto tuꞌ, kaw chawako yinh hanabꞌal hawatxꞌen sunil kꞌaybꞌalkꞌule sata naj faraón, hunteqꞌan kꞌaybꞌalkꞌule xawaqꞌan tawet. Yajaꞌ xin chiwaqꞌ kawbꞌolojan yanma naj faraón tuꞌ, hak tuꞌ xin mach chischabꞌato naj anma Israel tuꞌ. 22 Chawalni xin tet naj faraón tuꞌ hakaꞌ tiꞌ: “Hak tiꞌ chiyute yalni Komam Dios: Haꞌ Israel tiꞌ, hakaꞌ inbꞌabꞌel inkꞌaholan yehi. 23 Kaw halbꞌilxa tawet wuhan tato chachato inkꞌaholtiꞌan yu isto yanoko inmayan, yajaꞌ xin maxhtikꞌa chachatoj, yuxin chinpotxꞌkamojan habꞌabꞌel kꞌahol,” kachi, xhi Komam.

24 Yet ayko yaꞌ Moisés yinh isbꞌel, yapni Komam Dios iskꞌatanh yaꞌ bꞌay kankano yaꞌ yinh huneꞌ aqꞌbꞌal yebꞌ yixal yebꞌ yuninal wayoj, yoche Komam ispotxꞌoꞌkamo yaꞌ. 25 Yinikanh ix Séfora huneꞌ chꞌen cuchillo, ishosnilto ix istzꞌumal iswiꞌ isnimanil yunin, isqꞌojnayo ix yich yoj yaꞌ Moisés, yalni ix tet yaꞌ:

—Yinh kaw yeli, yu wichamilan hach, yuxin haꞌ hun hinan tawinta yinh chikꞌ chimalto tiꞌ, xhi ix.

26 Hak tuꞌ xin yu ischahnito Komam yaꞌ Moisés tuꞌ. Yalni ix Séfora: «málomto chikꞌ yaꞌ Moisés», yu circuncisión.

27 Yalni xin Komam Dios tet yaꞌ Aarón hakaꞌ tiꞌ:

—As chawal yinh yaꞌ Moisés bꞌey txꞌotxꞌ desierto, xhi Komam. Isto yaꞌ Aarón chawal yinh yaꞌ Moisés, haꞌ bꞌey huneꞌ witz yet Komam, haꞌ tuꞌ apni yaꞌ chawal, istzꞌohni yaꞌ isqꞌotx yaꞌ. 28 Yok yaꞌ Moisés yalno tet yaꞌ Aarón yinh sunil tzet yal Komam Dios tet yaꞌ ta chal yaꞌ tet yaꞌ Aarón, yebꞌ yinh sunil kꞌaybꞌalkꞌule ischej Komam iswatxꞌeꞌ yaꞌ. 29 Lahwi tuꞌ, isto yaꞌ Moisés yebꞌ yaꞌ Aarón, iskutxbꞌaniko ebꞌyaꞌ sunil ebꞌnaj ichamta winaj xol ebꞌnaj Israel. 30 Yok yaꞌ Aarón yalno tet anma yinh sunil tzet yal Komam Dios tet yaꞌ Moisés. Iswatxꞌenpaxo yaꞌ kꞌaybꞌalkꞌule yinh sat anma, hunteqꞌan isye Komam tet yaꞌ Moisés.

31 Hak tuꞌ xin yu yanayto anma Israel yul yanma yinh tzet yal ebꞌyaꞌ, yabꞌen anma tato ayko isnabꞌal Komam Dios yinh yebꞌ tato xayil Komam Dios sunil isyaꞌtajil chaqꞌle anma.