—Mam rey, haꞌ Komam Dios koDiosalanh hanhonh Israel honhtiꞌanh, haꞌ chihalni hakaꞌ tiꞌ: “Chato inkonhobꞌtiꞌan yunhe yekꞌtzen qꞌinh wetan, yu yaniko inmayan sat txꞌotxꞌ desierto,” xhi Komam, xhi ebꞌyaꞌ.

2 Istaqꞌwi naj rey faraón tuꞌ:

—¿Mak anmahil heDiosal tuꞌ, yuxin chiwabꞌehan tzet chala, kat kexinbꞌejtzontojan, hex Israel hex tiꞌ? Mach wohtajojan mak cheyal heDiosalo tuꞌ, yebꞌ xin mach chexinchatojan, xhi naj.

3 Yalnipaxo ebꞌyaꞌ tet naj rey tuꞌ hunelxa:

—Haꞌ Komam Dios, koDiosalanh hanhonh Israel honhtiꞌanh isye isbꞌa jetanh, yuxin tinanh oxebꞌ tzꞌayik chonhokanh yinh bꞌel sat txꞌotxꞌ desierto tuꞌ. Haꞌ bꞌey tuꞌ chijaqꞌaꞌkojanh koxahanbꞌalanh tet Komam Dios, koDiosalanh, yuto ta mach chonhtohanh, kꞌuxantaxka chonhkamanh yu hunu isyaꞌtajil maka hunu howal yu Komam, xhi ebꞌyaꞌ.

4 Istaqꞌwi naj rey Egipto tuꞌ tet ebꞌyaꞌ:

—Hach Moisés yebꞌ hach Aarón tiꞌ, ¿tzet yinh yuxin chelinhbꞌa heyet konhobꞌ tiꞌ yinh ismunil? As munlahanhwej, xhi naj.

5 Yalnipaxo naj faraón tuꞌ:

—Kaw hantanhekano heyet konhobꞌ Israel ay sat txꞌotxꞌ Egipto tiꞌ. ¿Tzet yinh xin chelinhbꞌa yinh ismunil? xhi naj rey tuꞌ.

6 Haꞌtikꞌa yinh huneꞌ tzꞌayik tuꞌ, yaqꞌ naj faraón chejbꞌanile tet ebꞌnaj yahawil yinh munil yebꞌ ebꞌnaj chiꞌilni munil, yalni naj tet ebꞌnaj:

7 —Wal tinanh matxa cheyaqꞌ teꞌ chꞌim tet ebꞌnaj Israel chiꞌok xol txꞌotxꞌ lokꞌ, wal xin tojabꞌ ebꞌnaj issayaꞌ ischꞌim. 8 Yajaꞌ xin, huneꞌnhetikꞌa haꞌ isbꞌisil txꞌotxꞌ lokꞌ tuꞌ chiswatxꞌe ebꞌnaj, hakaꞌ yet cheyaqꞌni teꞌ chꞌim tet ebꞌnaj. Kaw tzꞌajanojabꞌ chiswatxꞌe ebꞌnaj txꞌotxꞌ; machojabꞌ hunu txꞌotxꞌ chikꞌaywahi, yuto isah hunteqꞌan ebꞌnaj tiꞌ, yuxin chal ebꞌnaj ta chito ebꞌnaj yaqꞌaꞌ xahanbꞌal tet isDiosal. 9 Aweko yaqꞌbꞌil munil yibꞌanh ebꞌnaj, ayojabꞌnhetikꞌa tzet chu ebꞌnaj heyu, haxinwal mach chabꞌeto ebꞌnaj hunteqꞌan leqꞌtiꞌal chihal-lax tet tuꞌ, xhi naj.

10 Hayet yabꞌen ebꞌnaj yahawil yinh munil yebꞌ ebꞌnaj chiꞌilni munil huneꞌ tuꞌ, isto ebꞌnaj tzotelo tet ebꞌnaj Israel, yalni ebꞌnaj hakaꞌ tiꞌ:

—Mayal naj rey faraón jetanh tato matxa chijaqꞌanh hechꞌim cheyako xol txꞌotxꞌ lokꞌ tiꞌ. 11 Wal xin hexxa chexto hesayaꞌ hechꞌim, yajaꞌ xin huneꞌnhetikꞌa haꞌ isbꞌisil txꞌotxꞌ chewatxꞌe, machi ayti isbꞌisil txꞌotxꞌ, xhi ebꞌnaj.

12 Hak tuꞌ xin, yu isto ebꞌnaj Israel sunil sat txꞌotxꞌ Egipto; issayni ebꞌnaj yoj ixim trigo selelo teꞌ chꞌim. 13,14 Wal ebꞌnaj yahawil yinh munil, hunu tzꞌayik isqꞌanni ebꞌnaj ta lahan isbꞌisil txꞌotxꞌ lokꞌ chiswatxꞌe ebꞌnaj Israel tuꞌ hakaꞌtikꞌa yet chiꞌaqꞌlax ischꞌim ebꞌnaj; chismaqꞌnipaxo ebꞌnaj ebꞌnaj Israel ayko yahawilo xol ebꞌnaj tuꞌ, chalni ebꞌnaj tet ebꞌnaj:

—¿Tzet yinh yuxin mach lahano isbꞌisil txꞌotxꞌ hewatxꞌe yet ewi yebꞌ tinanh, hakaꞌ txꞌotxꞌ chitikꞌa hewatxꞌe yet yalanhtokanoj? xhi ebꞌnaj.

15 Hayet yabꞌen ebꞌnaj yahawil xol ebꞌnaj Israel huneꞌ tuꞌ, isto ebꞌnaj tzotelo tet naj rey faraón, yalni ebꞌnaj tet naj hakaꞌ tiꞌ:

—Mam rey, ¿tzet yinh yuxin chonhhawetahanh hanhonh hachejabꞌ honhtiꞌanh? 16 Matxa cheyaqꞌ kochꞌimanh, kat xin heqꞌannipaxoj ta lahannhetikꞌa isbꞌisil txꞌotxꞌ lokꞌ chikowatxꞌehanh hunun tzꞌayik, kat komaqꞌlaxpaxojanh; haꞌ xin hawet konhobꞌ ay ismul yinh tzet chijaqꞌletiꞌanh, xhi ebꞌnaj.

17 Istaqꞌwi naj rey tet ebꞌnaj:

—¡Isahil chexuten hex tiꞌ! Yuxin cheyala ta chexto heyaqꞌaꞌ hexahanbꞌal tet heDiosal tuꞌ. 18 Wal xin asiꞌwe munil, matxa chiꞌaqꞌlax teꞌ chꞌim teyet, yajaꞌ xin huneꞌnhetikꞌa haꞌ isbꞌisil txꞌotxꞌ lokꞌ tuꞌ chewatxꞌe hunun tzꞌayik, xhi naj.

19 Ebꞌnaj yahawil yinh munil xol ebꞌnaj Israel, kaw yaꞌ yuko yinh yanma ebꞌnaj, yet yalni naj rey ta mach chꞌayti isbꞌisil txꞌotxꞌ lokꞌ chiswatxꞌe ebꞌnaj yinh hunun tzꞌayik. 20 Hayet yelti ebꞌnaj yinh sat naj rey faraón ischanayo isbꞌa ebꞌnaj yebꞌ yaꞌ Moisés yebꞌ yaꞌ Aarón, yuto echmabꞌilxa yelti ebꞌnaj tuꞌ yu ebꞌyaꞌ iskawanhil. 21 Yalni ebꞌnaj yahawil yinh ebꞌnaj Israel tuꞌ tet ebꞌyaꞌ:

—Haꞌ Komam Dios chiꞌilni tzet chonheyute tiꞌanh, kat yanayo isyaꞌtajil teyibꞌanh, yuto heyu yuxin matit ishowal naj rey faraón jinhanh, yebꞌpaxo ebꞌnaj chimunla yinta naj rey tuꞌ. Hexkawex maxeyako chꞌen espada yul isqꞌabꞌ ebꞌnaj yunhe konhispotxꞌnihanh ebꞌnaj, xhi ebꞌnaj tet yaꞌ Moisés yebꞌ tet yaꞌ Aarón.

22 Hayet yabꞌen yaꞌ Moisés yalni ebꞌnaj hakaꞌ tuꞌ, istxahli yaꞌ tet Komam Dios, yalni yaꞌ yinh istxah:

—Mamin, ¿tzet yinh yuxin kaw chawayo isyaꞌtajil jibꞌanhanh, hanhonh konhhakonhobꞌonh tiꞌanh? ¿Tzet yinh yuxin kinhachejtijan tet naj rey faraón tiꞌ? 23 Hataxtikꞌa intzotelan tet naj yinh habꞌi, islahniko naj yanayo isyaꞌtajil jibꞌanhanh hanhonh konhhakonhobꞌ honhtiꞌanh, mach xin chonhhakolilojanh tet naj, xhi yaꞌ Moisés yinh istxah.