—Wal tinanh, chawilaꞌ tzet chꞌeliko naj faraón wuhan, yuto hato yet chiwanayojan isyaꞌtajil yibꞌanh naj, kat kexischanolo naj sat txꞌotxꞌ Egipto tiꞌ. Haꞌ kaw naj chihalni ta chexel sat txꞌotxꞌ Egipto tiꞌ, xhi Komam.

2 Istzotelpaxo Komam Dios tet yaꞌ Moisés hunelxa, yalni Komam:

—Hanintiꞌan, Yahawil hinan. 3 Inye hinbꞌahan tet heyichmam, Abraham, Isaac yebꞌ tet yaꞌ Jacob, walan inbꞌihan tet ebꞌyaꞌ tato hanintiꞌan Dios kaw aykano yip; yajaꞌ xin mach walan tato Yahawil inbꞌihan tet ebꞌyaꞌ. 4 Yebꞌ xin walkanojan yinh istꞌinhanil tet ebꞌyaꞌ, walnihan ta chiwaqꞌan txꞌotxꞌ Canaán, txꞌotxꞌ bꞌay ekꞌ ebꞌyaꞌ hakaꞌ nan konhobꞌal yinh hayebꞌ tiempohal. 5 Yajaꞌ wal tinanh, chiwilan ta kaw chiꞌetalax ebꞌnaj Israel tiꞌ, kat ischejlaxpaxiko ebꞌnaj yinh munil kaw yaꞌtaj yu ebꞌnaj Egipto, yuxin mannatijan tzet tꞌinhbꞌabꞌilkano wuhan tet ebꞌnaj. 6 Yuxin as hal tet ebꞌnaj Israel tuꞌ hakaꞌ tiꞌ: “Hanin Yahawilintiꞌan, Haninan chexwiltijan yalanh isyaꞌtajil munil chꞌaqꞌlax teyet bꞌey txꞌotxꞌ Egipto tiꞌ; kat kexinkolnilojan yalanh yip ebꞌnaj. Chexinkolilojan yu wipan yebꞌ yu nimeta kꞌaybꞌalkꞌule. 7 Kat kexwanikojan inkonhobꞌojan, kat wokan heDiosaloj kat heyohtanheniloj ta haninan heYahawil, yebꞌ haninan heDiosal kexinilo yalanh yalil isyaꞌtajil munil bꞌey txꞌotxꞌ Egipto. 8 Kat kexwinitojan sat txꞌotxꞌ waltehan yet wanikanh inqꞌabꞌan, walnihan ta chiwaqꞌan tet yaꞌ Abraham, yaꞌ Isaac yebꞌ tet yaꞌ Jacob, chiwaqꞌan txꞌotxꞌ oko heyu. Hanin Yahawintiꞌan, chiwalan huneꞌ tiꞌ,” kachi, xhi Komam tet yaꞌ Moisés.

9 Yalni yaꞌ Moisés sunil hunteqꞌan tiꞌ tet ebꞌnaj Israel, yajaꞌ xin mach yabꞌeto ebꞌnaj tzet yal yaꞌ Moisés tuꞌ, yuto kaw bꞌiskꞌulal ye ebꞌnaj yu isyaꞌtajil chiyaqꞌle ebꞌnaj. 10 Yuxin yalpaxo Komam tet yaꞌ Moisés: 11 —As hal tet naj faraón tuꞌ ta chisje naj chiꞌel ebꞌnaj Israel sat txꞌotxꞌ Egipto, xhi Komam.

12 Yajaꞌ xin taqꞌwi yaꞌ Moisés tet Komam:

—Mamin, mach chabꞌeto ebꞌnaj wet Israelan tzet chiwalan, hajxam xin naj faraón tuꞌ, yuto hanintiꞌan, mach helano hinan intzotelan, xhi yaꞌ. 13 Ischejni Komam Dios yaꞌ Moisés yebꞌ yaꞌ Aarón yalaꞌ tet ebꞌnaj Israel yebꞌ tet naj faraón tato yilal yinilo ebꞌyaꞌ ebꞌnaj Israel sat txꞌotxꞌ Egipto.

14 Hak tiꞌ isbꞌi ebꞌnaj mame yinh hunun majan anma titna yinh yuninal yaꞌ Israel.

Yaꞌ Rubén, bꞌabꞌel iskꞌahol yaꞌ Israel. Haꞌ xin ebꞌnaj tiꞌ iskꞌahol yaꞌ Rubén tuꞌ: Naj Hanoc, naj Falú, naj Hezrón yebꞌ naj Carmi, haꞌ ebꞌnaj tuꞌ iskꞌahol yaꞌ Rubén.

15 Haꞌ ebꞌnaj tiꞌ, iskꞌahol yaꞌ Simeón: Naj Jemuel, naj Jamín, naj Ohad, naj Jaquín, naj Zohar yebꞌ naj Saúl; naj Saúl tuꞌ yunin huneꞌ ix ah cananea ye naj. Haꞌ ebꞌnaj tuꞌ iskꞌahol yaꞌ Simeón.

16 Haꞌ ebꞌnaj tiꞌ iskꞌahol yaꞌ Leví, chiꞌichiko yinh naj bꞌabꞌel masanta yinh naj islahobꞌal: yaꞌ Gersón, naj Coat yebꞌ naj Merari. Yaꞌ Leví tuꞌ, 137 habꞌil ekꞌ yaꞌ sat yibꞌanhqꞌinal tiꞌ. 17 Haxa ebꞌnaj iskꞌahol yaꞌ Gersón, hak tiꞌ isbꞌi ebꞌnaj yinh istxolal: naj Libni yebꞌ naj Simei.

18 Naj Coat, 133 habꞌil ekꞌ naj sat yibꞌanhqꞌinal tiꞌ. Isbꞌi ebꞌnaj iskꞌahol naj xin, haꞌ ton naj Amram, naj Izhar, naj Hebrón, yebꞌ naj Uziel. 19 Haxa ebꞌnaj iskꞌahol naj Merari, hak tiꞌ isbꞌi ebꞌnaj hakaꞌ tiꞌ: naj Mahli yebꞌ naj Musi. Hak tuꞌ yu ispohcha yuninal yaꞌ Leví.

20 Naj Amram, yiqꞌkanh naj yanabꞌ ismam, haꞌ ton ix Jocabed, ispitzkꞌa kawanh yunin ix yebꞌ naj, haꞌ ton yaꞌ Aarón yebꞌ yaꞌ Moisés. Wal naj Amram tuꞌ, 137 habꞌil ekꞌ naj sat yibꞌanhqꞌinal tiꞌ.

21 Haxa ebꞌnaj yuninal naj Izhar, haꞌ ton ebꞌnaj tiꞌ: naj Coré, naj Nefeg yebꞌ naj Zicri.

22 Haxa ebꞌnaj iskꞌahol naj Uziel, haꞌ ton ebꞌnaj tiꞌ: naj Misael, naj Elzafán yebꞌ naj Sitri.

23 Yaꞌ Aarón, yiqꞌ yaꞌ ix Elisabet, iskutzꞌin naj Aminadab. Ix Elisabet tuꞌ, yanabꞌ naj Naasón ye ix. Haꞌ xin iskꞌahol yaꞌ Aarón pitzkꞌa yebꞌ ix Elisabet, haꞌ ton naj Nadab, naj Abiú, yaꞌ Eleazar yebꞌ naj Itamar.

24 Haxa ebꞌnaj iskꞌahol naj Coré, haꞌ ton ebꞌnaj tiꞌ: naj Asir, naj Elcana yebꞌ naj Abiasaf. Haꞌ ton ebꞌnaj tiꞌ mame yinh ebꞌnaj Coreíta.

25 Yaꞌ Eleazar, iskꞌahol yaꞌ Aarón, yiqꞌ yaꞌ huneꞌ iskutzꞌin naj Futiel. Ispitzkꞌa huneꞌ iskꞌahol yaꞌ Eleazar yebꞌ yixal tuꞌ, haꞌ ton naj Finees. Hak tiꞌ isbꞌi hunun majan ebꞌnaj mame yebꞌ yuninal titna yinh yaꞌ Leví. 26 Yaꞌ Aarón yebꞌ yaꞌ Moisés chibꞌina bꞌey tiꞌ, haꞌ ebꞌyaꞌ yal Komam Dios ta chiyilo ebꞌyaꞌ ebꞌnaj Israel sat txꞌotxꞌ Egipto yinh istxolal. 27 Haꞌtikꞌa xin yaꞌ Moisés yebꞌ yaꞌ Aarón tiꞌ tzotel tet naj faraón bꞌey txꞌotxꞌ Egipto, yu yinilo ebꞌyaꞌ konhobꞌ Israel sat txꞌotxꞌ Egipto.

28 Hayet istzꞌayikal yet istzotel Komam Dios tet yaꞌ Moisés bꞌey txꞌotxꞌ Egipto, 29 yalni Komam tet yaꞌ hakaꞌ tiꞌ:

—Hanintiꞌan Yahaw hinan, hal tet naj faraón isreyal Egipto sunil tzet chiwalan tawet tiꞌ, xhi Komam.

30 Yajaꞌ xin taqꞌwi yaꞌ Moisés tet Komam:

—Mamin, hanintiꞌan, mach kꞌulo intzotelan, yuxin mach chabꞌeto naj rey tzet chiwal tuꞌan, xhi yaꞌ.