—Matzet chal hakꞌul, hach chachok inselelojan sata naj rey tuꞌ, haꞌ xin hawuxhta Aarón chitzotel haseleloj. 2 Hach chawal sunil tzet xawalan tawet tet yaꞌ Aarón, haxa xin yaꞌ chitzotel tet naj faraón yu isjeni naj yel ebꞌnaj Israel sat txꞌotxꞌ Egipto tuꞌ. 3 Yajaꞌ xin hankawinan chiwaqꞌ kawbꞌolojan yanma naj rey Egipto tuꞌ yunhe mach chexischalo naj, kat inyenihan nimeta kꞌaybꞌalkꞌule yebꞌ txꞌiꞌal yechel chinyehan bꞌey Egipto. 4 Maxhtikꞌa chabꞌeto naj faraón tzet cheyalaꞌ, yuxin chinye wipan bꞌey tuꞌ, kat xin inyenojan txꞌiꞌal nimeta isyaꞌtajil, chinyenilojan ta istoholal chinwatxꞌehan. Hak tuꞌ chu winilojan inkonhobꞌ Israelan sat txꞌotxꞌ Egipto. 5 Hayet chiwinilojan ebꞌnaj Israel sat txꞌotxꞌ Egipto katto yohtanhenilo anma ah Egipto tuꞌ ta Yahaw hinan, xhi Komam.

6 Isyijen yaꞌ Moisés yebꞌ yaꞌ Aarón sunil tzet yalkano Komam tuꞌ. 7 Hayet istzotel ebꞌyaꞌ tet naj faraón, 80 (kanhwinaj) habꞌil yaꞌ Moisés, wal yaꞌ Aarón xin 83 (oxebꞌ ishokꞌal) yaꞌ.

8 Yalni Komam Dios tet yaꞌ Moisés yebꞌ tet yaꞌ Aarón hakaꞌ tiꞌ:

9 —Ta chisqꞌan naj faraón hunu kꞌaybꞌalkꞌule teyet, chawal tet yaꞌ Aarón ta chikanh yaꞌ isqꞌojoch, kat isqꞌojnayo yaꞌ teꞌ sat txꞌotxꞌ sata naj faraón tuꞌ, kat ismeltzoko teꞌ labꞌahil, xhi Komam.

10 Isto yaꞌ Moisés yebꞌ yaꞌ Aarón tzotelo tet naj faraón, isyijen ebꞌyaꞌ sunil tzet yal Komam tet ebꞌyaꞌ. Hayet isqꞌojnayo yaꞌ Aarón isqꞌojoch sata naj rey yebꞌ ebꞌnaj ischejabꞌ, ismeltzoko teꞌ labꞌahil. 11 Hayet yilni naj faraón huneꞌ tuꞌ, yawten naj ebꞌnaj eslom yebꞌ ebꞌnaj nawal ay bꞌey Egipto tuꞌ, haktikꞌapax tuꞌ yute ebꞌnaj yu yip naj matzwalil. 12 Isqꞌojpaxayo ebꞌnaj isqꞌojoch sat txꞌotxꞌ, ismeltzopaxiko isqꞌojoch ebꞌnaj tuꞌ labꞌahil; yaj xin bꞌiqꞌlaxayto isqꞌojoch ebꞌnaj ok labꞌahil yu isqꞌojoch yaꞌ Aarón. 13 Waxanhka yil naj faraón huneꞌ tuꞌ yaj mach yabꞌeto naj hakaꞌ yu yalni Komam Dios, wal xin ip iskawbꞌilo yanma naj.

14 Lahwi tuꞌ, yalni Komam Dios tet yaꞌ Moisés:

—Wal naj faraón tiꞌ, kaw ip iskawbꞌilo yanma naj yebꞌ xin mach isje naj kexischabꞌalo sat txꞌotxꞌ Egipto. 15 Yuxin yet hekal, yet sahabꞌ, chachto hawilaꞌ naj yet chiꞌayapno naj istiꞌ haꞌ niman. Haꞌ bꞌey istiꞌ haꞌ tuꞌ chawechma naj, kat hawinito haqꞌojoch meltzoko labꞌahil, 16 kat xin hawalni tet naj hakaꞌ tiꞌ: “Haꞌ Komam Dios, koDiosalanh hanhonh Israel honhtiꞌanh makinchejnitijan walaꞌan tawet tato chachato konhobꞌ Israel yu yaniko ismay Komam bꞌey txꞌotxꞌ desierto, yajaꞌ xin maxhtikꞌa chawabꞌe tzet chal Komam. 17 Yuxin chiyal Komam hakaꞌ tiꞌ: Wal tinanh, chawohtanheloj ta hanintiꞌan Yahaw hinan, hayet chiwanaytojan iswiꞌ inqꞌojochan iqꞌbꞌil wuhtiꞌan xol ha haꞌ, kat ismeltzoko haꞌ chikꞌal. 18 Kat iskamilo sunil ej noꞌ kay ay xol haꞌ, kat xin yeh sam haꞌ, hak tuꞌ xin matxa chu yukꞌni ebꞌnaj ah Egipto tiꞌ haꞌ,” kachi tet naj, xhi Komam tet yaꞌ Moisés.

19 Yalnipaxo Komam tet yaꞌ Moisés:

—Hal tet yaꞌ Aarón chismaqꞌayo yaꞌ isqꞌojoch yibꞌanh haꞌ nime haꞌ, haꞌ nixhte isnuqꞌ haꞌ, yebꞌ haꞌ nime haꞌ panhan, yebꞌ haꞌ etxan yulaj netbꞌal ay sat txꞌotxꞌ Egipto. Hak tuꞌ chu ismeltzoko sunil ha haꞌ chikꞌal, haꞌ ayayto yul chꞌen vaso yebꞌ haꞌ ayayto yu teꞌ hukubꞌ, xhi Komam.

20 Hakaꞌ yu yalni Komam tet yaꞌ Moisés yebꞌ tet yaꞌ Aarón tuꞌ, hak tuꞌ yute ebꞌyaꞌ; yikanh yaꞌ Aarón isqꞌojoch, ismaqꞌnayo yaꞌ yibꞌanh haꞌ yinh sat naj faraón yebꞌ yinh sat ebꞌnaj chimunla yintaj yul palacio, yinhnhena tuꞌ, ismeltzoko sunil ha haꞌ chikꞌal. 21 Hak tuꞌ yu iskamilo sunil noꞌ kay ay xol haꞌ, ispohkanh sam haꞌ xin, yuxin matxa yu yukꞌlax haꞌ yu anma ah Egipto. Sunil ha haꞌ ay bꞌey Egipto tuꞌ, meltzoko haꞌ chikꞌal.

22 Haktikꞌapax tuꞌ xin yute ebꞌnaj eslom yu yip naj matzwalil, yuxin kaw hipbꞌilo yanma naj rey faraón; hak tuꞌ xin mach yabꞌeto naj tzet yal yaꞌ Moisés yebꞌ yaꞌ Aarón, hakaꞌtikꞌa yu yal-lax tet ebꞌyaꞌ yu Komam. 23 Lahwi tuꞌ xin; ismeltzo naj rey faraón yul palacio; mach xin yako naj huneꞌ tuꞌ yinh iskꞌul. 24 Wal sunil ebꞌnaj ah Egipto; ok ebꞌnaj isholo kꞌuh istiꞌ haꞌ niman haꞌ chꞌekꞌ yul konhobꞌ tuꞌ, yunhe yilcha ha haꞌ saj yu ebꞌnaj; yuto haꞌ niman haꞌ tuꞌ, mach chu yukꞌlax haꞌ.^a

25 Hujebꞌxa tzꞌayik yaniko Komam ha haꞌ chikꞌal.^b