—Moisés, asiꞌ sata naj rey faraón, kat hawalni tet naj hakaꞌ tiꞌ: “Hak tiꞌ chute yalni Komam tawet: ‘Chato inkonhobꞌan yu isto yanoko inmayan. 2 Yuto ta mach chachato ebꞌnaj, chiwayojan isyaꞌtajil tawibꞌanh, kat ispohchakanh noꞌ pahtzaꞌ sat sunil hatxꞌotxꞌ tiꞌ. 3 Haꞌ xol haꞌ niman chipitzkꞌa yunin noꞌ pahtzaꞌ, kat yahti noꞌ, kat yapni noꞌ yul hapalacio yebꞌ bꞌay chachwayi, kat yapni noꞌ yul yatut ebꞌnaj chimunla tawintaj, yebꞌ yul yatut sunil anma ah Egipto tiꞌ; kat yapnipaxo noꞌ bꞌay chisomlax ixim pan yebꞌ yul horno. 4 Noꞌ pahtzaꞌ tuꞌ, chiꞌekꞌ tꞌujla noꞌ tawibꞌanh, yebꞌ yibꞌanh ebꞌnaj chimunla yul palacio, yebꞌ yibꞌanh hawet konhobꞌ,’” kachi tet naj, xhi tet yaꞌ Moisés yu yalni yaꞌ tet naj Faraón.

5 Yalnipaxo Komam tet yaꞌ Moisés:

—Hal tet yaꞌ Aarón: “Ismaqꞌabꞌayo yaꞌ isqꞌojoch yibꞌanh haꞌ nime haꞌ, yebꞌ haꞌ nixhte haꞌ, yebꞌ haꞌ nime haꞌ panhan, yunhe ispohchakanh noꞌ pahtzaꞌ xol haꞌ, kat yahti noꞌ, kat isto noꞌ, kat ispohkanokan noꞌ sunil sat txꞌotxꞌ Egipto tiꞌ,” kachi, xhi Komam.

6 Hayet ismaqꞌnayo yaꞌ Aarón isqꞌojoch yibꞌanh ha haꞌ bꞌey Egipto tuꞌ ispohchakanh noꞌ pahtzaꞌ xol haꞌ, yahti noꞌ xol haꞌ, isnohilo sunil sat txꞌotxꞌ Egipto yu noꞌ. 7 Yajaꞌ xin haktikꞌapax tuꞌ yute ebꞌnaj eslom, hulpaxo noꞌ pahtzaꞌ tuꞌ yu ebꞌnaj sat txꞌotxꞌ Egipto, yu yip naj matzwalil. 8 Lahwi tuꞌ yawten naj faraón yaꞌ Moisés yebꞌ yaꞌ Aarón, yalni naj tet ebꞌyaꞌ:

—Txahlanhwe tet heYahawil, hak tuꞌ xin chishekꞌilo isbꞌa noꞌ pahtzaꞌ winhan yebꞌ yul inkonhobꞌan, kat kexinchanitojan yebꞌ hekonhobꞌ, yu heyaniko hexahanbꞌal tet heDiosal, xhi naj tet ebꞌyaꞌ.

9 Istaqꞌwi yaꞌ Moisés tet naj faraón:

—Hala bꞌaqꞌinh chintxahlihan tawinh yebꞌ yinh ebꞌnaj chimunla tawintaj yebꞌ yinh hawet konhobꞌ, yunhe yinilo Komam noꞌ pahtzaꞌ texol yebꞌ yul heyatut; haꞌojabꞌnhe xin xol ha haꞌ chikankano noꞌ, xhi yaꞌ Moisés tet naj faraón.

10 Istaqꞌwi naj faraón tet naj:

—Yet hekal, xhi naj rey tuꞌ. Istaqꞌwi yaꞌ Moisés:

—Hakojabꞌ tuꞌ chꞌelikoj, yunhe hawohtanheniloj tato machi hunuxa mak hakaꞌ koDiosalanh. 11 Chiꞌelo noꞌ yul hawatut, hanhe xin xol ha haꞌ chikankano noꞌ, matxa chaxhyeta noꞌ yebꞌ ebꞌnaj chimunla tawintaj yebꞌ xin hawet konhobꞌ, xhi yaꞌ Moisés.

12 Lahwi tuꞌ, yelti yaꞌ Moisés yebꞌ yaꞌ Aarón yinh sat naj rey faraón. Istxahli yaꞌ Moisés tet Komam Dios ta chiyilo Komam noꞌ pahtzaꞌ, noꞌ yati Komam yibꞌanh naj faraón yebꞌ yibꞌanh ebꞌnaj Egipto. 13 Haꞌ tzet isqꞌan yaꞌ Moisés yinh istxah tuꞌ, isyije Komam, iskamilo sunil noꞌ pahtzaꞌ ay yulaj nha, noꞌ chꞌekꞌ istiꞌ nha, yebꞌ noꞌ ay xolaj telaj. 14 Hak tuꞌ yu iskutxbꞌankanh anma noꞌ, istenbꞌalaxkanh noꞌ, kaw xin samxanhe noꞌ chꞌekꞌ bꞌayejtuꞌwal. 15 Yajaꞌ haxa yet yilni naj faraón ta matxa isyaꞌtajil ayayo yibꞌanh, iskawbꞌipaxilo yanma naj, matxa xin yako naj yinh iskꞌul yinh tzet chal yaꞌ Moisés yebꞌ yaꞌ Aarón; hakaꞌtikꞌa yu yalni Komam.

16 Lahwi tuꞌ, yalnipaxo Komam Dios tet yaꞌ Moisés:

—Hal tet yaꞌ Aarón, ismaqꞌabꞌayo yaꞌ isqꞌojoch yibꞌanh pojoj ay sat txꞌo txꞌotxꞌ, yunhe ismeltzoko pojoj tuꞌ ukꞌal sunil sat txꞌotxꞌ Egipto tiꞌ, xhi Komam.

17 Isyijen ebꞌyaꞌ hakaꞌ yalni Komam tuꞌ. Ismaqꞌnayo yaꞌ Aarón isqꞌojoch yibꞌanh pojoj ay sat txꞌotxꞌ Egipto; yinhnhena tuꞌ ismeltzoko pojoj ay sat txꞌotxꞌ Egipto ukꞌal. Yaqꞌni ekꞌoyaꞌ noꞌ ukꞌ tuꞌ anma sunil yebꞌ sunil ej no noqꞌ. 18 Yaqꞌlenpaxo ebꞌnaj eslom yaniko pojoj tuꞌ ukꞌal, yajaꞌ mach chiyu yu ebꞌnaj. Kaw aqꞌlax ekꞌoyaꞌ anma yebꞌ ej no noqꞌ yu noꞌ ukꞌ tuꞌ.

19 Hayet yilni ebꞌnaj eslom huneꞌ tuꞌ, yalni ebꞌnaj tet naj rey faraón:

—Haꞌ huneꞌ isyaꞌtajil chijil tiꞌ, haꞌ Komam Dios chiꞌanayo jibꞌanh, xhi ebꞌnaj. Yajaꞌ wal naj faraón tuꞌ, kaw hipbꞌilo yanma naj, yuxin mach yabꞌeto naj huneꞌ tuꞌ, hakaꞌtikꞌa yu yalni Komam.

20 Yalnipaxo Komam tet yaꞌ Moisés:

—Moisés, yet hekal yinh sahabꞌ chaxhto hawilaꞌ naj faraón, yet chiꞌayapno naj istiꞌ ha haꞌ, kat hawalni tet naj hakaꞌ tiꞌ: “Hak tiꞌ chute yalni Komam Dios, koDiosalanh, chato inkonhobꞌan yu yaniko inmayan. 21 Yuto ta mach chachato inkonhobꞌtuꞌan, chiwatijan noꞌ us tawibꞌanh yebꞌ ebꞌnaj chimunla tawintaj yebꞌ yibꞌanh hawet konhobꞌ; kat ishanhchahokto noꞌ yul hawatut, yebꞌ yul yatut hawet konhobꞌ Egipto, yebꞌ xin, xanhe chihanhcha noꞌ sat txꞌotxꞌ. 22 Yajaꞌ yet chiyuni huneꞌ tuꞌ, machi hunu noꞌ us tuꞌ chiꞌapni bꞌey txꞌotxꞌ Gosén bꞌay ay inkonhobꞌan. Hak tuꞌ chu hawohtanheniloj, tato haninan Yahawilintiꞌan, ayinayojan sat txꞌotxꞌ Egipto tiꞌ. 23 Haꞌ huneꞌ isyaꞌtajil tiꞌ, mach chiꞌapni yinh inkonhobꞌan, hak tuꞌ chu hawohtanheniloj ta kaw ay yelapno inkonhobꞌtuꞌan yul insatan sata hakonhobꞌ. Huneꞌ tuꞌ, hekal chiyij isbꞌa,” kachi, xhi Komam tet yaꞌ Moisés.

24 Hakaꞌtikꞌa yu yalni Komam tuꞌ, hak tuꞌ elikoj. Ishanhchakanh noꞌ us chichiwahi, hakaꞌxanhe yekꞌ nhubꞌ, hak tuꞌ isqꞌejholi yekꞌ noꞌ yul ispalacio naj faraón yebꞌ yul yatut ebꞌnaj chimunla yinta naj, yebꞌ yibꞌanh sunil konhobꞌ Egipto. Sunil tzet ay bꞌey Egipto tuꞌ, yetakanto noꞌ us.

25 Yalni naj faraón ta chiꞌawtelax yaꞌ Moisés yebꞌ yaꞌ Aarón, yalni naj tet ebꞌyaꞌ:

—Asiꞌwe heyaqꞌaꞌ hexahanbꞌal tet heDiosal tuꞌ, yajaꞌ mach chexel sat txꞌotxꞌ Egipto tiꞌ, xhi naj.

26 Istaqꞌwi yaꞌ Moisés:

—Mach chu hakaꞌ tuꞌ, yuto no noqꞌ chijaqꞌanh yinh xahanbꞌal tet koDiosalanh kaw ay yelapno noꞌ yul sat hawet konhobꞌ Egipto; ta chonhyilaꞌanh hawet konhobꞌ kopotxꞌnihanh noꞌ xahanbꞌalil, chimkonhisqꞌoj kamojanh ebꞌnaj, yuto haꞌ tet noꞌ chiyiyo isbꞌa anma ah Egipto tiꞌ. 27 Wal xin, oxebꞌ tzꞌayik chonhbꞌelwitojanh sat txꞌotxꞌ desierto, haꞌ tuꞌ xin chijaqꞌanh koxahanbꞌalanh tet Komam Dios, koDiosalanh, hakaꞌ chu yalni jetanh, xhi yaꞌ Moisés tet naj faraón.

28 Yalni naj faraón:

—Chisje heto sat txꞌotxꞌ desierto tuꞌ yunhe heyaqꞌni hexahanbꞌal tet heDiosal, yajaꞌ xin mach nahato chextohi, kat hetxahli winhan, xhi naj faraón tuꞌ.

29 Istaqꞌwi yaꞌ Moisés tet naj:

—Chinhe kinelan tasata tiꞌ, kat inqꞌannihan tet Komam ta yet hekal chiyilo Komam noꞌ us tiꞌ tawinh yebꞌ yinh ebꞌnaj chimunla tawintaj yebꞌ yinh hawet konhobꞌ; yunhe matxa chonhhawetahanh yebꞌ yunhe matxa chakach kotohanh sat txꞌotxꞌ desierto jaqꞌaꞌ koxahanbꞌalanh tet koDiosalanh, xhi yaꞌ Moisés.

30 Hayet yel yaꞌ Moisés yinh sat naj faraón tuꞌ, istxahli yaꞌ tet Komam Dios. 31 Yabꞌen Komam tzet isqꞌan yaꞌ Moisés yinh istxah. Yinilo Komam noꞌ us tuꞌ yinh naj faraón yebꞌ yinh ebꞌnaj chimunla yinta naj, yebꞌ yinh anma Egipto. 32 Lahwi tuꞌ, iskawbꞌipaxilo yanma naj faraón tuꞌ, yuxin matxa ischapaxto naj ebꞌnaj Israel.