—Moisés, asiꞌ sata naj rey faraón kat hawalni tet naj hakaꞌ tiꞌ: “Hak tiꞌ chiyute yalni Komam Dios, koDiosalanh hanhonh Israel honhtiꞌanh, chato inkonhobꞌ Israelan yunhe isto yanoko inmayan. 2 Yajaꞌ ta yexnheto hamanhkꞌoni chakachni istohi; 3 wal tuꞌ chitit inhowalan yibꞌanh hanoqꞌ ay sat hatxꞌotxꞌ, ay huneꞌ howla yabꞌil chihul yinh noꞌ, kat iskamkanilo noꞌ. Chikamilo noꞌ cheh, noꞌ burro, noꞌ camello, noꞌ wakax, yebꞌ noꞌ meꞌ. 4 Yajaꞌ wal isnoqꞌ ebꞌnaj Israel, matzet chu noꞌ, hanhe noꞌ heyet chikamiloj,” kachi, xhi Komam.

5 Yalni Komam Jahawil bꞌaqꞌinh chiyij isbꞌa huneꞌ tuꞌ, yalni tet yaꞌ Moisés hakaꞌ tiꞌ:

—Huneꞌ chiwaltiꞌan, hekal chiyij isbꞌa, xhi Komam.

6 Haꞌ yinh huneꞌxa tzꞌayik xin, yanayo Komam huneꞌ yabꞌil tuꞌ yibꞌanh ej no noqꞌ. Sunil isnoqꞌ ebꞌnaj Egipto kamiloj; walpaxo isnoqꞌ ebꞌnaj Israel machi hunu noꞌ kami. 7 Ischejni naj faraón huneꞌ mak to ilnoj tato kampaxo isnoqꞌ ebꞌnaj Israel, yajaꞌ xin machi hunu noꞌ kami. Wal naj faraón tuꞌ, kawbꞌilo yanma naj yuxin matxa ischato naj ebꞌnaj Israel.

8 Lahwi tuꞌ, yalni Komam Dios tet yaꞌ Moisés yebꞌ tet yaꞌ Aarón hakaꞌ tiꞌ:

—Iwelti tanh yul heqꞌabꞌ yul horno, kat hetixhnikanh satkanh sata naj faraón. 9 Kat ismeltzoho tanh pojojal sat sunil txꞌotxꞌ Egipto, kat ispitzkꞌahokanh txꞌak yebꞌ úlcera yu pojoj, kat istzabꞌchahoti anma yebꞌ no noqꞌ ay bꞌey Egipto tiꞌ yu txꞌak, xhi Komam tet ebꞌyaꞌ.

10 Yinilti ebꞌyaꞌ hunun pul tanh yul horno, isto ebꞌyaꞌ sata naj faraón; istixhnikanh yaꞌ Moisés tanh satkanh sata naj faraón tuꞌ, yinhnhena tuꞌ yelilo txꞌak yebꞌ úlcera yinh sunil anma tuꞌ yebꞌ yinh ej isnoqꞌ. 11 Wal ebꞌnaj eslom, matxa apni ebꞌnaj sata yaꞌ Moisés yuto elilo hunteqꞌan yabꞌil tuꞌ yinh ebꞌnaj yebꞌ yinh sunil ebꞌnaj Egipto. 12 Yajaꞌ xin yaqꞌ kawbꞌolo Komam Dios yanma naj faraón, yuxin mach yako naj yinh iskꞌul yinh tzet chal yaꞌ Moisés yebꞌ yaꞌ Aarón, hakaꞌtikꞌa yu yalni Komam tet yaꞌ Moisés.

13 Lahwi tuꞌ, yalni Komam Dios tet yaꞌ Moisés:

—Wal yet hekal, sahabꞌ chachto sata naj faraón kat hawalni tet naj: “Hak tiꞌ chiyute yalni Komam Dios, koDiosal hanhonh hebreo honhtiꞌanh: Chato inkonhobꞌ Israelan yunhe yaniko inmayan; 14 yuto ta mach xin chiwayojan sunil isyaꞌtajil tawibꞌanh, yebꞌ yibꞌanh ebꞌnaj chimunla tawintaj yebꞌ yibꞌanh hawet konhobꞌ, yunhe hawohtanheniloj tato machi hunuxa mak hakaꞌ intiꞌan sat yibꞌanhqꞌinal tiꞌ. 15 Ta chal inkꞌulan chu wanayojan isyaꞌtajil tawibꞌanh yebꞌ yibꞌanh hawet konhobꞌ kat hetanhilo yinh hunelnhe; 16 yajaꞌ xin ayachtokꞌo wuhan, yunhe hawilni wipan yebꞌ yunhe wohtanhelaxilojan yu anma ay yul sat yibꞌanhqꞌinal tiꞌ. 17 Yajaꞌ waxanhka xin chinyehan wipan hawilaꞌ yexnheto hawaqꞌni ekꞌoyaꞌ yanma inkonhobꞌan, machi xin chachahpaxtoj. 18 Yuxin yet hekal, hakaꞌ yinh huneꞌ hora tiꞌ chiwatijan huneꞌ niman sajbꞌat teyibꞌanh; maxhto hunelo xin chaqꞌ chꞌen sajbꞌat yibꞌanh Egipto hakaꞌ tuꞌ. 19 Wal tinanh xin, kutxbꞌako sunil hanoqꞌ chilow satla cheqꞌanh, kat hawinikto noꞌ yul hunu niman pat, yebꞌ sunil tzet ayach, yunhe mach chitanhiloj. Yuto haꞌ mak mach ayokto yul nha yet chitit chꞌen sajbꞌat tuꞌ, chikam yu chꞌen; hakpax tuꞌ no noqꞌ ta machi mak chikolnilo noꞌ chikampaxilo noꞌ,” kachi, xhi Komam tet yaꞌ Moisés.

20 Hayet yabꞌen haywanh ebꞌnaj chimunla yinta naj faraón tzet yal Komam tuꞌ, yaniko ebꞌnaj yinh iskꞌul ischejni ebꞌnaj ischejabꞌ oko yul nha, iskutxbꞌanpaxiko ebꞌnaj isnoqꞌ yul nimeta pat. 21 Yajaꞌ ay ebꞌnaj mach yako yinh iskꞌul, machi yako ebꞌnaj ischejabꞌ yul nha, machi yapaxikto ebꞌnaj isnoqꞌ yul pat. 22 Lahwi tuꞌ, yalni Komam tet yaꞌ Moisés:

—Moisés, akanh haqꞌabꞌ satkanh, kat istit huneꞌ niman sajbꞌat yibꞌanh anma ay sat txꞌotxꞌ Egipto tiꞌ yebꞌ yibꞌanh no noqꞌ, yebꞌ yibꞌanh istzꞌunubꞌ ebꞌnaj, xhi Komam tet naj.

23 Hayet yanikanh yaꞌ Moisés isqꞌabꞌ, yaniti Komam Jahawil kꞌuh, yichiko isnhirlahi yebꞌ isjeplahi, yichiko istit huneꞌ niman sajbꞌat sat sunil txꞌotxꞌ Egipto. 24 Matxatikꞌa xin chisbꞌej yay chꞌen sajbꞌat tuꞌ, yebꞌ matxatikꞌa chisbꞌej isjepla kꞌuh. Maxhto hunelo xayaqꞌ chꞌen sajbꞌat sat txꞌotxꞌ Egipto hakaꞌ huneꞌ niman sajbꞌat yaqꞌ tuꞌ. 25 Sunil tzet ay sat txꞌotxꞌ Egipto, etaxkanto yu chꞌen sajbꞌat. Ay anma kami, iskampaxo ej no noqꞌ, istzꞌato sunil tzꞌunubꞌ, isqꞌahpaxto isqꞌabꞌ teꞌ qꞌebꞌtaj yu huneꞌ niman sajbꞌat tuꞌ; 26 yajaꞌ wal sat txꞌotxꞌ Gosén bꞌay ay ebꞌnaj Israel machi hunu chꞌen sajbꞌat tuꞌ ayi.

27 Ischejni naj faraón ilaxoti yaꞌ Moisés yebꞌ yaꞌ Aarón yinh issat. Hayet yapni ebꞌyaꞌ tuꞌ, yalni naj tet ebꞌyaꞌ:

—Wal tinanh matxumchalo wuhan, ta yu inmulan yebꞌ yu ismul inkonhobꞌan yuxin chꞌay huneꞌ isyaꞌtajil tiꞌ, wal heDiosal kaw haꞌ istoholal chiswatxꞌe. 28 Wal tinanh, txahlanhwe tet heDiosal tuꞌ yunhe isbꞌejni ismaqꞌwa kꞌuh yebꞌ yay chꞌen sajbꞌat tiꞌ; lahwi tuꞌ, kat kexinchanitojan, matxa xin chexinlinhbꞌahan hetohi, xhi naj rey faraón tet ebꞌyaꞌ.

29 Istaqꞌwi yaꞌ Moisés tuꞌ:

—Chinhe kinelan yul konhobꞌ tiꞌ, kat winikanh inqꞌabꞌan iskabꞌil sata Komam Dios, kat intxahlihan teyinh, kat islinho yaqꞌni chꞌen sajbꞌat tiꞌ, kat islinhopaxo ismaqꞌwa kꞌuh, yunhe hawohtanheniloj ta haꞌ Komam Dios, Yahaw Komam yinh sunil yul sat yibꞌanhqꞌinal tiꞌ. 30 Yajaꞌ xin kaw wohtajan tato maxhto yelapno Komam yul hasat yebꞌ yul sat ebꞌnaj chimunla tawintaj, xhi yaꞌ Moisés tet naj.

31 Hayet yaqꞌni chꞌen sajbꞌat tuꞌ, lanhan yok yul ixim cebada; walpaxo teꞌ lino, lanhan isxumakli teꞌ. Yuxin etaxkanto ixim cebada yebꞌ teꞌ lino. 32 Yajaꞌ wal ixim trigo yebꞌ ixim centeno matzet yu ixim, yuto tzujanxa chiꞌeliloj.

33 Hayet yel yaꞌ Moisés yul konhobꞌ tuꞌ yet lahwi yel yaꞌ sata naj faraón, yikanh yaꞌ isqꞌabꞌ, istxahli yaꞌ tet Komam Dios, yinhnhena tuꞌ isbꞌejni yaqꞌni haꞌ nhabꞌ, isbꞌejni yaqꞌnipaxo chꞌen sajbꞌat, isbꞌejnipaxo ismaqꞌwa kꞌuh. 34 Yajaꞌ haxa yet yilni naj faraón islinhi yekꞌ kꞌuh, yebꞌ chꞌen sajbꞌat, yebꞌ haꞌ nhabꞌ, yanipaxiko naj ismul yaqꞌni kawbꞌolo yanma naj yebꞌ ebꞌnaj chimunla yintaj yul palacio. 35 Hak tuꞌ yu iskawbꞌilo yanma naj faraón, yuxin matxa ischahpaxto naj ebꞌnaj Israel hakaꞌtikꞌa yu yalni Komam tet yaꞌ Moisés.