—Moisés, asiꞌ sata naj rey faraón, yuto hankawinan mawaqꞌ kawbꞌolojan yanma naj yebꞌ ebꞌnaj chimunla yinta naj yul ispalacio; yunhe inyenihan wipan yinh ej kꞌaybꞌalkꞌule chinyetiꞌan. 2 Yebꞌ yunhe hawalni yet bꞌaqꞌinh tet ebꞌnaj hakꞌahol yebꞌ tet yuninal ebꞌnaj hakꞌahol yinh hunteqꞌan isyaꞌtajil chiwayojan yibꞌanh ebꞌnaj Egipto tiꞌ, yebꞌ hunteqꞌan kꞌaybꞌalkꞌule tiꞌ. Hak tuꞌ chu heyohtanheniloj ta hanintiꞌan Yahaw hinan, xhi Komam tet yaꞌ.

3 Isto yaꞌ Aarón yebꞌ yaꞌ Moisés sata naj faraón, yalni ebꞌyaꞌ tet naj:

—Hak tiꞌ chiyute yalni Komam Dios, koDiosalanh, hanhonh hebreo honhtiꞌanh: ¿Bꞌaqꞌinh chabꞌej hawinikanh habꞌa insatajan? wal tinanh xin chato inkonhobꞌtiꞌan yunhe isto yanoko inmayan bꞌey txꞌotxꞌ desierto. 4 Yuto ta ip halutꞌnhen hawanma, mach xin chachatoj, ta hak tuꞌ chiwayojan noꞌ qꞌul sat txꞌotxꞌ Egipto yet hekal. 5 Chinohilo sunil sat txꞌotxꞌ Egipto tiꞌ yu noꞌ, matxa xin chu hemujli sat txꞌo txꞌotxꞌ yu noꞌ, yutoxanhe chibꞌukꞌcha noꞌ; kat islohnito noꞌ tzet kankano yu chꞌen sajbꞌat, kat islohnito noꞌ sunil xaj teꞌ qꞌebꞌtaj. 6 Chinohikto noꞌ yul hapalacio yebꞌ yul yatut ebꞌnaj chimunla tawintaj, yebꞌ yul yatut sunil anma Egipto. Huneꞌ chiwaltiꞌan, maxhto chiyil hemam, maxhto hunelo xayilpaxo hemam icham, yuto maxhto hunelo chuhi, to hanhe yet hunel tiꞌ chuhi, xhi yaꞌ Moisés tet naj faraón.

Hayet lahwi istzotel yaꞌ Moisés tet naj faraón tuꞌ, yelti yaꞌ yul palacio sata naj. 7 Yalni ebꞌnaj chimunla yinta naj faraón hakaꞌ tiꞌ:

—Mam rey ¿bꞌaqꞌinh chisbꞌej huneꞌ naj winaj tiꞌ konhyetani? Estam chachato hunteqꞌan anma tiꞌ, yaqꞌaꞌko ismay isDiosal. Mam rey, ¿tom mach chawila ta maꞌetaxkanto kokonhobꞌ Egipto yu hunteqꞌan isyaꞌtajil tiꞌ? xhi ebꞌnaj tet naj.

8 Lahwi tuꞌ, yawtenpaxo naj faraón yaꞌ Moisés yebꞌ yaꞌ Aarón tuꞌ, yalni naj tet ebꞌyaꞌ:

—Kꞌultikꞌa, asiꞌwe heyaqꞌaꞌko ismay heDiosal tuꞌ, yajaꞌ halwe wetan makta xin chito teyintaj, xhi naj faraón.

9 Istaqꞌwi yaꞌ Moisés tuꞌ tet naj, yalni yaꞌ:

—Hayet chonhto tuꞌanh, chijitojanh nixhte juninalanh yebꞌ ebꞌnaj ichamta winaj, yebꞌ ebꞌnaj kokꞌaholanh yebꞌ kokutzꞌinanh; kat jinipaxtojanh komeꞌanh yebꞌ kowakaxanh; yuto chonhto ay jahnojanh tet Komam Jahawil, xhi yaꞌ Moisés.

10 Yajaꞌ xin taqꞌwi naj faraón hakaꞌ tiꞌ:

—¡Kaw habꞌan kotxumni ta txꞌoj nabꞌil heyu! Waxanhka ayko heDiosal tuꞌ heyetbꞌihoj. ¿Ham heyalni tato chexinchatojan yebꞌ heyuninal? 11 Mach chu hakaꞌ tuꞌ, wal xin hanhe hex icham winaj hex tiꞌ chextohi, kat heyaniko ismay heDiosal tuꞌ, yuto hak tuꞌ cheyoche, xhi naj.

Ischejni naj faraón yilaxolo yaꞌ Moisés yebꞌ yaꞌ Aarón tuꞌ sataj. 12 Yajaꞌ yal Komam Dios tet yaꞌ Moisés tuꞌ:

—Ikanh haqꞌabꞌ yibꞌanh konhobꞌ Egipto yunhe istit bꞌulna noꞌ qꞌul sat txꞌotxꞌ Egipto tiꞌ, kat islonito noꞌ sunil xaj teꞌ qꞌebꞌtaj yebꞌ teꞌ satnom teꞌ kankano yu chꞌen sajbꞌat, xhi Komam.

13 Yinikanh yaꞌ Moisés isqꞌabꞌ yibꞌanh konhobꞌ Egipto, yinhnhena tuꞌ, yaniti Komam Dios huneꞌ niman jaqꞌeqꞌ tit yinh yetkꞌulal bꞌay chiꞌahilo tzꞌayik. Huneꞌ jaqꞌeqꞌ tuꞌ, sunilbꞌal tzꞌayik yebꞌ aqꞌbꞌal ekꞌ yibꞌanh txꞌotxꞌ Egipto. Haxa yinh hunxa tzꞌayik xin yiniti jaqꞌeqꞌ noꞌ qꞌul. 14 Isnohilo sunil sat txꞌotxꞌ Egipto yu noꞌ, maxhtotikꞌa xin chu hunelo hakaꞌ tuꞌ, nitam yet yalanhtokanoj. 15 Kaw xin nohilo sat txꞌotxꞌ Egipto tuꞌ yu noꞌ, matxa xin chu jilni txꞌo txꞌotxꞌ yu noꞌ. Islohnito noꞌ sunil telaj yebꞌ sunil sat ej teꞌ lobꞌehal kankano yu chꞌen sajbꞌat. Matxatikꞌa xin hunu tzet ye tuꞌ yax kankano sat txꞌotxꞌ Egipto yu noꞌ, sunil telaj yebꞌ sat te teꞌ islohto noꞌ.

16 Ischejnito naj faraón ischejabꞌ yawtenoti, yaꞌ Moisés yebꞌ yaꞌ Aarón yinh anhe, yalni naj tet ebꞌyaꞌ hakaꞌ tiꞌ:

—Wal tinanh kaw mawako inmulan tet Komam Dios, heDiosal, yebꞌ teyet. 17 Chinqꞌanan teyet haxanhe tinanh cheyaqꞌ nimankꞌulal winhan, kat xin hetxahli winhan tet heYahawil, heDiosal tato chilo huneꞌ isyaꞌtajil chiꞌaqꞌni kamikal yibꞌanh inkonhobꞌtiꞌan, xhi naj faraón.

18 Hayet yelti yaꞌ Moisés sata naj faraón tuꞌ, yok yaꞌ txahlo tet Komam. 19 Hak tuꞌ xin yati Komam huneꞌ niman jaqꞌeqꞌ bꞌay chito tzꞌayik, yinito jaqꞌeqꞌ noꞌ qꞌul tuꞌ, isto isqꞌojnokanayto noꞌ xol haꞌ Kajinh Mar. Matxa hunu noꞌ xin kankano sat txꞌotxꞌ Egipto. 20 Yaqꞌnipaxo Komam kawbꞌolo yanma naj faraón, hak tuꞌ xin mach ischato naj ebꞌnaj Israel.

21 Yalnipaxo Komam Dios tet yaꞌ Moisés:

—Wal tinanh akanh haqꞌabꞌ satkanh yunhe isqꞌejholilo sat txꞌotxꞌ Egipto tiꞌ, chiqꞌejholilo yinh hunelnhe chisje istzabꞌlax qꞌejholo tuꞌ, xhi Komam Dios.

22 Haxa yet yanikanh yaꞌ Moisés isqꞌabꞌ tuꞌ xin, isqꞌejholikanilo sunil sat txꞌotxꞌ Egipto. 23 Oxebꞌ tzꞌayik qꞌejholiloj, matxatikꞌa hunu mak yu yilni yet anmahil ayayo iskawilal, matxatikꞌa hunu mak chiꞌekꞌi; wal bꞌey Gosén bꞌay ay ebꞌnaj Israel ay sajqꞌinal.

24 Yawtelax yaꞌ Moisés yu naj faraón, yalni naj tet yaꞌ:

—Wal tinanh asiꞌwe heyaqꞌaꞌko ismay heDiosal tuꞌ, iweto heyuninal teyintaj, yajaꞌ xin awekano hemeꞌ yebꞌ hewakax bꞌey tiꞌ, xhi naj.

25 Istaqꞌwi yaꞌ Moisés tet naj:

—Wal xin hach kawach chawaqꞌ no noqꞌ chiꞌokniko juhanh yinh xahanbꞌalil tet Komam Dios, Jahawilanh, yunhe janikojanh ismay Komam. 26 Chijinipaxtojanh sunil ej konoqꞌanh jintajanh, machi xin hunkꞌitano konoqꞌ tuꞌanh chijakanojanh, xol noꞌ tuꞌ xin chikosikꞌilojanh noꞌ chijaqꞌanh tet Jahawilanh yinh xahanbꞌalil. Yet maxhto chonhapnihanh bꞌey tuꞌ xin, mach johtajojanh bꞌaytuꞌwal ay noꞌ chijaqꞌanh tet Jahawilanh yinh xahanbꞌalil, xhi yaꞌ Moisés.

27 Yaqꞌnipaxo Komam Dios kawbꞌolo yanma naj faraón yunhe mach chischato naj ebꞌnaj Israel. 28 Yalni naj faraón tet yaꞌ Moisés:

—Elanhto bꞌey tiꞌ, matxa chachhul yinh insatan hunelxa, yuto ta chachhul hunelxa, maqꞌbꞌilxa hakam yinh huneꞌ tzꞌayik tuꞌ, xhi naj faraón tet yaꞌ Moisés.

29 Istaqꞌwi yaꞌ Moisés tet naj:

—¡Kaw yel chawala! Matxa chinhulan tasata hunelxa, xhi yaꞌ Moisés.