—Ayto huneꞌxa isyaꞌtajil chiwatijan yibꞌanh naj faraón tiꞌ yebꞌ konhobꞌ Egipto; chilawi tuꞌ xin, kat isjeno naj ta chexel sat txꞌotxꞌ Egipto tiꞌ, haꞌ xin kaw naj chextzumbꞌeniloj. 2 Wal tinanh xin, hal tet anma Israel, tato chisqꞌan tzet ye tuꞌ oro maka plata tet anma Egipto ayayo iskawilal yatut, tet ebꞌnaj winaj yebꞌ tet ebꞌix ix, xhi Komam tet yaꞌ. 3 Kaw xin hunkuenta yute iskꞌul anma Egipto yinh ebꞌnaj Israel yu Komam, hakpax tuꞌ ebꞌnaj chimunla yinta naj faraón, kaw niman yelapno yaꞌ Moisés yul sat ebꞌnaj, yebꞌ yul sat sunil anma ay bꞌey Egipto tuꞌ.

4 Yalni yaꞌ Moisés tet naj faraón:

—Hak tiꞌ yute yalni Komam Dios hakaꞌ tiꞌ: “Yinh chuman aqꞌbꞌal chinekꞌojan sunil sat txꞌotxꞌ Egipto tiꞌ, 5 kat waqꞌni kamojan isbꞌabꞌel kꞌahol ebꞌnaj Egipto xol hunun nhahil anma; chiꞌichiti yinh isbꞌabꞌel kꞌahol naj faraón, chiꞌayo tzꞌonhno yul yehobꞌal yintajilo naj, masanta yinh isbꞌabꞌel yunin ix chejabꞌ chimunla yinh chꞌen molino, kat iskampaxo isbꞌabꞌel yunin sunil ej no noqꞌ. 6 Kaw ay niman oqꞌil sunil yul egipto, maxhto hunelo chu hakaꞌ tuꞌ, matxa xin bꞌaqꞌinhal chiyupaxoj. 7 Yaj wal ebꞌnaj Israel matzet chu ebꞌnaj, nitam hunu metx txꞌiꞌ chichiwa yinh ebꞌnaj yebꞌ yinh isnoqꞌ ebꞌnaj, yunhe heyohtanheniloj tato Komam Dios Jahawilanh ekꞌbꞌal jelapnojanh tesataj hex Egipto hex tiꞌ yul sat, xahan ayonhanh yu,” xhi. 8 Hak tuꞌ xin chihul sunil ebꞌnaj chimunla tawintaj, kat yay jahno ebꞌnaj, kat yalni ebꞌnaj wetan: “Wal tinanh, asiꞌ yebꞌ sunil anma ayko yalanh hawip,” xhi ebꞌnaj wetan. Yet chiyuni hunteqꞌan tiꞌ xin, kat kotokanojanh, xhi yaꞌ Moisés.

Kaw xin how yaꞌ Moisés yet yelti yaꞌ yinh sat naj faraón. 9 Lahwi tuꞌ, yalni Komam Dios tet yaꞌ Moisés:

—Mach chabꞌeto naj faraón tzet cheyalaꞌ yuxin kaw nimanto kꞌaybꞌalkꞌule chinyehan bꞌey Egipto tiꞌ, xhi Komam.

10 Yaꞌ Moisés yebꞌ yaꞌ Aarón iswatxꞌe ebꞌyaꞌ sunil hunteqꞌan kꞌaybꞌalkꞌule tiꞌ yinh sat naj faraón, yaj yu yaqꞌ kawbꞌolo Komam Dios yanma naj, yuxin mach isje naj ta chiꞌel ebꞌnaj Israel sat txꞌotxꞌ Egipto.