2 «Huneꞌ ixahaw tiꞌ, haꞌ niman yelapno yul hesat, bꞌabꞌel ixahaw yinh habꞌil chukanoj. 3 Halwe tet sunil anma Israel hakaꞌ tiꞌ: “Yinh 10 (islahonhebꞌ) tzꞌayik yinh huneꞌ ixahaw tiꞌ, hunun ebꞌnaj winaj chiyiti hunu noꞌ nichꞌan meꞌ maka hunu noꞌ nichꞌan chiw, hunun noꞌ yinh hunun nhahil anma. 4 Yaj tato ay hunu nhahil anma mach chiqꞌoji iskꞌuxnito noꞌ meꞌ tuꞌ yu haywanhnhe, chisje iskꞌuxnito noꞌ yebꞌ mak ayayo yatut iskawilal, chixin yaqꞌni hantatikꞌa isbꞌisil anma yebꞌ hanta chiskꞌuxu. 5 Noꞌ meꞌ tuꞌ machojabꞌ nichꞌano istzakaꞌil noꞌ aykoj, yebꞌ ta winaj noꞌ, yebꞌ ta huneꞌojabꞌ habꞌil noꞌ, machi yok yinh ta meꞌ maka chiw noꞌ. 6 Chixin heyanhe noꞌ masanto yinh 14 (iskanhlanhebꞌ) tzꞌayik yinh huneꞌ ixahaw tiꞌ, haxa yet chiꞌayilo huneꞌ tzꞌayik tuꞌ xin, sunil anma Israel chipotxꞌni noꞌ yinh qꞌejbꞌiyalil. 7 Chixin ischahnipaxo anma ischikꞌil noꞌ, kat ismasniko anma ischikꞌil noꞌ tuꞌ yinh sunil ismarcohal ispultahil teꞌ nha bꞌay chiskꞌux anma noꞌ meꞌ tuꞌ. 8 Yinh huneꞌ aqꞌbꞌalil tuꞌ, chiskꞌux anma noꞌ chibꞌe, yajaꞌ chisqꞌantze anma noꞌ, kat islohni anma teꞌ kꞌahla itah yinta noꞌ, kat iswanipaxo ixim pan machi yanhal chiꞌoki. 9 Machi nichꞌano noꞌ chiskꞌux yinh isyaxtohal, maka noꞌ chitahtzelaxi. Sunil isnimanil noꞌ yebꞌ iswiꞌ noꞌ yebꞌ yoj noꞌ yebꞌ yul iskꞌul noꞌ chiqꞌantzelaxi. 10 Matxa xin nichꞌano noꞌ cheyakano yinh hunuxa tzꞌayik; tato ayto noꞌ chikani, maqꞌbꞌil henhusnikanto noꞌ yul qꞌaꞌ. 11 Hayet chekꞌuxni noꞌ tuꞌ ayxako xil heqꞌap yebꞌ hexanhabꞌ yinh heyoj yebꞌ iqꞌbꞌilxa heqꞌojoch yul heqꞌabꞌ, chekꞌuxni noꞌ yinh anhe yuto qꞌinh Pascua tet Komam Jahawil huneꞌ tiꞌ. 12 Yinh huneꞌ aqꞌbꞌal tuꞌ, chintohan sunil sat txꞌotxꞌ Egipto tiꞌ, kat waqꞌni kamojan sunil isbꞌabꞌel kꞌahol ebꞌnaj Egipto yebꞌ isbꞌabꞌel yunin isnoqꞌ ebꞌnaj; kat wetanotojan isdiosal anma egipto tiꞌ. Hanin Yahawintiꞌan chiwalan huneꞌ tiꞌ.

13 »”Haꞌ chikꞌ ayko yinh ispultahil heyatut tuꞌ, haꞌ chiyeniloj tato Israel hex ay yul nha tuꞌ; hak tuꞌ xin yet chinekꞌan waqꞌaꞌkamojan Egipto machi hunu hex chexkami, yet chiwilnihan chikꞌ tuꞌ palan wekꞌtojan. 14 Huneꞌ tzꞌayik tiꞌ, yilal henanitij yebꞌ heyekꞌtzeni, qꞌinh kaw niman yelapnoj, yu heyaniko ismay heDiosal. Kaw xin chejbꞌanile chukanoj yinh hunelnhe, kaw yilal heyijeni, kat xin isnahnipaxti heyuninal. 15 Kaw hujebꞌ tzꞌayik mach chewah ixim pan machi yanhal aykoj, yuxin yinh bꞌabꞌel tzꞌayik matxahojabꞌ nino yanhal pan yul heyatut. Tato ay hunu mak chiwani ixim pan ayko yanhal yinh hunteqꞌan tzꞌayik tiꞌ, chiꞌilaxilo xol konhobꞌ Israel. 16 Yinh bꞌabꞌel tzꞌayik, kaw yilal hekutxbꞌan hebꞌa hesunil yu heyinayo hebꞌa wetan, hak tuꞌ cheyutepaxo yinh ishuj tzꞌayik chekutxbꞌapaxo hebꞌa, machojabꞌ xin hunujex chexmunla yinh hunteqꞌan tzꞌayik tuꞌ, hach kachannhe hewatxꞌen tzet cheloh hunun hex. 17 Huneꞌ qꞌinh yet chewani ixim pan machi yanhal kaw yilal heyekꞌtzeni, yuto haꞌ yinh huneꞌ tzꞌayik tuꞌ kexwiltijan yul konhobꞌ Egipto hesunil. Hakaꞌ chejbꞌanile chukano yinh hunelnhe, yuxin yilal heyekꞌtzeni, kat xin yekꞌtzenpaxo heyuninal yebꞌ heyikꞌal. 18 Yinh bꞌabꞌel ixahaw yinh 14 (iskanhlanhebꞌ) tzꞌayik yinh qꞌejbꞌiyal chexichiko hewani ixim pan machi yanhal, masanta yinh tzꞌayik 21 (hun iskawinaj) yinh qꞌejbꞌiyal yinh isbꞌabꞌel ixahaw tuꞌ. 19 Yulbꞌal hujebꞌ tzꞌayik tuꞌ, machi nino yanhal ixim pan yul heyatut, yuxin tato ay hunu mak chiwani ixim pan ayko yanhal tuꞌ, chiꞌilaxilo xol konhobꞌ Israel, waxanhka hunu nan konhobꞌal ayko texol maka Israel, chiꞌilaxilo texol. 20 Yuxin machi nino yanhal pan cheloh; bꞌajxanhetuꞌwal ay hex, anhe ixim pan machi yanhal aykoj haꞌ chewah,” kachi,» xhi Komam.

21 Lahwi tuꞌ, yawten yaꞌ Moisés ebꞌnaj icham winajxa xol ebꞌnaj Israel, yalni yaꞌ tet ebꞌnaj: «Asiꞌwej, kat heyiniti hunu noꞌ tzehla meꞌ maka noꞌ chiw yu hekꞌuxni yebꞌ heyixal yebꞌ heyuninal. Chepotxꞌkamo noꞌ, kat heyicheniko qꞌinh pascua. 22 Chechani ischikꞌil noꞌ yul hunu netbꞌal, kat xin heyiniti huntopano teꞌ hisopo, kat helabꞌanayto isqꞌabꞌ teꞌ xol chikꞌ, kat xin hemasniko yinh sunil ismarcohal hepulta. Machi hunu mak xin chiꞌelti yul yatut masanto yet chisajbꞌiloj. 23 Haꞌ xin yet chiꞌelto Komam yinh aqꞌbꞌalil yaqꞌno kamo ebꞌnaj Egipto chilno Komam chikꞌ ayko yinh ismarcohal hepulta, hak tuꞌ xin palan yekꞌ Komam bꞌey tuꞌ. Machi xin chischakto Komam naj ángel chꞌaqꞌni kamo anma yul heyatut, yunhe mach chiyaqꞌkamo naj hebꞌabꞌel kꞌahol.

24 »Huneꞌ chejbꞌanile tiꞌ, yilal heyijeni yebꞌ ej heyuninal, hakaꞌ chejbꞌanile chukano yinh hunelnhe. 25 Hayet ayexxa sat txꞌotxꞌ chaqꞌ Komam teyet, txꞌotxꞌ haltebꞌil teyet yu Komam, kaw yilal heyekꞌtzen huneꞌ qꞌinh tiꞌ. 26 Haxa yet chisqꞌambꞌen heyuninal teyet hakaꞌ tiꞌ: “¿tzet yelapno ye huneꞌ qꞌinh cheyekꞌtze tiꞌ?” ta xhi. 27 Chextaqꞌwi cheyalni tet heyuninal tuꞌ hakaꞌ tiꞌ: “Yinh huneꞌ qꞌinh tiꞌ, chikonahtijanh istzꞌayikal pascua, yet iskam noꞌ meꞌ yinh xahanbꞌalil tet Komam Dios. Yet yelto Komam yaqꞌno kamo ebꞌnaj Egipto, palan xin yekꞌto Komam bꞌay ay yatut ebꞌnaj Israel, hak tuꞌ xin yu iskolchakano juninalanh yu Komam yinh huneꞌ tiempohal tuꞌ,” kexchi tet heyuninal,» xhi yaꞌ Moisés.

Lahwi yalni yaꞌ Moisés hakaꞌ tuꞌ xin, yay nhohno ebꞌnaj Israel yu yinayo isbꞌa ebꞌnaj tet Komam Dios.

28 Lahwi tuꞌ, isto ebꞌnaj Israel, yok ebꞌnaj isyijeno hakaꞌtikꞌa yu yalni Komam tet yaꞌ Moisés yebꞌ tet yaꞌ Aarón.

29 Haxa yinh chuman aqꞌbꞌal xin, yaqꞌnikamo Komam Dios ebꞌnaj bꞌabꞌel kꞌahole ay sat txꞌotxꞌ Egipto, yaqꞌkamo Komam isbꞌabꞌel kꞌahol naj faraón, naj chiꞌay tzꞌonhno yul yehobꞌal yul palacio, iskampaxo isbꞌabꞌel kꞌahol ebꞌnaj majan yul preso; iskampaxo isbꞌabꞌel yunin sunil ej no noqꞌ. 30 Wal naj faraón yebꞌ ebꞌnaj chimunla yintaj, ahwano ebꞌnaj yinh huneꞌ aqꞌbꞌal tuꞌ, yahpaxowano sunil anma, yawxanhe yoqꞌ anma sunil, yuto machi hunu nha bꞌay machi kamom. 31 Yinhtikꞌa huneꞌ aqꞌbꞌal tuꞌ, yawte naj faraón yaꞌ Moisés yebꞌ yaꞌ Aarón, yalni naj tet ebꞌyaꞌ:

—Wal tinanh, asiꞌwej, elanhwe yebꞌ heyet konhobꞌ Israel tiꞌ xol wet konhobꞌan, as aweko ismay heDiosal tuꞌ, hakaꞌ cheyute heyalni. 32 Iwepaxto henoqꞌ, hemeꞌ yebꞌ hewakax teyintaj hakaꞌ cheyoche. Asiꞌwej, kat hetxahli winhan tet heDiosal tuꞌ, xhi naj faraón tet ebꞌyaꞌ kawanh tuꞌ.

33 Hakpax tuꞌ sunil anma, yal anma ta chiꞌel ebꞌnaj Israel sat txꞌotxꞌ Egipto yinh anhe, yuto istxumilo anma tuꞌ tato chikampaxo anma sunil. 34 Yinito ebꞌnaj ixim harina qꞌoyexa yehi yaj maxhto yanhal aykoj, ispichniko ebꞌnaj sábana yinh ixim, yanahto ebꞌnaj ixim yibꞌanh iswixikꞌ. 35 Isqꞌannipaxo ebꞌnaj Israel tuꞌ, tzet ye tuꞌ oro yebꞌ plata yebꞌ xilqꞌape tet anma Egipto hakaꞌtikꞌa yu yalni yaꞌ Moisés. 36 Kaw xin kꞌulchꞌan yute iskꞌul ebꞌnaj ah Egipto yinh ebꞌnaj Israel yu Komam Dios, yaqꞌni ebꞌnaj sunil tzet isqꞌan ebꞌnaj. Hak tuꞌ xin yu yinito ebꞌnaj Israel tzet ay ebꞌnaj Egipto.

37 Lahwi tuꞌ yel ebꞌnaj Israel bꞌey Ramsés, yapni ebꞌnaj bꞌey Sucot, 600 mil isbꞌisil ebꞌnaj winaj machi xin ok ebꞌix ix yebꞌ nixhte unin yinh huneꞌ isbꞌisil tiꞌ. 38 Kaw niman ismeꞌ ebꞌnaj yitoj, yebꞌ xin kaw niman anma nananta konhobꞌal to yinta ebꞌnaj. 39 Iswatxꞌen ebꞌnaj ixim pan yinh ixim qꞌoye harina yiti bꞌey Egipto, ixim machi yanhal aykoj xol, mach chisipkꞌahi; matxa yu iswatxꞌen ebꞌnaj tzet chislo, yuto yinhxanhe anhe tzumbꞌelaxilti ebꞌnaj yu ebꞌnaj Egipto.

40 Ebꞌnaj Israel tuꞌ 430 habꞌil ekꞌ ebꞌnaj bꞌey Egipto. 41 Hayet istzꞌajna 430 habꞌil tuꞌ yel iskonhobꞌ Komam yul huneꞌ konhobꞌ tuꞌ.^a 42 Yinh huneꞌ aqꞌbꞌal tuꞌ, yilti Komam iskonhobꞌ bꞌey Egipto, kaw xin ayko Komam istanhenoj. Yuxin huneꞌ aqꞌbꞌal tuꞌ yinh hunun habꞌil, sunil anma Israel elna iswayanh, yu yaniko ebꞌnaj ismay Komam, hak tuꞌ xin chiyute ebꞌnaj yinh sunilbꞌal ej habꞌil.

43 Yalni Komam Dios tet yaꞌ Moisés yebꞌ tet yaꞌ Aarón:

«Haꞌ huneꞌ chejbꞌanile tiꞌ, chiwakanojan teyet yet cheyekꞌtzen qꞌinh Pascua, anma mach Israelo ay texol mach chu iskꞌuxni ischibꞌehal no noqꞌ cheyaqꞌ yinh qꞌinh pascua tuꞌ. 44 Yajaꞌ wal ebꞌnaj chejabꞌ loqꞌbꞌil heyu chu iskꞌuxni ebꞌnaj noꞌ ta ayxako circuncisión yinh ebꞌnaj. 45 Machi hunu komon anma chu iskꞌuxni noꞌ, waxanhka hekꞌamteꞌ maka hunu mak aykꞌo tekꞌatanh kexistuklenoj. 46 Haꞌ yul nha bꞌay kutxanexikoj, haꞌ tuꞌ chekꞌux noꞌ, mach chu heyinilti nitam hun txꞌinano noꞌ yul nha tuꞌ; machi xin hunu isbꞌajil noꞌ chiꞌok xahanbꞌalil tuꞌ cheqꞌahtoj. 47 Huneꞌ chejbꞌanile chiwaltiꞌan, sunil anma Israel chiyijeni. 48 Yajaꞌ ta ay mak mach Israelo ay texol chiyoche yekꞌtze qꞌinh pascua tuꞌ teyintaj, yilal yaqꞌlax circuncidar bꞌabꞌel katto yekꞌtzen qꞌinh pascua tuꞌ teyintaj, hak tuꞌ xin heyet konhobꞌxa chukoj. Yaj wal mak machi circuncisión yinh, mach chu yekꞌtzen qꞌinh Pascua tuꞌ teyintaj. 49 Huneꞌ ley tiꞌ, yilal heyijen hex Israel hex tiꞌ, yebꞌ anma mach Israelo ay texol,» xhi Komam.

50 Sunil tzet ischej Komam yalaꞌ yaꞌ Moisés yebꞌ yaꞌ Aarón, isyije sunil anma Israel. 51 Yinhtikꞌa huneꞌ tzꞌayik tuꞌ, yilti Komam anma sat txꞌotxꞌ Egipto yinh istxolal, yuto kaw niman anma Israel tuꞌ.