13
Lahwi tuꞌ, yalni Komam Dios tet yaꞌ Moisés hakaꞌ tiꞌ: 2 «Sunil bꞌabꞌel winaj chipitzkꞌa texol chepohiloj, yuto wetan yehi; hakpax tuꞌ xol no noqꞌ, noꞌ bꞌabꞌel chipitzkꞌahi chepohkanilo noꞌ, yuto wetan ye noꞌ,» xhi Komam.3 Yalni yaꞌ Moisés tet anma Israel: «Yilal henaniti huneꞌ tzꞌayik yet kexyinilo Komam Dios sat txꞌotxꞌ Egipto bꞌay kexekꞌle chejabꞌoj; kexyilo Komam yebꞌ sunil yip, yuxin mach chubꞌ hewahni ixim pan ayko yanhal. 4 Haꞌ tinanh xin, yinh huneꞌ tzꞌayik yinh ixahaw Abib tiꞌ kexyilo Komam sat txꞌotxꞌ Egipto. 5 Yuxin yinhtikꞌa huneꞌ ixahaw tiꞌ yinh hunun habꞌil cheyekꞌtze qꞌinh pascua yet ayexxa sat txꞌotxꞌ kaw yax sat haltebꞌilxakano yu Komam Dios tet ebꞌyaꞌ komam jichmam, ta chiyaqꞌ jet. Haꞌ huneꞌ txꞌotxꞌ tuꞌ, haꞌ ton txꞌotxꞌ bꞌay ay anma cananeo, hitita, amorreo, heveo yebꞌ anma Jebuseo. 6 Hayet cheyekꞌtzen qꞌinh pascua tuꞌ, wajebꞌ tzꞌayik chewah ixim pan machi yanhal, haxa yinh ishuj tzꞌayik xin chekutxbꞌa hebꞌa, kat heyaniko ismay Komam Dios. 7 Yulbꞌal hujebꞌ tzꞌayik tuꞌ, mach chewah ixim pan ayko yanhal chisipkꞌahi, nitam hekꞌubꞌan ixim ayko yanhal yul heyatut, nitam hekꞌubꞌan yanhal ixim yul konhobꞌ. 8 Haꞌ yinh huneꞌ tzꞌayik tuꞌ, hak tiꞌ cheyute heyalni tet heyuninal hakaꞌ tiꞌ: “Haꞌ huneꞌ qꞌinh tiꞌ chijekꞌtzehanh yu konanitijanh tzetaj iskꞌulal isye Komam Dios jinhanh yet konhyinilojanh sat txꞌotxꞌ Egipto,” kexchi. 9 Hakaꞌ ismunil noꞌ tzꞌum ayko yinh koqꞌabꞌ yebꞌ yinh kopalanh, hak tuꞌ ismunil huneꞌ qꞌinh tiꞌ, haꞌ chiꞌok yechelo teyet yu henaniti yet kexyinilo Komam sat txꞌotxꞌ Egipto, kat heyalni ta yilal isyijelax isley Komam, yuto haꞌ konhinilo sat txꞌotxꞌ Egipto yebꞌ sunil yip. 10 Yuxin yilal heyekꞌtzen huneꞌ qꞌinh tiꞌ hunun habꞌil, yinh istzꞌayikal yebꞌ yinh ixahawil halbꞌilkano teyet.
11 »Hayet chexyanikto Komam Dios sat txꞌotxꞌ Canaán hakaꞌ yu yaltenkano Komam Dios txꞌotxꞌ teyet yebꞌ tet heyichmam. 12 Haꞌ hebꞌabꞌel winaj chipitzkꞌahi, chepohiloj yuto yet Komam yehi. Hakpax tuꞌ xin henoqꞌ, noꞌ winaj bꞌabꞌel chipitzkꞌahi, yet Komam ye noꞌ. 13 Haxa yet chipitzkꞌa isbꞌabꞌel yunin noꞌ burro, cheyaqꞌ hunu noꞌ nixhte meꞌ maka noꞌ nixhte chiw seleloj; yajaꞌ ta mach cheyaqꞌ selel noꞌ chimaqꞌlaxpoho isnuqꞌ noꞌ nichꞌan burro tuꞌ. Hakpax tuꞌ xin, yet chipitzkꞌa hebꞌabꞌel winaj unin, cheyaqꞌ heyebꞌalqꞌabꞌ tet Komam seleloj. 14 Hayet chisqꞌambꞌen heyuninal yet bꞌaqꞌinh hakaꞌ tiꞌ: “¿Tzet chalilo huneꞌ tiꞌ?” ta xhi, chextaqꞌwi tet hakaꞌ tiꞌ: “Huneꞌ tiꞌ chꞌaqꞌni konabꞌatijan yet konhyinilojanh Komam Dios sat txꞌotxꞌ Egipto, yet ayonhikojanh ischejabꞌo ebꞌnaj Egipto tuꞌ. 15 Yajaꞌ hayet iskawbꞌilo yanma naj faraón, matxa konhischalojanh naj sat txꞌotxꞌ Egipto, yuxin yaqꞌkamo Komam Dios sunil isbꞌabꞌel kꞌahol ebꞌnaj Egipto. Haktikꞌapax tuꞌ yute Komam yinh isnoqꞌ ebꞌnaj, yuxin haꞌ noꞌ bꞌabꞌel yunin noꞌ meꞌ maka noꞌ chiw winaj chipitzkꞌahi, yet Komam Dios ye noꞌ; kat jaqꞌnipaxojanh koyebꞌalqꞌabꞌanh yet chipitzkꞌa kobꞌabꞌel kꞌaholanh,” kexchi. 16 Yuxin hakaꞌ ismunil noꞌ tzꞌum ayko yinh koqꞌabꞌ yebꞌ yinh kopalanh, hak tuꞌ ismunil qꞌinh pascua tiꞌ; haꞌ chalnilo jetanh yu konanitijanh yet konhyiniltijanh Komam Jahawil sat txꞌotxꞌ Egipto yu yip,» xhi yaꞌ Moisés.
Huneꞌ niman topan moyan yebꞌ qꞌa qꞌaꞌ
17 Hayet ischahnilo naj faraón anma Israel sat txꞌotxꞌ Egipto, mach yito Komam Dios anma yul isbꞌehal iskonhobꞌ ebꞌnaj filisteo, waxanhka xin haꞌ huneꞌ bꞌeh tuꞌ kꞌotzan yekꞌi; yuto isnah Komam Dios ta mach kꞌuloj ta chiꞌah howal yu anma Israel yebꞌ ebꞌnaj filisteo tuꞌ, hayet chiyilni anma Israel howal tuꞌ chimmeltzopaxo sat txꞌotxꞌ Egipto hunelxa.
18 Yu huneꞌ tuꞌ, yuxin ekꞌ ebꞌnaj Ishoyoꞌ txꞌotxꞌ desierto yul bꞌeh chito istiꞌla haꞌ Kajinh Mar.
Hayet yel ebꞌnaj Israel sat txꞌotxꞌ Egipto iqꞌbꞌil ischꞌen ebꞌnaj yet howal yu. 19 Hayet yel ebꞌnaj tuꞌ yito yaꞌ Moisés isbꞌajil isnimanil yaꞌ José, yuto hak tuꞌ yu yalnikano yaꞌ tet ebꞌyaꞌ yuxhtaj, ebꞌyaꞌ iskꞌahol yaꞌ Jacob. Istaqꞌwenkano ebꞌyaꞌ yuxhta yaꞌ José tuꞌ ta hak tuꞌ chute ebꞌyaꞌ, yet yalni yaꞌ José hakaꞌ tiꞌ: «Yinh kaw yeli chiꞌapni istzꞌayikal bꞌay chikolwaho Komam Dios teyinh. Hayet chiyijni isbꞌa huneꞌ tuꞌ cheyito isbꞌajil innimanilan teyintaj,» xhi yaꞌ tet ebꞌyaꞌ yuxhta tuꞌ.
20 Hayet yel anma sat txꞌotxꞌ Sucot, yapni anma sat txꞌotxꞌ Etam, ayko yinh istiꞌla bꞌay chiꞌichiko txꞌotxꞌ desierto. 21 Hayet chibꞌelwi anma Israel yet tzꞌayikal ayko Komam Dios sata anma xol huneꞌ topan moyan yunhe isyeni Komam isbꞌeh anma Israel tuꞌ. Haxa yet aqꞌbꞌalil, ayko Komam sata anma xol huneꞌ topan qꞌaꞌ yunhe istzejni isbꞌeh. Hak tuꞌ yu isbꞌelwi anma Israel yinh isbꞌel yet tzꞌayikal yebꞌ yet aqꞌbꞌalil. 22 Huneꞌ topan moyan tuꞌ, bꞌabꞌelnhetikꞌa sata anma Israel yet chibꞌelwi yet tzꞌayikal, haktikꞌapax tuꞌ huneꞌ topan qꞌaꞌ yet aqꞌbꞌalil.