2 «Hal tet anma Israel ta chimeltzohi, kat yehayo satakꞌti txꞌotxꞌ Pi-hahirot yiktabꞌanil txꞌotxꞌ Migdol yebꞌ haꞌ mar, satakꞌti txꞌotxꞌ Baal-Zefón. Haꞌ bꞌey tuꞌ chiꞌehayo ebꞌnaj, kat iswatxꞌenkanh ebꞌnaj ismantiado yatutoj satakꞌti haꞌ mar. 3 Haxa naj faraón chistxum naj hakaꞌ tiꞌ, “Haꞌ ebꞌnaj Israel, chimkꞌayikꞌo ebꞌnaj sat txꞌotxꞌ desierto, matxam chitxumcha yu ebꞌnaj bꞌay kaw istokoj,” xhim naj. 4 Wal xin hankawinan chiwaqꞌ kawbꞌolojan yanma naj, kat istit naj kexistzujnoyoj, kat inyenilojan wipan tet naj yebꞌ tet ebꞌnaj issoldado naj, kat yohtanhenilo sunil anma Egipto ta hanintiꞌan Yahaw hinan,» xhi Komam tet yaꞌ Moisés.

Hakaꞌ yute yalni Komam tuꞌ, hak tuꞌ yute ebꞌnaj Israel.

5 Hayet xaꞌelna ebꞌnaj Israel sat txꞌotxꞌ Egipto yal-lax tet naj faraón ta matxa anma Israel tuꞌ. Hayet yabꞌen naj huneꞌ tuꞌ, ishelni naj isnabꞌal yebꞌ ebꞌnaj chimunla yinta yul palacio yinh ebꞌnaj Israel. Yalni ebꞌnaj tet hunun hakaꞌ tiꞌ: «Yajaꞌ tzet yinh yuxin makochahto ebꞌnaj Israel tuꞌ, masbꞌejnikano ebꞌnaj iswatxꞌen komunil,» xhi ebꞌnaj tet hunun.

6 Lahwi tuꞌ, ischejni naj faraón yilaxoti iscarruaje yet howal, isto naj yebꞌ issoldado istzujnoyo ebꞌnaj Israel. 7 Yinipaxto naj 600 carruaje kaw kꞌul, yinipaxto naj sunil carruaje ay bꞌey Egipto tuꞌ, hunun xin ebꞌnaj capitán yinh hunun carruaje tuꞌ. 8 Haꞌ kaw Komam Dios aqꞌni kawbꞌolo yanma naj rey tuꞌ, yuxin to naj istzujuyo ebꞌnaj Israel, yaj ebꞌnaj Israel tuꞌ kaw ay ismay yu yel ebꞌnaj sat txꞌotxꞌ Egipto.

9 Isto ebꞌnaj Egipto istzujnoyo ebꞌnaj Israel yebꞌ issoldado yebꞌ no cheh iqꞌnhe teꞌ carruaje; istzujchayo ebꞌnaj Israel yu ebꞌnaj satakꞌti haꞌ mar, iskawilal txꞌotxꞌ Pi-hahirot, satakꞌti txꞌotxꞌ Baal-Zefón bꞌay ayayo ebꞌnaj Israel tuꞌ. 10 Hayet yilni ebꞌnaj Israel ta kawilxa yeti ebꞌnaj Egipto istzujnoyo ebꞌnaj, isxiwkanh ebꞌnaj Israel tuꞌ, isqꞌanni ebꞌnaj iskolwal Komam yinh. 11 Yajaꞌ xin yal ebꞌnaj tet yaꞌ Moisés hakaꞌ tiꞌ:

—Moisés ¿tom machi bꞌay chonhmujlaxanh sat txꞌotxꞌ Egipto, yuxinto makonhhawitijanh kamo sat txꞌotxꞌ desierto tiꞌ? ¿Tzet yinh yuxin hak tiꞌ chonhhawutehanh? ¿Tzet yinh yuxin konhhawilojanh sat txꞌotxꞌ Egipto tuꞌ? 12 ¿Tom mach jalanh tawet yet ayonhtokꞌojanh bꞌey txꞌotxꞌ Egipto ta mach chakach komunlahanh yinh ismunil ebꞌnaj Egipto? Wal xin ekꞌbꞌal kꞌul, waxanhka ischejabꞌ ebꞌnaj jekojanh, sata kokamanh sat txꞌotxꞌ desierto tiꞌ, xhi ebꞌnaj tet yaꞌ Moisés.

13 Yajaꞌ xin taqꞌwi yaꞌ Moisés tet ebꞌnaj:

—Mach chexxiwi, mach chexpax teyintaj, yuto yinh huneꞌ tzꞌayik tiꞌ cheyilaꞌ tzet chu konhiskolno Komam, matxa bꞌaqꞌinh cheyilaꞌ yinh ebꞌnaj Egipto tiꞌ. 14 Yuxin mach cheyako yinh hekꞌul, yuto haꞌ Komam chꞌaqꞌno howal yinh ebꞌnaj koseleloj, xhi yaꞌ Moisés tet ebꞌnaj. 15 Yalni Komam tet yaꞌ Moisés:

—¿Tzet yinh, yuxin chaxhawi wetan? Hal tet ebꞌnaj Israel, ta chislahiko ebꞌnaj yinh isbꞌel tuꞌ, bꞌelwojabꞌ ebꞌnaj sataj. 16 Wal hach xin, ikanh haqꞌojoch kat hamaqꞌnayo yibꞌanh haꞌ mar tiꞌ, kat ispohno isbꞌa haꞌ yunhe yekꞌto ebꞌnaj Israel yul huneꞌ bꞌeh tajin, yiktabꞌal haꞌ. 17 Haninan xin chiwaqꞌan kawbꞌolo yanma ebꞌnaj Egipto yunhe yok tzujno ebꞌnaj teyintaj; kat xin inyenilo wipan tet naj faraón, yebꞌ tet issoldado naj, yebꞌ yinh iscarruaje yebꞌ ischeh yet howal. 18 Haxa yet chinyenilo wipan yinh naj faraón yebꞌ iscarruaje yebꞌ ischeh yet howal tuꞌ, hak tuꞌ xin chu yohtanhenilo sunil anma ah Egipto tato hanintiꞌan Yahawil hinan, xhi Komam.

19 Yinhnhena tuꞌ xin, naj yángel Komam Dios yebꞌ huneꞌ topan moyan ayko sata ebꞌnaj Israel tuꞌ ishekꞌilo isbꞌa, haxa yinta ebꞌnaj ok tzujnoj. 20 Hak tuꞌ xin yu yok huneꞌ topan moyan tuꞌ xolbꞌal ebꞌnaj soldado Egipto yebꞌ ebꞌnaj Israel. Kaw xin qꞌejholilo elkaniko chil ebꞌnaj Egipto yu huneꞌ moyan tuꞌ, wal yinh ebꞌnaj Israel xin chitzejtzoni. Hak tuꞌ xin mach qꞌojwi ebꞌnaj Egipto istzujnayo ebꞌnaj Israel yinh sunilbꞌal huneꞌ aqꞌbꞌal tuꞌ.

21 Yanayo yaꞌ Moisés isqꞌabꞌ yibꞌanh haꞌ mar tuꞌ, yaniti Komam Dios huneꞌ niman jaqꞌeqꞌ tit bꞌay chiꞌahilo tzꞌayik; sunilbꞌal aqꞌbꞌal xin ekꞌ huneꞌ jaqꞌeqꞌ tuꞌ, isqꞌaxpoyo haꞌ mar yu, yuxin kabꞌ ayiko haꞌ. Istajkanh haꞌ mar yu Komam. 22 Hak tuꞌ xin yu yekꞌto ebꞌnaj Israel yiktabꞌal haꞌ mar tuꞌ yinh istajinal. Hakaꞌ kꞌubꞌ yukanh haꞌ yinh isqꞌaxqꞌepal bꞌeh bꞌay ekꞌto ebꞌnaj tuꞌ.

23 Hakpax tuꞌ ebꞌnaj Egipto ayto ebꞌnaj yul huneꞌ bꞌeh xol haꞌ istzujuyo ebꞌnaj Israel tuꞌ; sunil noꞌ cheh bꞌay ayahto ebꞌnaj issoldado naj faraón yebꞌ iscarruaje naj ekꞌtoj masanta yiktabꞌal haꞌ. 24 Haxa yet lanhanxa issajbꞌiloj yilnayti Komam xol huneꞌ moyan yebꞌ xol huneꞌ qꞌaꞌ tuꞌ ebꞌnaj Egipto, yaqꞌni somchahokanh Komam isnabꞌal ebꞌnaj. 25 Yetanpaxto Komam isyantahil ej iscarruaje ebꞌnaj, kaw nankꞌulalxanhe xin chaqꞌ ebꞌnaj. Yalni ebꞌnaj Egipto tuꞌ hakaꞌ tiꞌ:

—Wal tinanh elojonhwekanh tet ebꞌnaj Israel tiꞌ, yuto haꞌ Yahawil ebꞌnaj chꞌaqꞌni howal jinh seleloj, xhi ebꞌnaj.

26 Yalni xin Komam tet yaꞌ Moisés:

—Moisés, wal tinanh ayo haqꞌabꞌ yibꞌanh haꞌ mar tiꞌ, kat ismeltzo haꞌ, kat istokano haꞌ yibꞌanh ebꞌnaj Egipto tiꞌ yebꞌ ej iscarruaje yebꞌ ischeh ebꞌnaj bꞌay ayahtoj, xhi Komam. 27 Yanayo yaꞌ Moisés isqꞌabꞌ yibꞌanh haꞌ mar tuꞌ, haxa yet issajbꞌilo xin, ishunbꞌanayo isbꞌa haꞌ hakaꞌtikꞌa bꞌay chꞌekꞌ haꞌ; haxa yet yelkanh ebꞌnaj Egipto yalni, istit haꞌ yibꞌanh ebꞌnaj, hak tuꞌ xin yu istokano ebꞌnaj xol haꞌ yu Komam. 28 Hayet ishunbꞌan isbꞌa haꞌ mar tuꞌ hunelxa, ismujikanto ej iscarruaje ebꞌnaj Egipto, yebꞌ noꞌ cheh, yebꞌ xin sunil ebꞌnaj soldado okto xol haꞌ yu istzujnayo ebꞌnaj Israel. Sunil issoldado naj faraón tuꞌ kami, matxa hunu mak kani. 29 Wal ebꞌnaj Israel tuꞌ xin, ekꞌto ebꞌnaj yiktabꞌal haꞌ mar tuꞌ yinh istajinal, hakaꞌ kꞌubꞌ yukanh ha haꞌ tuꞌ yinh isqꞌaxqꞌepal bꞌeh bꞌay ekꞌto ebꞌnaj xol haꞌ tuꞌ.

30 Hak tuꞌ xin yu iskolnilo Komam Dios ebꞌnaj Israel yul isqꞌabꞌ ebꞌnaj Egipto yinh huneꞌ tzꞌayik tuꞌ; yilni ebꞌnaj Israel isnimanil ebꞌnaj ah Egipto istiꞌ haꞌ mar. 31 Ebꞌnaj Israel tuꞌ, yil ebꞌnaj huneꞌ niman yip Komam isye tet ebꞌnaj ah Egipto yet istokano ebꞌnaj yul haꞌ. Yay jahno ebꞌnaj Israel, yaniko ebꞌnaj ismay Komam Dios, iskawxi iskꞌul ebꞌnaj yinh Komam yebꞌpaxo yinh yaꞌ Moisés, ischejabꞌ Komam.^a