Isbꞌit yaꞌ Moisés
15
Isbꞌitnhen yaꞌ Moisés isbꞌi Komam Dios yebꞌ ebꞌnaj Israel, yalni hakaꞌ tiꞌ:«Chonhbꞌitnihanh tet Komam Dios yuto kaw isyekanilo Komam yip;
yakanayto Komam noꞌ cheh xol haꞌ mar yebꞌ ebꞌnaj ayahto yibꞌanh noꞌ.
2 Chonhbꞌitnihanh tet Komam Dios, yuto haꞌ Komam chꞌaqꞌni jipanh yebꞌ kokolbꞌanilanh.
Haꞌ Komam koDiosalanh, yuxin chijalanh kꞌul-la tzotiꞌ yinh,
haꞌ Komam isDiosal jichmamanh, yuxin chijikanhanh Komam.
3 Komam Dios kaw helan yinh howal; Yahaw isbꞌi Komam.
4 Yakanayto Komam Dios ej iscarruaje naj faraón xol haꞌ mar yebꞌ issoldado naj;
yebꞌ ebꞌnaj yahawil soldado kaw niman yelapnoj tokano ebꞌnaj yich haꞌ Kajinh Mar tuꞌ.
5 Tokano ebꞌnaj yich haꞌ hakaꞌ chꞌen chꞌen,
ismujikanto ebꞌnaj yu haꞌ.
6 Mamin, hawatxꞌqꞌabꞌ kaw aykano yip,
haꞌ aqꞌni tanholo ebꞌnaj ayko ishowal tawinh.
7 Yu hawip kaw nimankanoj, hamaqꞌayo ebꞌnaj chꞌaqꞌni howal tawinh;
kaw tit hahowal yinh ebꞌnaj, istzꞌato ebꞌnaj hakaꞌ teꞌ chꞌim.
8 Haxu jaqꞌeqꞌ yinh sunil hawip ishunbꞌan isbꞌa ha haꞌ;
hakaꞌ kꞌubꞌ yukanh haꞌ istiꞌ huneꞌ bꞌeh yiktabꞌal haꞌ mar nimajal yich.
9 Yalni ebꞌnaj ayko ishowal jinhanh hakaꞌ tiꞌ:
Okojonh tzujno yintaj masanto chitzujcha ju;
kat jitxqꞌanto jinh yinh tzet chijilo tet ebꞌnaj, hak tuꞌ xin kaw aqꞌan kokꞌul.
Chijihti jespada kat kotanhtzenilo ebꞌnaj yu koqꞌabꞌ.
10 Yajaꞌ xin haxu jaqꞌeqꞌ, istokano ebꞌnaj yich haꞌ mar tuꞌ,
hakaꞌ isto chꞌen plomo yich haꞌ.
11 Mamin, machi hunu dios chu islahbꞌan isbꞌa yebꞌ hach.
Machi hunu mak kaw machi nino istxꞌojal yinh, yebꞌ kaw niman yelapno hakaꞌ hach.
Chawatxꞌe kꞌaybꞌalkꞌule yebꞌ tzet ye tuꞌ chonhxiw jilni. Hawet ay, yal-lax kꞌul-la tzotiꞌ tawinh.
12 Yet hawanilto haqꞌabꞌ kaw aykano yip, isbꞌiqꞌnito txꞌotxꞌ ebꞌnaj.
13 Yu iskꞌulal hakꞌul chawijbꞌakꞌo huneꞌ konhobꞌ hakoliltij.
Yu hawip xin chawito bꞌay ay hach, bꞌay machi nino istxꞌojal.
14 Hayet chiyabꞌen hunteqꞌanxa nan konhobꞌal chiluylunkanh,
haxa ebꞌnaj filisteo chixiwokanokanh ebꞌnaj.
15 Ebꞌnaj yahawil bꞌey Edom, chikꞌayokanokanh iskꞌul ebꞌnaj.
Haxa ebꞌnaj yahawil bꞌey Moab, chiluylunkanh ebꞌnaj yu xiwkilal,
haxapaxo ebꞌnaj cananeo xin chiyebꞌa isbꞌa ebꞌnaj.
16 Mamin, luylonojabꞌkanh ebꞌnaj yebꞌ xiwojabꞌ ebꞌnaj,
hakaꞌojabꞌ chꞌen chꞌen chukanilo ebꞌnaj yu yipal haqꞌabꞌ,
masanto yet chꞌekꞌkanto hakonhobꞌ, huneꞌ konhobꞌ kolbꞌililo hawu.
17 Mamin, iqꞌonhtojanh bꞌey huneꞌ witz hawet yehi,
huneꞌ txꞌotxꞌ sikꞌbꞌililo hawu bꞌay chonhehikꞌojanh,
bꞌey huneꞌ hawatut watxꞌebꞌil hawu yu haqꞌabꞌ.
18 Haꞌ Komam Dios Yahawil yinh sunilbꞌal tiempo,» xhi yaꞌ Moisés yebꞌ ebꞌnaj Israel yinh isbꞌit.
Isbꞌit ix María
19 Hayet yokto ej iscarruaje naj faraón yiktabꞌanil haꞌ mar yebꞌ ej noꞌ cheh bꞌay ayahto ebꞌnaj soldado, ishunbꞌan isbꞌa haꞌ mar tuꞌ yu Komam, istokano ebꞌnaj xol haꞌ; wal ebꞌnaj Israel ekꞌto ebꞌnaj yiktabꞌal haꞌ mar tuꞌ yinh istajinal.
20 Wal ix María, ix chihalni tzotiꞌ chitit tet Komam Dios, ix yanabꞌ yaꞌ Aarón, yiti ix ispandereta, haktikꞌapax tuꞌ ebꞌix yet ixal ix. Chisqꞌanhtzen ix ispandereta yebꞌ ebꞌix, chixin kanhalwipaxo ebꞌix. 21 Chalni ix María yinh isbꞌit hakaꞌ tiꞌ:
«Bꞌitnanhwe tet Komam Dios, yuto kaw maꞌisyekanilo Komam tato kaw aykano yip,
yuto mayakanayto Komam ej noꞌ cheh yebꞌ ebꞌnaj ayahto yibꞌanh noꞌ xol haꞌ mar,» xhi ix.
2. CHITO EBꞌNAJ ISRAEL YINH ISBꞌEL BꞌEY WITZ SINAÍ
(15:22–18:27)
Huneꞌ ha haꞌ kꞌah
22 Lahwi tuꞌ xin, yinilo yaꞌ Moisés ebꞌnaj Israel istiꞌ haꞌ Kajinh Mar, isto ebꞌnaj sat txꞌotxꞌ desierto, Shur isbꞌi. Oxebꞌ xin tzꞌayik bꞌelwi ebꞌnaj, machi xin nino ha haꞌ ilcha yu ebꞌnaj. 23 Haxa yet yapni ebꞌnaj bꞌey Mara, mach yukꞌ ebꞌnaj ha haꞌ ay bꞌey tuꞌ yuto kaw kꞌah haꞌ, yuxin Mara yako ebꞌnaj isbꞌiho huneꞌ txꞌotxꞌ tuꞌ.a
24 Wal anma Israel tuꞌ, ok bꞌuchwal yinh yaꞌ Moisés, isqꞌambꞌen hakaꞌ tiꞌ: «¿Tzet xin chijukꞌ tinanh?» xhi anma. 25 Isqꞌanni yaꞌ Moisés iskolwal Komam Dios, isyeni Komam huneꞌ teꞌ nichꞌan qꞌebꞌtaj tet yaꞌ, yanayto yaꞌ teꞌ xol haꞌ, hak tuꞌ xin yu yel iskꞌahil haꞌ.
Yaqꞌni Komam ischejbꞌanil tet ebꞌnaj bꞌey tuꞌ yebꞌ yinh tzet chute ebꞌnaj isbꞌeybꞌal, yunhe yilni Komam tato yijem ebꞌnaj. 26 Yalni Komam tet ebꞌnaj: «Tato cheyabꞌeto tzet chiwalan, hanin Heyahaw intiꞌan yebꞌ heDiosal wehan, yebꞌ ta chewatxꞌe istoholal yul insatan, cheyijen chejbꞌanile chiwalan, kat hewatxꞌen tzet chiwalan; wal tuꞌ, machi hunu isyaꞌtajil chiwatijan teyibꞌanh, hakaꞌ hunteqꞌan watijan yibꞌanh ebꞌnaj Egipto, yuto hanin Heyahaw intiꞌan chexwaqꞌ kawxojan,» xhi Komam.
27 Lahwi tuꞌ xin yapni ebꞌnaj bꞌey Elim, bꞌey tuꞌ xin ay 14 (kanhlanhebꞌ) isnuqꞌ ha haꞌ yebꞌ 70 (lahonhebꞌ iskanhwinaj) teꞌ palmera aykanh, iswatxꞌenkanh ebꞌnaj ismantiado yatuto istiꞌ haꞌ.