—Estam bꞌey Egipto konhkamanh yu Komam sataj, yuto bꞌey tuꞌ chonhay tzꞌonhno iskꞌatanh isxihal noꞌ chibꞌe, kat xin kowaꞌi, masanto kaw chinohkano kokꞌul, yajaꞌ makonhheyitijanh sat txꞌotxꞌ desierto tiꞌ yunhe kokamanh yu wahil, xhi ebꞌnaj.

4 Yalni Komam Dios tet yaꞌ Moisés hakaꞌ tiꞌ:

—Chiwatijan tzet chislo anma tiꞌ satkanh, hunun tzꞌayik xin yelto anma yinokanh tzet chislo tuꞌ, hanhe xin hanta kꞌuxan islohni anma yinh hunun tzꞌayik haꞌnhe chikanh; hak tuꞌ xin chu wilnihan tato cheyije chejbꞌanile chiwaltiꞌan. 5 Haxa yinh iswajebꞌ tzꞌayik xin, yet cheyinikanh tzet cheloh tuꞌ, cheyikanto tzet cheloh yinh hunuxa tzꞌayik, xhi Komam tet yaꞌ Moisés.

6 Yalni yaꞌ Moisés yebꞌ yaꞌ Aarón tet anma Israel:

—Yinh qꞌejbꞌiyal cheyohtanheloj tato haꞌ Komam Dios kexinilti bꞌey Egipto. 7 Haxa yinh sakꞌayal xin cheyil isqꞌaqꞌal yip Komam Jahawil; yuto xayabꞌe Komam hebꞌuchwa yinh, wal xin hanhonhtiꞌanh, ¿mak anmahil honhanh yuxin kexbꞌuchwa jinhanh? xhi ebꞌyaꞌ.

8 Yalnipaxo yaꞌ Moisés:

—Yinh qꞌejbꞌiyal, chibꞌe chekꞌux yu Komam, haxa yinh sakꞌayal xin pan chaqꞌ Komam hewabꞌ, yaj yinh kaw niman. Wal xin xayabꞌe Komam hebꞌuchwa yinh, yuto ¿mak anmahil honhanh heyalni? Yet hebꞌuchwa tuꞌ, maxhtaj jinhanh kexbꞌuchwahi, wal xin yinh Komam Dios kexbꞌuchwahi, xhi yaꞌ.

9 Yalni yaꞌ Moisés tet yaꞌ Aarón hakaꞌ tiꞌ:

—Hal tet ebꞌnaj Israel, hitzojabꞌti ebꞌnaj yinh sat Komam Dios, wal xin xayabꞌe Komam isbꞌuchwa ebꞌnaj, xhi yaꞌ Moisés.

10 Hayet lanhan istzotel yaꞌ Aarón tet ebꞌnaj Israel tuꞌ, istꞌanhxito ebꞌnaj sat txꞌotxꞌ desierto, isyeni isbꞌa isqꞌaqꞌal yip Komam Dios xol huneꞌ moyan. 11 Istzotel Komam tet yaꞌ Moisés, yalni Komam:

12 —Xawabꞌehan isbꞌuchwa ebꞌnaj Israel tiꞌ. Tzotelanh tet ebꞌnaj, kat hawalni hakaꞌ tiꞌ: “Yinh qꞌejbꞌiyal, chibꞌe chekꞌuxuꞌ, haxa yinh sakꞌayal xin pan chewah masanta kaw chinohkano hekꞌul. Hak tuꞌ chu yohtanhenilo ebꞌnaj tato hanintiꞌan Yahaw hinan, isDiosal ebꞌnaj wehan,” xhi Komam, kachi.

13 Yinhtikꞌa huneꞌ tzꞌayik tuꞌ, yul ej noꞌ ahomtzꞌikin, isnohikto noꞌ yul iscampamento ebꞌnaj Israel tuꞌ, haxa yet issajbꞌilo xin nohnayo yal chew sat txꞌotxꞌ, yinhla iscampamento ebꞌnaj. 14 Haxa yet istajkanh yal chew tuꞌ, iskankano wejna hunteqꞌan hakaꞌ chꞌen chew sat txꞌotxꞌ. 15 Mach xin yohtajo ebꞌnaj Israel tzet ye tuꞌ, yuxin hayet yilni ebꞌnaj, isqꞌambꞌen ebꞌnaj hakaꞌ tiꞌ: «¿Tzet ye huneꞌ tiꞌ?» xhi ebꞌnaj. Yalni yaꞌ Moisés tet ebꞌnaj:

—Haꞌ ton huneꞌ tiꞌ chiyaqꞌ Komam Dios helobꞌ. 16 Haꞌ huneꞌ chejbꞌanile tiꞌ xin chaqꞌkano Komam. Hunun hex tiꞌ cheyikanh hantatikꞌa kꞌuxan heloni yinh hunu tzꞌayik, hatatikꞌa isbꞌisil anma ay yul heyatut, huneꞌ malbꞌal kabꞌ litro yul, cheyito yinh hunun anma, xhi yaꞌ.

17 Hakaꞌ yu yalni yaꞌ Moisés, hak tuꞌ yute ebꞌnaj Israel, ay ebꞌnaj niman yitoj, ay ebꞌnaj hanikꞌnhe. 18 Hakaꞌtikꞌa ismalil hal-laxi. Ebꞌnaj niman yet yitoj matxa tzet kankano tet ebꞌnaj, haxa ebꞌnaj hanikꞌnhe yitoj, kaw kꞌuxan islohni ebꞌnaj, matxa tzet kankanoj. Hunun ebꞌnaj Israel yikanh ebꞌnaj yet hatatikꞌa hanta kꞌuxan islohni ebꞌnaj yul yatut.

19 Yalnipaxo yaꞌ Moisés tet ebꞌnaj:

—Machi hunu hex tiꞌ cheyakano hanikꞌoxa yinh hunuxa tzꞌayik, xhi yaꞌ.

20 Yajaꞌ ay ebꞌnaj tiꞌ xin, mach isyije tzet yal yaꞌ Moisés, iskꞌubꞌakano ebꞌnaj hanikꞌxa tzet chislo tuꞌ yinh hunxa tzꞌayik. Haꞌ tzet iskꞌubꞌakano ebꞌnaj tuꞌ, ok ishahaꞌil yebꞌ kaw eh sam. Kaw xin tit ishowal yaꞌ Moisés yinh ebꞌnaj mach yijen hakaꞌ tzet yal yaꞌ.

21 Hunun sakꞌayal xin, yelto anma Israel yinokanh tzet chislo, hakaꞌtikꞌa kꞌuxan islohni yinh hunun tzꞌayik. Haxa yet chiꞌahilo tzꞌayik xin, kat yulito hantato tzet chikankano sat txꞌotxꞌ. 22 Haxa yinh iswaj tzꞌayik, huneꞌto ekꞌbꞌal yet hunun anma yikanh; chal yelapnoj ta kanhkanh litro yikanh hunun anma. Wal ebꞌnaj yahawil xol anma Israel, to ebꞌnaj yalaꞌ huneꞌ tuꞌ tet yaꞌ Moisés. 23 Istaqꞌwi yaꞌ Moisés tet ebꞌnaj:

—Hakton tuꞌ yute yalni Komam: “Yet hekal istzꞌayikal xewilal, huneꞌ tzꞌayik tuꞌ yet Komam yehi; yuxin tahtzewekano tinanh tzet cheloh hekal, yebꞌ aqꞌwekano huju tinanh tzet cheloh hekal, haꞌ tzet machi lahwi heyu tinanh chekꞌubꞌakanokanh, yu heloni yinh hunuxa tzꞌayik,” kachi, xhi Komam, xhi yaꞌ Moisés.

24 Isyijen ebꞌnaj hakaꞌ yute yalni yaꞌ Moisés, haꞌ tzet chislo ebꞌnaj iskꞌubꞌakano yinh hunxa tzꞌayik, machi xin eh sam, machi okpaxo ishahaꞌil. 25 Haxa yinh hunxa tzꞌayik xin, yalni yaꞌ Moisés tet anma Israel:

—Lohwe tzet cheloh hekꞌubꞌakano yet ewi; tinanh istzꞌayikal xewilal, yet Komam ye huneꞌ tzꞌayik tiꞌ. Yinh huneꞌ tzꞌayik tiꞌ, machi nino tzet chilolax chiꞌilcha heyu yinhla hecampamento. 26 Yulbꞌal wajebꞌ tzꞌayik chexelto heyiqꞌaꞌkanh tzet cheloh, haxa yinh ishuj tzꞌayik xin, istzꞌayikal xewilal, machi nino tzet chiꞌayi, xhi yaꞌ Moisés.

27 Yajaꞌ ay ebꞌnaj elto sayno yinh ishuj tzꞌayik tuꞌ, yaj matzet ilcha yu ebꞌnaj. 28 Yalni Komam tet yaꞌ Moisés:

—¿Bꞌaqꞌinh chebꞌej hemanhkꞌon inchejbꞌanilan yebꞌ tzet chiwalan? 29 Txumwekꞌanabꞌi, tato hanin Yahawintiꞌan, hanin chiwalan tato ay huneꞌ tzꞌayik xewilal; yuxinto yinh iswaj tzꞌayik chiwaqꞌan tzet cheloh yinh kabꞌ tzꞌayik. Haxa yinh ishujebꞌ tzꞌayik xin wal heye yul heyatut, machi hunu mak chiꞌeltoj, xhi Komam.

30 Hak tuꞌ xin yute anma, xew anma yinh ishuj tzꞌayik.

31 Ebꞌnaj Israel, maná^a yako ebꞌnaj isbꞌiho tzet chiyikanh yinh hunun tzꞌayik tuꞌ. Maná tuꞌ, saj jilni hakaꞌ yinhatil teꞌ culantro; kaw xin chiꞌ kowani, hakaꞌ ixim wonhkꞌox ayko noꞌ kabꞌ xol.

32 Lahwi tuꞌ, yalni yaꞌ Moisés:

—Haꞌ huneꞌ chejbꞌanile tiꞌ chaqꞌ Komam Dios: “Nohtzewe huneꞌ malbꞌal kabꞌ litro yu maná, kat hekꞌubꞌanto tet heyuninal chipoholto teyinh; yunhe yilni tzet cheloh waqꞌan yet heyekꞌ sat txꞌotxꞌ desierto, yet kexwiniltijan bꞌey Egipto,” xhi Komam, xhi yaꞌ Moisés.

33 Yalni yaꞌ Moisés tet yaꞌ Aarón:

—Iti hunu xhalu, kat hawanayto kabꞌ litro maná yul, kat hato hawanoyo sata Komam Dios, yunhe iskꞌubꞌalaxtoj, yunhe yilni heyuninal chipohilto teyinh, xhi yaꞌ Moisés.

34 Hakaꞌtikꞌa yute yalni Komam Dios tet yaꞌ Moisés, hak tuꞌ yute yaꞌ Aarón; to yaꞌ iskꞌubꞌakanto huneꞌ xhalu tuꞌ sata huneꞌ Kaxha, bꞌay ayayto istꞌinhanil istrato Komam Dios.

35 Ebꞌnaj Israel tuꞌ, 40 (kawinaj) habꞌil isloh ebꞌnaj maná masanta apni ebꞌnaj sat txꞌotxꞌ bꞌay ay anma. Isloh ebꞌnaj maná tuꞌ masanta apni ebꞌnaj bꞌey ismohonal txꞌotxꞌ Canaán.

36 Huneꞌ malbꞌal tuꞌ, gomer isbꞌi, 10 (lahonhebꞌ) gomer yinh huneꞌ efa, haꞌ chaliloj 20 (hunkꞌal) litro.