—Moisés, aqꞌ jaꞌanh chijukꞌanh, xhi ebꞌnaj. Istaqꞌwi yaꞌ Moisés tet ebꞌnaj:

—¿Tzet yinh xin cheyaliko hunteqꞌan tiꞌ yinh insatan? ¿Tzet yinh yuxin cheyako Komam Dios yinh ilwebꞌal? xhi yaꞌ.

3 Yajaꞌ xin kaw chitaj istiꞌ anma Israel tuꞌ, yu machi ha haꞌ bꞌey tuꞌ; yuxin ok ebꞌnaj bꞌuchwal yinh yaꞌ Moisés hakaꞌ tiꞌ:

—¿Tzet yinh yuxin kaxhok konhawiqꞌaltijanh sat txꞌotxꞌ Egipto? ¿Tzet yinh xin konhhawitijanh bꞌey tiꞌ yunhe kokamanh yebꞌ juninalanh yebꞌ konoqꞌanh yu tajintiꞌal? xhi ebꞌnaj.

4 Istxahli yaꞌ Moisés tet Komam Dios, yalni yaꞌ hakaꞌ tiꞌ:

—Mamin, tzet wal wutenan anma tiꞌ, hayet xakintibꞌayojan yu, kat kinisqꞌojnokamojan anma, xhi.

5 Istaqꞌwi Komam tet yaꞌ:

—Bꞌabꞌanh sata anma Israel yebꞌ haywanho ebꞌnaj icham winaj Israel, kat hawinito haqꞌojoch tawintaj, teꞌ hamaqꞌayo yibꞌanh ha haꞌ. 6 Chach wechmahan bꞌey witz Horeb, yibꞌanh iswiꞌ chꞌen niman chꞌen, yuto hayet chamaqꞌnayo haqꞌojoch yibꞌanh chꞌen, kat yelilo ha haꞌ yul iskꞌul chꞌen, kat yukꞌni anma haꞌ, xhi Komam.

Hak tuꞌ xin yute yaꞌ Moisés tuꞌ sata ebꞌnaj ichamta winaj Israel. 7 Yuxin Masah yebꞌ Meriba yako yaꞌ Moisés isbꞌiho txꞌotxꞌ bꞌay yu huneꞌ tuꞌ; yuto bꞌuchwa anma yinh yaꞌ Moisés yebꞌ xin yilwepaxo anma Israel tuꞌ Komam Dios yet yalni hakaꞌ tiꞌ: «¿Aymiko Komam Dios jetbꞌihoj makato machoj?» xhi ebꞌnaj.

8 Lahwi tuꞌ, yapni ebꞌnaj amalecita bꞌey txꞌotxꞌ Refidim, bꞌay ayayo ebꞌnaj Israel. Yaniko ebꞌnaj howal yinh ebꞌnaj Israel tuꞌ. 9 Yuxin yal yaꞌ Moisés tet yaꞌ Josué:

—Wal tinanh sayilo haywanho ebꞌnaj winaj xol anma Israel tiꞌ, kat heto aqꞌo howal yinh ebꞌnaj amalecita tiꞌ; wal hinan xin, chintohan yet hekal yinh iswiꞌ witz, kat winitojan teꞌ qꞌojoch yakaniko Komam yul inqꞌabꞌan yunhe isyeni kꞌaybꞌalkꞌule, xhi yaꞌ Moisés.

10 Isyijen yaꞌ Josué tzet yal yaꞌ Moisés, yaniko yaꞌ howal yebꞌ ebꞌnaj yetbꞌi yinh ebꞌnaj amalecita. Wal yaꞌ Moisés yebꞌ yaꞌ Aarón yebꞌ yaꞌ Hur ahto ebꞌyaꞌ yinh iswiꞌ witz. 11 Hayet chanikanh yaꞌ Moisés isqꞌabꞌ satkanh yet chaqꞌlen ebꞌnaj howal tuꞌ, haꞌ ebꞌnaj Israel chiqꞌoji yinh ebꞌnaj amalecita; yajaꞌ hayet chiyinayo yaꞌ isqꞌabꞌ tuꞌ, haꞌ ebꞌnaj amalecita chiqꞌoji yinh ebꞌnaj Israel. 12 Yajaꞌ yu kaw xasikilo yaꞌ Moisés yanikanh isqꞌabꞌ, yuxin issay ebꞌnaj huneꞌ chꞌen chꞌen yay tzꞌonhno yaꞌ Moisés yibꞌanh chꞌen. Yok yaꞌ Aarón yebꞌ yaꞌ Hur istzabꞌnokanh isqꞌabꞌ yaꞌ; huneꞌ yaꞌ yinh iswatxꞌqꞌabꞌ yaꞌ, huneꞌxa yaꞌ yinh ismekqꞌabꞌ yaꞌ. Hak tuꞌ yu istecha yu yaꞌ Moisés yanikanh isqꞌabꞌ satkanh masanto yet isto tzꞌayik. 13 Hak tuꞌ yu isqꞌoji yaꞌ Josué yebꞌ ebꞌnaj yetbꞌi yinh ebꞌnaj amalecita; ismaqꞌnikano kamo ebꞌnaj ebꞌnaj yu chꞌen espada.

14 Lahwi tuꞌ, yalni Komam Dios tet yaꞌ Moisés:

—Tzꞌibꞌnhekano huneꞌ tiꞌ yul hum, yunhe isnahlaxtij, kat hawalni tet yaꞌ Josué ta chintanhtzekanilojan sunil anma amalecita tiꞌ, matxa yekꞌlenal chikani, xhi Komam.

15 Lahwi tuꞌ, islatzꞌbꞌankanh yaꞌ Moisés chꞌen chꞌen, yaniko yaꞌ isbꞌi chꞌen hakaꞌ tiꞌ Jahawil-nisi.^a 16 Yalni yaꞌ Moisés: «Sunilbꞌal tiempo chiyako Komam Dios howal yinh anma amalecita tiꞌ, yuto yako anma howal yinh Komam,» xhi yaꞌ.