Yet yapni naj Jetro istukleꞌ yaꞌ Moisés
18
Yabꞌen naj Jetro, naj sacerdote bꞌey Madián, naj ismam yixal yaꞌ Moisés sunil tzet iswatxꞌe Komam yinh yaꞌ Moisés yebꞌ yinh konhobꞌ Israel; yabꞌenpaxo naj ta xayilo Komam ebꞌnaj Israel sat txꞌotxꞌ Egipto. 2 Yinito naj Jetro ix Séfora yet isto naj tuꞌ, yuto yet yalanhto yaqꞌpaxo yaꞌ Moisés ix tet naj Jetro, ismam ix. 3 Yinipaxto naj kawanh iskꞌahol yaꞌ Moisés tuꞌ. Huneꞌ naj Gersón isbꞌi yuto yet ispitzkꞌa naj yalni yaꞌ Moisés hakaꞌ tiꞌ: «Hanintiꞌan, nan konhobꞌal hinan sat huneꞌ txꞌo txꞌotxꞌ tiꞌ,» xhi yaꞌ. 4 Haxa hunxa iskꞌahol yaꞌ Moisés tuꞌ, Eliezer isbꞌi, yuto yet ispitzkꞌa naj, yal yaꞌ Moisés hakaꞌ tiꞌ: «Haꞌ isDiosal inmaman, haꞌ makolwa winhan kiniskolnihan tet chꞌen espada yul isqꞌabꞌ naj faraón,» xhi.5 Yapni naj Jetro iskꞌatanh yaꞌ Moisés, tzujaniko xin yixal yaꞌ Moisés yinta naj yebꞌ kawanh iskꞌahol yaꞌ; apni naj sat txꞌotxꞌ desierto, yuto haꞌ tuꞌ ay yaꞌ Moisés yebꞌ ebꞌnaj Israel yul iscampamento, satakꞌti huneꞌ witz kaw txahul. 6 Yalni naj Jetro tet yaꞌ Moisés tuꞌ:
—Hanin Jetro intiꞌan, ismam hawixal wehan, makintitan kach wilaꞌan, tzujan hawixal yebꞌ kawanh hakꞌahol wintajan, xhi naj.
7 Hayet yilni yaꞌ Moisés naj Jetro tuꞌ, yelti yaꞌ ischahno naj, yay nhohno yaꞌ sata naj, istzꞌohni yaꞌ isqꞌotx naj; lahwi istioxhli ebꞌnaj tet hunun, yokto ebꞌnaj yul mantiado aykanh yatutoj. 8 Yichiko yaꞌ Moisés yalni tet naj Jetro yinh sunil isyaꞌtajil yayo Komam Dios yibꞌanh naj faraón yebꞌ yibꞌanh ebꞌnaj ah Egipto yunhe isyenilo iskꞌulal iskꞌul yinh anma Israel. Yalnipaxo yaꞌ Moisés yinh ej isyaꞌtajil yaqꞌle ebꞌnaj Israel tuꞌ yinh isbꞌel, yebꞌ yinh tzet yu iskolni Komam ebꞌnaj.
9 Kaw tzala naj Jetro yabꞌen hanta iskꞌulal iskꞌul Komam Dios isyelo yinh ebꞌnaj Israel, yet iskolnilo Komam ebꞌnaj Israel yul isqꞌabꞌ ebꞌnaj ah Egipto. 10 Hayet yabꞌen naj Jetro sunil tzet yal yaꞌ Moisés tuꞌ, yalni naj hakaꞌ tiꞌ:
—Chiwalan kꞌul-la tzotiꞌ yinh Komam Dios, yuto kexiskolilo yul isqꞌabꞌ naj faraón yebꞌ yul isqꞌabꞌ ebꞌnaj Egipto. Xakexiskolilo Komam yalanh isyaꞌtajil bꞌay ayexikoj. 11 Wal tinanh, chiwohtanhelojan ta hanhe Komam Dios kaw aykano yelapnoj sata sunil tzet chihal-lax diosal; yuto hayet yinikanh isbꞌa ebꞌnaj Egipto tuꞌ istanhtzenilo Komam ebꞌnaj, xhi naj.
12 Ispotxꞌni naj Jetro no noqꞌ, yaqꞌni naj noꞌ yinh xahanbꞌalil tet Komam Dios. Yaqꞌnipaxo naj hunteqꞌanxa isyebꞌalqꞌabꞌ tet Komam. Yapni yaꞌ Aarón yebꞌ ebꞌnaj ichamta winaj Israel iskꞌatanh naj Jetro tuꞌ, iskꞌuxni ebꞌnaj ischibꞌehal no noqꞌ ok yinh xahanbꞌalil sata Komam Dios.
Saylaxilo ebꞌnaj juez xol ebꞌnaj Israel yu yaꞌ Moisés
13 Haxa yet hunxa tzꞌayik yay tzꞌonhno yaꞌ Moisés sata konhobꞌ Israel, yu yilni yaꞌ yinh tzet chiꞌeliko howal maka hunuxa tzet chiyoche anma Israel. Kaw xin sunilbꞌal tzꞌayik linhankanh anma Israel sata yaꞌ Moisés. 14 Hayet yilni naj Jetro isyaꞌtajil chiyaqꞌle anma yebꞌ yaꞌ Moisés tuꞌ, yalni naj Jetro tet yaꞌ Moisés:
—¿Tzet yinh yuxin hachukilnhe chaxhay tzꞌonhno sata sunil anma yebꞌ xin sunilbꞌal tzꞌayik linhankanh anma tasataj? xhi naj.
15 Istaqꞌwi yaꞌ Moisés tet naj:
—Chul anma insatajan yuto chiyoche ta chintzotelan yinh tet Komam Dios; 16 yebꞌ xin yet ay howal xol anma, kat yul yalno wetan yunhe wilnihan yinh tzet chiꞌelikoj, kat xin walnihan chejbꞌanile yebꞌ kuybꞌanile yet Komam Dios tet, xhi yaꞌ Moisés tuꞌ.
17 Yajaꞌ xin yal naj Jetro tet yaꞌ Moisés hakaꞌ tiꞌ:
—Mach kꞌulo hakaꞌ tiꞌ; 18 yuto chachekꞌ yaꞌ, kat yekꞌpaxo yaꞌ anma Israel, kaw hachukilnhe xol huneꞌ niman munil tiꞌ, yuxin chitibꞌayo hawu. 19 Wal xin, abꞌe tzet chiwalan, haꞌojabꞌ xin Komam chikolwa tawinh. Chachtzotel yinh anma tiꞌ tet Komam Dios, kat hawalni tet Komam tzet chiyoche anma iswatxꞌeyo yinh istoholal. 20 Wal tet anma xin, hal ischejbꞌanil Komam tet yebꞌ kuybꞌanile chal Komam, kat hawalni tet yinh tzet wal iswatxꞌeni yebꞌ yinh tzet chu yehikꞌo yul sat yibꞌanhqꞌinal tiꞌ.
21 »Yuxin tinanh, sayilo haywanho ebꞌnaj winaj ay isnabꞌal xol ebꞌnaj Israel tiꞌ, ebꞌnaj chixiw tet Komam Dios, yebꞌ isyelalnhetikꞌa tzet chiyala, yebꞌ mach ayoko yanma yinh chꞌen melyu; kat hawaniko ebꞌnaj iswiꞌehalo yinh hunta majan anma Israel. Ay ebꞌnaj chawako yinh hunta majan yinh mil isbꞌisil, yebꞌpaxo yinh hunta majan yinh 100 (hokꞌal) isbꞌisil, yebꞌpaxo hunta majan yinh 50 (lahonh yoxkꞌal) yebꞌ xin hunta majan yinh 10 (lahonhwanh) isbꞌisil. 22 Haꞌ ebꞌnaj tuꞌ xin, chiꞌilni yinh tzet chiꞌeliko anma yet ay tzet chiyoche iswatxꞌeꞌ; yajaꞌ ta ay tzet ye tuꞌ kaw yaꞌta yehi tawet chiyiti ebꞌnaj. Haxa hunteqꞌan mach yaꞌtajoj, haꞌ ebꞌnaj chiwatxꞌeni; haxinwal machnhetaj hach chaxhekꞌ yaꞌ, ayxa ebꞌnaj chikolwa tawinh. 23 Ta chayije tzet chiwaltiꞌan, yebꞌ ta chischah iswiꞌ Komam, chawako yinh ismunil, hak tuꞌ xin mach chitibꞌayo anma Israel hawu. Yebꞌpaxo hayet chihul anma iswatxꞌeyo hunu tzet ye tuꞌ, yinhojabꞌ tzalahilal chipaxto yatut, xhi naj Jetro tet yaꞌ Moisés.
24 Sunil tzet yal naj Jetro tet yaꞌ Moisés tuꞌ, isyije yaꞌ. 25 Issaynilo yaꞌ haywanh ebꞌnaj winaj kaw ay isnabꞌal xol ebꞌnaj Israel, yaniko yaꞌ ebꞌnaj iswiꞌehalo yinh hunta majan yinh mil isbꞌisil, hunta majan 100 (hokꞌal), hunta majan 50 (lahonh yoxkꞌal) yebꞌ hunta majan yinh 10 (lahonhwanh) isbꞌisil. 26 Haꞌ ebꞌnaj tuꞌ xin, ok ilno yinh tzet chiꞌeliko tzetaj ye tuꞌ choche anma Israel iswatxꞌeyoj yinh hunu tzꞌayik. Wal tzet ye tuꞌ yaꞌta iswatxꞌayoj, haꞌ tet yaꞌ Moisés chito ebꞌnaj; wal tzet subꞌuta iswatxꞌayo xin haꞌ ebꞌnaj chiwatxꞌenayoj. 27 Wal naj Jetro taqꞌlikano naj tet yaꞌ Moisés, ispaxto naj bꞌey iskonhobꞌ.