3. YET YAQꞌNI KOMAM DIOS ISTRATO TET ANMA ISRAEL BꞌEY WITZ SINAÍ
(19:1–24:18)
Yet yapni anma Israel sat txꞌotxꞌ Sinaí
19
Yinhxa yoxebꞌ ixahaw yelti ebꞌnaj Israel sat txꞌotxꞌ Egipto yapni ebꞌnaj sat txꞌotxꞌ desierto bꞌey witz Sinaí.a 2 Hayet yapni ebꞌnaj bꞌey txꞌotxꞌ Sinaí tuꞌ, ispeto ebꞌnaj sat txꞌotxꞌ Refidim; yuto haꞌ tuꞌ ehayo ebꞌnaj hayebꞌ tzꞌayik yinh isbꞌel. Hayet yapni ebꞌnaj bꞌey txꞌotxꞌ Sinaí, satakꞌti huneꞌ witz tuꞌ ehayo ebꞌnaj. 3 Yahto yaꞌ Moisés iswiꞌ witz tuꞌ yu istzotel yaꞌ tet Komam Dios, yawten Komam yaꞌ, yalni Komam hakaꞌ tiꞌ:—Sunil tzet chiwalan tawet tiꞌ, hal tet anma pohchana yinh yuninal yaꞌ Jacob, haꞌ ton anma Israel.b 4 Hex kaw hex heyil tzet wutehan anma ah Egipto; heyilnipaxo iskꞌulal wayojan teyibꞌanh, kexwinitijan bꞌay ay intiꞌan; hakaꞌto yibꞌanh noꞌ tꞌiw kexwakojan yet kexwinitijan. 5 Yuxin ta cheyije sunil tzet chiwalan kat heyijenpaxo intratohan, chexwakojan inkonhobꞌojan, kaw ay yelapno chexelkaniko yul insatan xol sunil ej konhobꞌ. Sunil txꞌo txꞌotxꞌ ay yul sat yibꞌanhqꞌinal tiꞌ, wetan txꞌotxꞌ. 6 Chexok sacerdotehal yinh inmunilan, chexinpohilojan wetojan. Hal hunteqꞌan tzet chiwalan tiꞌ tet anma Israel, xhi Komam tet yaꞌ Moisés.
7 Yayti yaꞌ Moisés, yawten yaꞌ ebꞌnaj ichamta winaj Israel, yok yaꞌ yalno sunil tzet ischej Komam yalaꞌ yaꞌ tet anma Israel. 8 Hayet yabꞌen anma Israel tzet yal yaꞌ Moisés, kaw hun yu istaqꞌwi sunil, yalni hakaꞌ tiꞌ:
—Sunil tzet ischej Komam Dios kowatxꞌe tuꞌanh, chikoyijehanh, xhi anma Israel.
Isto yaꞌ Moisés iswiꞌ witz tuꞌ, yinito yaꞌ ispaj istzotiꞌ anma Israel tet Komam Dios. 9 Yalni Komam tet yaꞌ Moisés tuꞌ:
—Chinye hinbꞌahan tawet xol huneꞌ moyan kaw tat, yu yabꞌen anma Israel yul innuqꞌan yet chintzotelan tawet, hak tuꞌ xin, chu iskawxi iskꞌul anma Israel tawinh, xhi Komam. Yalni yaꞌ Moisés ispaj istzotiꞌ anma Israel tet Komam Dios. 10 Yalnipaxo Komam Dios tet yaꞌ Moisés:
—Asiꞌ, kat hawalni tet anma Israel ta tinanh yebꞌ hekal chissajnhe isbꞌa, chispohnilo isbꞌa xol istxꞌojal. 11 Haxa yet kabꞌe xin kꞌulxa yehi, yuto yet kabꞌe tuꞌ chinayilojan yibꞌanh iswiꞌ witz Sinaí sata sunil anma Israel. 12 Yuxin chawako yechel yinhla ishoyanil yich witz Sinaí tuꞌ yunhe machi mak chiꞌekꞌto bꞌay ayko yechel tuꞌ, kat hawalni tet ta kaw txahul huneꞌ witz tuꞌ, yuxin machi hunu mak chu yahto iswiꞌ witz, maka yekꞌ yinhla ishoyani; ta ay mak chihitziko xin, chiꞌaqꞌlaxkamoj. 13 Yuto hayet chimaqꞌlaxkamo tuꞌ, machi hunu mak chiꞌaniko isqꞌabꞌ yinh, wal xin chꞌen chiqꞌojlaxiko yinh maka teꞌ litꞌ chꞌaqꞌni kamoj. Machi yok yinh, ta anma maka hunu no noqꞌ, wal xin yilal yaqꞌlax kamoj; kachannhe yet chiyabꞌen yoqꞌtzelax noꞌ yukꞌaꞌ chiw, wal tuꞌ chu ishitziko anma iskawilal yich witz Sinaí tiꞌ, xhi Komam tet yaꞌ Moisés.
14 Lahwi tuꞌ, yayti yaꞌ Moisés iswiꞌ Sinaí iswatxꞌeno anma Israel yunhe iskutxbꞌaniko isbꞌa yaniko ismay Komam Dios; sunil anma istxꞌah xil isqꞌap. 15 Yalni yaꞌ Moisés tet anma:
—Watxꞌewe hebꞌa yebꞌ xin mach chexway yebꞌ heyixal masanto yet kabꞌe, xhi yaꞌ Moisés.
16 Haxa yet issajbꞌilo yinh yox tzꞌayik, yichiko isjeplahi yebꞌ ismaqꞌwa kꞌuh; yok huneꞌ niman moyan kaw qꞌej yibꞌanh iswiꞌ witz Sinaí, yabꞌelax yoqꞌ chꞌen trompeta yinh kaw ip; isluylunkanh anma Israel ayikto yul iscampamento. 17 Hayet yilni yaꞌ Moisés huneꞌ tuꞌ, yinilo yaꞌ anma yul iscampamento tuꞌ, yinito yaꞌ yinhla ishoyanil witz Sinaí, yuto haꞌ tuꞌ chischah isbꞌa anma Israel yebꞌ Komam Dios. 18 Sunil witz Sinaí tuꞌ chiꞌah isnhubꞌal, yuto ayilo Komam Dios yibꞌanh witz xol qꞌa qꞌaꞌ. Xanhe topton yah nhubꞌ, hakaꞌ isnhubꞌal horno kaw ayko qꞌaꞌ yinh, kaw xin chibꞌili witz tuꞌ yinh kaw ip. 19 Wal noꞌ yukꞌaꞌ chiw kaw ip islahniko yoqꞌtzelax noꞌ. Hayet chitzotel yaꞌ Moisés yebꞌ Komam Dios, hakaꞌ ismaqꞌwa kꞌuh, hak tuꞌ yu istaqꞌwi Komam tet yaꞌ.
20 Ayilo Komam bꞌey kaw nahat yekanh yinh iswiꞌ witz Sinaí tuꞌ, yawtenahto Komam yaꞌ Moisés tuꞌ tzotelo tet, yahto yaꞌ Moisés. 21 Yalni Komam tet yaꞌ:
—Ayanhtoj kat hawalni tet anma Israel tiꞌ ta mach chipalkꞌonikto bꞌay ayko yechel yinhla ishoyanil witz tiꞌ, machojabꞌ xin chinyilpaxojan, yuto ta chinil-laxan yu anma haywanhtam mak chikami. 22 Hakpax tuꞌ, ebꞌnaj sacerdote chitikꞌa hitziko inkꞌatanhan yilal issajnhen isbꞌa ebꞌnaj, ta mach xin intanhtzetalojan ebꞌnaj, xhi Komam tet yaꞌ.
23 Istaqꞌwi yaꞌ Moisés tet Komam:
—Mamin, machi hunu mak chisyipnhe isbꞌa yahti yinh iswiꞌ witz tiꞌ yuto kinhachejan wanikojan yechel yinhla ishoyanil witz tiꞌ; hawalnipaxo ta kaw txahul huneꞌ witz tiꞌ, xhi yaꞌ.
24 Yajaꞌ yal Komam tet yaꞌ Moisés tuꞌ hakaꞌ tiꞌ:
—Asiꞌ, ayanhtoj, haxa yet chachahilo hunelxa chawihti yaꞌ Aarón tawintaj. Wal ebꞌnaj sacerdote yebꞌ anma Israel machojabꞌ chipalkꞌonikti bꞌay ayejxako yechel hawu yinhla ishoyanil witz tiꞌ; ta mach chisyije tzet chiwalan, intanhtzetakanilojan ebꞌnaj sunil, xhi Komam tet yaꞌ Moisés.
25 Yayti yaꞌ Moisés iswiꞌ witz Sinaí, yalni yaꞌ tzet yal Komam tet anma Israel.