Yet yaqꞌni Komam Dios lahonhebꞌ chejbꞌanile
20
Yalni Komam Dios sunil tzotiꞌ tiꞌ, yalni hakaꞌ tiꞌ:2 «Hanintiꞌan, Yahaw hinan, haninan heDiosal. Haninan kexwilojan sat txꞌotxꞌ Egipto bꞌay ayexiko chejabꞌoj.
3 »Mach cheyako hunuxa mak heDiosalo insatajan, yuto haninnhechꞌanan heDiosal. 4 Mach chewatxꞌe tioxh maka yechel hunu tzetaj ay yul satkanh, maka tzetaj ay sat txꞌo txꞌotxꞌ tiꞌ, maka tzetaj ay xol haꞌ mar, maka tzetaj ay yalanh txꞌo txꞌotxꞌ tiꞌ. 5 Mach chexay jahno sataj, nitam heyinayo hebꞌa tet, yuto hanintiꞌan heYahawil, kaw ay yelapnoj, yebꞌ heDiosal wehan. Hanintiꞌan kaw ay wipan, kaw tzꞌeꞌ hinan teyinh, chitit inhowalan teyinh ta cheyiyo hebꞌa tet hunuxa maka. Chiwayojan isyaꞌtajil yibꞌanh ebꞌnaj mame chiwatxꞌen istxꞌojal, yebꞌ yibꞌanh yuninal ebꞌnaj yebꞌ yibꞌanh ebꞌnaj isyox yebꞌ iskanh majan uninale titna yinh ebꞌnaj mame tuꞌ. 6 Wal mak chinochenan, kat isyijen chejbꞌanile chiwaltiꞌan, chiwayojan iskꞌulal inkꞌulan yibꞌanh yebꞌ yibꞌanh yuninal yinh sunilbꞌal tiempo.
7 »Mach cheyaqꞌ bꞌinaho isbꞌi Komam Dios yinh tzet ye tuꞌ machi yelapnoj, yuto haꞌ mak tonhe chiꞌaqꞌni bꞌinaho isbꞌi Komam, machi ekꞌto yet yay isyaꞌtajil yibꞌanh.
8 »Naweti istzꞌayikal xewilal, kaw ayojabꞌ yelapno yul hesat yuto wetan ye huneꞌ tzꞌayik tuꞌ. 9 Wajebꞌ tzꞌayik chexmunlahi, yulbꞌal wajebꞌ tzꞌayik tuꞌ chewatxꞌe hemunil. 10 Yajaꞌ wal ishuj tzꞌayik, istzꞌayikal xewilal, wetan ye huneꞌ tzꞌayik tuꞌ; machi hunu munil chisje hewatxꞌen yulbꞌal huneꞌ tzꞌayik tuꞌ. Machi hunu munil chisje iswatxꞌen hekꞌahol maka hekutzꞌin maka naj hechejabꞌ, maka ix hechejabꞌ maka henoqꞌ, maka naj nan konhobꞌal ayko tekꞌatanh. 11 Yuto yulbꞌal wajebꞌ tzꞌayik iswatxꞌe Komam txꞌo txꞌotxꞌ yebꞌ sunil tzet ay sat txꞌotxꞌ, yebꞌ haꞌ mar yebꞌ sunil tzet ay xol haꞌ; haxa yinh ishuj tzꞌayik xin isxew Komam, istxayenkano huneꞌ tzꞌayik tuꞌ, yanikaniko Komam yetoj.a
12 »Ayojabꞌ yelapno hemam yebꞌ hemiꞌ yul hesat, haxinwal ay hekawil sat txꞌo txꞌotxꞌ chiwaqꞌan teyet, hanin heDiosal intiꞌan.
13 »Mach chepotxꞌkamo heyet anmahil.
14 »Mach chexixli, mach chexwinajli.
15 »Mach chexelqꞌawi.
16 »Mach chehobꞌkanh leqꞌtiꞌal yinh heyet anmahil.
17 »Mach cheyocheko yatut heyet anmahil, mach cheyocheko yixal naj, maka naj ischejabꞌ naj, maka ix ischejabꞌ naj. Mach cheyochepaxiko iswakax, maka ischeh, maka hunuxa tzet ye tuꞌ ay heyet anmahil,» xhi Komam.
Xiwkanh anma Israel yet istzotel Komam Dios
18 Sunil anma Israel, abꞌen ismaqꞌwa kꞌuh yebꞌ yilpaxo isjeplahi, yabꞌenpaxo anma yoqꞌ chꞌen trompeta; yilnipaxo yah nhubꞌ yinh witz, yuxin kaw xiw anma Israel yilni hunteqꞌan tuꞌ, ishitzilo yinhla ishoyanil yich witz tuꞌ. 19 Yuxin yal anma Israel tet yaꞌ Moisés:
—Moisés, tzotelanh tet Komam Dios tuꞌ, walonh tiꞌanh chikoyijehanh sunil tzet chal Komam tawet; yajaꞌ matxahojabꞌ chitzotel Komam jetanh, yuto konhkamtalojanh, xhi anma Israel.
20 Istaqꞌwi yaꞌ Moisés tet anma:
—Mach chexxiwi, yuto lanhan kexyilwen Komam Dios yunhe hexiw tet Komam yinh sunilbꞌal tiempo, yebꞌ yunhe matxa cheyako hemul yul sat Komam, xhi yaꞌ Moisés.
21 Haꞌ konhobꞌ Israel tuꞌ, nahat yehiloj, wal yaꞌ Moisés xin hitziko yaꞌ iskꞌatanh huneꞌ qꞌej moyan bꞌay aykꞌo Komam.
22 Lahwi tuꞌ, yalnipaxo Komam Dios tet yaꞌ Moisés:
«Hak tiꞌ chawute hawalni tet anma Israel hakaꞌ tiꞌ: “Kaw maxeyila ta makintzotelaytijan teyet yul satkanh. 23 Mach chewatxꞌe chꞌen plata maka chꞌen oro hetioxhoj, kat heyay jahno sataj, hakaꞌ chu heyay jahno insatajan. 24 Watxꞌekanh txꞌo txꞌotxꞌ ismexhahilo yet xahanbꞌal, kat hanhusni noꞌ meꞌ yebꞌ noꞌ wakax yinh xahanbꞌalil wetan, yebꞌ bꞌay chanhuspaxo hayebꞌalqꞌabꞌ yet aqꞌankꞌulal chawaqꞌ wetan. Sunil bꞌay chinyehan chanati inbꞌihan, hak tuꞌ xin chinayilojan, kat wanayojan isyaxil tawibꞌanh. 25 Yajaꞌ xin ta haꞌ chꞌen chꞌen chawako ismexhahilo xahanbꞌal tuꞌ, mach chawako chꞌen chakꞌbꞌil iskꞌul yu martillo, yuto machi yelapno huneꞌ yet xahanbꞌal tuꞌ. 26 Yebꞌpaxo xin mach cheyako isqꞌochal ismexhahil yet xahanbꞌal wetan yehi, haxinwal mach chiꞌil-lax henimanil yet chexahto bꞌey tuꞌ,” kachi,» xhi Komam.