«Hex Israel hex tiꞌ, abꞌewekano kuybꞌanile yebꞌ chejbꞌanile chiwalkanojan teyet tinanh. Kaw kam cheyabꞌekanoj, kat xin hebꞌeybꞌalnheni.

2 »Komam Jahawil koDiosal, yaqꞌkano Komam istꞌinhanil istzotiꞌ jet bꞌey witz Horeb. 3 Machnhetaj tet komam icham yaqꞌkano Komam Jahawil istꞌinhanil istzotiꞌ tiꞌ, wal xin haꞌ hunonh bꞌay yaqꞌkano Komam jet kosunil, hanhonh itzitzonh tiꞌ tinanh. 4 Haꞌ kaw Komam Jahawil tzotel jet bꞌey iswiꞌ witz. Tꞌanhaniko yinh kosat, tꞌanhan honhpaxiko yinh sat xol qꞌa qꞌaꞌ. 5 Wal hinan xin, haninan ayinikojan texolbꞌal yunhe walnihan teyet tzotiꞌ chiyal Komam. Yu chexxiw tet qꞌa qꞌaꞌ yuxin mach kexahto iswiꞌ witz tuꞌ. Yalni Komam Jahawil hakaꞌ tiꞌ:

6 »“Haninan, Yahaw hinan, heDiosal wehan; haninan kexwilojan sat txꞌotxꞌ Egipto bꞌay ayexiko chejabꞌoj.

7 »”Mach cheyako hunuxa mak hediosaloj, wal xin haninnhechꞌanan heDiosal.

8 »”Mach chewatxꞌe yechel hunu tzet ye tuꞌ hediosaloj, tzet ye tuꞌ ay satkanh, yebꞌ tzetaj ay sat txꞌo txꞌotxꞌ tiꞌ, maka tzetaj ye tuꞌ ay yich haꞌ mar. 9 Mach chexay jahno sataj, mach cheyaqꞌ chejaꞌ hebꞌa tet, yuto haninnhehan Yahaw hinan, heDiosal wehan, kaw ay welapnojan, chitit inhowalan teyinh tato cheyiyo hebꞌa tet hunuxa maka. Chiwayojan isyaꞌtajil yibꞌanh ebꞌnaj mame chiwatxꞌen istxꞌojal, yebꞌ yibꞌanh yuninal ebꞌnaj, yebꞌ yibꞌanh ebꞌnaj yox majan uninale, yebꞌ yibꞌanh ebꞌnaj iskanh majan uninale, ebꞌnaj chinyanihan. 10 Mach isbꞌi hanta anma chiwayojan iskꞌulchꞌanil inkꞌulan yibꞌanh, yaj haꞌ mak chinochenan yebꞌ chisyije inchejbꞌanilan yinh sunil yanma.

11 »”Mach cheyaqꞌ bꞌinaho isbꞌi Komam Jahawil, heDiosal yinh isnabꞌnhehal; wal xin mach chiꞌekꞌto yet yanayo Komam isyaꞌtajil yibꞌanh mak chiꞌawten isbꞌi Komam yinh tzet ye tuꞌ machi yelapnoj.

12 »”Cheyijewe tzꞌayik xewilal, yu heyinayo hebꞌa tet Komam, hakaꞌtikꞌa yu yalnikano Komam Jahawil. 13 Wajebꞌ tzꞌayik chexmunlahi, yulbꞌal wajebꞌ tzꞌayik tuꞌ chewatxꞌe hemunil. 14 Yaj wal yinh ishuj tzꞌayik xin, istzꞌayikal xewilal, yet Komam Jahawil yehi. Machi hunu munil chewatxꞌe yinh huneꞌ tzꞌayik tuꞌ. Machi hunu munil chiswatxꞌe hekꞌahol, hekutzꞌin, nitam ebꞌnaj hechejabꞌ, nitam ebꞌix hechejabꞌ. Mach chimunlapaxo hewakax, heburro, maka hunuxa henoqꞌ; hakpax tuꞌ ebꞌnaj mach Israelo ay yul hekonhobꞌ mach chu ismunlapaxo ebꞌnaj yinh huneꞌ tzꞌayik tuꞌ. Yunhe isxew ebꞌnaj hechejabꞌ yebꞌ ebꞌix hechejabꞌ. 15 Yilal henanitij tato hex tiꞌ chejabꞌ heye bꞌey Egipto. Haꞌ Komam Yahaw, heDiosal kexinilti bꞌey tuꞌ yu sunil yip, yuxin yilal heyijen tzꞌayik yet xewilal, hakaꞌ yalni Komam.

16 »”Ayojabꞌ yelapno hemam yebꞌ hemiꞌ yul hesat, hakaꞌtikꞌa yu yalni Komam Dios, heYahawil teyet, yunhe ay hekawil, yebꞌ chexnahatli yul sat yibꞌanhqꞌinal, yebꞌ kꞌulnhetikꞌa chiꞌekꞌ heyilaꞌ sat txꞌo txꞌotxꞌ chiyaqꞌ Komam teyet.

17 »”Mach chepotxꞌkamo heyet anmahil.

18 »”Mach chexixli, mach chexwinajli.

19 »”Mach chexelqꞌawi.

20 »”Mach chehobꞌkanh leqꞌtiꞌal yinh heyet anmahil.

21 »”Mach cheyocheko yixal heyet anmahil, nitam ebꞌnaj ischejabꞌ heyet anmahil, nitam ebꞌix ischejabꞌ heyet anmahil, nitam iswakax, nitam isburro, nitam hunuxa tzet ye tuꞌ ay heyet anmahil,” xhi Komam,» xhi yaꞌ Moisés.

22 Yalnipaxo yaꞌ Moisés: «Haꞌ ton hunteqꞌan tzotiꞌ tuꞌ yal Komam Jahawil yinh kaw ip xol qꞌa qꞌaꞌ yebꞌ xol huneꞌ moyan kaw qꞌej, yet kutxanonhiko kosunil yich witz. Lahwi tuꞌ, matxa tzotel Komam, istzꞌibꞌnheniko Komam hunteqꞌan tzotiꞌ tuꞌ yinh kabꞌebꞌ chꞌen chꞌen paqꞌpaqꞌ yehi, yaqꞌni Komam chꞌen wetan. 23 Yaj yet heyabꞌen huneꞌ yul nuqꞌe xol qꞌejholo tuꞌ yebꞌ heyilni yah xaj qꞌaꞌ yinh witz, sunil hex yahaw hex yinh hunun majan ebꞌnaj Israel, yebꞌ ebꞌnaj ichamta winaj xol ebꞌnaj Israel tiꞌ, kexhul tzotelo wetan, 24 heyalni wetan: “Yinh kaw yeli Komam Dios, Jahawil masye isqꞌaqꞌal yip jet, majabꞌenpaxo yul isnuqꞌ xol qꞌa qꞌaꞌ. Tinanh chijohtanheloj tato chisje istzotel Komam tet anma, machi xin chikam anma yu. 25 Yaj, ¿tzet yinh yuxin chikosayti kamikal jibꞌanh yu huneꞌ qꞌa qꞌaꞌ kaw aykano ismay tiꞌ? Tato chijabꞌe yul isnuqꞌ Komam Jahawil hunelxa chonhkami. 26 Yuto ¿mak hunu tiꞌ chu yabꞌen yul isnuqꞌ Komam Dios itzitz, xol qꞌa qꞌaꞌ, machi xin chikami, hakaꞌ mayu jabꞌen hanhonh tiꞌ? 27 Wal xin okanh sata Komam hach tiꞌ, kat hawabꞌen sunil tzet chal Komam Dios, Jahawil, lahwi tuꞌ kat hawalni jetanh sunil tzet chal Komam tawet tuꞌ, kat jokanh koyijenanh yinh sunil tzet chiyal Komam tawet,” kexchi.

28 »Hayet hetzotel wettuꞌan yabꞌe Komam tzet heyala, yalni Komam wetan hakaꞌ tiꞌ: “Mawabꞌehan tzet mayal konhobꞌ tiꞌ, kaw xin kꞌul tzet mayala. 29 Majaltam haknhetikꞌa tuꞌ isnabꞌal, ayojabꞌnhetikꞌa welapnojan yul sat, kat isyijen inchejbꞌanilan hunun tzꞌayik, haxinwal kꞌulnhetikꞌa chiꞌekꞌ yilaꞌ yebꞌ yuninal yinh tohbꞌalqꞌinal. 30 Yuxin, as hal tet ebꞌnaj, meltzohojabꞌto ebꞌnaj bꞌay aykanh ismantiado. 31 Yaj wal hach tiꞌ, kananhkano inkꞌatanhan bꞌey tiꞌ, yuto chiwalan sunil kuybꞌanile yebꞌ chejbꞌanile tawet, yunhe hakuyni ebꞌnaj yinh, kat isbꞌeybꞌalnhen ebꞌnaj yet ayxa ebꞌnaj sat txꞌotxꞌ chiwaqꞌan tet yinh hunelnhe,” xhi Komam. 32 Yuxin yijewe sunil tzet chischej Komam heyubꞌ, machojabꞌ chexekꞌ txaltxoni, hakaꞌ yinh hewatxꞌ maka yinh hemek. 33 Bꞌeybꞌalnhewe bꞌeybꞌale isyekano Komam Dios Jahawil teyet, yunhe kꞌulnhetikꞌa chiꞌekꞌ heyilaꞌ, yebꞌ chexnahatli sat txꞌo txꞌotxꞌ chaqꞌ Komam teyet yinh hunelnhe.