Huneꞌ niman chejbꞌanile
6
»Haꞌ ton hunteqꞌan chejbꞌanile yebꞌ kuybꞌanile tiꞌ yal Komam Dios Jahawil tato chexinkuyan yinh yu hebꞌeybꞌalnhen sat txꞌo txꞌotxꞌ chiꞌokkano heyu yinh hunelnhe. 2 Hak tuꞌ xin chu heyaniko ismay Komam Dios Jahawil, cheyijen chejbꞌanile yebꞌ kuybꞌanile chiwaqꞌan teyet tiꞌ. Cheyije yebꞌ heyuninal yebꞌ yuninal heyuninal yulbꞌal itzitz hex, hak tuꞌ xin chexnahatli sat txꞌo txꞌotxꞌ tuꞌ. 3 Yuxin abꞌewe hex wet konhobꞌ Israel, haweko yinh hekꞌul heyijen hunteqꞌan chejbꞌanile tiꞌ, haxinwal kꞌulnhetikꞌa chiꞌekꞌ heyilaꞌ yebꞌ kaw chichꞌibꞌ hebꞌisil sat txꞌo kaw kꞌul, kaw yax sat, bꞌay chiꞌel yojomal noꞌ lech yebꞌ noꞌ kabꞌ sat txꞌotxꞌ. Sunil tiꞌ yal Komam Jahawil tet ebꞌnaj jichmam yet yalanhtokanoj.4 »Abꞌewe hex wet konhobꞌ Israel, Komam Jahawil koDiosal, hunchꞌannhe Komam, machi hunuxa.
5 »Tzalahanhwe yinh Komam Dios, Jahawil yinh sunil hekꞌul, yinh sunil heyanma, yebꞌ yinh sunil heyip.
6 »Sunil tzet chiwalkanojan teyet tiꞌ, kanojabꞌkano yinh heyanma. 7 Naunhe xin cheqꞌaytzen heyuninal yabꞌeni. Cheyal tet yet ay hex yul heyatut, yet ayexiko yinh hebꞌel, yebꞌ yet chexok wayoj, yebꞌ yet chexahwanoj. 8 Chekꞌaliko hunteqꞌan chejbꞌanile tiꞌ yinh heqꞌabꞌ yebꞌ yinh hepalanh, hakaꞌ hunu yechel chꞌok yu henanitij. 9 Kat xin hetzꞌibꞌnheniko yinh ispilalil heyatut yebꞌ yinh ispultahil.
Kuybꞌanile yinh yijemal
10 »Komam Dios Jahawil, chexanikto sat txꞌo txꞌotxꞌ yalte tet ebꞌyaꞌ jichmam, haꞌ ton yaꞌ Abraham, yaꞌ Isaac, yebꞌ yaꞌ Jacob bꞌay ay hunteqꞌan konhobꞌ kaw nanxa yoki yebꞌ kaw nimej, maxhtaj hex watxꞌenhekanh. 11 Bꞌay ay ej teꞌ nha nohna yu sunil tzetaj ye tuꞌ kaw kꞌulkanoj, maxhtaj hex xin nohtzenhe, yebꞌ bꞌay ay hunteqꞌan kꞌuh maxhtaj hex holnhe, yebꞌ bꞌay ay teꞌ uva yebꞌ teꞌ olivo maxhtaj hex tzꞌunnhe. Cheloh sunil hunteqꞌan tuꞌ masanto yet chinohkano hekꞌul. 12 Cheyil hebꞌa tajka chenahulnheto Komam Dios, Jahawil kexinilti bꞌey Egipto bꞌay kexok chejabꞌoj. 13 Haꞌojabꞌnhe tet Komam chexxiwi. Hanhe tet Komam xin cheyije; yebꞌ xin yet cheyalni hunu tzet ye tuꞌ, hanhehojabꞌ isbꞌi Komam cheyaqꞌ bꞌinaho yinh. 14 Mach chexoktzujno yinta hunteqꞌan tioxh bꞌay chiyiyo isbꞌa ej konhobꞌ ayayo tekawilal, 15 yuto Komam Dios Jahawil ayko texol, kaw tzꞌeꞌ teyinh yinh hunteqꞌan tuꞌ, haxataxka chꞌelikoj, chitit ishowal Komam teyinh, kat kexistanhtzenilo sat txꞌotxꞌ.
16 »Mach cheyako Komam Dios Jahawil yinh ilwebꞌal, hakaꞌ heyu bꞌey Masah.a 17 Kaw yijem cheyute hebꞌa tet chejbꞌanil yalkano Komam Jahawil; haꞌ ton sunil chejbꞌanile yebꞌ kuybꞌanile yaqꞌ jet. 18 Watxꞌewe istoholal yebꞌ iskꞌulal sata Komam Jahawil, haxinwal kꞌulnhetikꞌa chꞌekꞌ heyilaꞌ, kat heyehayo sat txꞌotxꞌ kaw kꞌul. Huneꞌ txꞌotxꞌ tuꞌ yalte Komam tato chiyaqꞌ tet jichmam, 19 kat yinilo Komam tesataj ebꞌnaj ayko ishowal teyinh, hakaꞌtikꞌa yu yalni Komam.
20 »Hayet chisqꞌambꞌen heyuninal teyet, yet hekal kabꞌe, chalni hakaꞌ tiꞌ: “¿Tzet chalilo hunteqꞌan kuybꞌanile yebꞌ chejbꞌanile xayaqꞌ Komam Jahawil koDiosal jet tiꞌ?” ta xhi. 21 Kat hetaqꞌwi tet hakaꞌ tiꞌ: “Hanhonh tiꞌ, ayonhiko ischejabꞌo naj faraón bꞌey Egipto yet yalanhtokanoj, konhyinilti Komam bꞌey tuꞌ yebꞌ sunil yip. 22 Komam yeni hunteqꞌan nimeta kꞌaybꞌalkꞌule yebꞌ yechel yip jilaꞌanh bꞌey Egipto. Isye Komam tet naj faraón yebꞌ tet sunil konhobꞌ huneꞌ niman xiwkilal kaw nanxa yoki. 23 Konhyinilti Komam bꞌey tuꞌ, konhyinito bꞌey txꞌotxꞌ haltebꞌilkano tet ebꞌnaj jichmam yu Komam, yaqꞌnikano Komam txꞌotxꞌ jet. 24 Ischejni Komam Jahawil koyijen sunil hunteqꞌan chejbꞌanile tiꞌ, yebꞌ nimanojabꞌ yelapno Komam Dios Jahawil yul kosat, yebꞌ yunhe kꞌul chꞌekꞌ jilaꞌ hunun tzꞌayik, yebꞌ yu ay kokawil yu Komam masanto tinanh. 25 Yuxin tato chikoyije hunteqꞌan chejbꞌanile tiꞌ, hakaꞌtikꞌa yu yalnikano Komam, yinh hakaꞌ tuꞌ, kꞌulonh yul sat Komam,” kexchi tet heyuninal.