Kachbꞌanile tet ebꞌnaj Israel ta machi yiyo isbꞌa tet tioxh
7
»Hayet chexyinokto Komam Dios Jahawil sat txꞌotxꞌ bꞌay chexehkanayo yinh hunelnhe, yet chiyinilo Komam hujebꞌ nimeta konhobꞌ ekꞌbꞌal yip tesataj; haꞌ ton istxꞌotxꞌ ebꞌnaj heteo, ebꞌnaj gergeseo, ebꞌnaj amorreo, ebꞌnaj cananeo, ebꞌnaj ferezeo, ebꞌnaj heveo, yebꞌ ebꞌnaj Jebuseo. 2 Hayet chaqꞌno aykꞌayo Komam Jahawil hunteqꞌan txꞌotxꞌ konhobꞌ tuꞌ yul heqꞌabꞌ, yet chexqꞌoji yinh, chetanhtzekanilo yinh hunelnhe. Matzet chetꞌinhbꞌakano yebꞌi, mach chitzꞌaypaxo hekꞌul yinh. 3 Mach chehunbꞌa hebꞌa yebꞌi. Mach chemohbꞌa hekutzꞌin yebꞌ iskꞌahol ebꞌnaj, machi yiqꞌkanh hekꞌahol iskutzꞌin ebꞌnaj. 4 Yuto chishekꞌilo isbꞌa ebꞌnaj hekꞌahol tuꞌ yinh Komam yu ebꞌix, kat yinayo isbꞌa ebꞌnaj tet hunuxa nan diosal. Yinh hakaꞌ tuꞌ, chitit ishowal Komam Dios teyinh, kat kexistanhtzenilo Komam yinh anhe. 5 Wal xin haꞌ huneꞌ cheyute, cheyuchkꞌakanto ismexhahil yet isxahanbꞌal ebꞌnaj, kat hemaqꞌni qꞌaho istioxh ebꞌnaj Asera, isbꞌi, yebꞌ hunteqꞌan te teꞌ yebꞌ chꞌen chꞌen bꞌay chiyiyo isbꞌa ebꞌnaj, kat henhusnikanto istioxh. 6 Yuto hex tiꞌ, pohbꞌilexilo yu heyok iskonhobꞌo Komam Dios Jahawil, haꞌ Komam sikꞌnhe hexilo xol sunil ej konhobꞌ yul sat yibꞌanhqꞌinal tiꞌ, wal xin kaw ay heyelapno yul sat Komam.Huneꞌ konhobꞌ kaw kꞌul tet Komam Jahawil
7 »El yinh iskꞌul Komam Dios Jahawil kexissikꞌnikaniloj, maxhtaj yu nime konhobꞌ hex, wal xin kaw haywanh hexchꞌan sata hunteqꞌanxa konhobꞌ. 8 Kexyilti Komam bꞌey Egipto bꞌay ayexiko chejabꞌoj, kexyilo Komam yinh sunil yip yul isqꞌabꞌ naj faraón, yuto xahan ay hex yu Komam; isyijen Komam tzet yaltekano tet ebꞌnaj jichmam. 9 Ohtanheweloj tato Komam Dios Jahawil, Dios yinh kaw isyelal, chisyije Komam tzet haltebꞌilkano yu, mach isbꞌi hanta iskꞌulal chaqꞌ tet mak chitzala yinh Komam, kat isyijen kuybꞌanile chaqꞌ Komam, kat isyeni iskꞌulchꞌanil iskꞌul Komam tet yuninal yuninal anma tuꞌ. 10 Yajaꞌ chispajtze Komam, yaqꞌni selel tet mak chiyahni Komam, chistanhtzenkanilo Komam; yajaꞌ mach chinahatli Komam ispajtzen selel tet mak tuꞌ.a 11 Yuxin bꞌeybꞌalnhewe chejbꞌanile yebꞌ kuybꞌanile chiwalkanojan teyet tiꞌ.
Isyaxilal chaqꞌ Komam Dios tet anma Israel tato chisyije tzet chala
12 »Tato yet chilahwikano heyabꞌen hunteqꞌan kuybꞌanile tiꞌ, kat heyok heyijenoj, kat xin hebꞌeybꞌalnheni, wal tuꞌ, chisyije Komam Dios Jahawil yinh tzet tꞌinhbꞌabꞌilkano teyet, kat isyijen Komam tzet haltebꞌil yu tet ebꞌnaj jichmam, yuto yawte Komam isbꞌi yinh. 13 Chexisxahannhe Komam, kat yanayo isyaxil teyibꞌanh, kat yaqꞌni chꞌibꞌo Komam hebꞌisil. Chayo Komam iskꞌulal yibꞌanh heyuninal, yebꞌ yibꞌanh sat hetzꞌunubꞌ, yebꞌ yibꞌanh hetrigo, yebꞌ yibꞌanh hevino yebꞌ teꞌ aceite, yebꞌpaxo yibꞌanh yunin hewakax, yebꞌ hemeꞌ, yet ayexxa sat txꞌotxꞌ yalte Komam tet ebꞌnaj jichmam ta chiyaqꞌ jet. 14 Chayo Komam isyaxil teyibꞌanh sata hunteqꞌanxa konhobꞌ. Machi hunu ebꞌnaj winaj tiꞌ machi yuninal, yebꞌ machi hunu ebꞌix ix tiꞌ machi yunin, yebꞌpaxo xin henoqꞌ, machi hunu noꞌ tiꞌ machi uninwi. 15 Chishekꞌilo Komam sunil yabꞌil texol, yebꞌ sunil hunteqꞌan nimeta isyaꞌtajil chati Komam yibꞌanh anma bꞌey Egipto, hex kaw hex heyohta huneꞌ tiꞌ. Mach xin chayo Komam hunteqꞌan tuꞌ teyibꞌanh; wal xin haꞌ yibꞌanh anma ayko ishowal teyinh, haꞌ yibꞌanh chiyayo hunteqꞌan isyaꞌtajil tuꞌ. 16 Wal xin wiyom hetanhtzenkanilo sunil hunteqꞌan konhobꞌ chischej Komam hetanhtzeloj. Mach chitzꞌay hekꞌul yinh, mach cheyipaxayo hebꞌa tet ej istioxh, yuto haꞌ hunteqꞌan tuꞌ chexyaqꞌ aykꞌayoj.
17 »Hex tiꞌ ta chiyal heyanma hakaꞌ tiꞌ: “Anma ay yul hunteqꞌan txꞌotxꞌ konhobꞌ tuꞌ, kaw tzetkꞌakano isbꞌisil kosataj, ¿tzettaxka chu kotanhtzeniloj?” tajka kexchi. 18 Wal xin, mach chexxiw tet hunteqꞌan konhobꞌ tuꞌ, chenati tzet iswatxꞌe Komam Dios Jahawil yinh naj faraón bꞌey Egipto, yebꞌ yinh anma ay bꞌey tuꞌ. 19 Chenahti yinh hunteqꞌan nimeta isyaꞌtajil yati Komam bꞌey tuꞌ, hex xin kaw hex heyila. Isyeni Komam hunteqꞌan yechel yebꞌ kꞌaybꞌalkꞌule, isyenikanilo Komam Dios Jahawil yip yet konhyinilti bꞌey Egipto; haktikꞌapax tuꞌ xin, chiyutepaxo Komam yinh hunteqꞌan konhobꞌ bꞌay chexxiwiko tiꞌ. 20 Chaniti Komam noꞌ chꞌuchu yulaj teꞌ nime teꞌ, yinh ebꞌnaj, kat istanhtzenilo makta chitokankanoj, yebꞌ makta chiyebꞌa isbꞌa teyet. 21 Yuxin mach chexxiwkanh tet ebꞌnaj, yuto Komam Dios Jahawil, ayko texol, Komam kaw aykano yip, yebꞌ kaw ay ismay. 22 Nixhtejal xin chinilo Komam Dios Jahawil anma ay yul hunteqꞌan konhobꞌ tuꞌ tesataj, mach chu hetanhtzenilo ebꞌnaj yinh hunelnhe, yunhe mach chichꞌibꞌ isbꞌisil noꞌ xoltelajil noqꞌ teyinh, kat kexiskꞌuxnayto noꞌ. 23 Haꞌ xin Komam Dios Jahawil chꞌaniko hunteqꞌan konhobꞌ tuꞌ yul heqꞌabꞌ, hak tuꞌ xin chiyu iskꞌaytzelaxiloj, masanta chitanhtzelaxkanilo yinh hunelnhe. 24 Chako Komam isreyal anma tuꞌ yul heqꞌabꞌ, hak tuꞌ xin matxa chiꞌaqꞌlax bꞌinaho anma tuꞌ yul sat yibꞌanhqꞌinal tiꞌ yu chetanhtzekaniloj. Machi hunu konhobꞌ tuꞌ chiqꞌoji teyinh yet cheyaniko howal yinh, wal xin chetanhtzekanilo sunil. 25 Chenhuskanto istioxh, hunteqꞌan chal anma tuꞌ isdiosaloj, yaj mach cheyikano chꞌen oro yebꞌ chꞌen plata ayko yinh hunteqꞌan tioxh tuꞌ yu yok heyetoj; mach chexaykꞌay yinh huneꞌ isyaꞌtajil tuꞌ, yuto ta hak tuꞌ kaw yahbꞌeta tzet chewatxꞌe sata Komam. 26 Yuxin sunil hunteqꞌan tzet chisyah Komam Dios tiꞌ, machi hunu tzet cheyito heyatut, yunhe mach chextanhtzelaxiloj, wal xin yahwe hunteqꞌan tuꞌ yuto yalanh istzꞌaktiꞌ Komam Dios ayayoj.