3 »Chiyayo Komam isyaxil teyibꞌanh yul hekonhobꞌ yebꞌ xol hemunil.

4 »Chiyayo Komam isyaxil yibꞌanh heyuninal yebꞌ yibꞌanh sat hetzꞌunubꞌ; chiyayo Komam isyaxil yibꞌanh yunin hewakax, yunin hemeꞌ yebꞌ yibꞌanh yunin hunteqꞌanxa henoqꞌ.

5 »Chiyayo Komam isyaxil yibꞌanh tzet cheyayto yul hemotx yebꞌ yibꞌanh bꞌay chesom ixim harina.

6 »Kat yanayo Komam isyaxil teyibꞌanh yet chexto yinh hebꞌel, yebꞌ yet chexmeltzohi.

7 »Haꞌ Komam chiꞌaniko ebꞌnaj ayko ishowal teyinh yul heqꞌabꞌ; hayet chiyaniko ebꞌnaj howal teyinh tuꞌ, hunchꞌan bꞌeh bꞌay chihul ebꞌnaj, hujebꞌxapaxo bꞌeh bꞌay chito ebꞌnaj yet chiꞌelkanh ebꞌnaj teyet.

8 »Chiyayo Komam isyaxil yibꞌanh sat hetzꞌunubꞌ yebꞌ yibꞌanh sunil tzet chewatxꞌe; kat heyaqꞌni tzalaho hekꞌul sat txꞌo txꞌotxꞌ chiyaqꞌ teyet.

9 »Tato cheyije ischejbꞌanil Komam, kat heyok tzujno yinh tzet chala, haꞌ Komam chexaniko iskonhobꞌoj, yu heyokkano yetoj, hakaꞌtikꞌa yu yaqꞌni isbꞌi Komam yinh. 10 Hak tuꞌ xin sunil konhobꞌ ay sat yibꞌanhqꞌinal tiꞌ, chiyabꞌeloj tato chibꞌina isbꞌi Komam texol, kat isxiwkanh teyet. 11 Chisyenilo Komam iskꞌulal iskꞌul teyinh, chiyaqꞌni txꞌiꞌal heyuninal, kat ispohchakanh isbꞌisil henoqꞌ, yebꞌ xin kaw niman chuko sat hetzꞌunubꞌ sat txꞌo txꞌotxꞌ chiyaqꞌ teyet, hakaꞌ yu yalnikano tet ebꞌnaj jichmam yet yaqꞌni isbꞌi Komam yinh. 12 Kat ishajni Komam niman isqꞌalomal teyet, haꞌ ton satkanh bꞌay chitit haꞌ nhabꞌ, chiyaniti haꞌ yinh istiempohal yibꞌanh hetxꞌotxꞌ, kat yanayo isyaxil yibꞌanh hemunil. Kaw txꞌiꞌal konhobꞌ bꞌay cheyaqꞌ kꞌamil, yajaꞌ wal hex xin mach hunu mak tet chexkꞌamli. 13 Tato cheyije sunil ischejbꞌanil Komam Dios Jahawil chiwalan teyet tinanh, chexbꞌabꞌi yu Komam, mach xin islahobꞌal cheyukanoj. Ayexnhetikꞌakanh yibꞌanh ej konhobꞌ, mach xin chexkankano yalanh. 14 Hak tuꞌ chiyute Komam teyet tato mach chepohilo hebꞌa yinh tzet chiwalan teyet tiꞌ tinanh, yebꞌ ta mach chexokꞌ tzujno yinta hunteqꞌan chihal-lax diosal kat heyinayo hebꞌa sataj.

15 »Yajaꞌ tato mach cheyabꞌe tzet chiyal Komam Dios Jahawil, mach xin cheyije sunil chejbꞌanile yebꞌ kuybꞌanile chiwalan teyet tiꞌ, chiꞌay hunteqꞌan tzꞌaktiꞌ tiꞌ teyibꞌanh.

16 »Chiꞌay tzꞌaktiꞌ teyibꞌanh yul hekonhobꞌ yebꞌ yet ay hex xol hemunil.

17 »Chiꞌay tzꞌaktiꞌ yibꞌanh tzet cheyayto yul hemotx, yebꞌ yibꞌanh bꞌay chesom ixim harina.

18 »Kat yay tzꞌaktiꞌ yibꞌanh heyuninal, yebꞌ yibꞌanh sat hetzꞌunubꞌ, yebꞌ yibꞌanh yuninal hewakax yebꞌ yibꞌanh yunin hemeꞌ, yebꞌ yibꞌanh yunin hunteqꞌanxa henoqꞌ.

19 »Kat yaypaxo tzꞌaktiꞌ teyibꞌanh yet chexokto yul heyatut, yebꞌ yet chexelto yul heyatut.

20 »Chiꞌay istzꞌaktiꞌ Komam Dios Jahawil teyibꞌanh, chiyanayo isyaꞌtajil yibꞌanh sunil tzet chewatxꞌe, kat issomchakanh yul hewiꞌ, yinh hunelnhe xin chexistanhtzeloj; yu istxꞌojal chewatxꞌe yu hebꞌejkanoj. 21 Chiyaniti Komam Jahawil howla yabꞌil texol yunhe kexistanhtzenilo sat txꞌo txꞌotxꞌ chiyaqꞌ teyet. 22 Chiyanipaxti Komam Jahawil hunteqꞌan yabꞌil tonhe chextzꞌonbꞌayo yu, yebꞌ howla qꞌaꞌ yebꞌ malilal yebꞌ yabꞌil kaw yaꞌ chexaqꞌni ekꞌoyaꞌ, kat yanipaxti tajintiꞌal yu matxa chaqꞌ haꞌ nhabꞌ, kat istajilo hetzꞌunubꞌ yu qꞌa qꞌaꞌ, kat yah sohol yinh hetrigo. Sunil hunteqꞌan tuꞌ chexkꞌaytzenkaniloj.

23 »Haꞌ satkanh, matxa chiyaqꞌati haꞌ nhabꞌ teyibꞌanh, matxa xin chiyaqꞌpaxo txꞌo txꞌotxꞌ sat hetzꞌunubꞌ. 24 Yajaꞌ chati Komam Jahawil pojoj yebꞌ tanh teyibꞌanh selelo haꞌ nhabꞌ, yunhe hetanhkaniloj. 25 Chexyaniko Komam yul isqꞌabꞌ anma ayko ishowal teyinh, hayet cheyaniko howal yinh ebꞌnaj yinh istxolal chu heyelilo yul huneꞌ bꞌeh, yajaꞌ haxa yet chexelkanh tet ebꞌnaj xin, nanantaxanhe bꞌay chextokanikoj. Sunil konhobꞌ ay sat yibꞌanhqꞌinal tiꞌ, chixiw yilni tzet chexelkanikoj. 26 Haꞌ noꞌ chꞌik chilojnito henimanil, yebꞌpaxo xin noꞌ xoltelajil noqꞌ chexkꞌuxnitoj; matxa mak xin chixibꞌten noꞌ.

27 »Chiyaqꞌni Komam Dios ekꞌoyaꞌ heyanma, kat isqꞌato henimanil hakaꞌ yu anma ah Egipto, kat yelilo malilal teyinh yebꞌ howla txꞌak, yebꞌ hunteqꞌan howla qꞌajach yabꞌil yinh henimanil; matxa xin chexanhchahi. 28 Chiyaqꞌni Komam Dios somchahokanh yul hewiꞌ, kat heyok tzꞌopsatil, kat iskꞌayilo hekꞌul. 29 Kat heyekꞌ matxmon yet tzꞌayikal, hakaꞌ chu yekꞌ matxmon ebꞌnaj mach chu yilni. Machi hunu tzet chewatxꞌe kꞌul chiꞌelikoj, tonhetikꞌa chexetalaxi, kat yelqꞌalax tzet ay hex, machi xin hunu mak chexkolni.

30 »Haꞌ mak qꞌanbꞌilxa yixal yu ismohyi, nanxa naj winaj chiway yebꞌ ix. Cheyakanh heyatut, yajaꞌ mach chexeh yul heyatut tuꞌ. Chetzꞌun teꞌ uva, yajaꞌ mach cheyoche sat teꞌ. 31 Yinh hesat chipotxꞌlaxkamo hewakax, yajaꞌ xin mach chekꞌux ischibꞌehal noꞌ. Yinh hesat chiꞌilaxto heburro, yajaꞌ xin matxa chꞌaqꞌlaxpaxo noꞌ teyet, kat yilaxto hemeꞌ yu anma ayko ishowal teyinh, machi mak xin chikolwa teyinh heyinilo noꞌ tet. 32 Yinh hesat chiꞌalaxiko hekꞌahol yebꞌ hekutzꞌin yul isqꞌabꞌ anma mach ohtabꞌilo heyu, kat yilaxtoj. Cheyoche heyilaꞌ heyuninal, yajaꞌ matxa cheyil yinh yuto matxa heyip heyinitij. 33 Haꞌ hemunil yebꞌ sat hetzꞌunubꞌ chiyaqꞌ txꞌo txꞌotxꞌ, haꞌ anma mach heyohtajoj haꞌ chilonitoj. Naunhe xin chexetalaxi, kat yaqꞌlax ekꞌoyaꞌ heyanma. 34 Hayet cheyilni sunil hunteqꞌan isyaꞌtajil tuꞌ, chisomchakanh yul hewiꞌ. 35 Chiyaniti Komam howla txꞌak yinh hewitxꞌiꞌ, yebꞌ yinh hebꞌul, yebꞌ yinh sunil henimanil, chiꞌichiti yalanh ispaqꞌanil heyoj masanta chiꞌahapno yinh hechꞌuj, matxa xin chexanhchahi.

36 »Haꞌ Komam Dios Jahawil, chexinito yebꞌ hereyal bꞌey hunuxa nan konhobꞌal mach heyohtajoj, mach ohtabꞌilpaxo yu hemam icham. Cheyinayo hebꞌa tet te teꞌ watxꞌebꞌil tioxhal, yebꞌ chꞌen chꞌen watxꞌebꞌil tioxhal. 37 Haꞌ konhobꞌ bꞌay chexyito Komam kaw toxanhe chikꞌay iskꞌul kexyilni, hexxanhe ayexilti yul istiꞌ, kat istzebꞌipaxo teyinh. 38 Kaw niman hetzꞌunubꞌ cheyakoj, yajaꞌ kaw hanikꞌnhe issat chehatxꞌkanh, yuto chihul noꞌ qꞌul islobꞌotoj. 39 Chetzꞌunnipaxo teꞌ uva, kat heyok hetanheno teꞌ, yajaꞌ machi sat teꞌ cheyuxiloj, mach cheyukꞌpaxo vino yinh teꞌ, yuto haꞌ noꞌ tzojoy chilonito teꞌ sunil. 40 Ay teꞌ olivo sat hetxꞌotxꞌ, yajaꞌ mach cheyako anh kaw xuqꞌ sam chiꞌel yinh teꞌ teyinh, yuto yaxto teꞌ, kat yaykꞌayti teꞌ yinh isqꞌabꞌ. 41 Kaw ay hekꞌahol, yebꞌ hekutzꞌin, yajaꞌ machi heyuninal tuꞌ tekꞌatanh, yuto chiꞌilaxto preso yu hunteqꞌanxa nan konhobꞌal. 42 Sunil teꞌ lobꞌehal yebꞌ sat tzꞌunubꞌ chaqꞌ txꞌo txꞌotxꞌ chitanhkanilo yu noꞌ qꞌul. 43 Haꞌ anma mach heyet konhobꞌo ay texol chiyiqꞌkanokanh yip, wal hex xin chipaxkano heyip. 44 Haꞌ anma tuꞌ chiꞌaqꞌni kꞌamil teyet, wal hexpaxo xin matzet tzꞌaj heyaqꞌaꞌ kꞌamil tet; haꞌ chiꞌokpaxo bꞌabꞌel tesataj, wal hex xin islahobꞌal cheyukanoj.

45 »Sunil hunteqꞌan istzꞌaktiꞌ Komam tiꞌ, chihul texol kat yapni teyinh, kat kexistanhtzenkaniloj, yuto mach cheyabꞌe tzet chiyal Komam Dios Jahawil, yebꞌ mach cheyije ischejbꞌanil yebꞌ iskuybꞌanil Komam aqꞌbꞌilxa teyet. 46 Haꞌ hunteqꞌan tiꞌ chiꞌok yecheloj yebꞌ kꞌaybꞌalkꞌulehal teyinh yebꞌ tet yuninal heyuninal yinh sunilbꞌal tiempo.

47 »Yu matxa cheyiyo hebꞌa sata Komam Dios Jahawil yinh tzalahilal yebꞌ yinh sunil heyanma yu hanta iskꞌulal iskꞌul Komam teyibꞌanh. 48 Chexok ischejabꞌo konhobꞌ chischej Komam yanoko howal teyinh, kat heyijlen wahil, tajintiꞌal yebꞌ manh xilqꞌapehal, kat heyaqꞌlen sunil isyaꞌtajil. Haꞌ Komam chexaqꞌni ekꞌoyaꞌ yinh munil kaw yaꞌtaj yet chexok ischejabꞌo hunteqꞌan konhobꞌ tuꞌ masanta chextanhkaniloj. 49 Kat yiniti Komam Jahawil huneꞌ niman konhobꞌ kaw nahat ispeto yul sat yibꞌanhqꞌinal tiꞌ, kat yul lemna teyinh, hakaꞌ chu yul purna noꞌ tꞌiw. Huneꞌ konhobꞌ tuꞌ, mach chitxumcha yabꞌxubꞌal heyu. 50 Hunteqꞌan anma tuꞌ, kaw how jilni issat, machi xin yelapno ebꞌnaj ichamta winaj yul sat, yebꞌ nixhte unin. 51 Kat iskꞌuxnito ebꞌnaj yunin henoqꞌ, kat islohnito ebꞌnaj sat hetzꞌunubꞌ ay sat hetxꞌotxꞌ, kat yetankanoto ebꞌnaj. Matxa hetrigo yebꞌ hevino yebꞌ teꞌ aceite chiyakano ebꞌnaj. Matxapaxo xin yunin hewakax yebꞌ yunin hemeꞌ chikankanoj, kat hekam yu wahil.

52 »Kat ishoynayo ebꞌnaj sunil hekonhobꞌ, kat yaniko ebꞌnaj howal teyinh, kat yuchkꞌanayo ebꞌnaj iskꞌubꞌal hekonhobꞌ kaw ay yip yebꞌ kaw nahat yekanh istel. Chishoyayo ebꞌnaj sunil hekonhobꞌ bꞌay sat txꞌo txꞌotxꞌ chiyaqꞌ Komam Dios Jahawil teyet, kat yaniko ebꞌnaj howal teyinh. 53 Hayet chiꞌalaxiko howal teyinh tuꞌ, cheyaqꞌle wahil, haxa yu wahil tuꞌ chekꞌuxayto heyuninal chipitzkꞌati teyinh, haꞌ ton hekꞌahol yebꞌ hekutzꞌin chiyaqꞌ Komam Dios Jahawil teyet. 54 Haꞌ ebꞌnaj winaj kaw kꞌul iskꞌul texol tinanh, yinh huneꞌ tiempohal tuꞌ, how chiyute sat ebꞌnaj yinh yuxhtaj, yinh yixal, yebꞌ yinh yuninal chitokani. 55 Machi xin chiyaqꞌ hanikꞌo ischibꞌehal yuninal lanhan iskꞌuxni tuꞌ tet yuxhtaj, yixal yebꞌ tet yuninal tuꞌ, yuto haxanhe ay yul isqꞌabꞌ; yu matxa tzet chilolaxi yet chiyaniko huneꞌ konhobꞌ tuꞌ howal teyinh, chiyaqꞌni ekꞌoyaꞌ heyanma yulaj hekonhobꞌ. 56 Hakpax tuꞌ, ix ix kaw kꞌul iskꞌul yebꞌ kaw txahul, maxhtikꞌa chiyayo yoj sat txꞌotxꞌ ta machi isxanhabꞌ aykoj. Haꞌ yinh huneꞌ tiempohal tuꞌ, how chiyute sat ix yinh yichamil yebꞌ yinh yuninal, 57 mach xin chiyaqꞌ ix ischibꞌehal yunin lanhan yali yebꞌ yet bꞌeyom tuꞌ tet yichamil yebꞌ tet yunin, wal xin ewanta chiskꞌuxayto ix yuto matxa tzet chilolaxi, yet chiyaniko huneꞌ konhobꞌ tuꞌ howal teyinh, chexyaqꞌni ekꞌoyaꞌ yulaj hekonhobꞌ.

58 »Tato mach cheyije sunil chejbꞌanile tzꞌibꞌnhebꞌilayo yul hum tiꞌ, yebꞌ ta machi yelapno isbꞌi Komam Dios Jahawil yul hesat, Komam saqꞌalkano isbꞌi, yebꞌ kaw aykano ismay, 59 chiyahti Komam nimeta isyaꞌtajil teyibꞌanh yebꞌ yibꞌanh heyuninal chipohcha teyinh, kat yanipaxti howla yabꞌil teyinh, machi xin chiꞌanhchahi. 60 Chiyati Komam sunil isyaꞌtajil heyil yay yibꞌanh anma bꞌey Egipto teyibꞌanh, hunteqꞌan isyaꞌtajil kaw kexxiw heyilni, kaw naunhe xin chiyanayo teyibꞌanh. 61 Chiyanipaxti hunteqꞌan isyaꞌtajil yebꞌ yabꞌil matxa ayayo yul hum tiꞌ yet kuybꞌanile tiꞌ teyibꞌanh, yunhe hekꞌaytzelaxkaniloj. 62 Hex konhobꞌ Israel hex tiꞌ, kaw nimankano hebꞌisil hakaꞌ isbꞌisil txꞌumel, yajaꞌ xin hanikꞌxanhe chiꞌelkaniko hebꞌisil yu mach cheyije tzet chiyal Komam Dios Jahawil. 63 Hakaꞌtikꞌa istzala iskꞌul Komam yanayo iskꞌulal teyibꞌanh yebꞌ yaqꞌni chꞌibꞌo hebꞌisil, haktikꞌapax tuꞌ istzala iskꞌul Komam yanayo isyaꞌtajil teyibꞌanh yebꞌ kexistanhtzeniloj. Chexistanhtzelo Komam sat txꞌotxꞌ bꞌay chexehayoj.

64 »Chexpujnato sunil yulaj konhobꞌ ay yul sat yibꞌanhqꞌinal tiꞌ yu Komam, kat heyinayo hebꞌa tet hunteqꞌan tzet chal anma isdiosaloj mach heyohtajoj yebꞌ mach yohtajo heyichmam; haꞌ ton xin te teꞌ yebꞌ chꞌen chꞌen watxꞌebꞌil isdiosaloj. 65 Hayet ay hex yul hunteqꞌan konhobꞌ tuꞌ, machi aqꞌankꞌulal yul heyanma yebꞌ xin machi xewilal tet heyoj, yuto haꞌ Komam chiꞌaniko xiwkilal teyinh, toxanhe bꞌiskꞌulal yil-lax hesat, kat yoqꞌ heyanma. 66 Ayexnhetikꞌako yul isqꞌabꞌ naj huchan, aynhetikꞌako xiwkilal teyinh chiꞌekꞌ aqꞌbꞌal chiꞌekꞌ tzꞌayik, mach xin tꞌinhano heyekoj yinh hekawil. 67 Chiꞌokkano huneꞌ niman xiwkilal teyinh yu sunil isyaꞌtajil cheyila, yuxin cheyal yet tzꞌayikal hakaꞌ tiꞌ: “Majaltam aqꞌbꞌalil tinanh,” kexchi. Haxa yet aqꞌbꞌalil cheyalnipaxoj: “Majaltam tzꞌayikal tinanh,” kexchipaxoj. 68 Waxanhka xayal Komam ta mach chexmeltzo yul isbꞌehal Egipto, yajaꞌ chexyaqꞌ meltzo Komam bꞌey Egipto tuꞌ yul teꞌ barco, kat hetxonhlaxto chejabꞌoj bꞌey tuꞌ tet ebꞌnaj ayko ishowal teyinh, yajaꞌ xin mach chisje ebꞌnaj kexisloqꞌoꞌ,» xhi yaꞌ Moisés.