«Haꞌ tinanh xin, cheyije sunil tzet xawalkanojan teyet. 2 Hayet chexqꞌaxponikꞌto yibꞌanh haꞌ Jordán, kat heyapni sat txꞌo txꞌotxꞌ chiyaqꞌ Komam Dios Jahawil teyet, chelinhbꞌakanh hunteqꞌan chꞌen nime chꞌen, kat heyaniko chꞌen txoh yinh chꞌen, 3 kat hetzꞌibꞌnheniko yinh chꞌen sunil chejbꞌanile tiꞌ yet chexapni sat txꞌo txꞌotxꞌ kaw kꞌul yebꞌ kaw yax sat^a chaqꞌ Komam Dios Jahawil teyet, hakaꞌ yalnikano Komam tet ebꞌnaj jichmam. 4 Yuxin hayet chexqꞌaxponikꞌto haꞌ Jordán, chelinhbꞌakanh chꞌen nime chꞌen chiwalan teyet tiꞌ bꞌey witz Ebal, kat heqꞌilniko chꞌen txoh yinh chꞌen. 5 Chewatxꞌenpaxokanh hunu ismexhahil xahanbꞌal tet Komam Dios Jahawil bꞌey tuꞌ. Haꞌ chꞌen chꞌen chelatzꞌbꞌako yinh mexhahil tuꞌ, mach chiꞌokniko munlabꞌal istzeni sat chꞌen. 6 Chelatzꞌbꞌakanh chꞌen mexhahil, yaj chꞌen mach tzehbꞌilo yu munlabꞌal. Yibꞌanh chꞌen mexha tuꞌ xin chenhus xahanbꞌal tet Komam Dios Jahawil. 7 Cheyaqꞌpaxo hexahanbꞌal yet aqꞌankꞌulal yibꞌanh mexha tuꞌ sata Komam Dios Jahawil, kat hewaꞌ bꞌey tuꞌ, kat heyaqꞌni tzalaho hekꞌul sata Komam. 8 Kaw habꞌan chu hetzꞌibꞌnhenayo chejbꞌanile xawalkanojan teyet yibꞌanh chꞌen,» xhi yaꞌ Moisés.

9 Lahwi tuꞌ, istzotelpaxo yaꞌ Moisés tet konhobꞌ tuꞌ, ayko xin ebꞌnaj sacerdote titna yinh yaꞌ Leví iskꞌatanh yaꞌ, yalni yaꞌ tet anma Israel hakaꞌ tiꞌ: «Wal tinanh hex wet konhobꞌ Israel, mach chextzoteli, abꞌewe tzet chiwalan, yuto iskonhobꞌxa Komam Dios Jahawil heyehi. 10 Yuxin yilal heyijen sunil tzet chiyal Komam Dios Jahawil, kat hebꞌeybꞌalnhen sunil chejbꞌanile yebꞌ kuybꞌanile chiwalkanojan teyet tiꞌ tinanh,» xhi yaꞌ Moisés.

11 Yinh huneꞌ tzꞌayik tuꞌ, yal yaꞌ Moisés hunteqꞌan chejbꞌanile tiꞌ tet konhobꞌ Israel:

12 «Hayet chexqꞌaxponikꞌto haꞌ Jordán, haꞌ ebꞌnaj Israel titna yinh yaꞌ Simeón, yinh yaꞌ Leví, yinh yaꞌ Judá, yinh yaꞌ Isacar, yinh yaꞌ José, yebꞌ yinh yaꞌ Benjamín, chiꞌahto ebꞌnaj iswiꞌ witz Gerizim,^b yu isqꞌannayo ebꞌnaj iskꞌulal Komam Dios yibꞌanh konhobꞌ Israel. 13 Walpaxo anma Israel titna yinh yaꞌ Rubén, yinh yaꞌ Gad, yinh yaꞌ Aser, yinh yaꞌ Zabulón, yinh yaꞌ Dan yebꞌ yinh yaꞌ Neftalí chiꞌahto ebꞌnaj iswiꞌ witz Ebal yu isqꞌannayo ebꞌnaj istzꞌaktiꞌ Komam Dios. 14 Kat yok ebꞌnaj levita yalno yinh kaw ip hunteqꞌan tzotiꞌ tiꞌ tet anma Israel, chalni ebꞌnaj:

15 »“Chiꞌalaxayo tzꞌaktiꞌ yibꞌanh mak chiwatxꞌen istioxh, maka yechel tzetaj ye tuꞌ yinh chꞌen chꞌen nhusbꞌil, kat isto yanokanh bꞌay ewan; hunteqꞌan tiꞌ kaw yahbꞌeta yul sat Komam Dios,” xhi ebꞌnaj, kat xin istaqꞌwi konhobꞌ: “Yubꞌojabꞌi,” xhi anma tuꞌ.

16 »“Chiꞌalaxayo tzꞌaktiꞌ yibꞌanh mak mach yelapno ismam maka ismiꞌ yul sat,” xhi ebꞌnaj. Kat istaqꞌwi konhobꞌ: “Yubꞌojabꞌi,” xhi.

17 »“Chiꞌalaxayo tzꞌaktiꞌ yibꞌanh mak chihekꞌni ismohonal istxꞌotxꞌ yet anmahil yu yelqꞌan hanikꞌxa txꞌo txꞌotxꞌ tuꞌ,” xhi ebꞌnaj. Kat xin istaqꞌwi konhobꞌ: “Yubꞌojabꞌi,” xhi.

18 »“Chiꞌalaxayo tzꞌaktiꞌ yibꞌanh mak chihekꞌnilo hunu mak mach chu yilni yul isbꞌeh,” xhi ebꞌnaj. Kat yalni konhobꞌ: “Yubꞌojabꞌi,” xhi.

19 »“Chiꞌalaxayo tzꞌaktiꞌ yibꞌanh mak chiwatxꞌen hunu tzet mach toholo yinh anma mach Israelo ay texol, maka yinh nixhte unin xakam ismiꞌ yebꞌ ismam, maka yinh ebꞌix hunix mebꞌaꞌ,” xhi ebꞌnaj. Kat xin istaqꞌwi konhobꞌ: “Yubꞌojabꞌi,” xhi anma.

20 »“Chiꞌalaxayo tzꞌaktiꞌ yibꞌanh naj winaj chiway yebꞌ yixal ismam, yuto chiyilo naj ispixan ismam yinh hakaꞌ tuꞌ,” xhi ebꞌnaj. Kat xin istaqꞌwi konhobꞌ: “Yubꞌojabꞌi,” xhi anma.

21 »“Chiꞌalaxayo tzꞌaktiꞌ yibꞌanh mak chiyeta isbꞌa yebꞌ hunu no noqꞌ,” xhi ebꞌnaj. Kat xin istaqꞌwi sunil konhobꞌ: “Yubꞌojabꞌi,” xhi.

22 »“Chiꞌalaxayo tzꞌaktiꞌ yibꞌanh naj winaj chiway yebꞌ yanabꞌ, iskutzꞌin ismam, maka yunin ismiꞌ,” xhi ebꞌnaj. Kat istaqꞌwi konhobꞌ hakaꞌ tiꞌ: “Yubꞌojabꞌi,” xhi anma.

23 »“Chiꞌalaxayo tzꞌaktiꞌ yibꞌanh naj winaj chiway yebꞌ ismiꞌ yixal,” xhi ebꞌnaj. Kat istaqꞌwi sunil konhobꞌ hakaꞌ tiꞌ: “Yubꞌojabꞌi,” xhi.

24 »“Chiꞌalaxayo tzꞌaktiꞌ yibꞌanh mak chimaqꞌnikamo yet anmahil, yinh ewantajil,” xhi ebꞌnaj. Kat xin istaqꞌwi sunil konhobꞌ: “Yubꞌojabꞌi,” xhi anma.

25 »“Chiꞌalaxayo istzꞌaktiꞌ Komam Dios yibꞌanh mak chitohlalaxi yu ispotxꞌnikamo hunu yet anmahil machi ismul,” xhi ebꞌnaj. Kat xin istaqꞌwi konhobꞌ: “Yubꞌojabꞌi,” xhi.

26 »“Chiꞌalaxayo tzꞌaktiꞌ yibꞌanh mak mach chiyelapno hunteqꞌan chejbꞌanile tiꞌ yul sat, mach xin chisyije,” xhi ebꞌnaj. Kat xin istaqꞌwi sunil konhobꞌ: “Yubꞌojabꞌi,” xhi anma.