Yebꞌalqꞌabꞌe yet bꞌabꞌel sat tzꞌunubꞌ
26
»Hayet chexapni sat txꞌo txꞌotxꞌ chiyaqꞌ Komam Dios Jahawil teyet hemajuloj, yet ayexxa sat txꞌotxꞌ; 2 cheyiti bꞌabꞌel sat sunil hetzꞌunubꞌ chiyaqꞌ txꞌo txꞌotxꞌ chaqꞌ Komam teyet, kat heyanayto yul teꞌ motx, cheyinito bꞌey txꞌotxꞌ sikꞌbꞌililo yu Komam Dios Jahawil bꞌay chiꞌehikꞌo isbꞌi. 3 Cheyito huneꞌ motx tuꞌ sata yaꞌ sacerdote ayko yinh ismunil yinh huneꞌ tzꞌayik tuꞌ, kat heyalni hakaꞌ tiꞌ: “Tinanh chijalanh sata Komam Dios Jahawil, tato ayonhxa sat txꞌo txꞌotxꞌ yawte isbꞌi Komam Dios tet ebꞌyaꞌ jichmam ta chiyaqꞌ Komam jet,” kexchi tet naj sacerdote. 4 Chischahnilo naj sacerdote huneꞌ motx tuꞌ teyet, kat yanayo naj sata ismexhahil xahanbꞌal tet Komam Dios; 5 kat heyalnipaxo sata Komam Dios Jahawil hunteqꞌan tzotiꞌ hakaꞌ tiꞌ:»“Mamin, naj jichmamanh, haꞌ naj arameo, ekꞌ kolohia kaw haywanhnhechꞌan isbꞌisil ebꞌnaj apni bꞌey Egipto. Yu huneꞌ wahil xin to ebꞌnaj iskoloꞌ isbꞌa Egipto. Haꞌ tuꞌ xin ok ebꞌnaj nime konhobꞌal yebꞌ xin kaw ay yelapno eliko ebꞌnaj, ischꞌibꞌpaxokanh isbꞌisil ebꞌnaj. 6 Yajaꞌ yet tzujanilxa yichiko ebꞌnaj Egipto tuꞌ konhyetananh, yaqꞌni ekꞌoyaꞌ ebꞌnaj janmahanh, konhyanikojanh ebꞌnaj ischejabꞌoj. 7 Jalnihanh tet Komam Dios, isDiosal ebꞌnaj jichmamtuꞌanh tato chonhiskolilojanh, yabꞌen Komam tzet koqꞌananh, yilni Komam jetalaxanh yebꞌ yaqꞌlax ekꞌoyaꞌ janmahanh yinh munil, yebꞌ kaw yaꞌta munil yaqꞌ ebꞌnaj Egipto jetanh. 8 Isyeni Komam yip yebꞌ iskꞌulal jinhanh, konhyinilojanh sat txꞌotxꞌ Egipto tuꞌ, isyenipaxo nimeta xiwkilal yebꞌ kꞌaybꞌalkꞌule, yebꞌ yechel yip yet konhyinilo tuꞌanh. 9 Konhyinitijanh Komam sat txꞌo txꞌotxꞌ kaw kꞌul tiꞌ, yebꞌ kaw yax sat. 10 Yuxin majitijanh bꞌabꞌel sat kotzꞌunubꞌanh mayaqꞌ txꞌo txꞌotxꞌ aqꞌbꞌil jetanh yu Komam Jahawil,” kexchi.
»Lahwi tuꞌ kat heyanayo huneꞌ motx tuꞌ sata Komam Dios Jahawil, kat heyay jahno sata Komam. 11 Kat heyaqꞌni tzalaho hekꞌul yu sunil iskꞌulal chiyaqꞌ Komam Dios Jahawil teyet yebꞌ tet sunil heyuninal, yebꞌ ebꞌnaj levita yebꞌ anma mach Israelo ay texol chitzala tekꞌatanh.
12 »Hayet chitzꞌajna oxox habꞌil yet chepohnilo isdiezmohal sunil sat hetzꞌunubꞌ yet cheyaqꞌni tet ebꞌnaj levita, yebꞌ tet anma mach Israelo ay texol, yebꞌ tet nixhte unin xakam ismiꞌ xakam ismam, yebꞌ tet ebꞌix hunix mebꞌaꞌ, yunhe ay tzet chislo, yebꞌ nohnanhetikꞌa iskꞌul yulaj hekonhobꞌ. 13 Kat xin heyalni sata Komam Dios Jahawil hakaꞌ tiꞌ:
»“Mamin, xaꞌinpohilojan yul watutan sunil tzet hawet yehi, yinh sunil tzet mawiqꞌan yinh sat intzꞌunubꞌan, manpohnikanhan yinh ebꞌnaj levita, yebꞌ yinh anma mach Israelo ay koxolanh yebꞌ yinh nixhte unin xakam ismam xakam ismiꞌ, yebꞌ yinh ebꞌix hunix mebꞌaꞌ. Inyijehan sunil tzet halbꞌilkano hawu, machi hunu hachejbꞌanil tiꞌ xin chinmanhkꞌohan. 14 Machi hunu tzet hawet yehi, inlotojan yet istzꞌayikal yet bꞌiskꞌulal wehan yu hunu kamikal, matzet inlopaxojan yet mach sajo wehan, hakaꞌ yalni chejbꞌanile; mach waltepaxojan tet kamom. Mamin, hach inDiosalan, inyijehan sunil tzet halbꞌilkano hawu. 15 Ilonhaytijanh satkanh bꞌay ay hawehobꞌal kaw ay yelapnoj, kat hawanayo hakꞌulal jibꞌanhanh hanhonh hakonhobꞌ Israelo honhtiꞌanh, kat hawanayo hayaxil yibꞌanh txꞌo txꞌotxꞌ kaw kꞌul yebꞌ kaw yax sat xahawaqꞌ jetanh, hakaꞌ yu hawalnikano tet ebꞌnaj jichmamanh,” kexchi.
16 »Haꞌ Komam Dios Jahawil, chihalnikano tinanh tato yilal heyijen chejbꞌanile yebꞌ kuybꞌanile chiwalkanojan teyet tiꞌ, yuxin yijewe yinh sunil hekꞌul yebꞌ yinh sunil heyanma.
17 »Maxeyalkano tinanh, tato haꞌ Komam Dios haꞌ heDiosal, maxetaqꞌwenpaxiko teyinh heyok tzujno yinh tzet chala, yebꞌ heyijen ischejbꞌanil yebꞌ iskuybꞌanil Komam. 18 Mayalpaxo Komam tinanh tato hanhonh Israelonh tiꞌ, iskonhobꞌ Komam jehi, hakaꞌ yu yalnikanoj, yuxin yilal heyijen sunil ischejbꞌanil Komam. 19 Haꞌ Komam chexanoko nime konhobꞌal, yebꞌ kaw aykano hemay sata ej konhobꞌ, kat hebꞌinakanoj, yebꞌ kaw ekꞌbꞌal heyelapno sata hunteqꞌanxa konhobꞌ iswatxꞌe Komam, kat xin heyokkano yeto Komam Dios Jahawil, hakaꞌtikꞌa yu yalnikanoj,» xhi yaꞌ Moisés.