25
»Tato ay ebꞌnaj chiyaqꞌ howal, yilal isto ebꞌnaj sata ebꞌnaj yahaw konhobꞌ yu yil-laxi yinh tzet chiꞌeliko ebꞌnaj. Haꞌ mak machi ismul chikolchaloj, wal mak ay ismul chiꞌay isyaꞌtajil yibꞌanh yu ebꞌnaj. 2 Haꞌ naj ay ismul tuꞌ yet ay ishatelaxi, ebꞌnaj yahaw konhobꞌ tuꞌ chichejnayo naj sat txꞌotxꞌ, kat yijni naj tzꞌum, hatatikꞌa ismul naj. 3 Yet chihatelax hunu maka, mach chipalkꞌon 40 (kawinaj) el tzꞌum chiyija, yunhe mach kaw chiꞌaykano isyaꞌtajil tuꞌ yibꞌanh, yebꞌ yunhe machi el ispixan tesataj.a4 »Mach cheyako tzꞌispa yinh istiꞌ noꞌ wakax yet chixanhwi trigo noꞌ.
5 »Tato ay kawanh ebꞌnaj winaj yuxhta isbꞌa, huneꞌnhe nhahil xin ye ebꞌnaj, yajaꞌ ta chikam hunu naj, machi xin hunu yuninal naj kamom tuꞌ yebꞌ yixal, haꞌ ix chikam yichamil tuꞌ, mach chu yiqꞌni ix hunuxa naj komon winaj, wal xin haꞌ naj yuxhta naj kamom tuꞌ chiꞌiqꞌnikanokanh ix, yu isyijen naj hakaꞌ yalni chejbꞌanile ta yilal chiqꞌkanh naj yixal yuxhtaj. 6 Haꞌ bꞌabꞌel yunin ix winaj chipitzkꞌahi, haꞌ isbꞌi naj kamom tuꞌ chiꞌok isbꞌiho nichꞌan unin tuꞌ, yunhe mach chikꞌayilo isbꞌi naj yul konhobꞌ Israel. 7 Yajaꞌ ta mach isje naj yuxhta naj chikam tuꞌ yiqꞌaꞌ ix, chito ix sata ebꞌnaj ichamta winaj yahawil konhobꞌ, kat yalni ix hakaꞌ tiꞌ: “Haꞌ naj yuxhta wichamilan kamnaxa, mach chisje naj chibꞌina isbꞌi yuxhta yul konhobꞌ, mach chisje naj kinyiqꞌaꞌan hakaꞌ yalni chejbꞌanile yinh ebꞌnaj chiyiqꞌnikanokanh yixal yuxhta chikami,” xhi ix. 8 Haxa xin ebꞌnaj ichamta winaj yahaw konhobꞌ tuꞌ, chichejni ilaxoti naj, kat istzotel ebꞌnaj tet naj, yajaꞌ ta chiꞌah linhno naj kat yalni naj: “Machi wiqꞌan ix,” xhi naj. 9 Chihitziko ix iskꞌatanh naj, kat yinilo ix isxanhabꞌ naj sata ebꞌnaj yahaw konhobꞌ tuꞌ, kat istzubꞌliko ix yinh sat naj, kat yalni ix hakaꞌ tiꞌ: “Hak tiꞌ chiꞌutelax ebꞌnaj winaj mach chisje chiꞌaqꞌlax bꞌinaho isbꞌi yuxhtaj,” xhi ix.b 10 Yu huneꞌ tuꞌ, yuxin chihal-lax yinh naj xol konhobꞌ Israel hakaꞌ tiꞌ: “yatut naj ilaxilo isxanhabꞌ,” xhi.
11 »Tato ay kawanh ebꞌnaj winaj chiyaqꞌle howal, kat yaniko isbꞌa yixal hunu naj kolwal yinh, kat yok tzabꞌno ix yinh iswinajil naj chimaqꞌni yichamil ix, 12 haꞌ huneꞌ ix ix tuꞌ, chechej tzokꞌlaxolto isqꞌabꞌ ix, mach cheyaqꞌ nimankꞌulal yinh ix.
13 »Hayet chextxonhwi maka yet chexloqꞌwi, mach cheyako chꞌen libra mach tzꞌajanoj. 14 Machojabꞌ hemalbꞌal nimej yet heloqꞌbꞌal yul heyatut, yebꞌ xin hemalbꞌal txannhe yet hetxonh. 15 Wal xin kaw tzꞌajan cheyute hemalbꞌal, haxinwal ay hekawil sat txꞌo txꞌotxꞌ chiyaqꞌ Komam Dios Jahawil teyet. 16 Yuto haꞌ mak chiwatxꞌen malbꞌal mach tzꞌajanoj, yebꞌ mak mach chiwatxꞌen istoholal, chisyah Komam Dios Jahawil huneꞌ tuꞌ.
Chejbꞌanile yinh istanhtzelaxkanilo anma amalecita
17 »Chenatij tzet konhyute anma amalecita yet ayonhiko yinh kobꞌel yet jel bꞌey Egipto. 18 Nawetij tato maxhtikꞌa xiw ebꞌnaj tuꞌ tet Komam Dios, yaniko ebꞌnaj howal jinh yul bꞌeh yet yilni tato kaw sikomonh, yebꞌ kaw matxa jip, yebꞌ yet yilni anma kankano tzujnoj yu matxatikꞌa nino yip. 19 Yuxin hayet xakexiskolilo Komam Dios Jahawil yul isqꞌabꞌ sunil anma ayko ishowal teyinh, hoyaniko yinh txꞌotxꞌ chiyaqꞌ Komam teyet, yilal hetanhtzenkanilo isbꞌi naj Amalec tuꞌ sat yibꞌanhqꞌinal tiꞌ.c Machojabꞌ chito nahul huneꞌ tiꞌ heyu.