24
»Tato ay hunu naj winaj chimohyi yebꞌ hunu ix ix, yajaꞌ ta yet tzujanilxa xin matxa chiyoche naj ix yu hunu istxꞌojal chiꞌilchalo yinh ix yu naj, yinh hakaꞌ tuꞌ chistzꞌibꞌnhe naj hunu hum yet pohlebꞌahil tet ix, kat yalni naj tet ix ta chipaxto ix. 2 Haxa yet paxnaxa ix yatut naj tuꞌ, chisje yiqꞌni ix hunuxa naj yichamiloj. 3 Yajaꞌ ta hayet tzujanilxa, matxa chiꞌochelaxpaxo ix yu naj iskabꞌ tuꞌ yixaloj, chistzꞌibꞌnhe naj hum yet pohlebꞌahil tet ix, kat ispaxto ix; yajaꞌ tato chikam naj iskabꞌ ichamile tuꞌ; 4 yinh hakaꞌ tuꞌ, matxa chisje yiqꞌlax ix yu naj bꞌabꞌel ichamile hunelxa, yuto mach sajo ye ix; mach kꞌulo huneꞌ tuꞌ yul sat Komam Dios Jahawil. Mach cheyetato txꞌo txꞌotxꞌ aqꞌbꞌil teyet yu Komam yu chewatxꞌen hakaꞌ tuꞌ.5 »Tato ay hunu naj tolto mohyi, mach chu yalaxto naj yinh howal, mach chu yokpaxo naj yinh hunuxa munil chiꞌaqꞌlax tet yulbꞌal huneꞌ tiempo. Chikankano naj yul yatut iskꞌatanh yixal yunhe istzala iskꞌul yixal naj tuꞌ.
6 »Mach cheqꞌanilo isqꞌabꞌ iskaꞌ ebꞌnaj, maka chꞌen ismiꞌehal yet cheyaqꞌni chꞌen melyu kꞌamil tet, yuto ta mach iskaꞌ naj lahan hakaꞌto cheyilo iskawil huneꞌ mak tuꞌ.
7 »Tato ay hunu jet Israelal chiꞌelqꞌalaxto yu hunu yet konhobꞌ yu yaniko ischejabꞌoj, maka yu istxonhnito chejabꞌoj, haꞌ huneꞌ mak tuꞌ yilal yaqꞌlax kamoj, yu heyinilo istxꞌojal texol.
8 »Tato ay hunujex chiꞌelilo lepra teyinh, yilal heyijen sunil chejbꞌanile chiyal ebꞌnaj sacerdote levita, yilal heyijen hakaꞌtikꞌa yu walnikanojan tet ebꞌnaj. 9 Naweti tzet utelax ix María yu Komam Dios Jahawil, yet ayonhiko yinh kobꞌel yet jel bꞌey Egipto.
10 »Tato ay chꞌen melyu cheyaqꞌ kꞌamil tet hunu heyet anmahil, mach chexokto yul yatut naj heyiqꞌalti hunu xil isqꞌap selelo chꞌen melyu cheyaqꞌ kꞌamil tuꞌ. 11 Wal xin chexkankano linhno istiꞌ yatut naj, kat heyechman yinilti hunu xil isqꞌap selelo chꞌen melyu tuꞌ. 12 Yajaꞌ ta kaw mebꞌaꞌ naj, mach chu iskankano xil isqꞌap naj yul heqꞌabꞌ yet chiꞌah aqꞌbꞌal. 13 Wal xin yilal heyaqꞌni meltzoho tet naj yet chiꞌah aqꞌbꞌal, yunhe ispichni isbꞌa naj yu xil isqꞌap tuꞌ yet chiꞌok wayoj. Hak tuꞌ chu isqꞌanni hawet anmahil tuꞌ iskꞌulal teyibꞌanh, yinh hakaꞌ tuꞌ xin chewatxꞌe iskꞌulal sata Komam Dios Jahawil.
14 »Mach cheyeta heyet anmahil kaw yaꞌtaj chiꞌekꞌ yu, yebꞌ kaw mebꞌaꞌ, ayiko munil teyintaj, anma heyet konhobꞌ maka mach heyet konhobꞌo ay yul hekonhobꞌ. 15 Wal xin haꞌtikꞌa yinh huneꞌ tzꞌayik chimunla teyinta tuꞌ chetohla yet maxhto chito tzꞌayik, yuto mebꞌaꞌ, yuto chiꞌokniko istohol tuꞌ yu yekꞌ yilaꞌ; ta mach xin chiꞌah yaw teyinh tet Komam Dios, kat yok huneꞌ tuꞌ hemulo sata Komam.
16 »Mach chu yaqꞌlax kamo naj mame yu ismul iskꞌahol, hakpax tuꞌ naj kꞌahole mach chu yaqꞌlax kamo naj yu ismul ismam; wal xin haꞌ mak ay ismul, haꞌ chiꞌaqꞌlaxkamo yu ismul.
17 »Mach chewatxꞌe istxꞌojal yinh anma nan konhobꞌal ay texol, yebꞌ hunu mebꞌaꞌ machi ismam machi ismiꞌ. Mach cheqꞌanpaxilo xil isqꞌap ebꞌix hunix iskꞌambꞌanilo tzet cheyaqꞌ tet. 18 Mach chenahulnhetoj tato hakexpax tuꞌ kexok ischejabꞌo anma ah Egipto, yajaꞌ xin kexiskolilo Komam Dios Jahawil yalanh isyaꞌtajil tuꞌ. Yuxin chiwalan teyet tato cheyije sunil tzet chiwalan teyet tiꞌ.
19 »Tato yet lanhan hekꞌupni hetrigo, kat hebꞌejnikano hunu yachan ixim, matxa chexmeltzo hesikꞌaꞌkanh ixim, chikankano ixim yuto haxa anma mach Israelo ay texol, maka mak machi ismam machi ismiꞌ, maka ebꞌix hunix mebꞌaꞌ chiꞌekꞌ sikꞌnokanh ixim tuꞌ. Hak tuꞌ xin chu yanayo Komam Dios Jahawil isyaxil yibꞌanh sunil tzet chewatxꞌe.
20 »Hayet cheyinilo sat teꞌ olivo, mach chexekꞌ hekayeꞌnhe hesayni sat teꞌ xolaj isqꞌabꞌ, haꞌ teꞌ sat chikankano heyu yetxa anma mach Israelo ay texol ye teꞌ, yebꞌ makta mach ismam machi ismiꞌ, yebꞌ ebꞌix hunix mebꞌaꞌ.
21 »Hayet cheyuxni sat heyuva, mach chexekꞌ hekayeꞌnhe heyilni tato ay sat teꞌ chitokankano heyu. Haꞌ teꞌ chikan tuꞌ, awekano teꞌ tet anma mach Israelo ay texol, yebꞌ makta mach ismam mach ismiꞌ, yebꞌ ebꞌix hunix mebꞌaꞌ. 22 Nawetij tato kexok ischejabꞌo anma Egipto, yuxin chiwalan teyet, tato cheyijewe sunil tzet chiwaltiꞌan.