2 »Haꞌ mak tonhe mitzꞌnhebꞌil yu ismiꞌ, mach chu yok xol anma Israel yet chiskutxbꞌan isbꞌa sata Komam, hakpax tuꞌ xin yuninal chipohchakanti yinh 10 (islahonhebꞌ) majan yuninal yuninal ebꞌnaj, machi bꞌaqꞌinhal chiꞌok xol konhobꞌ Israel yet chiꞌok sata Komam.

3 »Haꞌ anma amonita yebꞌ anma moabita, hakpax tuꞌ xin yuninal chipohchahi, machi bꞌaqꞌinh tiꞌ chiꞌok xol konhobꞌ Israel yet chiskutxbꞌan isbꞌa sata Komam Dios. 4 Yuto yet ayexiko yinh hebꞌel yet heyel bꞌey txꞌotxꞌ Egipto, machi elilo ebꞌnaj kexischabꞌ yul bꞌeh yu yaqꞌni ebꞌnaj nichꞌano pan hewabꞌ yebꞌ ha haꞌ. Wal xin istohla ebꞌnaj naj Balaam, iskꞌahol naj Beor ay bꞌey txꞌotxꞌ Petor, ayko yul ismajul txꞌotxꞌ Mesopotamia, yunhe isqꞌanni naj tzꞌaktiꞌ teyibꞌanh, 5 yajaꞌ xin mach yabꞌe Komam tzet yal naj Balaam tuꞌ. Haxa xin Komam Dios Jahawil tzotel tet naj, yuxin haxa iskꞌulal isqꞌan naj teyibꞌanh selelo tzꞌaktiꞌ, yuto kaw xahan ay hex yu Komam. 6 Mach chesay isaqꞌankꞌulal hunteqꞌan konhobꞌ tuꞌ yinh sunilbꞌal ej tiempo.

7 »Yajaꞌ xin mach cheyako hehowal yinh ebꞌnaj edomita,^a yuto heyuxhtato hebꞌa yebꞌ ebꞌnaj, mach xin chichiwapaxo hekꞌul yinh anma Egipto, yuto nan konhobꞌal yu heyekꞌ sat istxꞌotxꞌ ebꞌnaj. 8 Haꞌ xin yuninal ebꞌnaj chipohchati yinh isyox majan mame chiyu yok texol yet chekutxbꞌa hebꞌa sata Komam.

9 »Hayet chexelto yinh howal yinh ebꞌnaj ayko ishowal teyinh, yet ay hex yul hecampamento, mach chewatxꞌe tzet ye tuꞌ mach kꞌuloj hakaꞌ yalni chejbꞌanile. 10 Tato ay hunu naj winaj chiꞌel yikꞌal yinh yet lanhan isway yet aqꞌbꞌalil, huneꞌ naj tuꞌ, mach sajo naj hakaꞌ yalni chejbꞌanile, yuxin yilal yelto naj yintalto campamento sunilbꞌal huneꞌ tzꞌayik tuꞌ. 11 Haxa yet qꞌejbꞌiyal xin, kat yaxhnhen isbꞌa naj, kat ismeltzo naj yul campamento tuꞌ yet chito tzꞌayik.

12 »Yintalto campamento tuꞌ chesay bꞌay chextxuli. 13 Yilal heyinikꞌo hunu te teꞌ paqꞌan ye iswiꞌ yinta hechꞌen yet howal, haxinwal yet chextzayi yintalto campamento tuꞌ, cheholni txꞌo txꞌotxꞌ yu te teꞌ, kat hetzayayto yul, lahwi tuꞌ kat hemajchenkano yu txꞌo txꞌotxꞌ. 14 Yuto chiꞌekꞌayo Komam Dios Jahawil texol yul campamento tuꞌ, yu kexistanheni, yebꞌ yu iskolwa teyinh heqꞌoji yinh ebꞌnaj ayko ishowal teyinh. Yuxin yilal saj ye campamento tuꞌ, yunhe machi hunu tzet tzꞌil chiyil Komam bꞌey tuꞌ, ta mach xin mach chꞌehikꞌo Komam texol.

15 »Tato ay hunu naj chejabꞌ chiꞌelkanh iskꞌatanh yahaw, kat yapni naj tekꞌatanh, mach chetzumbꞌeto naj iskꞌatanh yahaw tuꞌ hunelxa. 16 Kanojabꞌkano naj yul konhobꞌ chissikꞌiloj bꞌay chiyoche iskꞌul chiꞌeh texol tuꞌ, mach xin cheyeta naj.

17 »Machojabꞌ ebꞌix txꞌoj ye iswiꞌ xol ebꞌix ix Israel, machojabꞌ hunu ebꞌnaj winaj jet Israelal chiyako ismul yu isway yebꞌ yet winajil.^b 18 Haꞌ chꞌen melyu istohol hunu ix txꞌoj ye iswiꞌ, maka istohol hunu naj winaj chiway yebꞌ yet winajil, mach chu yilaxto chꞌen yul Yatut Komam yebꞌalqꞌabꞌehal yu isyijen tzet xayalte tet Komam, yuto kaw chisyah Komam hunteqꞌan istxꞌojal tuꞌ.

19 »Hayet cheyaqꞌni chꞌen melyu kꞌamil tet heyet konhobꞌ, mach cheqꞌan yal chꞌen tet. Mach cheqꞌanpaxo iskꞌambꞌanil tzet chilolaxi, maka iskꞌambꞌanil hunuxa tzet chitikꞌa qꞌanlax iskꞌambꞌanil. 20 Wal tet ebꞌnaj mach Israelo ay texol chisje heqꞌanni iskꞌambꞌanil, yajaꞌ wal tet heyet konhobꞌ, mach cheqꞌana. Haꞌ xin Komam chiꞌanayo isyaxil yibꞌanh sunil tzet chewatxꞌe yet ay hex sat txꞌo txꞌotxꞌ chiyaqꞌ Komam teyet.

21 »Hayet cheyalten hunu tzet ye tuꞌ tet Komam Dios Jahawil, mach nimano tzꞌayikal chiꞌekꞌto heyu heyijeni, wal xin yinh anhe cheyije; ta mach xin, chisqꞌanaꞌ Komam teyet, yinh hakaꞌ tuꞌ chiꞌok hemul sata Komam. 22 Yajaꞌ ta matzet chetaqꞌweko teyibꞌanh sata Komam, mach chiꞌok hemul hakaꞌ tuꞌ, 23 yaj ta chitit yinh hekꞌul, kat heyalni ta cheyaqꞌ hunu tzet ye tuꞌ tet Komam Dios Jahawil, mach chiꞌekꞌto yet heyijeni.

24 »Hayet chexekꞌ xol istzꞌunubꞌ hunu heyet anmahil, chisje heloni sat teꞌ uva hantatikꞌa chiyoche hekꞌul, yajaꞌ machi hunu teꞌ cheyito yul hemotx. 25 Yebꞌ xin tato chexekꞌ xol istrigo heyet anmahil, chisje heyinilo iswiꞌ ixim trigo hekꞌuxuꞌ, yajaꞌ mach chu hekꞌupnilo iswiꞌ ixim yu chꞌen kꞌupbꞌal trigo.