22
»Tato ay hunujex tiꞌ cheyil hunu iswakax maka hunu ismeꞌ heyet konhobꞌ kꞌaynatoj, mach tonhe cheyiliko noꞌ, wal xin cheyito noꞌ bꞌey yatut heyet konhobꞌ tuꞌ. 2 Yajaꞌ ta mach hekawilalo ayayo yatut naj yahaw noꞌ, maka mach heyohtajo mak ay yet noꞌ, yinh hakaꞌ tuꞌ, cheyito noꞌ heyatut, kat xin iskankano noꞌ heyatut tuꞌ masanto chiqꞌambꞌelax noꞌ yu yahaw, kat heyaqꞌni meltzoho noꞌ. 3 Haktikꞌapax tuꞌ cheyute yet chikꞌayto isburro heyet konhobꞌ maka hunu xil isqꞌap, maka hunuxa tzet ye tuꞌ chikꞌaytoj. Tato ay hunujex cheyila, mach tonheho cheyilikoj.4 »Tato ay hunujex tiꞌ cheyil yaykꞌay ischeh maka iswakax hunu heyet konhobꞌ, mach tonheho cheyila, wal xin yilal hekolwa heyinikanh noꞌ yinta heyet konhobꞌ tuꞌ.
5 »Ebꞌix ix, mach chu yaniko ebꞌix xil isqꞌap ebꞌnaj winaj yinh, hakpax tuꞌ ebꞌnaj winaj, mach chu yaniko ebꞌnaj xil isqꞌap ebꞌix ix yinh; yuto chisyah Komam Dios Jahawil makxanhetikꞌa chiwatxꞌen hakaꞌ tuꞌ.
6 »Hayet chiꞌilcha hunu yatut noꞌ chꞌik bꞌayejtuꞌwal heyu yinh ej iswiꞌ te teꞌ maka yibꞌanh txꞌotxꞌ, pajanayo noꞌ miꞌe yibꞌanh yunin maka yibꞌanh ishos, mach cheyito noꞌ miꞌe tuꞌ yebꞌ yunin. 7 Wal xin chisje heyinito noꞌ nixhte yunin, kat heyanikano noꞌ miꞌe tuꞌ ischukil, haxinwal kꞌul chiꞌekꞌ heyilaꞌ, kat ischꞌibꞌto yoj hekawil sat yibꞌanhqꞌinal tiꞌ.
8 »Tato ay hunu hex tiꞌ cheyakanh hunu heyatut, yilal helatzꞌbꞌankanh iskꞌubꞌal yinh istiꞌla yibꞌanh terraza tuꞌ, yuto kꞌuxantaxka yaykꞌayti hunu mak bꞌey tuꞌ kat iskami, kat yok iskamikal tuꞌ hemuloj yebꞌ mak ay yul heyatut.
9 »Mach cheyato hunuxa nan hinhatil xol heyuva yet chetzꞌunni, yuto ta hak tuꞌ cheyute, chiꞌetaxto hehinhat tuꞌ, kat yetaxpaxto issat teꞌ uva.
10 »Hayet ay tꞌoko mach cheyako noꞌ wakax yebꞌ huneꞌ noꞌ burro iskakꞌonhal tꞌoko txꞌotxꞌ.
11 »Mach cheyako xilqꞌape sombꞌil ischembꞌanil yebꞌ noꞌ lana yebꞌ txꞌal lino.
12 »Cheyako yelawil kanhebꞌ istxikin istiꞌ xil heqꞌap chehukbꞌako teyinh.a
Chejbꞌanile yinh iqꞌlebꞌahil
13 »Tato ay hunu naj winaj chiꞌiqꞌni hunu ix ix yixaloj, lahwi yiqꞌni naj ix xin matxa chiyoche naj ix, 14 kat yalni naj tato xayiqꞌle ix winaj, kat yok naj tzotelo yinh ix, chiyalni naj hakaꞌ tiꞌ: “Manmoyihan yebꞌ huneꞌ ix ix tiꞌ, yajaꞌ hayet manwayan yebꞌ ix mawilnihan tato matxa qꞌopoho ix, xayiqꞌle ix winaj,” xhi naj. 15 Haxa ismam ix yebꞌ ismiꞌ ix chiꞌinito yechel isqꞌopohal ix sata ebꞌnaj ichamta yahawil konhobꞌ, 16 kat xin yalni naj mame tuꞌ hakaꞌ tiꞌ: “Hanintiꞌan waqꞌan inkutzꞌinan yixalo huneꞌ naj tiꞌ, yajaꞌ haxa tinanh xin matxa chiyoche naj ix. 17 Isnakanh naj leqꞌtiꞌal ismulo ix, chalni naj tato matxa qꞌopoho ix yet yiqꞌni naj ix, wal xin ay yechel isqꞌopohal ix lah,” xhi naj mame tuꞌ. Hayet chiyalni naj hak tuꞌ, kat islehbꞌalaxto qꞌap sábana sata ebꞌnaj ichamta winaj yahaw konhobꞌ tuꞌ; 18 kat ischejni ebꞌnaj tzabꞌlaxoyo huneꞌ naj tuꞌ, kat yalaxayo isyaꞌtajil yibꞌanh naj. 19 Kat yaqꞌni naj 100 (hokꞌal) siclo chꞌen melyu plata ismultahoj, kat yaqꞌlax chꞌen tet ismam ix, yu yilo naj ispixan huneꞌ ix ix haꞌ Israel; yaj xin yixal naj chuko ix yinh sunilbꞌal tiempo, machi xin chu ispohlen isbꞌa naj yebꞌ ix.
20 »Yajaꞌ tato yeli matxa qꞌopoho ix yet yiqꞌni naj ix, 21 wal tuꞌ chiꞌilaxilti ix yul yatut ismam, kat isqꞌojlaxkamo ix yu ebꞌnaj winaj ay yul konhobꞌ tuꞌ, yu yako ix ismul yul konhobꞌ Israel yebꞌ yu yilo ix ispixan ismam; hak tuꞌ chu heyinilo istxꞌojal tuꞌ texol.
22 »Tato ay hunu naj winaj chiꞌilcha yet lanhan isway yebꞌ hunu ix ix, ay xin yichamil ix, haꞌ kawanh mak tuꞌ chiyako ismul, yilal yaqꞌlax kamoj; hak tuꞌ chu heyinilo istxꞌojal texol.
23 »Tato ay hunu ix qꞌopo qꞌanbꞌilxa, yajaꞌ ay hunu naj chiꞌilni ix yul konhobꞌ, kat isway naj yebꞌ ix. 24 Haꞌ kawanh yako ismul tuꞌ, yilal yilaxto sata ebꞌnaj yahaw konhobꞌ yu isqꞌojlaxkamoj. Chiꞌaqꞌlaxkamo ix qꞌopo tuꞌ yuto machi awi ix yul konhobꞌ tuꞌ yu iskol-laxilo ix tet naj; chiqꞌojlaxpaxo kamo naj winaj tuꞌ, yuto yeta naj huneꞌ ix ix qꞌanbꞌilxa tuꞌ. Hak tuꞌ chu heyinilo istxꞌojal texol tuꞌ.
25 »Tato ay hunu naj winaj chichahni hunu ix ix qꞌanbꞌilxa xol munil, kat xin yipiko naj yinh ix, kat isway naj yebꞌ ix, yinh hakaꞌ tuꞌ, hanhe huneꞌ naj winaj tuꞌ chiꞌaqꞌlaxkamoj; 26 wal ix qꞌopo tuꞌ, matzet chiꞌutelax ix, yuto machi ismul ix chiꞌaqꞌnikamoj. Haꞌ tzet yute huneꞌ naj tuꞌ, lahan hakaꞌ hunu naj chismaqꞌkamo hunuxa yet anmahil, 27 yuto ischukil ix yet ischahni naj ix, waxanhkami xin awi ix, yaj machi mak kolni ix tet naj.
28 »Tato ay hunu naj winaj chichahnayo hunu ix qꞌopo maxhto qꞌanbꞌiloj, kat xin yipiko naj yinh ix kat isway naj yebꞌ ix, kat yabꞌchalo huneꞌ tuꞌ. 29 Yinh hakaꞌ tuꞌ, chiyaqꞌ naj 50 (lahonhebꞌ yoxkꞌal) siclo chꞌen melyu plata tet ismam ix qꞌopo tuꞌ, kat yokkano ix yixalo naj yinh hunelnhe, yuto etalax ix yu naj, mach xin chu isbꞌejnikano naj ix.
30 »Machi hunu naj winaj chu isway yebꞌ yixal ismam, yuto ta yinh hakaꞌ tuꞌ, chilo naj ispixan ismam tuꞌ.