Xahanbꞌal chiꞌaqꞌlax yinh yet chipotxꞌlaxkamo hunu mak mach ohtabꞌilo mak chipotxꞌni
21
»Wal xin yet ay hex sat txꞌo txꞌotxꞌ chiyaqꞌ Komam Dios Jahawil teyet, chiꞌilcha isnimanil hunu mak maqꞌbꞌil kamoj, machi xin chiꞌabꞌchaloj mak potxꞌnhekamoj; 2 haꞌ xin ebꞌnaj ichamta winaj ay yul konhobꞌ yebꞌ ebꞌnaj juez chimaleni bꞌaytet konhobꞌ kawil yeko bꞌay ayayo isnimanil huneꞌ kamom tuꞌ. 3 Haꞌ xin ebꞌnaj ichamta winaj ay yul konhobꞌ ayko iskawilal tuꞌ chiꞌiniti hunu noꞌ qꞌopo wakax maxhto chiꞌalaxiko yinh munil, maxhto chiꞌok te teꞌ yibꞌanh isnuqꞌ, 4 kat yinayto ebꞌnaj noꞌ istiꞌ hunu haꞌ nichꞌan haꞌ mach chitajkanh, bꞌay maxhto hunu mak xamunlahi yebꞌ chiꞌaniko istzꞌunubꞌ; haꞌ bꞌey tuꞌ xin chiswoqꞌilo ebꞌnaj isnuqꞌ noꞌ, kat iskam noqꞌ.5 »Lahwi tuꞌ, kat yapni ebꞌnaj sacerdote, ebꞌnaj titna yinh yaꞌ Leví, ebꞌnaj sikꞌbꞌiliko yu Komam Dios Jahawil yu ismunla ebꞌnaj yinh ismunil Komam, kat xin isqꞌanni ebꞌnaj iskꞌulal teyibꞌanh yinh isbꞌi Komam. Haꞌ xin ebꞌnaj chihalni yinh tzet chiꞌeliko howal, yebꞌ kajlebꞌahil chiꞌah texol, haꞌ xin tzet chiyal ebꞌnaj haꞌ chij isbꞌa. 6 Lahwi tuꞌ, sunil ebꞌnaj ichamta winaj ay yul konhobꞌ iskawilal bꞌay ilcha huneꞌ kamom tuꞌ, chistxꞌah isqꞌabꞌ yibꞌanh isnimanil noꞌ wakax tuꞌ, 7 kat yalni ebꞌnaj hakaꞌ tiꞌ: “Mamin, hanhonhtiꞌanh, maxhtaj honhanh kopotxꞌanh huneꞌ naj tiꞌ, mach xin jilanh mak potxꞌnikamo naj. 8 Mam Jahawil, aqꞌ nimankꞌulal jinhanh hanhonh konhhakonhobꞌ Israelonh tiꞌanh, hanhonh konhhakolilojanh yul konhobꞌ Egipto, mach chawako iskamikal huneꞌ naj machi ismul tiꞌ komulojanh,” xhi ebꞌnaj. Hak tuꞌ xin machi ok iskamikal huneꞌ naj tuꞌ hemuloj. 9 Ta hak tuꞌ cheyute, chewatxꞌe istoholal sata Komam Dios, machi heyok yinh huneꞌ kamikal tuꞌ.
Chejbꞌanile yinh ebꞌix ix chiꞌilaxto preso
10 »Hayet cheyaqꞌni howal yebꞌ konhobꞌ chiꞌaniko howal teyinh, kat xin yaqꞌni aykꞌayo Komam Dios Jahawil anma yul heqꞌabꞌ, kat heyinito preso yul hekonhobꞌ, 11 ta xin ay hunu naj winaj tiꞌ chiꞌilni hunu ix ix kaw kꞌulchꞌan jilni xol anma cheyito preso tuꞌ, kat xin yok yanma naj yinh ix yu yok ix yixalo naj. 12 Yinh hakaꞌ tuꞌ, chiyito naj ix yatut, kat iskꞌupnilo ix xil iswiꞌ, kat yinilo ix yisqꞌaj, 13 kat ishelni ix xil isqꞌap ayko yinh yet chiꞌilaxti preso tuꞌ, kat iskankano ix yatut naj, huneꞌ ixahaw xin chiꞌoqꞌ ix yinh ismam yebꞌ yinh ismiꞌ, lahwi tuꞌ kat yiqꞌni naj Israel tuꞌ ix yixaloj, hak tuꞌ chu yokkano naj yichamilo ix, kat yokpaxkano ix yixalo naj. 14 Yajaꞌ ta yet tzujanilxa matxa chiyoche naj ix, chisje isbꞌejnikano naj ix, yajaꞌ mach chu istxonhnito naj ix chejabꞌoj, maka yok ix ischejabꞌo naj, yuto ta hak tuꞌ chꞌel ispixan ix yu naj.
15 »Tato ay hunu naj winaj kawanh yixal, ay xin hunu ix xahan ay yu naj, hunxa ix xin machoj, yajaꞌ ay yuninal naj yebꞌ ebꞌix iskawanhil, haꞌ xin yebꞌ ix mach xahano ay yu naj tuꞌ ay isbꞌabꞌel kꞌahol,a 16 hayet chispohni naj tzet ay yinh yuninal tuꞌ, mach chu yaqꞌni naj tet yunin ix xahan ilbꞌil yu naj hakaꞌ ismalil tzet chaqꞌ naj tet isbꞌabꞌel kꞌahol, yunin ix yahbꞌil yu naj. 17 Wal xin yilal haꞌ naj yunin ix mach ochebꞌilo tuꞌ chiꞌok bꞌabꞌel kꞌahole yul sat naj, yuxin ekꞌbꞌal ismajul naj chiꞌaqꞌlax yu ismam tuꞌ sata hunteqꞌanxa ebꞌnaj iskꞌahol naj, yuto haꞌ naj isbꞌabꞌel kꞌahol naj pitzkꞌahi yet tzeh naj mame tuꞌ, yuxin yet naj ye ismajul yet bꞌabꞌel kꞌahole.
18 »Tato ay hunu naj mame tiꞌ ay hunu iskꞌahol kaw manhkꞌom, kaw hip chute isbꞌa, mach chabꞌeto tzet chal ismam, mach chabꞌe tzet chal ismiꞌ, mach xin chisyije yet chihatelax yu ismam tuꞌ, waxanhka chiꞌaqꞌlax yijaꞌ yet chikuylaxi, matxatikꞌa chiyabꞌetoj. 19 Haꞌ huneꞌ naj kꞌahole tuꞌ, chiꞌilaxto naj yu ismam yebꞌ ismiꞌ sata ebꞌnaj ichamta winaj yahawil yul konhobꞌ, bꞌey ispultahil iskonhobꞌ ebꞌnaj tuꞌ, 20 kat xin yalni naj hakaꞌ tiꞌ: “Huneꞌ juninal tiꞌanh kaw manhkꞌom, soman mach chisyije, maxhtikꞌa chiyabꞌe tzet chijalanh, kaw peqꞌ, yebꞌ kaw ukꞌum teꞌ,” xhi. 21 Haxa xin ebꞌnaj winaj yul konhobꞌ tuꞌ chiqꞌojnikanh masanta chikami. Hak tuꞌ chu hetanhtzenilo istxꞌojal texol hex Israel hex tiꞌ. Hayet chiyabꞌen anma Israel huneꞌ tuꞌ, kat isxiw iswatxꞌen istxꞌojal.
22 »Ta ay hunu naj chiꞌaqꞌlaxkamo yu ismul, kat istꞌunhbꞌalaxkanh yinh te teꞌ yuto yako ismul kaw how, 23 haꞌ isnimanil huneꞌ naj tuꞌ mach chu iskankano tꞌunhno yinh huneꞌ aqꞌbꞌal, wal xin haꞌtikꞌa yinh huneꞌ tzꞌayik bꞌay chitꞌunhbꞌalax tuꞌ chiꞌilaxaytij, kat ismujlaxi. Ta cheyije hakaꞌ tuꞌ, mach cheyetato txꞌo txꞌotxꞌ chiyaqꞌ Komam Dios Jahawil teyet hemajuloj, yuto haꞌ mak chitꞌunhbꞌalaxkanh yinh te teꞌ ayayo istzꞌaktiꞌ Komam Dios yibꞌanh.