Chejbꞌanile yet chiꞌok howal
20
»Hayet chexelto yinh howal yinh anma chiꞌaniko howal teyinh, kat heyilni ischeh yebꞌ iscarruaje yet howal, yebꞌ tato ekꞌbꞌal isbꞌisil anma tuꞌ tesataj, mach chexxiwi, yuto ayko Komam Dios Jahawil heyetbꞌihoj, Komam konhinilti bꞌey Egipto. 2 Hayet lanhan yichiko howal tuꞌ kat yelto naj sacerdote yilno ebꞌnaj Israel, 3 kat yalni naj tet ebꞌnaj hakaꞌ tiꞌ: “Abꞌewe hex Israel hex tiꞌ, tinanh cheyaqꞌ howal yebꞌ ebꞌnaj ayko ishowal teyinh, mach chikabꞌkon hekꞌul, mach chexxiwpaxoj, mach chexluylunkanh yu xiwkilal, 4 yuto ayko Komam Dios Jahawil heyetbꞌihoj. Haꞌ Komam chiꞌaqꞌni howal yinh ebꞌnaj heseleloj, kat xin heqꞌoji yinh ebꞌnaj,” xhi naj. 5 Lahwi tuꞌ chitzotelpaxo ebꞌnaj iswiꞌehal ebꞌnaj Israel chito yinh howal, chalni ebꞌnaj tet ebꞌnaj: “Tato ay hunu mak tiꞌ tolto yakanh hunu yatut, maxhto xin chiꞌokto yul teꞌ, meltzojabꞌto yatut, yuto kꞌuxantaxka chikam yinh howal, nanxa xin mak chitzulni teꞌ yinh yakꞌtohal. 6 Tato ay hunu mak tiꞌ istzꞌun teꞌ uva, maxhto xin chislo sat teꞌ, meltzojabꞌto yatut, yuto kꞌuxantaxka iskam yinh howal, nanxa xin mak chiloni sat istzꞌunubꞌ. 7 Tato ay hunu mak tiꞌ qꞌanbꞌilxa yixal, maxhto xin chimohyi, meltzojabꞌto yatut, yuto kꞌuxantaxka iskam yinh howal, nanxa xin naj chiꞌiqꞌnikanh ix qꞌanbꞌilxa tuꞌ,” xhi ebꞌnaj.8 »Kat xin yalnipaxo ebꞌnaj iswiꞌehal ebꞌnaj tuꞌ hunelxa: “Tato ay hunu mak texol tiꞌ mach yip yanma tet howal, pet chixiwkanh, meltzojabꞌto yatut, yuto kꞌuxantaxka yaqꞌni kabꞌkonokanh yanma hunteqꞌanxa ebꞌnaj,” xhi ebꞌnaj. 9 Hayet chilahwi istzotel ebꞌnaj iswiꞌehal tuꞌ, chisikꞌnilo ebꞌnaj ebꞌnaj ok ijbꞌano hunun majan ebꞌnaj chito yinh howal.
10 »Hayet kawilxa heyeko yinh hunu konhobꞌ yu heyaniko howal yinh, chextzotel tet anma ay yul hunu konhobꞌ tuꞌ ta chiyoche chiꞌok yinh aqꞌankꞌulal yebꞌ hex. 11 Ta xin chiyoche chiꞌok yinh aqꞌankꞌulal yebꞌ hex xin, chexischahnikto yul iskonhobꞌ, haꞌ xin anma tuꞌ chiꞌokkano hechejabꞌoj, kat xin ismunla yinh munil kaw yaꞌtaj. 12 Yajaꞌ ta mach chisje chiꞌok yinh aqꞌankꞌulal yebꞌ hex, kat yaniko howal teyinh, chehoyayo iskonhobꞌ tuꞌ, kat heyaniko howal yinh. 13 Hayet chiyaniko Komam Dios Jahawil huneꞌ konhobꞌ tuꞌ yul heqꞌabꞌ, kat hepotxꞌnikamo sunil ebꞌnaj winaj yu chꞌen espada. 14 Wal sunil ebꞌix ix yebꞌ nixhte unin yebꞌ isnoqꞌ, yebꞌ sunil tzet ay yul konhobꞌ heyet chukanikoj, kat heloni tzet kꞌuwan yu ebꞌnaj chichiwa iskꞌul teyinh tuꞌ, sunil tzet chiyako Komam Dios Jahawil yul heqꞌabꞌ ay yul hunun konhobꞌ heyet yehi. 15 Hak tuꞌ cheyute yinh hunteqꞌan txꞌotxꞌ konhobꞌ nahat yehiloj, mach yetbꞌiho isbꞌa yebꞌ hunteqꞌan konhobꞌ kawil bꞌay chexapni tuꞌ.
16 »Yajaꞌ wal hunteqꞌan konhobꞌ ayayo sat txꞌo txꞌotxꞌ chiyaqꞌ Komam Dios Jahawil hemajuloj, machi hunu mak chikankano yinh itzitzal. 17 Wal xin chetanhtzelo sunil hakaꞌ yu yalnikano Komam Dios Jahawil; haꞌ ton hunteqꞌan konhobꞌ bꞌay ay anma heteo, amorreo, cananeo, ferezeo, heveo, yebꞌ anma jebuseo. 18 Chetanhtzekanilo sunil anma tuꞌ haxinwal mach cheqꞌaytze hebꞌa kexiskuyni yinh isyahbꞌetajil chiswatxꞌe ebꞌnaj sata isdiosal, kat heyaniko hemul tet Komam Dios Jahawil.
19 »Hayet cheyaniko howal yinh hunu konhobꞌ, txꞌiꞌal tzꞌayik xin chehoyayoj yet chexqꞌoji yinh, mach cheqꞌajikꞌo teꞌ lobꞌehal yu chꞌen eche, yuto chiꞌokniko sat teꞌ lobꞌehal tuꞌ heyu. Mach chekꞌayilo teꞌ lobꞌehal tuꞌ yuto mach lahano teꞌ hakaꞌ anma, mach chitit teꞌ teyinh, kat yaqꞌni howal teꞌ yebꞌ hex. 20 Yajaꞌ wal teꞌ komon qꞌebꞌtaj machi sat chiyaqꞌa, chisje heqꞌajnikꞌo teꞌ, kat hewatxꞌenilo teꞌ kucham yinh teꞌ, kat helatzꞌbꞌankanh teꞌ yu hekolni hebꞌa masanta chexqꞌoji yinh huneꞌ konhobꞌ tuꞌ.