Hunteqꞌan nime konhobꞌ bꞌay chiskol isbꞌa anma
19
Yalnipaxo yaꞌ Moisés: «Hayet chistanhtzenilo Komam Dios Jahawil hunteqꞌan txꞌotxꞌ konhobꞌ tuꞌ, kat yaqꞌnikano Komam istxꞌotxꞌ anma tuꞌ teyet, kat heyehayo yul iskonhobꞌ, yebꞌ yul yatut, 2 hayet ay hexxa sat txꞌotxꞌ chaqꞌ Komam Dios Jahawil teyet tuꞌ, chepohilo oxebꞌ nime konhobꞌ. 3 Chepohnipaxayo txꞌo txꞌotxꞌ chiyaqꞌ Komam teyet yinh ox majan, hunun konhobꞌ yul hunun majan txꞌotxꞌ, kat hewatxꞌen isbꞌelal oxebꞌ konhobꞌ tuꞌ yu yapni anma iskoloꞌ isbꞌa yul konhobꞌ tuꞌ mak chiꞌok huchanil yinh chismaqꞌnikamo yet anmahil. 4 Haꞌ mak mach nabꞌilo yu chismaqꞌnikamo hunu yet anmahil, yebꞌ machi howal chaqꞌ yebꞌi yet yalanhtokanoj; haꞌ huneꞌ mak tuꞌ chito yebꞌaꞌ isbꞌa yul konhobꞌ tuꞌ yu iskolni isbꞌa. 5 Qꞌinalo tato ay hunu naj chito tzokꞌo siꞌ yinta hunuxa naj, hayet lanhan istzokꞌni huneꞌ naj issiꞌ tuꞌ, kꞌuxan xin yel sopna chꞌen eche yinh yoj, kat islow chꞌen yinh yetbꞌi naj tuꞌ, kat iskam naj. Haꞌ naj ok huchan yinh tuꞌ, chiꞌelkanh naj kat isto naj iskolno isbꞌa yul hunu konhobꞌ tuꞌ. 6 Yaj ta nahat yeko isbꞌelal huneꞌ konhobꞌ bꞌay chiꞌapni naj iskoloꞌ isbꞌa, kꞌuxantaxka istzujchayo naj yu hunu mak ayto yu isbꞌa yebꞌ naj kam yu naj tuꞌ, kat ispotxꞌnikamo naj naj yu ishowal. Yajaꞌ xin huneꞌ naj tuꞌ mach chu ispotxꞌlaxkamo naj yuto mach kꞌulo yubꞌ naj ismaqꞌnikamo naj yet anmahil; yuto machi howal xol ebꞌnaj yet yalanhtokanoj. 7 Yuxin chiwalan teyet, chepohilo oxebꞌ konhobꞌ bꞌay chito anma iskoloꞌ isbꞌa.8-9 »Tato chebꞌeybꞌalnhe sunil chejbꞌanile chiwalan teyet tiꞌ tinanh, cheyochen Komam Dios Jahawil, kat heyok tzujno yinta tzet chala, wal tuꞌ chiyaqꞌ Komam sunil txꞌo txꞌotxꞌ yaltekano tet ebꞌnaj jichmam teyet, hayet chiyaqꞌni chꞌibꞌo Komam Dios hetxꞌotxꞌ tuꞌ, kat hepohnipaxilo oxebꞌxa konhobꞌ yibꞌanhilo oxebꞌ pohbꞌililoj heyu yet bꞌabꞌelal. 10 Hak tuꞌ cheyute haxinwal mach tonhe chiꞌaqꞌlaxkamo mak machi ismul yunhe mach tonhe chiꞌaqꞌlax maloto ischikꞌil sat txꞌo txꞌotxꞌ chiyaqꞌ Komam Dios teyet, hak tuꞌ xin mach chiꞌay iskamikal hunu mak teyibꞌanh.
11 »Yajaꞌ tato ay hunu mak ayko ishowal yinh hunu yet anmahil kat yok tzujno yintaj, kat ismaqꞌnikamoj, lahwi tuꞌ kat isto iskolno isbꞌa yul hunu konhobꞌ tuꞌ, 12 yinh hakaꞌ tuꞌ, chischej ebꞌnaj ichamta winaj ilaxolti huneꞌ mak tuꞌ, kat yalaxiko yul isqꞌabꞌ mak ayto yu isbꞌa yebꞌ mak potxꞌbꞌilkamo tuꞌ, kat ismaqꞌnikamoj. 13 Mach chitzꞌay hekꞌul yinh huneꞌ mak tuꞌ; haxinwal mach tonhe chimalto ischikꞌil mak machi ismul texol hex Israel hex tiꞌ; ta hak tuꞌ cheyu kꞌul chiꞌeliko sunil tzet chewatxꞌe.
14 »Hayet ay hex sat txꞌo txꞌotxꞌ chiyaqꞌ Komam Dios Jahawil teyet, ayojabꞌ chalilo ismohonal istxꞌotxꞌ heyet anmahil yul hesat, hakaꞌtikꞌa yekano ismohonal tuꞌ yet yalanhtokanoj.
Chejbꞌanile yinh mak chako isbꞌa yalnilo tzet ye tuꞌ kaw yeli
15 »Yaj tato huneꞌnhe mak chiyaqꞌ isbꞌa yalnilo ismul maka istxꞌojal maka ismanhkꞌomal hunu maka, yinh hakaꞌ tuꞌ mach chichalax abꞌelaxoj; yajaꞌ tato kawanh maka oxwanh mak chaqꞌ isbꞌa yalniloj, wal tuꞌ chichalax abꞌelaxoj.
16 »Tato ay hunu naj txꞌoj isnabꞌal chalni hunu tzet ye tuꞌ mach yeloj, kat isbꞌalnikanh naj leqꞌtiꞌal ismulo hunu yet anmahil. 17 Haꞌ kawanh mak ay howal xol tuꞌ, yilal isto sata Komam yebꞌ sata ebꞌnaj sacerdote yebꞌ sata ebꞌnaj juez ayko yinh ismunil yinh huneꞌ tzꞌayik tuꞌ, 18 haꞌ xin ebꞌnaj juez chiꞌilni yinh kaw kꞌul tzet chiꞌeliko huneꞌ tuꞌ, yajaꞌ ta xin leqꞌtiꞌal tzet chiyaliko naj ismulo yuxhtaj; 19 haꞌ yibꞌanh naj chinanikanh leqꞌtiꞌal tuꞌ, chitokano tzet chisqꞌan naj yibꞌanh yuxhta tuꞌ, hak tuꞌ chu hetanhtzenilo istxꞌojal texol. 20 Haꞌ xin yet chiyabꞌen konhobꞌ huneꞌ tuꞌ kat isxiwi, hak tuꞌ xin machi hunu istxꞌojal chiswatxꞌe hakaꞌ tuꞌ. 21 Mach chitzꞌay hekꞌul yinh mak hakaꞌ tuꞌ; wal xin haꞌ mak chismaqꞌkamo yet anmahil, yilal ismaqꞌlaxpaxokamoj, haꞌ mak chimaqꞌnipoho isbꞌaqꞌ sat yet anmahil, yilal ismaqꞌlaxpaxo poho isbꞌaqꞌ sat. Haꞌ mak chimaqꞌnilti yeh yet anmahil, yilal ismaqꞌlaxpaxilti yeh. Haxa mak chimaqꞌnilto isqꞌabꞌ maka yoj yet anmahil, haktikꞌapax tuꞌ chiꞌutelaxi.