Haꞌ ismajul ebꞌnaj levita haꞌ ton hunteqꞌan konhobꞌ pohlaxkanh yinh ebꞌnaj
35
Istzotel Komam Jahawil tet yaꞌ Moisés bꞌey yakꞌalil Moab, istiꞌ haꞌ Jordán satakꞌti Jericó, yalni Komam hakaꞌ tiꞌ: 2 «Hal tet ebꞌnaj Israel ta haꞌ yul istxꞌotxꞌ ebꞌnaj chischah, chiyaqꞌ ebꞌnaj hayebꞌo konhobꞌ tet ebꞌnaj levita yu yehayo ebꞌnaj yul konhobꞌ tuꞌ; kat xin yaqꞌnipaxo ebꞌnaj txꞌotxꞌ hoyaniko yinhla konhobꞌ tuꞌ, xin wal ay bꞌay chilow isnoqꞌ ebꞌnaj. 3 Yul hunteqꞌan konhobꞌ tuꞌ chiꞌehayo ebꞌnaj levita, kat xin islowpaxo isnoqꞌ ebꞌnaj yinhla ishoyanil konhobꞌ tuꞌ. 4 Haꞌ txꞌotxꞌ hoyaniko yinhla istxamla konhobꞌ tuꞌ, haꞌ txꞌotxꞌ chꞌaqꞌlax tet ebꞌnaj; 450 metro chuko satbꞌal txꞌotxꞌ yinhla ishoyanil konhobꞌ, chiꞌichito bꞌay aykanh iskꞌubꞌal konhobꞌ. 5 Istxꞌotxꞌ ebꞌnaj levita cheyaqꞌa, 900 metro ismalil yetkꞌulal bꞌay chiꞌahilo tzꞌayik, haktikꞌapax tuꞌ ismalil txꞌotxꞌ yinh komek, yebꞌ yinh kowatxꞌ, yebꞌ bꞌay chitopaxkano tzꞌayik. Haꞌ xin konhobꞌ tuꞌ, chikan yiktabꞌanil txꞌotxꞌ bꞌay chilow isnoqꞌ ebꞌnaj levita.6 »Xol konhobꞌ cheyaqꞌ tet ebꞌnaj levita tuꞌ, wajebꞌ konhobꞌ chiꞌokniko bꞌay chiskol isbꞌa anma chispotxꞌnikamo yet anmahil. Nanpaxo xin ye 42 (kabꞌ yoxkꞌal) konhobꞌ cheyaqꞌ tet ebꞌnaj levita tuꞌ. 7 Yuxin yinh sunil, 48 (waxajebꞌ yoxkꞌal) konhobꞌ cheyaqꞌ tet ebꞌnaj levita, yebꞌ txꞌotxꞌ hoyaniko yinhla hunun konhobꞌ bꞌay chilow isnoqꞌ ebꞌnaj. 8 Haꞌ yinh istxꞌotxꞌ ebꞌnaj Israel chischah, chiꞌel iskonhobꞌ ebꞌnaj levita tuꞌ, yuxin hunun majan ebꞌnaj Israel chiꞌaqꞌni konhobꞌ tet ebꞌnaj levita. Haꞌ ebꞌnaj niman istxꞌotxꞌ, niman konhobꞌ chiyaqꞌ ebꞌnaj tet ebꞌnaj levita; haxa ebꞌnaj hanikꞌnhe istxꞌotxꞌ, hayebꞌnhe konhobꞌ chꞌaqꞌlax tet ebꞌnaj,» xhi Komam.
Nime konhobꞌ bꞌay chiskol isbꞌa anma
9 Istzotelpaxo Komam Jahawil tet yaꞌ Moisés, yalni Komam hakaꞌ tiꞌ: 10 «Hal hunteqꞌan chejbꞌanile tiꞌ tet ebꞌnaj Israel: Hayet chexqꞌaxponikꞌto haꞌ Jordán tiꞌ, kat heyapni sat txꞌotxꞌ Canaán. 11 Yilal hesayni hayebꞌo konhobꞌ bꞌay chito hunu mak yinh anhe iskoloꞌ isbꞌa, anma chiyaqꞌkamo yet anmahil, yaj huchan yinh, mach chisje iskꞌul iswatxꞌe huneꞌ tuꞌ. 12 Haꞌ tuꞌ chiskol isbꞌa mak chiꞌaqꞌnikamo yet anmahil tet yuxhta huneꞌ mak chikami, lanhanto maxhto chiꞌok sata konhobꞌ yu yil-laxi yinh tzet chiꞌelikoj. 13 Wajebꞌ konhobꞌ cheyaqꞌa bꞌay chiskol isbꞌa anma chiꞌaqꞌnikamo yet anmahil, yaj huchan yinh. 14 Oxebꞌ konhobꞌ cheyaqꞌ isqꞌaxebꞌikꞌti haꞌ Jordán, yok oxebꞌxa bꞌey txꞌotxꞌ Canaán, isqꞌaxebꞌikꞌto haꞌ Jordán tiꞌ, wajebꞌ konhobꞌ tuꞌ xin bꞌay chiꞌapni anma iskoloꞌ isbꞌa. 15 Haꞌ hunteqꞌan konhobꞌ tuꞌ, chiꞌokniko bꞌay chiskol isbꞌa anma Israel yebꞌ anma mach Israelo ay texol, yebꞌ mak tonhe chiꞌekꞌ tukla tekꞌatanh. Haꞌ tuꞌ chiskol isbꞌa mak chiꞌaqꞌnikamo yet anmahil, yaj huchan yinh.
16 »Tato ay hunu mak chismaqꞌ yet anmahil yu hunu chꞌen hierro, kat iskam yu, haꞌ huneꞌ mak tuꞌ yilal yaqꞌlax kamoj.
17 »Tato ay hunu mak chiqꞌojnikanh yet anmahil yu chꞌen chꞌen, kat iskam yu, haꞌ huneꞌ mak tuꞌ, maqꞌomkamo anma, yuxin yilal yaqꞌlax kamoj.
18 »Tato ay hunu mak chismaqꞌ yet anmahil yu te teꞌ, kat iskam yu, maqꞌomkamo anma huneꞌ mak tuꞌ, yuxin yilal yaqꞌlax kamoj. 19 Haꞌ mak ayto yu isbꞌa yebꞌ mak maqꞌlaxkamo tuꞌ, haꞌ chimaqꞌnikamo naj maqꞌom tuꞌ yet chischahnayo isbꞌa ebꞌnaj.
20 »Ta ay hunu mak chistenkanh hunu yet anmahil yu ayko ishowal yinh, maka ta chisqꞌojto hunu tzet ye tuꞌ yinh yuto chichiwa iskꞌul yinh, kat iskami, 21 maka chismaqꞌa yu ayko ishowal yinh, kat iskam yu; huneꞌ mak tuꞌ yilal yaqꞌlax kamoj, yuto maqꞌomkamo anma. Haꞌ mak ayto yu isbꞌa yebꞌ mak maqꞌlaxkamo tuꞌ, haꞌ chimaqꞌnikamo naj maqꞌom tuꞌ yet chischahnayo isbꞌa.
22 »Yajaꞌ ta ay hunu mak kꞌuxan chistenchakanh hunu yet anmahil, mach xin ayoko ishowal yinh, maka xin chisqꞌojto hunu tzet ye tuꞌ, kꞌuxan xin yapni yinh hunu yet anmahil, mach xin kꞌulo yubꞌ, 23 maka ta ay hunu mak chiqꞌojnito hunu chꞌen chꞌen, kꞌuxan xin islow chꞌen yinh hunu maka kat iskami, mach xin ayoko ishowal huneꞌ mak tuꞌ yinh mak isqꞌojkamo tuꞌ, to huchanxa yinh, 24 yinh hakaꞌ tuꞌ, haꞌ konhobꞌ chiꞌilni yinh tzet chiꞌelikoj naj chiꞌaqꞌnikamo yet anmahil tuꞌ, yebꞌ tzet chiꞌeliko naj yu naj ayto yu isbꞌa yebꞌ mak maqꞌlaxkamoj tuꞌ. Chiyil ebꞌnaj yinh tzet chiꞌelikoj, hakaꞌtikꞌa yalni chejbꞌanile. 25 Haꞌ xin konhobꞌ tuꞌ, chikolni naj potxꞌnikamo yet anmahil tuꞌ yul isqꞌabꞌ naj ayto yu isbꞌa yebꞌ naj kam tuꞌ, kat xin ismeltzo naj yul konhobꞌ bꞌay chiskol isbꞌa tuꞌ. Haꞌ tuꞌ xin chiꞌeh naj masanta yet chikam naj yahawil yinh ebꞌnaj sacerdote, naj sikꞌbꞌiliko yinh munil tuꞌ yet yalaxayo aceite yibꞌanh iswiꞌ naj.
26 »Yajaꞌ tato naj potxꞌom anma tuꞌ chiꞌeltij naj yintalti isnajachil konhobꞌ bꞌay chiskol isbꞌa tuꞌ, 27 tato chichahlo naj yu naj ayto yu isbꞌa yebꞌ naj maqꞌbꞌilkamo tuꞌ, kat ispotxꞌnikamo naj naj, yinh hakaꞌ tuꞌ, mach chiꞌok ismulo naj. 28 Yuto haꞌ mak chismaqꞌkamo yet anmahil, haꞌ bꞌey konhobꞌ tuꞌ chiꞌehayoj yu iskolni isbꞌa. Haꞌ tuꞌ xin chiꞌehayo masanta chikam naj yahawil sacerdote, katto ismeltzo naj iskonhobꞌ hunelxa.
Chejbꞌanile yibꞌanhilo ebꞌnaj chaqꞌ isbꞌa testigohal yebꞌ yinh ebꞌnaj choche chikol-laxiloj
29 »Haꞌ tzet chiwalkanotiꞌan, chejbꞌanile chukaniko texol, yebꞌ tet heyuninal yet bꞌaqꞌinh bꞌayejtuꞌwal ay hex.
30 »Tato txꞌiꞌal mak chaqꞌ isbꞌa yalnilo ismul hunu mak chismaqꞌkamo hunu yet anmahil, yinh hakaꞌ tuꞌ, chꞌaqꞌlaxkamo mak ay ismul; yajaꞌ tato hunchꞌannhe mak chihalni ta ay ismul hunu maka, mach chu yaqꞌlax kamo yinh hakaꞌ tuꞌ.
31 »Mach chu ischahlax chꞌen melyu tet hunu mak chipotxꞌnikamo yet anmahil yunhe iskolni isbꞌa; yuto kaw tꞌinhanxa iskam yu ismul, yilal yaqꞌlax kamoj.
32 »Mach chu ischahlax chꞌen melyu tet hunu mak xapotxꞌni kamo yet anmahil yu yel yul konhobꞌ bꞌay iskol isbꞌa, yunhe ismeltzo yul iskonhobꞌ, yet maxhto chikam naj yahawil sacerdote.
33 »Yet chexapni bꞌey txꞌotxꞌ Canaán tajka chepotxꞌ anma, mach cheyetato txꞌo txꞌotxꞌ yu ischikꞌil mak chipotxꞌlaxkamoj, yuto mach issajbꞌilo txꞌotxꞌ tato machi potxꞌlaxkamo anma potxꞌom anma tuꞌ.
34 »Yuxin mach cheyetato txꞌotxꞌ bꞌay chexapni tuꞌ, yuto haꞌ tuꞌ, chinehpaxojan texol. Yuto hanin Yahawintiꞌan ayinnhetikꞌakojan texol hex Israel hex tiꞌ,» xhi Komam.