2 —Mam Moisés, haꞌ Komam Dios halni tawet tato yinh suertehal chapohkanh txꞌo txꞌotxꞌ yinh hunun majan hanhonh Israelonh tiꞌanh. Yalnipaxo Komam tawet tato haꞌ ismajul naj Zelofehad, naj juxhtajanh kamnaxa, haꞌ ebꞌix iskutzꞌin naj chichahnikanilo txꞌotxꞌ. 3 Yajaꞌ ta xin chimohyi ebꞌix yebꞌ hunuxa majan yet Israelal, haꞌ istxꞌotxꞌ ebꞌix tuꞌ, chitokano tet hunxa majan ebꞌnaj Israel chiyiqꞌ ebꞌix tuꞌ, yinh hakaꞌ tuꞌ, chimel txꞌotxꞌ yul komajultiꞌanh. Hak tuꞌ xin, nixhtejal yilaxilo kotxꞌotxꞌanh aqꞌbꞌil yinh jinhbꞌalanh. 4 Yuxin hayet chꞌayilo istiempohal bꞌay chikol-laxilo txꞌo txꞌotxꞌ, haꞌ istxꞌotxꞌ ebꞌix tuꞌ, chiꞌokkano txꞌotxꞌ yu hunmajanxa ebꞌnaj Israel chiyiqꞌ ebꞌix tuꞌ, hak tuꞌ xin chu yilaxilo txꞌotxꞌ yul komajulanh, xhi ebꞌnaj.^a

5 Istaqꞌwi yaꞌ Moisés tet ebꞌnaj hakaꞌ yu yalni Komam Jahawil tet yaꞌ, yalni yaꞌ hakaꞌ tiꞌ:

—Haꞌ ebꞌnaj Israel titna yinh yaꞌ José tiꞌ, haꞌ ye yu ebꞌnaj. 6 Ebꞌix iskutzꞌin naj Zelofehad yet chimohyi hunu ebꞌix tuꞌ makxanhetikꞌa hunu naj winaj chu yiqꞌni ebꞌix, yajaꞌ tanhe haꞌ hunu naj ay xol hunmajan yikꞌal yaꞌ José. 7 Haꞌ txꞌotxꞌ ischah hunun majan ebꞌnaj Israel, mach chu yekꞌto txꞌotxꞌ tet huneꞌxa majan yet Israelal, wal xin hunun ebꞌnaj Israel chikankano yebꞌ istxꞌotxꞌ yinh hunun majan. 8 Tato ay hunu ix ix Israel chischah istxꞌotxꞌ tet ismam yilal ismohyi ix yebꞌ hunu naj winaj ayko xol yikꞌal ismam tuꞌ, haxinwal chikankano txꞌotxꞌ xol ismajul ismam ix tuꞌ. Hak tuꞌ xin chikankano istxꞌotxꞌ ebꞌnaj hunun majan tuꞌ yul isqꞌabꞌ, hakaꞌtikꞌa ismalil istxꞌotxꞌ ebꞌnaj chabꞌilkano tet ismam icham. 9 Mach chu yekꞌto hunu txꞌotxꞌ yet huneꞌ majan ebꞌnaj Israel tet huneꞌxa majan, wal xin hunun majan chikankano yebꞌ istxꞌotxꞌ tuꞌ hakaꞌtikꞌa yu ischahnikanoj, xhi yaꞌ Moisés.

10,11 Yuxin ebꞌix iskutzꞌin naj Zelofehad, haꞌ ton ix Maala, ix Tirsa, ix Hogla, ix Milca yebꞌ ix Noa, isyije ebꞌix tzet yal Komam Dios tet yaꞌ Moisés; ismohyi ebꞌix yebꞌ ebꞌnaj iskꞌahol yuxhta ismam. 12 Ebꞌnaj bꞌay mohyi ebꞌix tuꞌ, titna ebꞌnaj yinh yaꞌ Manasés, naj iskꞌahol yaꞌ José. Hak tuꞌ yu iskankano istxꞌotxꞌ ebꞌix tuꞌ yul ismajul istxꞌotxꞌ ismam ebꞌix tuꞌ.

13 Haꞌ hunteqꞌan chejbꞌanile tiꞌ yaqꞌ Komam Jahawil tet yaꞌ Moisés yunhe yalni tet ebꞌnaj Israel yet ayayo ebꞌnaj bꞌey yakꞌalil Moab, istiꞌla haꞌ Jordán, satakꞌti Jericó.