Ismohonal txꞌotxꞌ Canaán
34
Lahwi tuꞌ, istzotel Komam Jahawil tet yaꞌ Moisés, yalni Komam: 2 «Hal hunteqꞌan chejbꞌanile tiꞌ tet ebꞌnaj Israel: Hayet ayexxako sat txꞌotxꞌ Canaán heyetxa chukaniko txꞌotxꞌ, hatatikꞌa bꞌay kachan yekꞌ txꞌotxꞌ.3 »Haꞌ ismohonal txꞌotxꞌ yinh sur chiꞌekꞌ yinh desierto Zin, masanta chꞌapni istiꞌla txꞌotxꞌ Edom, chiꞌichiti ismohonal txꞌotxꞌ yinh yetkꞌulal bꞌay chiꞌahilo tzꞌayik masanta chiꞌapni yinh haꞌ Mar Kꞌachiꞌ yinh yetkꞌulal sur. 4 Kat isto txꞌotxꞌ yinh sur masanta yinh witz Acrabim, kat yekꞌ txꞌotxꞌ bꞌey txꞌotxꞌ Zin, masanta chiꞌapni txꞌotxꞌ yinh Cades-barnea, kat istopaxo txꞌotxꞌ yinh txꞌotxꞌ Hasar-adar, masanta chiꞌapni txꞌotxꞌ yinh txꞌotxꞌ Asmón. 5 Chiꞌichipaxti txꞌotxꞌ yinh txꞌotxꞌ Asmón kat yapni txꞌotxꞌ istiꞌla haꞌ ayko ismohonal txꞌotxꞌ Egipto, kat iskachnakanapno txꞌotxꞌ bꞌey haꞌ Mar Mediterráneo.
6 »Haxa ismohonal txꞌotxꞌ yinh yetkꞌulal bꞌay chito tzꞌayik, haꞌ ton haꞌ Mar Mediterráneo.
7 »Haꞌ yinh yetkꞌulal norte ismohonal txꞌotxꞌ, chiꞌichiti yinh haꞌ niman Mar Mediterráneo, kat yapni yinh witz Hor. 8 Kat yichipaxti ismohonal txꞌotxꞌ yinh witz Hor masanta chꞌapni txꞌotxꞌ bꞌay chonhoknapno bꞌey Hamat, kat istopaxo ismohonal txꞌotxꞌ yinh txꞌotxꞌ Zedad. 9 Chiꞌichipaxiko txꞌotxꞌ yinh txꞌotxꞌ Zedad kat yekꞌapno ismohonal txꞌotxꞌ yibꞌanhahto txꞌotxꞌ Zifrón, kat iskachnahapno txꞌotxꞌ bꞌey txꞌotxꞌ Hazar-enán.
10 »Haxa yinh yetkꞌulal bꞌay chiꞌahilo tzꞌayik ismohonal txꞌotxꞌ chiꞌichiti yinh txꞌotxꞌ Hazar-enán, masanta chiꞌapni yinh txꞌotxꞌ Sefam. 11 Kat yichipaxti ismohonal txꞌotxꞌ yinh txꞌotxꞌ Sefam masanta chiꞌapni yinh txꞌotxꞌ Ribla yibꞌanhahto txꞌotxꞌ Aín, kat yayilo ismohonal txꞌotxꞌ tuꞌ yibꞌanhahto haꞌ lago Cineret.a 12 Kat istopaxo ismohonal txꞌotxꞌ yinh haꞌ Jordán masanta chꞌapni yinh haꞌ Mar Kꞌachiꞌ.
»Haꞌ hunteqꞌan tuꞌ bꞌay kachan yekꞌ ismohonal hetxꞌotxꞌ,» xhi Komam.
Yinh tzet chu ispohlaxkanh txꞌo txꞌotxꞌ
13 Yalni yaꞌ Moisés hunteqꞌan chejbꞌanile tiꞌ tet ebꞌnaj Israel hakaꞌ tiꞌ: «Haꞌ txꞌotxꞌ tiꞌ, chipohlaxkanh teyinh kat yokkano txꞌotxꞌ heyu hatatikꞌa heyinhbꞌal hunun majan hex. Haꞌ txꞌotxꞌ yalkano Komam ta chipohlaxkanh teyinh hex bꞌalonh majan hex Israel hex tiꞌ yok yiktaxa. 14 Wal xin haꞌ kabꞌ majan heyet Israelal yok yiktaxa, haꞌ ton ebꞌnaj Rubén, yebꞌ ebꞌnaj Gad yok yiktaxa majan ebꞌnaj Manasés. 15 Yikta yox majan ebꞌnaj Israel xaꞌischahna ebꞌnaj ismajul yibꞌanhahto haꞌ Jordán, satakꞌti konhobꞌ Jericó bꞌay chꞌahilo tzꞌayik,» xhi yaꞌ Moisés tuꞌ.
16 Yalni Komam Jahawil tet yaꞌ Moisés: 17 «Haꞌ ebꞌnaj chipohnikanh txꞌotxꞌ tiꞌ yinh ebꞌnaj Israel, haꞌ ton yaꞌ sacerdote Eleazar yebꞌ yaꞌ Josué, iskꞌahol yaꞌ Nun. 18 Yajaꞌ xin, yilal cheyawtepaxo hunun ebꞌnaj iswiꞌehal yeko xol hunun majan ebꞌnaj Israel, haꞌ xin ebꞌnaj chipohnikanh txꞌotxꞌ. 19 Haꞌ xin ebꞌnaj cheyawte tuꞌ, haꞌ ton ebꞌnaj tiꞌ:
»Yaꞌ Caleb, iskꞌahol naj Jefone, haꞌ yaꞌ cheyawtelo xol ebꞌnaj Judá.
20 »Naj Semuel, iskꞌahol naj Amiud, haꞌ naj cheyawtelo xol ebꞌnaj Simeón.
21 »Naj Elidad, iskꞌahol naj Quislón, haꞌ naj cheyawtelo xol ebꞌnaj Benjamín.
22 »Naj Buqui, iskꞌahol naj Jogli, haꞌ naj cheyawtelo xol ebꞌnaj Dan.
23 »Haxa yinh yaꞌ Manasés, iskꞌahol yaꞌ José, haꞌ naj Haniel, iskꞌahol naj Efod cheyawtelo. 24 Haxa yinh yaꞌ Efraín, hunxa iskꞌahol yaꞌ José, naj Kemuel, iskꞌahol naj Siftán cheyawtelo.
25 »Naj Elizafán, iskꞌahol naj Parnac, haꞌ naj cheyawtelo xol ebꞌnaj Zabulón.
26 »Naj Paltiel, iskꞌahol naj Azán, haꞌ naj cheyawtelo xol ebꞌnaj Isacar.
27 »Naj Ahiud, iskꞌahol naj Selomi, haꞌ naj cheyawtelo xol ebꞌnaj Aser.
28 »Naj Pedael, iskꞌahol naj Amiud, haꞌ naj cheyawtelo xol ebꞌnaj Neftalí,» xhi Komam.
29 Haꞌ ebꞌnaj tuꞌ, yako Komam Jahawil ispohnokanh txꞌotxꞌ Canaán yinh ebꞌnaj Israel.