Istxolal yinh tzet yu yapnikano ebꞌnaj Israel yinh isbꞌel bꞌey Jordán
33
Haꞌ tiꞌ istxolal bꞌay leekꞌ anma Israel yinh isbꞌel yet yel sat txꞌotxꞌ Egipto yalanh ischejbꞌanil yaꞌ Moisés yebꞌ yaꞌ Aarón. Hunun majan ebꞌnaj ayko yinh istxolal. 2 Istzꞌibꞌnhenkano yaꞌ Moisés isbꞌi bꞌayejtuꞌwal ekꞌ anma Israel yinh isbꞌel hakaꞌtikꞌa yu yalni Komam tet yaꞌ, bꞌey hunteqꞌan txꞌotxꞌ tiꞌ leekꞌ ebꞌnaj yinh isbꞌel.3 Haꞌ yinh 15 (isholanhebꞌ) tzꞌayik, yulbꞌal isbꞌabꞌel ixahaw yul habꞌil yet yel anma Israel sat txꞌotxꞌ Ramasés, yinhxa yewihal qꞌinh Pascua. Yel sunil anma tuꞌ yu yip Komam sata sunil anma Egipto. 4 Yet lanhan ismujni sunil ebꞌnaj Egipto isbꞌabꞌel kꞌahol kam yu Komam; yetanpaxkanto Komam Jahawil hunteqꞌan tzet chiyal anma Egipto isdiosaloj.
5 Hayet yel ebꞌnaj Israel sat txꞌotxꞌ Ramasés yapni bꞌey txꞌotxꞌ Sucot.
6 Lahwi tuꞌ, yel bꞌey Sucot, yapni bꞌey Etam, istiꞌla txꞌotxꞌ desierto.
7 Yel anma Israel bꞌey Etam yekꞌ ishoyno txꞌotxꞌ Pi-hahirot, ayko yinh ismohonal Baal-zefón, apni satakꞌti Migdol bꞌay ehayo ebꞌnaj.
8 Yel bꞌey Pi-hahirot, isqꞌaxebꞌikꞌto haꞌ mar, yapni bꞌey txꞌotxꞌ desierto, isbꞌelwito oxebꞌ tzꞌayik sat txꞌotxꞌ desierto Etam, yapni bꞌey txꞌotxꞌ Mara, yehayo bꞌey tuꞌ.
9 Yel bꞌey Mara, yapni bꞌey Elim bꞌay ay 12 (kabꞌlahonhebꞌ) isnuqꞌ ha haꞌ yebꞌ 70 (lahonhebꞌ iskanhwinaj) teꞌ palma, yehayo hayebꞌ tzꞌayik bꞌey tuꞌ.
10 Yel ebꞌnaj bꞌey txꞌotxꞌ Elim, yehayo ebꞌnaj istiꞌ haꞌ Kajinh Mar.
11 Yel istiꞌ haꞌ Kajinh Mar, yapni sat txꞌotxꞌ desierto Sin, iswatxꞌenkanh bꞌay ehayoj.
12 Yel sat txꞌotxꞌ Sin, yehpaxayo sat txꞌotxꞌ Dofca.
13 Yel bꞌey Dofca, yehayo sat txꞌotxꞌ Alús.
14 Yel bꞌey txꞌotxꞌ Alús, yehayo sat txꞌotxꞌ Refidim, wal bꞌey tuꞌ machi ha haꞌ yukꞌ anma Israel.
15 Yel bꞌey Refidim, yehayo sat txꞌotxꞌ desierto Sinaí.
16 Yel bꞌey desierto Sinaí, yapni bꞌey Kibrot-hataava, yehayo bꞌey tuꞌ. 17 El bꞌey Kibrot-hataava, yehayo sat txꞌotxꞌ Hazerot.
18 El bꞌey Hazerot, yehayo sat txꞌotxꞌ Ritma.
19 Lahwi tuꞌ, yel bꞌey Ritma, yehayo sat txꞌotxꞌ Rimón-peres.
20 Yel bꞌey Rimón-peres, yehayo sat txꞌotxꞌ Libna.
21 Yel bꞌey Libna, yehayo sat txꞌotxꞌ Rissa.
22 Yel bꞌey txꞌotxꞌ Rissa, yehayo sat txꞌotxꞌ Ceelata.
23 Yel bꞌey Ceelata, yehayo bꞌey witz Sefer.
24 Lahwi tuꞌ, yel bꞌey witz Sefer, yehayo sat txꞌotxꞌ Harada. 25 Yel bꞌey Harada, yehayo bꞌey Macelot.
26 Yel bꞌey Macelot, yapni bꞌey txꞌotxꞌ Tahat.
27 Yel bꞌey Tahat, yapni bꞌey Tara.
28 Yel bꞌey Tara, yapni bꞌey Mitca.
29 Yel bꞌey Mitca, yapni bꞌey Hasmona.
30 Yel bꞌey Hasmona, yapni bꞌey Moserot.
31 Yel bꞌey Moserot, yapni bꞌey Bene-jaacán.
32 Yel bꞌey Bene-jaacán, yapni bꞌey witz Gidgad.
33 Yel bꞌey witz Gidgad, yapni bꞌey Jotbata.
34 Yel bꞌey Jotbata, yapni bꞌey Abrona.
35 Yel bꞌey Abrona, yapni bꞌey Ezión-geber.
36 Yel bꞌey Ezión-geber, yehayo bꞌey txꞌotxꞌ desierto Zin, txꞌotxꞌ chihal-laxpaxo Cades.
37 Lahwi tuꞌ, yel bꞌey txꞌotxꞌ desierto Cades, yehayo bꞌey witz Hor, satakꞌti ismohonal txꞌotxꞌ Edom. 38 Haꞌ bꞌey iswiꞌ witz Hor ahto yaꞌ Aarón. Haꞌ kaw istzꞌajna 40 (kawinaj) habꞌil yekꞌ hoyon ebꞌnaj Israel bꞌey txꞌotxꞌ desierto yet iskamayo yaꞌ Aarón hakaꞌtikꞌa yu yalni Komam Dios, yinh bꞌabꞌel tzꞌayik yinh ishoꞌ ixahaw, yet 40 (iskawinaj) habꞌil yet yichiko anma Israel yinh isbꞌel yet yel bꞌey txꞌotxꞌ Egipto. 39 Hayet iskam yaꞌ Aarón bꞌey iswiꞌ witz Hor, 123 habꞌil yaꞌ.
40 Naj rey ah Arad, isreyal ebꞌnaj cananeo, ayayo naj sat txꞌotxꞌ Neguev yul ismajul txꞌotxꞌ Canaán yabꞌelo naj tato apni ebꞌnaj Israel bꞌey tuꞌ.
41 Lahwi tuꞌ, yel ebꞌnaj Israel bꞌey witz Hor, yehayo ebꞌnaj bꞌey txꞌotxꞌ Zalmona. 42 Yel ebꞌnaj bꞌey Zalmona, yapni bꞌey Punón. 43 Yel bꞌey Punón, yapni bꞌey Obot. 44 Yel ebꞌnaj bꞌey Obot, yehayo bꞌey txꞌotxꞌ Ije-abarim, ayko istiꞌla ismohonal txꞌotxꞌ Moab.
45 Lahwi tuꞌ, yel bꞌey Ije-abarim, yapni bꞌey Dibón-gad.
46 Yel bꞌey Dibón-gad, yapni bꞌey Almón-diblataim.
47 Yel ebꞌnaj bꞌey Almón-diblataim, yehayo ebꞌnaj bꞌey witz Abarim, satakꞌto txꞌotxꞌ Nebo.
48 Lahwi tuꞌ, yel ebꞌnaj Israel bꞌey witz Abarim, yehayo bꞌey yakꞌalil txꞌotxꞌ Moab, istiꞌla haꞌ Jordán, satakꞌti konhobꞌ Jericó. 49 Yanikanh anma Israel tuꞌ ismantiado istiꞌla haꞌ Jordán; sat yakꞌalil txꞌotxꞌ Moab. Haꞌ bꞌay yayo ismantiado ebꞌnaj, ichiti bꞌey txꞌotxꞌ Bet-jesimot masanta apni bꞌey txꞌotxꞌ Abel-sitim.
Chejbꞌanile yinh tzet chu ispohlaxayo txꞌotxꞌ Canaán
50 Haꞌ bꞌey akꞌal Moab, istiꞌla haꞌ Jordán satakꞌti konhobꞌ Jericó tzotel Komam Jahawil tet yaꞌ Moisés, yalni Komam hakaꞌ tiꞌ: 51 «Moisés, hal tet ebꞌnaj Israel hakaꞌ tiꞌ: Hayet chexqꞌaxponikꞌto yibꞌanh haꞌ Jordán, yet chexapni sat txꞌotxꞌ Canaán, 52 chetzumbꞌelo anma ayayo sat txꞌotxꞌ tuꞌ, kat heyuchkꞌanto istioxh watxꞌebꞌil yinh chꞌen chꞌen yebꞌ hunteqꞌan istioxh watxꞌebꞌil yinh chꞌen chꞌen nhusbꞌil xol qꞌa qꞌaꞌ, kat heyuchkꞌanto sunil bꞌay chiyiyo isbꞌa tet isdiosal yinh iswiꞌla wonhan. 53 Chetzumbꞌelo anma ayayo sat txꞌotxꞌ Canaán tuꞌ, kat yokkano txꞌotxꞌ heyu yuto haninan chiwaqꞌan txꞌotxꞌ teyet yu heyehayo sat txꞌotxꞌ. 54 Yajaꞌ yinh suertehal chapohayo txꞌotxꞌ yinh hunun majan. Haꞌ hunun majan ebꞌnaj niman isbꞌisil, niman txꞌotxꞌ chꞌaqꞌlax tet ebꞌnaj; haxa hunun majan ebꞌnaj haywanhnhe isbꞌisil, hanikꞌnhe txꞌotxꞌ chischah. Hunun majan ebꞌnaj chikan sat txꞌotxꞌ bꞌay chiꞌay issuerte. 55 Yajaꞌ ta mach chetzumbꞌelo sunil anma ayayo sat txꞌotxꞌ; haꞌ mak chikan texol tuꞌ chaqꞌ ekꞌoyaꞌ heyanma, lahan chuko anma tuꞌ teyinh hakaꞌ hunu qꞌalem yul isbꞌaqꞌ hesat, maka hakaꞌ hunu teꞌ txꞌix yinh hemotx, chiꞌaqꞌni isyaꞌtajil teyet bꞌay chexehayoj. 56 Tato ay ebꞌnaj chitokankano texol, haꞌ teyinh chinwatxꞌehan tzet nabꞌilxa wuhan yinh ebꞌnaj,» xhi Komam.