3 —Ilwekꞌanabꞌ txꞌotxꞌ majbꞌil yu konhobꞌ Atarot, konhobꞌ Dibón, konhobꞌ Jazer, konhobꞌ Nimra, konhobꞌ Hesbón, konhobꞌ Eleale, konhobꞌ Sebam, konhobꞌ Nebo yebꞌ konhobꞌ Beón. 4 Komam qꞌoji yinh anma ayayo sat txꞌotxꞌ tiꞌ, Komam aqꞌni txꞌotxꞌ jet hanhonh Israelonh tiꞌ; kaw kꞌul txꞌotxꞌ bꞌay chilow no noqꞌ. Hanhonh konhhachejabꞌ honhtiꞌanh kaw ay konoqꞌanh, 5 yuxin tato chisje hekꞌul haꞌ txꞌotxꞌ cheyaqꞌ jetanh, ta hak tuꞌ matxa chonhqꞌaxponikꞌtojanh satakꞌto haꞌ Jordán tiꞌ, xhi ebꞌnaj.

6 Istaqꞌwi yaꞌ Moisés tet ebꞌnaj Rubén yebꞌ ebꞌnaj Gad:

—¿Tom chexkannakano bꞌey tiꞌ, tom matxa chexto kolwal yinh heyuxhta yinh howal? 7 ¿Tzet yinh yuxin cheyaqꞌ kabꞌkonokanh iskꞌul heyet Israelal yunhe matxa chexhitzikꞌto sat txꞌotxꞌ haltebꞌil jet yu Komam Jahawil? 8 Hakaꞌ cheyute tiꞌ tinanh, hak tuꞌ yu ebꞌnaj hemam icham bꞌey txꞌotxꞌ Cades-barnea yet inchejnitojan ebꞌnaj yilno txꞌotxꞌ aqꞌbꞌilxa jet yu Komam. 9 Yahto ebꞌnaj heyichmam masanta apni ebꞌnaj bꞌey hokan chiyij Escol yu yilni ebꞌnaj sunil txꞌotxꞌ tuꞌ, haxa yet ismeltzo ebꞌnaj xin iskabꞌkonkanh iskꞌul anma Israel yu tzet yal ebꞌnaj; yunhe machi apni sat txꞌotxꞌ yalte Komam Jahawil ta chiyaqꞌ jet hanhonh Israelonh tiꞌ. 10 Yu huneꞌ tuꞌ, yuxin tit ishowal Komam Jahawil, istaqꞌwen Komam hakaꞌ tiꞌ: 11 “Sunil anma Israel el sat txꞌotxꞌ Egipto ayxako yinh 20 (hunkꞌal) habꞌil, yebꞌ sunil mak xapalkꞌon yinh huntakꞌal habꞌil, matxa chiꞌapni sat txꞌo txꞌotxꞌ haltebꞌil wuhan tet yaꞌ Abraham, yaꞌ Isaac yebꞌ yaꞌ Jacob, yu ismanhkꞌomal ebꞌnaj wetan. 12 Kachannhe yaꞌ Caleb, iskꞌahol naj Jefone, naj cenezeo, yebꞌ yaꞌ Josué, iskꞌahol yaꞌ Nun, kaw yijem yute isbꞌa ebꞌyaꞌ tuꞌ wetan,” xhi Komam Jahawil yet istaqꞌwen Komam. 13 Kaw tit ishowal Komam Dios yinh jet Israelal tuꞌ, yuxin 40 (kawinaj) habꞌil konhekꞌ sat txꞌotxꞌ desierto, ha tuꞌ xin kam sunil ebꞌnaj yako ismul tet Komam.

14 »Haxa hex tiꞌ, iskꞌahol hunteqꞌan ebꞌnaj mame yako ismul, hexxapaxo tinanh cheyako hemul, yu heyiniti ishowal Komam Jahawil jibꞌanh hanhonh Israelonh tiꞌ. 15 Tato mach cheje heyok tzujno yinta tzet chal Komam, txꞌiꞌalto tiempo chikan sunil anma Israel sat txꞌotxꞌ desierto tiꞌ heyu, kat xin istanhtzenilo Komam anma tiꞌ heyu, xhi yaꞌ Moisés.

16 Ishitziko ebꞌnaj tuꞌ iskꞌatanh yaꞌ Moisés, yalni ebꞌnaj tet yaꞌ:

—Wal xin chijochehanh kowatxꞌehanh ispeyabꞌ komeꞌanh yebꞌ kowakaxanh bꞌey tiꞌ, kat xin kowatxꞌenanh bꞌay chikan jixalanh yebꞌ juninalanh. 17 Walonh tiꞌanh chikowatxꞌe kobꞌahanh yu kotohanh yinh howal tuꞌ, kat kobꞌabꞌihanh sata jet Israelanh masanto chonhapnihanh sat txꞌo txꞌotxꞌ chꞌaqꞌlax tet ebꞌnaj. Wal jixalanh yebꞌ juninalanh xin chikankano yul konhobꞌ chikopehkanayojanh tiꞌ yunhe matzet chiyu yu anma hoyaniko yinhla iskꞌul. 18 Mach chonhmeltzohanh jatutanh masanto chiꞌalaxiko istxꞌotxꞌ jet Israel tiꞌanh yul isqꞌabꞌ. 19 Haꞌ txꞌotxꞌ ayko yetkꞌulal bꞌay chiꞌahilo tzꞌayik, txꞌotxꞌ ayayo satakꞌti haꞌ Jordán tiꞌ, haꞌ txꞌotxꞌ chiꞌok juhanh; yuxin matxa chikoqꞌananh komajulanh isqꞌaxebꞌikꞌto haꞌ tiꞌ, xhi ebꞌnaj. 20 Istaqꞌwi yaꞌ Moisés:

—Kꞌultikꞌa chikan txꞌotxꞌ tiꞌ teyet tato cheyije hakaꞌ heyalni tiꞌ, kat heto yinta heyet Israelal heyaqꞌaꞌ howal, hakaꞌ yu ischejni Komam Jahawil. 21 Yebꞌ tato hesunil iqꞌbꞌil hechꞌen yet howal heyu, kat heqꞌaxponikꞌto haꞌ Jordán tiꞌ sata Komam, kat heyechman bꞌey tuꞌ masanto chilo Komam sunil mak ayko ishowal yinh Komam sat txꞌotxꞌ. 22 Yetto chonhqꞌojikano yinh sunil anma ayayo sat txꞌotxꞌ, katto hemeltzohi; yinh hakaꞌ tuꞌ, xaheyije tzet taqꞌwebꞌil heyu teyibꞌanh sata Komam yebꞌ tet heyet konhobꞌ Israel, kat yokkano txꞌotxꞌ tiꞌ heyu yu Komam. 23 Yajaꞌ ta mach cheyije tzet cheyal tiꞌ, cheyako hemul tet Komam, yilal xin heyohtanheniloj tato chiyati Komam isyaꞌtajil teyibꞌanh yu hemul tuꞌ. 24 Watxꞌewe bꞌay chikankano heyixal yebꞌ heyuninal tiꞌ, kat xin hewatxꞌenpaxo ispeyabꞌ henoqꞌ; yajaꞌ xin yilal heyijen tzet chal hetiꞌ, xhi yaꞌ Moisés.

25 Istaqꞌwi ebꞌnaj Gad yebꞌ ebꞌnaj Rubén, hakaꞌ tiꞌ:

—Hanhonh konhhachejabꞌ honhtiꞌanh chikoyijehanh tzet chawal tiꞌ. 26 Sunil ebꞌix jixalanh yebꞌ nixhte juninalanh chijakanojanh yul konhobꞌ Galaad, kat iskanpaxkano kowakaxanh yebꞌ konoqꞌanh; 27 walonh hachejabꞌ honhtiꞌanh chikowatxꞌe kobꞌahanh, kat kotohanh yinh howal hakaꞌ chiyal iskꞌul Komam, hakaꞌ hawalni tiꞌ, xhi ebꞌnaj.

28 Lahwi tuꞌ, yalni yaꞌ Moisés hunteqꞌan chejbꞌanile tiꞌ tet yaꞌ sacerdote Eleazar yebꞌ tet yaꞌ Josué yebꞌ tet ebꞌnaj iswiꞌehal ye xol hunun majan ebꞌnaj Israel, yalni yaꞌ hakaꞌ tiꞌ:

29 —Tato sunil ebꞌnaj winaj Gad yebꞌ sunil ebꞌnaj Rubén chiqꞌaxponikꞌto yibꞌanh haꞌ Jordán iqꞌbꞌil ismunlabꞌal yu isto yinh howal teyintaj hakaꞌ chal iskꞌul Komam, ayko ebꞌnaj xin heyetbꞌihoj masanto chexqꞌoji yinh sunil anma ayayo sat txꞌo txꞌotxꞌ chiyaqꞌ Komam teyet; wal tuꞌ cheyaqꞌ txꞌotxꞌ Galaad tet ebꞌnaj, kat yokkano txꞌotxꞌ yu ebꞌnaj. 30 Yajaꞌ tato mach chiꞌekꞌto ebꞌnaj teyintaj yinh howal, haꞌ bꞌey txꞌotxꞌ Canaán cheyaqꞌ ismajul ebꞌnaj teyintaj, xhi yaꞌ Moisés.

31 Istaqꞌwi ebꞌnaj Gad yebꞌ xin ebꞌnaj Rubén, yalni ebꞌnaj:

—Chikoyijehanh sunil tzet chiyal Komam, hanhonh konhhachejabꞌ honhtiꞌanh, 32 chonhtohanh yinh howal bꞌey txꞌotxꞌ Canaán tuꞌ yu koyijenanh tzet chiyal Komam; yajaꞌ chiꞌok txꞌotxꞌ ayko yinh yetkꞌulal bꞌay chiꞌahilo tzꞌayik tiꞌ juhanh, xhi ebꞌnaj.

33 Yuxin haꞌ tet ebꞌnaj Gad yebꞌ tet ebꞌnaj Rubén yebꞌ tet yikta majan ebꞌnaj Manasés, iskꞌahol yaꞌ José yaqꞌ yaꞌ Moisés istxꞌotxꞌ naj Sehón isreyal ebꞌnaj amorreo, istxꞌotxꞌ naj Og isreyal konhobꞌ Basán, yebꞌ sunil konhobꞌ ayko yul ismajul, yebꞌ txꞌo txꞌotxꞌ hoyaniko yinhla konhobꞌ tuꞌ. 34 Yok ebꞌnaj Gad iswatxꞌenokanh konhobꞌ Dibón, konhobꞌ Atarot, konhobꞌ Aroer, 35 yebꞌ konhobꞌ Atarot-sofán, konhobꞌ Jazer, konhobꞌ Jogbeha, 36 yebꞌ konhobꞌ Bet-nimra, yebꞌ konhobꞌ Bet-arán; ispenayo ebꞌnaj iskonhobꞌ yu kꞌubꞌ; iswatxꞌenpaxo ebꞌnaj ispeyabꞌ ismeꞌ. 37 Haxa ebꞌnaj Rubén, watxꞌenkanh konhobꞌ Hesbón, konhobꞌ Eleale, konhobꞌ Quiriataim, 38 yebꞌ konhobꞌ Nebo, konhobꞌ Baal-meón, yebꞌ konhobꞌ Sibma. Haxa yet iswatxꞌenkanh ebꞌnaj hunteqꞌan konhobꞌ tuꞌ yaniko ebꞌnaj isbꞌi isbꞌihoj.

39 Haxa ebꞌnaj titna yinh naj Maquir, iskꞌahol yaꞌ Manasés, qꞌoji ebꞌnaj yinh ebꞌnaj amorreo ayayo sat txꞌotxꞌ Galaad, istzumbꞌenilo ebꞌnaj anma amorreo tuꞌ, yokkano istxꞌotxꞌ anma tuꞌ yu ebꞌnaj. 40 Hak tuꞌ yu yaqꞌnikano yaꞌ Moisés txꞌotxꞌ Galaad tet ebꞌnaj titna yinh naj Maquir, iskꞌahol yaꞌ Manasés, yehayo ebꞌnaj sat txꞌotxꞌ. 41 Haxa ebꞌnaj Jair, hunxa iskꞌahol yaꞌ Manasés, qꞌoji ebꞌnaj yinh hunteqꞌan yaldeahil ebꞌnaj amorreo, yaniko ebꞌnaj isbꞌi Havot-jair isbꞌiho txꞌotxꞌ. 42 Haxa hunmajanxa ebꞌnaj chiyij Noba, qꞌoji ebꞌnaj yinh konhobꞌ Kenat, yebꞌ yinh sunil yaldeahil yaniko ebꞌnaj isbꞌi, yuxin Noba isbꞌi txꞌotxꞌ.