Yet isqꞌoji ebꞌnaj Israel yinh naj Og isreyal Basán
3
»Lahwi tuꞌ xin, nanxa bꞌehal jiqꞌa, kotoh bꞌey txꞌotxꞌ Basán; yajaꞌ naj Og, isreyal txꞌotxꞌ Basán tuꞌ, elti naj yebꞌ sunil issoldado yu yaniko howal jinh bꞌey Edrei.2 »Yalni Komam wetan hakaꞌ tiꞌ: “Mach chaxhxiw tet naj, wal xin xawakojan naj yul heqꞌabꞌ yebꞌ sunil issoldado yebꞌ iskonhobꞌ, yunhe heqꞌoji yinh naj, hakaꞌ heyu yinh naj Sehón, isreyal ebꞌnaj amorreo, naj ay bꞌey Hesbón,” xhi Komam.
3 »Hak tuꞌ xin yu yaqꞌni Komam Dios Jahawil koDiosal aykꞌayo naj rey Og tuꞌ yul koqꞌabꞌ, yebꞌ sunil issoldado naj, kopotxꞌnikamo ebꞌnaj sunil, machi hunu mak xin jakanoj. 4 Koqꞌojipaxo yinh sunil iskonhobꞌ naj, machi hunu konhobꞌ tiꞌ bꞌay mach konhqꞌoji. Yinh sunil, 60 (oxkꞌal) konhobꞌ, haꞌ ton sunil ej konhobꞌ ayko yul ismajul Argob, ayko yalanh yip naj Og bꞌey Basán. 5 Sunil hunteqꞌan konhobꞌ tuꞌ majchebꞌilayoj, kaw nahat yekanh iskꞌubꞌal, ayko xin ispultahil konhobꞌ tuꞌ, ayko huneꞌ chꞌen hierro qꞌataniko isteloj. Nanyepaxo xin hunteqꞌanxa konhobꞌ machi iskꞌubꞌal bꞌay konhqꞌojipaxoj. 6 Konhqꞌoji yinh hunteqꞌan konhobꞌ tuꞌ, hakaꞌ ju yinh naj Sehón, isreyal Hesbón. Kopotxꞌnikamo ebꞌnaj winaj yebꞌ ebꞌix ix yebꞌ nixhte unin yul hunteqꞌan konhobꞌ tuꞌ. 7 Hanhe xin isnoqꞌ ebꞌnaj okkano ju, yebꞌ tzetaj ye tuꞌ ay istohol ay yul hunteqꞌan konhobꞌ tuꞌ.
8 »Hak tuꞌ xin yu yokkano istxꞌotxꞌ ebꞌnaj amorreo yul koqꞌabꞌ yinh hunteqꞌan tiempo tuꞌ; bꞌay ayko ebꞌnaj kawanh rey, ebꞌnaj ayayo isqꞌaxebꞌalikꞌti haꞌ Jordán, yinh yetkꞌulal bꞌay chiꞌahilo tzꞌayik; chiꞌichiti bꞌey haꞌ Arnón masanta bꞌey witz Hermón. 9 (Ebꞌnaj Sidonio, Sirión yako ebꞌnaj isbꞌiho huneꞌ witz tuꞌ, wal ebꞌnaj amorreo xin, Senir yako ebꞌnaj isbꞌihoj). 10 Sunil ej konhobꞌ ayayo yul niman akꞌal yebꞌ bꞌey Galaad yebꞌ bꞌey Basán masanta bꞌey Salca yebꞌ bꞌey Edrei; haꞌ hunteqꞌan konhobꞌ tuꞌ aykꞌay yul koqꞌabꞌ. Yalanhto tuꞌ haꞌ hunteqꞌan konhobꞌ tuꞌ, ayiko yalanh yip naj Og bꞌey Basán. 11 Haxanhe naj rey Og tuꞌ, kaw islahobꞌalxhanhe yinh ebꞌnaj gigante, ebꞌnaj nime istel. Haꞌ ischꞌen txꞌat naj xin, kanhebꞌ metro yok howebꞌ centímetroxa istel, yok huneꞌ metro yebꞌ 80 (kanhwinaj) centímetro sat. Chito ilcha istxꞌat naj tuꞌ yul konhobꞌ Rabá, yul ismajul ebꞌnaj amonita.
Ebꞌnaj Israel titna yinh yaꞌ Rubén yebꞌ yaꞌ Gad yebꞌ yikta majan ebꞌnaj titna yinh yaꞌ Manasés ehayo ebꞌnaj isqꞌaxebꞌikꞌto haꞌ Jordán yetkꞌulal bꞌay chiꞌahilo tzꞌayik
12 »Haꞌ txꞌotxꞌ komajilo yinh hunteqꞌan tiempo tuꞌ, waqꞌan txꞌotxꞌ tet ebꞌnaj Israel titna yinh yaꞌ Rubén yebꞌ yinh yaꞌ Gad. Txꞌotxꞌ chiꞌichiti bꞌey Aroer, ayayo istiꞌla haꞌ Arnón, masanta chiꞌapni yiktabꞌanil witz Galaad, yebꞌ sunil ej konhobꞌ ay sat txꞌotxꞌ. 13 Haxa yaqꞌbꞌilxa txꞌotxꞌ Galaad, yebꞌ sunil txꞌotxꞌ Basán, txꞌotxꞌ ayiko yalanh yip naj Og yet yalanhto, yebꞌpaxo sunil txꞌotxꞌ Argob, txꞌotxꞌ chihal-lax istxꞌotxꞌ ebꞌnaj nimej istel. Sunil txꞌotxꞌ tuꞌ waqꞌan tet yikta majan ebꞌnaj titna yinh yaꞌ Manasés. 14 Wal naj Jair, naj titna yinh yaꞌ Manasés, haꞌ naj iqꞌni txꞌotxꞌ Argob masanta bꞌey ismohonal istxꞌotxꞌ ebꞌnaj Gesur yebꞌ ebꞌnaj Maaca, yaniko naj isbꞌi naj yinh txꞌotxꞌ hakaꞌ tiꞌ, Basán-havot-jair. Hakto tuꞌ isbꞌi txꞌotxꞌ tinanh. 15 Haꞌ tet naj Maquir waqꞌan txꞌotxꞌ Galaad. 16 Wal tet ebꞌnaj titna yinh yaꞌ Rubén yebꞌ yinh yaꞌ Gad, waqꞌan txꞌotxꞌ ayko xolbꞌal Galaad yebꞌ haꞌ Arnón, haꞌ xin yiktabꞌal akꞌal chiꞌekꞌ ismohonal txꞌotxꞌ masanta bꞌey haꞌ Jaboc, haꞌ ton ismohon ebꞌnaj amonita. 17 Haxa yinh yetkꞌulal bꞌay chiꞌahilo tzꞌayik, waqꞌan txꞌotxꞌ Arabá, haꞌ xin haꞌ Jordán ayko ismohonalo txꞌotxꞌ; chiꞌichiti bꞌey haꞌ Cinereta masanta bꞌey haꞌ mar Arabá, haꞌ ton haꞌ Mar Kꞌachiꞌ, yich witz Pisga.
18 »Yinh huneꞌ tiempo tuꞌ, waqꞌan huneꞌ chejbꞌanile tiꞌ tet ebꞌnaj Israel titna yinh yaꞌ Rubén yebꞌ yinh yaꞌ Gad, yebꞌ tet yikta majan ebꞌnaj titna yinh yaꞌ Manasés: “Komam Dios, Jahawil, chꞌaqꞌnikano txꞌotxꞌ tiꞌ hemajuloj. Haxa sunil ebꞌnaj winaj texol chiyu isto yinh howal, yiqꞌabꞌ ebꞌnaj ischꞌen yet howal, kat isbꞌabꞌi ebꞌnaj sata yet Israelal. 19 Kachannhe xin ebꞌix ix chikankano yebꞌ nixhte yunin, yebꞌ sunil henoqꞌ yul konhobꞌ xawaqꞌan teyet tiꞌ. (Kaw wohtajan tato kaw tzetkꞌakano henoqꞌ.) 20 Chexkolwahi masanto yet chꞌaqꞌni Komam xewilal tet heyuxhtaj, hakaꞌ yu yaqꞌni teyet, yet chꞌapnikano ebꞌnaj sat txꞌo txꞌotxꞌ chaqꞌ Komam ismajulo ebꞌnaj isqꞌaxebꞌikꞌto haꞌ Jordán, lahwi tuꞌ kat hemeltzo sat hetxꞌotxꞌ xawaqꞌan teyet,” haꞌ xin ischejbꞌanil Komam chiwalan teyet.
21 »Haꞌ tet yaꞌ Josué walkanojan chejbꞌanile hakaꞌ tiꞌ: “Hach kaw hawil yu isbꞌaqꞌ hasat tzettaj iswatxꞌe Komam Jahawil koDiosal yinh kawanh ebꞌnaj rey tiꞌ; haktikꞌapax tuꞌ xin chute Komam yinh ebꞌnaj ayko yahawilo txꞌo txꞌotxꞌ bꞌay chexhekꞌtoj.” 22 Mach chaxhxiw tet ebꞌnaj, yuto haꞌ Komam Jahawil, koDiosal chꞌaqꞌni howal yinh ebꞌnaj teseleloj, kinchihan tet yaꞌ.
Yaꞌ Moisés mach chꞌokto yaꞌ sat txꞌotxꞌ Canaán
23 »Yinhtikꞌa huneꞌ tiempohal tuꞌ, inqꞌanan tet Komam, walnihan hakaꞌ tiꞌ: 24 “Mam Wahawil, xakaxhichiko hayeni tato kaw niman hawelapnoj yebꞌ ta kaw aykano hawip tet hachejabꞌ tiꞌ; yuto machi hunu dios yul satkanh yebꞌ sat txꞌo txꞌotxꞌ tiꞌ chisje iswatxꞌen tzet kaw chikꞌay kokꞌul jilni hakaꞌ chawatxꞌe tiꞌ. 25 Chinqꞌanan tawet tato chaje chinekꞌtojan isqꞌaxebꞌikꞌto haꞌ Jordán tuꞌ, yuto chiwochehan wilaꞌan txꞌo txꞌotxꞌ kaw kꞌulkanoj, txꞌotxꞌ chewal txꞌotxꞌ kaw kꞌul, yebꞌ witz Líbano,” kinchihan tet Komam. 26 Yaj tit ishowal Komam winhan heyu hex tiꞌ; mach isje Komam yinh tzet inqꞌanan tet, yalni Komam wetan hakaꞌ tiꞌ: “Kꞌuxanxa, matxa chawal huneꞌ tiꞌ wetan. 27 Wal xin ahanhto yinh iswiꞌ witz Pisga, kat hawilnito yinh yetkꞌulal bꞌay chito tzꞌayik, yebꞌ yinh yetkꞌulal norte, yebꞌ yinh yetkꞌulal sur, yebꞌ yinh yetkꞌulal bꞌay chiꞌahilo tzꞌayik; wal haqꞌaxponikꞌto yibꞌanh haꞌ Jordán, mach chaxhekꞌtoj. 28 Wal xin aqꞌ kuybꞌanile tet yaꞌ Josué, iptzekanoj, kat hawaniko yip yanma, yuto haꞌ yaꞌ chibꞌabꞌi sata konhobꞌ tiꞌ, kat yanikto yaꞌ anma tuꞌ sat txꞌo txꞌotxꞌ chawilkano tinanh,” xhi Komam wetan.
29 »Lahwi tuꞌ kokankano bꞌey tuꞌ sat akꞌal, sata Bet-peor.