Istanhtzelo ebꞌnaj Israel ebꞌnaj Cananeo
21
Haxa yet yabꞌen naj isreyal ebꞌnaj cananeo ay yul konhobꞌ Arad yul ismajul txꞌotxꞌ Neguev tato ayko ebꞌnaj Israel yul bꞌeh chito konhobꞌ Atarim, yelto naj rey tuꞌ yaqꞌaꞌko howal yinh ebꞌnaj Israel, istzabꞌnayo naj haywanh ebꞌnaj, yinito naj ebꞌnaj yul preso. 2 Hayet yuni huneꞌ tuꞌ, istaqꞌweniko ebꞌnaj Israel yibꞌanh sata Komam, yalni ebꞌnaj hakaꞌ tiꞌ: «Mamin, ta chawako huneꞌ niman konhobꞌ tiꞌ yul koqꞌabꞌanh, chikotanhtzelojanh sunil konhobꞌ ayko yul ismajul huneꞌ niman konhobꞌ tiꞌ,» xhi ebꞌnaj tet Komam. 3 Yabꞌen Komam tzet isqꞌan ebꞌnaj, iskolwa Komam yinh ebꞌnaj, isqꞌoji ebꞌnaj yinh ebꞌnaj cananeo tuꞌ, istanhtzenilo ebꞌnaj Israel sunil ebꞌnaj cananeo, yebꞌ sunil iskonhobꞌ ebꞌnaj. Yu huneꞌ tuꞌ, yuxin Horma ok isbꞌiho huneꞌ txꞌotxꞌ bꞌay yu huneꞌ tuꞌ.Huneꞌ yechel labꞌa bronce
4 Lahwi tuꞌ, yel anma Israel bꞌey witz Hor, isto yul bꞌeh chito bꞌey haꞌ Kajinh Mar yu yekꞌ ishoyno txꞌotxꞌ Edom. Istibꞌayo yu anma Israel yinh isbꞌel tuꞌ. 5 Yichiko istzotel yinh Komam Dios yebꞌ yinh yaꞌ Moisés, yalni hakaꞌ tiꞌ:
«¿Tzet yinh yuxin konhheyilojanh sat txꞌotxꞌ Egipto, chonhheyaqꞌni kamojanh sat txꞌotxꞌ desierto tiꞌ? Wal sat txꞌotxꞌ tiꞌ machi ha haꞌ chijukꞌu, machipaxo tzet chikolo, kaw xin huneꞌnhetikꞌa haꞌ tzet chikolo hunun tzꞌayik. Kaw xatibꞌayo huneꞌ maná tiꞌ kaw mach kꞌulo koloni,» xhi anma Israel.
6 Yuxin yati Komam Jahawil hunteqꞌan noꞌ howla labꞌa xol anma Israel, ischilax anma yu noꞌ, kaw xin hantanhe anma kam yu noꞌ. 7 Isto anma Israel tuꞌ iskꞌatanh yaꞌ Moisés, yalni anma tet yaꞌ hakaꞌ tiꞌ:
«Mam Moisés, kaw majako komulanh kobꞌuchwahanh yinh Komam Dios yebꞌ tawinh; qꞌan tet Komam ta chiyilo noꞌ labꞌa koxol tiꞌanh,» xhi anma.
Isqꞌanni yaꞌ Moisés tet Komam ta chiyaqꞌ nimankꞌulal yinh anma tuꞌ. 8 Yalni Komam tet yaꞌ Moisés hakaꞌ tiꞌ:
«Watxꞌe hunu yechel noꞌ howla labꞌa hakaꞌ hunteqꞌan noꞌ labꞌa tiꞌ, kat hatꞌunhbꞌankanh yinh hunu te teꞌ nimajal istel. Makxanhetikꞌa chischi noꞌ, kat yok tꞌanhno yinh huneꞌ yechel labꞌa chawatxꞌe tuꞌ, kat iskawxikanh, matxa chikam yu noꞌ,» xhi Komam tet yaꞌ Moisés.
9 Iswatxꞌen yaꞌ Moisés huneꞌ yechel labꞌa yinh chꞌen bronce, islokbꞌankanh yaꞌ yechel tuꞌ yinh huneꞌ te teꞌ nimajal istel. Yuxin hayet chichilax anma Israel yu noꞌ labꞌa tuꞌ, kat isto tꞌanhno yinh huneꞌ chꞌen labꞌa bronce, hak tuꞌ xin matxa chikamiloj.a
Ebꞌnaj Israel ekꞌ ebꞌnaj ishoyoꞌ txꞌotxꞌ Moab
10 Lahwi tuꞌ, yel anma Israel bꞌay aya, yapni bꞌey txꞌotxꞌ Obot, haꞌ tuꞌ iswatxꞌekanh ismantiado. 11 Tzujan tuꞌ, yel sat txꞌotxꞌ Obot, yapni bꞌey txꞌotxꞌ Ije-abarim, ayko sat txꞌotxꞌ desierto yibꞌanhahto txꞌotxꞌ Moab bꞌay chꞌahilo tzꞌayik. 12 Lahwi tuꞌ, istopaxo yinh isbꞌel, iswatxꞌenpaxokanh ismantiado bꞌey istiꞌla ha haꞌ, Zered isbꞌi. 13 Lahwi tuꞌ, istopaxo yinh isbꞌel, yapni isqꞌaxebꞌikꞌto haꞌ niman haꞌ Arnón sat txꞌotxꞌ desierto ayko yul ismajul ebꞌnaj amorreo. Haꞌ xin ha haꞌ tuꞌ ayko ismohonal istxꞌotxꞌ ebꞌnaj Moab yebꞌ ebꞌnaj amorreo. 14 Haꞌ yinh huneꞌ tuꞌ chitzotel libro yinh howal yet Komam Jahawil bꞌay chala:
«Chikꞌay kokꞌul yinh tzet iswatxꞌe Komam Dios bꞌey haꞌ Kajinh Mar,
yebꞌ bꞌey haꞌ Arnón;
15 yebꞌ tzet isye Komam yinh yojomal ha haꞌ, haꞌ chiꞌekꞌ bꞌey txꞌotxꞌ Ar,
kat yapnikano bꞌey ismohonal txꞌotxꞌ Moab,» xhi.
16 Lahwi tuꞌ, yel anma Israel isqꞌaxebꞌikꞌto haꞌ Arnón, yapni bꞌey txꞌotxꞌ Beer bꞌay ay huneꞌ kꞌuh, bꞌay yal Komam Dios tet yaꞌ Moisés hakaꞌ tiꞌ: «Kutxbꞌako sunil anma Israel kat waqꞌnihan haꞌ yukꞌuꞌ,» xhi Komam. 17 Hak tuꞌ xin yu yaniko anma Israel isnuqꞌal huneꞌ bꞌit, chalni hakaꞌ tiꞌ:
«Ahanhwano kꞌuh, kat habꞌitnhelaxi.
18 Haꞌ huneꞌ kꞌuh tiꞌ, ishol ebꞌnaj yahaw konhobꞌ yu isqꞌojoch.
Isholnipaxo ebꞌnaj nime winaj yu isvara ayko yul isqꞌabꞌ,» xhi huneꞌ bꞌit tuꞌ.
Lahwi tuꞌ, yel anma Israel bꞌey tuꞌ, yapni bꞌey txꞌotxꞌ Matana. 19 Lahwi tuꞌ, yel ebꞌnaj bꞌey txꞌotxꞌ Matana, yapni bꞌey txꞌotxꞌ Nahaliel. Yelpaxo bꞌey txꞌotxꞌ Nahaliel yapni bꞌey txꞌotxꞌ Bamot. 20 Lahwi tuꞌ yel bꞌey Bamot, yapni bꞌey huneꞌ niman hokan yul ismajul Moab, yapni bꞌey yakꞌalil iswiꞌ witz Pisga bꞌay chijilto txꞌotxꞌ desierto.
Qꞌoji ebꞌnaj Israel yinh naj rey Sehón
21 Ischejnito ebꞌnaj Israel ischejabꞌ yalno tet naj Sehón, isreyal ebꞌnaj amorreo hakaꞌ tiꞌ: 22 «Chijochehanh chonhekꞌtojanh sat hatxꞌotxꞌ tiꞌ. Mach chonhekꞌanh xolaj hetzꞌunubꞌ yebꞌ xolaj heyuva, mach chijukꞌpaxojanh ha haꞌ hayayto yul hekꞌuh. Yul niman bꞌeh chonhtohanh kat koqꞌaxponikꞌtojanh sat hetxꞌotxꞌ tiꞌ,» xhi ebꞌnaj.
23 Yajaꞌ mach isje naj rey Sehón ischahbꞌakto ebꞌnaj sat istxꞌotxꞌ; wal xin ishunbꞌako naj sunil anma, isto ebꞌnaj majwal yinh anma Israel sat txꞌotxꞌ desierto, haxa yet yapni ebꞌnaj bꞌey Jahaza, yaniko ebꞌnaj howal yinh ebꞌnaj Israel. 24 Yajaꞌ xin iskol isbꞌa ebꞌnaj Israel tuꞌ tet ebꞌnaj, isqꞌoji ebꞌnaj yinh naj rey Sehón, yehayo ebꞌnaj Israel sat istxꞌotxꞌ ebꞌnaj. Istxꞌotxꞌ ebꞌnaj tuꞌ chiꞌichito txꞌotxꞌ yinh haꞌ Arnón masanta chiꞌapni txꞌotxꞌ yinh haꞌ Jaboc, bꞌay chiꞌekꞌ ismohonal istxꞌotxꞌ ebꞌnaj amonita, kaw xin pebꞌilayo ismohonal ebꞌnaj tuꞌ. 25 Hak tuꞌ yu yokkano istxꞌotxꞌ ebꞌnaj amorreo yu ebꞌnaj Israel, yehayo ebꞌnaj Israel tuꞌ yul iskonhobꞌ ebꞌnaj, xol hunteqꞌan konhobꞌ tuꞌ ayko Hesbón yebꞌ sunil yaldeahil. 26 Haꞌ konhobꞌ Hesbón tuꞌ, haꞌ iskonhobꞌ naj Sehón isreyal ebꞌnaj amorreo. Naj rey Sehón tuꞌ, yaqꞌ naj howal yebꞌ naj isreyal txꞌotxꞌ Moab yet yalanhtokanoj, yinilo naj Sehón tuꞌ huneꞌ majan istxꞌotxꞌ ebꞌnaj chitaapni yinh haꞌ Arnón. 27 Yu huneꞌ tuꞌ yuxin chiyal ebꞌnaj chiꞌanilo isnuqꞌal tzotiꞌ hakaꞌ tiꞌ:
«Hulanhwe bꞌey Hesbón, iskonhobꞌ naj rey Sehón.
Watxꞌewekanh huneꞌ konhobꞌ tiꞌ,
kat heyanikanh iskꞌubꞌal.
28 Ay huneꞌ qꞌa qꞌaꞌ ichiti yul konhobꞌ Hesbón, iskonhobꞌ naj rey Sehón,
isnhusnilo qꞌaꞌ huneꞌ konhobꞌ ayko yul ismajul txꞌotxꞌ Moab.
Isnhusnipaxilo qꞌaꞌ tuꞌ ebꞌnaj yahaw yeko yinh konhobꞌ Ar ayko yinh qꞌeyan yibꞌanhahto haꞌ Arnón.
29 Kꞌanchꞌan hex konhobꞌ Moab, kꞌanchꞌan hex cheyiyo hebꞌa tet tioxh Quemos,
makextanhtzelaxiloj. Elkanh hekꞌahol yul hekonhobꞌ,
ilaxpaxto hekutzꞌin preso yu naj Sehón, isreyal ebꞌnaj amorreo.
30 Yajaꞌ wal tinanh xin makotanhtzelojanh yip konhobꞌ Hesbón tiꞌ,
yebꞌ hunteqꞌanxa konhobꞌ masanta maꞌapni yinh konhobꞌ Dibón.
Makotanhtzenpaxilojanh konhobꞌ Nofa yebꞌ hunteqꞌanxa konhobꞌ masanta bꞌey konhobꞌ Medeba,» xhi.
Tanhtzelaxilo naj rey Og yebꞌ konhobꞌ Basán
31 Hak tuꞌ yu yokkano istxꞌotxꞌ ebꞌnaj amorreo yu anma Israel. 32 Lahwi tuꞌ ischejnito yaꞌ Moisés haywanh ebꞌnaj Israel yunhe yilni ebꞌnaj tzet jilni konhobꞌ Jazer. Isqꞌoji ebꞌnaj Israel yinh huneꞌ konhobꞌ tuꞌ yebꞌ yinhla yaldeahil ayko yinhla ishoyanil; yinilo ebꞌnaj anma amorreo ay yul hunteqꞌan konhobꞌ tuꞌ. 33 Lahwi tuꞌ, istopaxo ebꞌnaj yinh isbꞌel, yahto ebꞌnaj yul bꞌeh chꞌapni bꞌey konhobꞌ Basán; yajaꞌ naj Og, isreyal konhobꞌ Basán tuꞌ, elti naj yebꞌ issoldado yaqꞌaꞌko howal yinh ebꞌnaj Israel bꞌey txꞌotxꞌ Edrei. 34 Istzotel Komam Dios tet yaꞌ Moisés, yalni Komam tet yaꞌ: «Mach chaxhxiw tet naj yuto haninan chiwakojan naj yul haqꞌabꞌ yebꞌ sunil issoldado, kat wanipaxikojan iskonhobꞌ naj tuꞌ yul haqꞌabꞌ, kat hatanhtzenilo naj rey tiꞌ, hakaꞌ hawute hatanhtzenilo naj Sehón, naj isreyal anma amorreo ay yul konhobꞌ Hesbón,» xhi Komam.
35 Ispotxꞌni ebꞌnaj Israel naj rey Og yebꞌ yuninal yebꞌ sunil issoldado naj. Machi hunu anma ay yul huneꞌ konhobꞌ tuꞌ mach kam yu ebꞌnaj, yokkano istxꞌotxꞌ ebꞌnaj tuꞌ yu ebꞌnaj Israel.