2 Yajaꞌ yu machi ha haꞌ bꞌey tuꞌ, yuxin ah wejna anma Israel yinh yaꞌ Moisés yebꞌ yinh yaꞌ Aarón. 3 Yalni anma Israel hakaꞌ tiꞌ:

«¡Ayxikꞌa konhkam yinta jet konhobꞌ kam yu Komam Jahawil! 4 ¿Tzet yinh yuxin konhheyitijanh bꞌey txꞌotxꞌ desierto tiꞌ hanhonh iskonhobꞌ Komam Dios Jahawil honhtiꞌanh? 5 ¿Tzet yinh yuxin konhheyihtijanh yet jelanh sat txꞌotxꞌ Egipto, konhheyinitijanh sat txꞌotxꞌ bꞌay kaw ay isyaꞌtajil tiꞌ? Bꞌay ayonh tiꞌ, kaw matzet chiyaqꞌa, machi teꞌ higuera, machi teꞌ uva, machi teꞌ granado, kaw machi nichꞌano haꞌ, wal jukꞌni bꞌey tiꞌ,» xhi ebꞌnaj.

6 Hayet yabꞌen yaꞌ Moisés yebꞌ yaꞌ Aarón yalni ebꞌnaj hakaꞌ tiꞌ, ishitzilo ebꞌyaꞌ yinh anma Israel, isto ebꞌyaꞌ istiꞌ ispultahil isTabernáculo Komam, yay jahno ebꞌyaꞌ bꞌey tuꞌ, yay xulno ebꞌyaꞌ sat txꞌotxꞌ, yinhnhena tuꞌ, isyeni isbꞌa isqꞌaqꞌal ismay Komam Dios yibꞌanh ebꞌyaꞌ. 7 Yalni Komam Jahawil tet yaꞌ Moisés:

8 «Iqꞌ haqꞌojoch, kat iskolwa hawuxhta Aarón tawintaj chakutxbꞌaniko anma Israel, kat hawalni tet chꞌen chꞌen ta chiꞌelilo ha haꞌ yul iskꞌul chꞌen, kat yukꞌni anma haꞌ yebꞌ isnoqꞌ,» xhi Komam.

9 Yinikanh yaꞌ Moisés teꞌ qꞌojoch ayko sata Komam Dios, hakaꞌ yu yalni Komam tet yaꞌ. 10 Lahwi tuꞌ, iskutxbꞌaniko yaꞌ Moisés yebꞌ yaꞌ Aarón sunil anma Israel sata huneꞌ chꞌen chꞌen, yalni yaꞌ Moisés tet anma Israel tuꞌ:

«Hex manhkꞌom hex tiꞌ, abꞌewe tzet chiwalan, ¿tom chijiltijanh ha haꞌ yul iskꞌul chꞌen chꞌen tiꞌ, kat jaqꞌnihanh haꞌ heyukꞌuꞌ?» xhi yaꞌ.

11 Hayet lahwi yalni yaꞌ Moisés hakaꞌ tuꞌ, yinikanh yaꞌ isqꞌabꞌ, ismaqꞌniko yaꞌ isqꞌojoch tuꞌ kayel yinh iskꞌul chꞌen chꞌen tuꞌ, yinhnhena tuꞌ, yelilo tixhna ha haꞌ yul iskꞌul chꞌen, kaw xin nimajal isnuqꞌ ha haꞌ tuꞌ eliloj. Yukꞌni anma Israel haꞌ yebꞌ isnoqꞌ anma tuꞌ. 12 Yajaꞌ xin yal Komam Dios tet yaꞌ Moisés yebꞌ tet yaꞌ Aarón hakaꞌ tiꞌ:

«Yu mach heyako heyanma winhan, yebꞌ yu mach heyala ta ay welapnojan sata anma Israel tiꞌ, yuxin maxhtaj hex cheyikto anma Israel tiꞌ sat txꞌotxꞌ aqꞌbꞌilxa tet wuhan,» xhi Komam.

13 Meriba ok isbꞌiho huneꞌ txꞌotxꞌ bꞌay elti haꞌ yul iskꞌul chꞌen chꞌen tuꞌ, yuto haꞌ bꞌey tuꞌ ok ebꞌnaj Israel bꞌuchwal yinh Komam Dios; haꞌ xin bꞌey tuꞌ isye Komam sata sunil anma Israel ta machi nino istxꞌojal ay yinh Komam.^a

14 Hayet ay yaꞌ Moisés yebꞌ anma Israel bꞌey txꞌotxꞌ Cades, ischejnito yaꞌ haywanh ebꞌnaj kaw ay yelapno yalno tet naj rey Edom hakaꞌ tiꞌ: «Hanhonh Israelonh tiꞌanh yebꞌ hex tiꞌ, jikꞌalto kobꞌa, yuxin chijaltojanh huneꞌ chejbꞌanile tiꞌ tawet mam rey. Hach tiꞌ, kaw hawohta sunil isyaꞌtajil jaqꞌlehanh bꞌey txꞌotxꞌ Egipto. 15 Komam jichmamanh apni bꞌey Egipto tuꞌ, yehayo txꞌiꞌal tiempo sat txꞌotxꞌ, yok ebꞌnaj ah Egipto tuꞌ konhyetananh, haktikꞌapax tuꞌ yu yetan ebꞌnaj komam jichmamanh. 16 Yuxin koqꞌananh tet Komam Dios ta chikolwa jinhanh; yabꞌen Komam tzet koqꞌan tuꞌanh, ischejniti Komam yángel, konhyinilojanh sat txꞌotxꞌ Egipto. Tinanh xin, ayonhanh sat txꞌotxꞌ Cades iskawilal ismohonal hekonhobꞌ tiꞌ. 17 Yuxin chikoqꞌananh tawet ta chonhhachakꞌtojanh sat hetxꞌotxꞌ tiꞌ yinh kobꞌelanh; mach chonhekꞌanh xolaj hetzꞌunubꞌ, mach chonhekꞌpaxojanh xolaj heyuva. Mach chonhokanh jiqꞌatijanh ha haꞌ yul hekꞌuh jukꞌuꞌanh; wal xin wihom jokanh yul niman bꞌeh, mach chu kohekꞌnilo kobꞌahanh kotohanh yinh kowatxꞌqꞌabꞌanh yebꞌ yinh komekqꞌabꞌanh, yet chonhqꞌaxponikꞌtojanh sat hetxꞌotxꞌ tiꞌ,» xhito yaꞌ Moisés.

18 Istaqꞌwi naj rey Edom hakaꞌ tiꞌ:

—Machoj, mach chexekꞌ sat kotxꞌotxꞌ tiꞌanh, ta mach xin chintohan kexinmajaꞌan yebꞌ insoldadohan, kat janikojanh howal teyinh, xhi naj.

19 Istaqꞌwi ebꞌnaj chejlaxto tuꞌ, yalni ebꞌnaj:

—Mamin, haꞌ yul niman bꞌeh chonhtohanh, taka xin ay ha haꞌ chijukꞌanh maka konoqꞌanh chꞌukꞌni haꞌ, chikotohlahanh haꞌ tawet. Chahonhikꞌtojanh sat hetxꞌotxꞌ tiꞌ, hanhe huneꞌ tuꞌ chikoqꞌananh tawet, xhi ebꞌnaj.

20 Yajaꞌ xin taqꞌwi naj rey Edom tuꞌ:

—Machoj, mach chexekꞌto sat kotxꞌotxꞌ tiꞌanh, xhi naj.

Yajaꞌ wal naj rey Edom tuꞌ, elto naj ischahbꞌaꞌ ebꞌnaj Israel yu yaniko naj howal yinh ebꞌnaj yebꞌ sunil issoldado, ayko xin ischꞌen ebꞌnaj yet howal yul isqꞌabꞌ. 21 Maxhtikꞌa xin isje naj ta chiꞌekꞌto ebꞌnaj Israel sat istxꞌotxꞌ ebꞌnaj; yuxin nanxa bꞌehal bꞌay to ebꞌnaj Israel yinh isbꞌel tuꞌ.

22 Lahwi tuꞌ, yel sunil anma Israel sat txꞌotxꞌ Cades yapni bꞌey witz Hor. 23 Huneꞌ witz tuꞌ ayayo istiꞌla ismohonal istxꞌotxꞌ ebꞌnaj Edom, haꞌ bꞌey tuꞌ tzotel Komam Dios tet yaꞌ Moisés yebꞌ tet yaꞌ Aarón, yalni Komam hakaꞌ tiꞌ: 24 «Hach Moisés, wal tinanh toxa chikam hawuxhta Aarón tiꞌ, yuxin matxa chiꞌapni yaꞌ sat txꞌotxꞌ chiwaqꞌan tet anma Israel tiꞌ, yuto hemanhkꞌo tzet walan bꞌey haꞌ Meriba. 25 Yuxin ito yaꞌ Aarón tiꞌ yebꞌ yaꞌ Eleazar, yaꞌ iskꞌahol yaꞌ, kat hawahto yebꞌ ebꞌyaꞌ iswiꞌ witz Hor. 26 Haꞌ tuꞌ chawilo xil isqꞌap yaꞌ, qꞌap chiꞌokniko yinh ismunil yinh sacerdotehal, kat hawaniko qꞌap yinh yaꞌ Eleazar, yuto haꞌ tuꞌ chikam yaꞌ Aarón tiꞌ,» xhi Komam.

27 Isyijen yaꞌ Moisés sunil tzet yal Komam tuꞌ, yahto yaꞌ yebꞌ yaꞌ Aarón yebꞌ yaꞌ Eleazar yinh iswiꞌ witz sata sunil anma Israel. 28 Hayet yapni ebꞌyaꞌ iswiꞌ witz tuꞌ, yinilo yaꞌ Moisés xil isqꞌap yaꞌ Aarón, qꞌap chꞌokniko yinh ebꞌnaj ay ismunil yinh sacerdotehal, yaniko yaꞌ qꞌap yinh yaꞌ Eleazar. Haꞌ iswiꞌ witz tuꞌ xin kam yaꞌ Aarón. Lahwi tuꞌ, ispaxayti yaꞌ Moisés yebꞌ yaꞌ Eleazar iswiꞌ witz tuꞌ.^b 29 Hayet yohtanhenilo anma Israel ta kam yaꞌ Aarón tuꞌ, yiqꞌni bꞌiskꞌulal anma yinh huneꞌ ixahaw yinh yaꞌ Aarón.