Chejbꞌanile yinh tzet chu issajnhen isbꞌa anma yetato isbꞌa
19
Lahwi tuꞌ istzotelpaxo Komam Dios tet yaꞌ Moisés yebꞌ tet yaꞌ Aarón, yalni Komam hakaꞌ tiꞌ: 2 «Hanin Yahawintiꞌan chiwalan huneꞌ chejbꞌanile tiꞌ: Hal tet ebꞌnaj Israel ta chiyiti ebꞌnaj hunu noꞌ qꞌopo wakax kajinh, machi nino istzakaꞌil, yebꞌ maxhto hunelo chiꞌok te teꞌ yibꞌanh istel isnuqꞌ. 3 Kat heyaniko noꞌ yul isqꞌabꞌ yaꞌ sacerdote Eleazar, kat yinilto yaꞌ noꞌ yintalto campamento, kat ischejni yaꞌ potxꞌlaxo noꞌ yinh sat yaꞌ. 4 Kat yinikanh yaꞌ sacerdote Eleazar hanikꞌo ischikꞌil noꞌ yu yiximal isqꞌabꞌ, kat istxihniko yaꞌ hujel yinh yetkꞌulal bꞌay ay Tabernáculo bꞌay chekutxbꞌa hebꞌa inkꞌatanhan. 5 Lahwi tuꞌ, kat isnhuslaxto noꞌ yinh sat yaꞌ. Chinhuslaxto istzꞌumal noꞌ, ischibꞌehal noꞌ, ischikꞌil noꞌ yebꞌ istzaꞌ noꞌ; 6 kat yinikanh yaꞌ sacerdote tuꞌ teꞌ cedro yebꞌ huneꞌ isqꞌabꞌ teꞌ hisopo, yebꞌ txꞌal kaj txꞌal, kat yanikto yaꞌ sunil tuꞌ yul qꞌa qꞌaꞌ bꞌay lanhan istzꞌato noꞌ wakax tuꞌ. 7 Lahwi tuꞌ, kat istxꞌahni yaꞌ xil isqꞌap, kat yaxhni yaꞌ; chilahwi tuꞌ kat yokto yaꞌ yul campamento, waxanhka xin maxhto sajo ye yaꞌ hakaꞌ yalni chejbꞌanile masanto yet chiqꞌejbꞌayoj. 8 Hakpax tuꞌ, naj chinhusnito noꞌ wakax tuꞌ, chistxꞌah naj xil isqꞌap kat yaxhni naj, mach xin sajo chukano naj hakaꞌ yalni chejbꞌanile masanto yet chiqꞌejbꞌayoj. 9 Haxa hunxa naj winaj saj yehi hakaꞌ yalni chejbꞌanile, haꞌ naj chiꞌinikanh istanhil noꞌ wakax tuꞌ, kat yinito naj bꞌay saj yehi yintalto campamento. Haꞌ tanh tuꞌ, chiꞌokniko yu anma Israel yu yokniko xol ha haꞌ chiꞌokniko issajnhe anma Israel. Haꞌ huneꞌ tiꞌ xahanbꞌal chiꞌinilo mule. 10 Haꞌ naj inikanh tanh tuꞌ, chistxꞌah naj xil isqꞌap kat yaxhnhen isbꞌa naj, mach xin sajo chukano naj masanto yet qꞌejbꞌiyal. Huneꞌ tiꞌ, chejbꞌanile chukano texol yinh sunilbꞌal ej tiempo; cheyije hex Israelex tiꞌ, yebꞌ anma mach Israelo ay texol.11 »Haꞌ mak chitzabꞌni isnimanil hunu kamom anma, mach sajo chukano yulbꞌal hujebꞌ tzꞌayik. 12 Haꞌ yinh yox tzꞌayik yebꞌ yinh ishuj tzꞌayik tuꞌ, chissajnhe isbꞌa yu ha haꞌ chiꞌokniko yu issajnhelax anma Israel hakaꞌ yalni chejbꞌanile. Tato mach chissajnhe isbꞌa yinh yox tzꞌayik yebꞌ yinh ishuj tzꞌayik tuꞌ, machi sajbꞌikano huneꞌ mak tuꞌ. 13 Tato ay hunu mak chitzabꞌni isnimanil hunu kamom, mach xin chissajnhe isbꞌa hakaꞌ yalni chejbꞌanile, haꞌ huneꞌ mak tuꞌ, chiyetato inTabernáculohan; yuxin maqꞌbꞌil yilaxilo mak tuꞌ xol anma Israel yuto mach issajnhe isbꞌa yu ha haꞌ chitxilaxayoj.
14 »Haꞌ tiꞌ chejbꞌanile chiwaqꞌan yet chikam hunu mak yul ismantiado yul campamento. Sunil mak chiꞌokto yul huneꞌ mantiado tuꞌ mach sajo chukanoj yulbꞌal hujebꞌ tzꞌayik. 15 Sunil txꞌotxꞌ xi mach kꞌul yeko ismajil mach sajo chukano txꞌotxꞌ.
16 »Haꞌ mak chitzabꞌni hunu mak chimaqꞌlaxkamo istiꞌ campamento, maka mak chitzabꞌni isnimanil hunu mak tonhe chikamkanh yu hunu yabꞌil, maka mak chitzabꞌni isbꞌajil kamom, maka chitzabꞌni hunu panteón, haꞌ huneꞌ mak tuꞌ mach sajo chukano yulbꞌal hujebꞌ tzꞌayik.
17 »Yu hunteqꞌan mak mach sajo tuꞌ yuxin chiꞌilaxti hanikꞌo istanhil noꞌ wakax tzꞌanatoj yu yaqꞌni tanho mule kat yalaxayto yul hunu net, kat yalaxayto ha haꞌ elilo yul isnuqꞌ yul hunu net tuꞌ yibꞌanh tanh. 18 Haxa hunu naj saj yehi, haꞌ naj chiꞌiniti hunu isqꞌabꞌ teꞌ hisopo, kat islabꞌanayto naj isqꞌabꞌ teꞌ xol ha haꞌ tuꞌ, kat istxihniko naj yinh huneꞌ mantiado, yebꞌ yinh txꞌotxꞌ xi, yebꞌ yinh anma ay yul mantiado tuꞌ. Kat istxihnipaxiko naj ha haꞌ tuꞌ yinh mak tzabꞌni isnimanil mak potxꞌbꞌilkamoj, yebꞌ yinh mak tzabꞌni isbꞌajil hunu kamom, yebꞌ yinh mak tzabꞌni hunu mak kam yu hunu yabꞌil, yebꞌ yinh mak tzabꞌni hunu panteón.a 19 Haꞌ naj winaj saj yehi hakaꞌ yalni chejbꞌanile, chistxihiko naj ha haꞌ tuꞌ yinh yox tzꞌayik yebꞌ yinh ishuj tzꞌayik yinh mak chisajnhelaxkanoj. Haxa yinh ishuj tzꞌayik tuꞌ kat istxꞌahni xil isqꞌap kat yaxhnhen isbꞌa, haxa yinh qꞌejbꞌiyalil xin kat issajbꞌikanoj. 20 Tato ay hunu mak mach sajoj, machi xin chissajnhe isbꞌa hakaꞌ yalni chejbꞌanile, machi xin txihlaxiko ha haꞌ yinh, haꞌ chisajnhenkano anma mach sajoj yehi, haꞌ huneꞌ mak tuꞌ, chiꞌilaxilo xol yet konhobꞌ yuto chiyetato isTabernáculo Komam, yebꞌ yu mach sajo yehi. 21 Huneꞌ tiꞌ, chejbꞌanile chukaniko texol yinh sunilbꞌal ej tiempo.
»Haꞌ mak chitxihniko ha haꞌ tiꞌ yinh hunuxa anma, yilal istxꞌahni xil isqꞌap. Haꞌ mak chitzabꞌni ha haꞌ tuꞌ, mach sajo chukanoj masanto yet qꞌejbꞌiyalil. 22 Sunil tzet chistzabꞌ hunu mak mach sajoj, mach sajo chupaxkano tzet chistzabꞌ tuꞌ. Hakpax tuꞌ xin haꞌ mak chitzabꞌni hunu mak mach sajoj, mach sajo chukanoj masanto yet qꞌejbꞌiyalil,» xhi Komam.