Ismunil ebꞌnaj sacerdote yebꞌ ebꞌnaj levita
18
Yalni Komam Dios tet yaꞌ Aarón: «Tato ay hunu mak chiyako ismul yinh watutan, haꞌ huneꞌ ismul tuꞌ chitit tawibꞌanh yebꞌ yibꞌanh hakꞌahol yebꞌ yibꞌanh ebꞌnaj hawet levitahil. Yajaꞌ tato ay hunu hemul cheyako yinh hemunil yinh sacerdotehal, tawibꞌanh hach tiꞌ yebꞌ yibꞌanh hakꞌahol chitokano huneꞌ mule tuꞌ. 2 Yilal iskolwapaxo sunil ebꞌnaj hawet levitahil tawinh yebꞌ yinta hakꞌahol yinh munil yul inTabernáculohan bꞌay ay istꞌinhanil intzotiꞌan. 3 Chiswatxꞌe ebꞌnaj tzet chawala kat ismunla ebꞌnaj yinh tzet chiꞌokniko yinh Tabernáculo, yajaꞌ mach chu ishitziko ebꞌnaj iskꞌatanh munlabꞌal chiꞌokniko yul Tabernáculo yebꞌ iskꞌatanh ismexhahil yet xahanbꞌal, yuto ta hak tuꞌ chikam ebꞌnaj kat hekampaxo yinta ebꞌnaj. 4 Haꞌ hun ebꞌnaj chimunla teyintaj yinh sunil munil yinhla watutan, yajaꞌ hex cheyal tet ebꞌnaj tzet chu ebꞌnaj. Machi hunu komon anma tiꞌ chu ishitziko tekꞌatanh. 5 Hexnhechꞌan chu hemunla bꞌey Watutan yebꞌ yinh ismexhahil xahanbꞌal, yunhe matxa chitit inhowalan yinh anma Israel. 6 Hanan insikꞌilojan ebꞌnaj heyet levitahil xol ebꞌnaj Israel, yunhe waqꞌnihan ebꞌnaj teyet, yu yok ebꞌnaj munil teyintaj yinh hemunil bꞌey Tabernáculo bꞌay chekutxbꞌa hebꞌa inkꞌatanhan. 7 Yajaꞌ hanhechꞌan hach yebꞌ ej hakꞌahol chu ismunla yinh sacerdotehal bꞌay ay ismexhahil yet xahanbꞌal, yebꞌ yintakꞌto qꞌap velo litxꞌankanh bꞌey huneꞌ Ehobꞌal ekꞌna kaw Txahul. Haꞌ munil tuꞌ chewatxꞌe, yuto hanan walan ta hex chexok insacerdotehojan. Tato ay hunu mak chimunla yinh huneꞌ inmunilan tuꞌ, mach xin insacerdotehojan yehi, haꞌ huneꞌ mak tuꞌ maqꞌbꞌil iskami,» xhi Komam tet yaꞌ Aarón.8 Yalnipaxo Komam Dios tet yaꞌ Aarón: «Haninan kaxhwakojan hachahni yebꞌalqꞌabꞌe chiyaqꞌ ebꞌnaj Israel wetan. Sunil tuꞌ kaw ay yelapnoj. Haꞌ tuꞌ chiwaqꞌan tawet yebꞌ tet ebꞌnaj hakꞌahol, yuto huneꞌ tuꞌ hemajul ye wuhan yinh sunilbꞌal ej tiempo.a 9 Haninan chiwaqꞌan tawet yebꞌ tet ebꞌnaj hakꞌahol sunil yebꞌalqꞌabꞌe chꞌaqꞌlax wetan, haꞌ ton hunteqꞌan machi nhuslaxi; hakaꞌ yebꞌalqꞌabꞌe yinh ixim trigo, yebꞌ xahanbꞌal chiꞌaqꞌni tanho mule yebꞌ xahanbꞌal chitohlan mule chiyalte ebꞌnaj Israel wetan. Sunil hunteqꞌan tuꞌ chiwaqꞌan tawet yebꞌ tet ebꞌnaj hakꞌahol. 10 Sunil ebꞌnaj winaj ay texol chisje iskꞌuxni ebꞌnaj hunteqꞌan xahanbꞌal tuꞌ, kachannhe xin bꞌey Watutan chiskꞌux ebꞌnaj noꞌ, yuto kaw ay yelapno xahanbꞌal tuꞌ wuhan.
11 »Isyebꞌalqꞌabꞌ ebꞌnaj Israel chaqꞌ wetan, kaw ay yelapnoj, chiwaqꞌan tawet yebꞌ tet ebꞌnaj hakꞌahol yebꞌ tet ebꞌix hakutzꞌin ay takꞌatanh. Huneꞌ tiꞌ chejbꞌanile chukaniko yinh sunilbꞌal ej tiempo. Makxanhetikꞌa ayto hawu habꞌa yebꞌi tanhe saj yehi hakaꞌ yalni chejbꞌanile, chu iskꞌuxni yebꞌ hex. 12 Yebꞌpaxo xin, bꞌabꞌel sat tzꞌunubꞌ chiyiti ebꞌnaj Israel wetan, hanin Yahawilintiꞌan, yinh hunun habꞌil, chiwaqꞌpaxojan teyet, haꞌ ton aceite kaw kꞌul, vino kaw kꞌul yebꞌ ixim trigo, ixim kaw kꞌul. 13 Chiwaqꞌpaxojan bꞌabꞌel sat tzꞌunubꞌ chiyaqꞌ ebꞌnaj Israel wetan teyet. Makxanhetikꞌa ayto hawu habꞌa yebꞌi, tanhe saj yehi, chiyu islohni yebꞌ hex. 14 Sunil yebꞌalqꞌabꞌe chiyaqꞌ ebꞌnaj Israel wetan, hawet yehi.
15 »Sunil isbꞌabꞌel kꞌahol ebꞌnaj Israel yebꞌ bꞌabꞌel yunin isnoqꞌ ebꞌnaj chiyaqꞌ ebꞌnaj wetan, hawet yepaxoj, yuxin chaqꞌan chꞌen melyu isyebꞌalqꞌabꞌ ebꞌnaj selelo ebꞌnaj bꞌabꞌel iskꞌahol chipitzkꞌahi, kat haqꞌannipaxo chꞌen yinh noꞌ bꞌabꞌel yunin no noqꞌ chipitzkꞌahi, noꞌ mach kꞌulo yinh xahanbꞌalil. 16 Hayet hunxa ixahaw ispitzkꞌahi kat istohlalax bꞌabꞌel unin tuꞌ. Chꞌen howebꞌ siclo plata chꞌaqꞌlax yinh hunun, hakaꞌ chꞌen chiꞌokniko bꞌey Tabernáculo, chꞌen 20 (hunkꞌal) geras yalil. 17 Yajaꞌ wal noꞌ bꞌabꞌel yunin noꞌ wakax yebꞌ noꞌ meꞌ, yebꞌ noꞌ chiw, mach chu istohlalax noꞌ, yuto wetan ye noꞌ, haꞌ noꞌ chepotxꞌo kat henhusni ismantecahil noꞌ wetan, huneꞌ tuꞌ yebꞌalqꞌabꞌe kaw xuqꞌ sam yul insatan. 18 Hawet chiyukaniko sunil ischibꞌehal noꞌ, hakaꞌ noꞌ istxam iskꞌul yebꞌ noꞌ isbꞌul yinh iswatxꞌqꞌabꞌ yebꞌ hunteqꞌan xahanbꞌal chibꞌatxbꞌalaxahto yibꞌanh ismexhahil yet xahanbꞌal. 19 Sunil isyebꞌalqꞌabꞌ ebꞌnaj Israel chiyalte wetan chiwaqꞌan tawet yebꞌ tet hakꞌahol yebꞌ hakutzꞌin ay takꞌatanh. Huneꞌ tiꞌ, chejbꞌanile chukaniko texol yinh sunilbꞌal tiempo. Huneꞌ tiꞌ istꞌinhanil chiwaqꞌan tawet yebꞌ tet hawuninal chipoh bꞌaqꞌinh, huneꞌ istꞌinhanil tiꞌ, mach chu ishel-laxi,» xhi Komam.
20 Yalnipaxo Komam Dios tet yaꞌ Aarón: «Hach tiꞌ, machi hatxꞌotxꞌ yebꞌ tzet ayach hakaꞌ ebꞌnaj Israel; wal xin Haninan hamajul xol ebꞌnaj Israel. 21 Hex titna yinh yaꞌ Leví tiꞌ, haꞌ diezmo chiyaqꞌ ebꞌnaj Israel, haꞌ chiwaqꞌan hemajuloj, yebꞌ haꞌ chiwaqꞌan hetoholoj yu chexmunla bꞌey Tabernáculo, bꞌay chiskutxbꞌa isbꞌa ebꞌnaj Israel inkꞌatanhan. 22 Wal xin machi hunu ebꞌnaj Israel tiꞌ chu ishitziko bꞌay ayayo inTabernáculohan, bꞌay chekutxbꞌa hebꞌa inkꞌatanhan, yuto ta chihitziko ebꞌnaj, chiyako ebꞌnaj ismul, kat istit kamikal yibꞌanh. 23 Wal xin, hanhkꞌanhe ebꞌnaj levita chu ismunla yinh Tabernáculo bꞌay chekutxbꞌa hebꞌa inkꞌatanhan. Taka xin ay hunu ismul ebꞌnaj chako yinh munil tuꞌ, haꞌ kaw ebꞌnaj chitohlan ismul tuꞌ. Huneꞌ tiꞌ, chejbꞌanile chukaniko yinh sunilbꞌal ej tiempo, chisyije naj mame, kat isyijenpaxo yuninal naj. Ebꞌnaj levita tuꞌ, machi ismajul ebꞌnaj xol ebꞌnaj Israel. 24 Haꞌ isdiezmohal tzet chiyaqꞌ ebꞌnaj Israel yinh sat istzꞌunubꞌ, haꞌ chiwaqꞌan tet ebꞌnaj levita; yuxin xawalan tato machi istxꞌotxꞌ ebꞌnaj chischah xol ebꞌnaj Israel,» xhi Komam tet yaꞌ Aarón.
25 Lahwi tuꞌ, yalnipaxo Komam Dios tet yaꞌ Moisés: 26 «Hal tet sunil ebꞌnaj levita hakaꞌ tiꞌ: Yet chechahni isdiezmohal sat istzꞌunubꞌ ebꞌnaj Israel, hakaꞌtanhe hemajul chechah tet Komam, yilal chepohilo isdiezmohal yinh tzet chechah, kat heyaqꞌni tet Komam Jahawil. 27 Haꞌ huneꞌ diezmo cheyaqꞌ tuꞌ, lahan hakaꞌ isdiezmohal ixim trigo yebꞌ vino chiyaqꞌ ebꞌnaj munlawom. 28 Hak tuꞌ chu heyaqꞌni heyebꞌalqꞌabꞌ tet Komam Jahawil yinh isdiezmohal sat istzꞌunubꞌ ebꞌnaj Israel chechah, kat heyaqꞌni tet yaꞌ sacerdote Aarón hakaꞌojtam tet Komam Jahawil chiꞌaqꞌlaxi. 29 Yinh sunil tzet chechah tet ebꞌnaj Israel chekꞌubꞌa tzet kaw kꞌul yu heyaqꞌni tet yaꞌ Aarón, haꞌ xin cheyaqꞌ heyebꞌalqꞌabꞌo tet Komam Jahawil,» kachi.
30 Yalnipaxo Komam Dios tet yaꞌ Moisés: «Chawalnipaxo tet ebꞌnaj levita hakaꞌ tiꞌ: “Hayet cheyaqꞌni iskꞌulal heyebꞌalqꞌabꞌ, hantato chikani, heyet yehi; hexxa cheyila tzet cheyute, hakaꞌ chute ebꞌnaj munlawom yinh istrigo yebꞌ yinh isvino. 31 Chisje heloni tuꞌ yebꞌ heyixal yebꞌ heyuninal bꞌajxanhetuꞌwal, yuto haꞌ huneꞌ tuꞌ hetohol yinh hemunil yul isTabernáculo Komam bꞌay chekutxbꞌa hebꞌa. 32 Hayet xahepohilo huneꞌ majan iskꞌulal tzet cheyaqꞌ heyebꞌalqꞌabꞌo tet Komam, haxa hunteqꞌanxa chikani chiyu heloni; machi xin cheyako hemul yet cheloni tuꞌ. Ta hak tuꞌ cheyute, mach cheyetato isyebꞌalqꞌabꞌ kaw ay yelapno chiyaqꞌ ebꞌnaj Israel tet Komam; yebꞌ xin machi kamikal chitit teyibꞌanh,” kachi,» xhi Komam tet yaꞌ Moisés.