Wolni isqꞌojoch yaꞌ Aarón
17
Istzotel Komam Dios tet yaꞌ Moisés: 2 «Hal tet ebꞌnaj iswiꞌehal yinh hunun majan ebꞌnaj Israel tato chiyiti ebꞌnaj hunun isqꞌojoch, kabꞌlahonhebꞌ qꞌojoch yinh sunil; kat hatzꞌibꞌnheniko isbꞌi yichmam ebꞌnaj yinh isqꞌojoch tuꞌ. 3 Haxa yinh isqꞌojoch ebꞌnaj yikꞌal yaꞌ Leví, haꞌ isbꞌi yaꞌ Aarón chawako yinh teꞌ, yuto ayko qꞌojoch yul isqꞌabꞌ hunun iswiꞌehal ebꞌnaj yinh hunun majan yikꞌal ebꞌnaj Israel. 4 Yul Tabernáculo bꞌay chekutxbꞌa hebꞌa satalti Kaxha bꞌay ayayto istꞌinhanil intratotiꞌan cheyayo sunil qꞌojoch tuꞌ. 5 Haꞌ mak chiꞌelilo iswol isqꞌojoch, haꞌ chinsikꞌilojan oko wuhan, yunhe isbꞌejni ebꞌnaj Israel isbꞌuchwa teyinh insatajan,» xhi Komam.6 Yalni yaꞌ Moisés huneꞌ tuꞌ tet ebꞌnaj Israel. Yiniti hunun ebꞌnaj iswiꞌehal yinh hunun majan ebꞌnaj Israel isqꞌojoch, iskutxbꞌaniko ebꞌnaj Israel isqꞌojoch, aypaxikto isqꞌojoch yaꞌ Aarón xol teꞌ kabꞌlahonhebꞌ qꞌojoch tuꞌ. 7 Yaniko yaꞌ Moisés teꞌ qꞌojoch tuꞌ sata Komam Dios yul isTabernáculo Komam bꞌay ay istꞌinhanil isTrato Komam. 8 Haxa yet hunxa tzꞌayik yet yapni yaꞌ Moisés yul isTabernáculo Komam, yilni yaꞌ ta elilo iswol isqꞌojoch yaꞌ Aarón, yaꞌ yikꞌal yaꞌ Leví. Elilo isqꞌabꞌ teꞌ yebꞌ isxumakil teꞌ, qꞌanxa xin issat teꞌ almendra tuꞌ. 9 Yinilo yaꞌ Moisés ej teꞌ qꞌojoch tuꞌ sata Komam yu isyeni yaꞌ teꞌ tet ebꞌnaj Israel. Haxa yet lahwi yilni ebꞌnaj teꞌ yinito hunun ebꞌnaj isqꞌojoch.
10 Lahwi tuꞌ, yalni Komam Dios tet yaꞌ Moisés: «As akano isqꞌojoch yaꞌ Aarón wolni tiꞌ sata isKaxhahil istꞌinhanil inTratohan, kat hakꞌubꞌanto bꞌey tuꞌ, yuto haꞌ teꞌ chiꞌokniko yechelo tet anma kaw manhkꞌom tiꞌ, yunhe isbꞌejni isbꞌuchwa insatajan, hak tuꞌ xin mach chikami,» xhi Komam.
11 Hakaꞌtikꞌa yu yalni Komam Jahawil, hak tuꞌ yu isyijen yaꞌ Moisés. 12 Yajaꞌ xin yal ebꞌnaj Israel tuꞌ tet yaꞌ Moisés: «Kosunilanh lanhan kokamilojanh. ¡Kosunil hanhonh Israelonh tiꞌ kꞌaynajonhtoj! ¡Kosunil kꞌaynajonhtoj! 13 Makxanhetikꞌa chihitziko iskꞌatanh isTabernáculo Komam maqꞌbꞌil iskami, hak tuꞌ chu kokamilo kosunil,» xhi ebꞌnaj.