—Bꞌejwe heyaniko hebꞌa yahawilo jinhanh yuto hanhonh Israelonh tiꞌ yet Komam Dios je kosunil, yuto ayko Komam koxol. ¿Tzet yinh yuxin cheyako hebꞌa yahawilo jinhanh hanhonh iskonhobꞌ Komam Dios jetiꞌanh? xhi ebꞌnaj.

4 Hayet yabꞌen yaꞌ Moisés yalni ebꞌnaj hakaꞌ tuꞌ, yay jahno yaꞌ, yay xulno yaꞌ sat txꞌotxꞌ; 5 yalni yaꞌ tet naj Coré yebꞌ tet ebꞌnaj tzujan yinta naj Coré tuꞌ:

—Yet sahabꞌ hekal chisyelo Komam mak yet Komam yehi yebꞌ mak hunelnhe yekaniko yul isqꞌabꞌ Komam, kat isyenilo mak sikꞌbꞌililo yu yalten xahanbꞌal tet. Hanhe xin mak sikꞌbꞌililo yu Komam tuꞌ, haꞌ chihalten xahanbꞌal tet. 6 Yet sahabꞌ hekal cheyiti helesén, hach Coré yebꞌ sunil mak tzujan tawintaj, 7 kat heyanayto tzaqꞌaqꞌ yul helesén yebꞌ xin pom, kat heyaniko sata Komam; haꞌ xin mak chissikꞌilo Komam, haꞌ ton huneꞌ mak tuꞌ yet Komam yehi, hak tuꞌ xin chebꞌej hetzoteli, xhi yaꞌ Moisés tet ebꞌnaj.

8 Yalnipaxo yaꞌ Moisés tet naj Coré:

—Hex levita hex tiꞌ, kaw abꞌewe tzet chiwalan. 9 ¿Tom kaw machi yelapno hemunil tiꞌ yul hesat yet kexissikꞌnilo Komam Dios, koDiosal hanhonh Israelonh tiꞌ, xol anma Israel yu hemunla yul Yatut Komam, yebꞌ yunhe heyehikꞌo iskawilal, yu heyijenpaxo tzet chiyal Komam yu hekolwa yinh anma Israel, iskonhobꞌ Komam? 10 Wal xin xaꞌel yinh iskꞌul Komam tato hex yikꞌal hex yaꞌ Leví ayexnhetikꞌako iskawilal Komam. Tinanh xin, ¿tom cheyochepaxo chexok issacerdoteho Komam? 11 Yuxin, hayet txꞌoj hetzoteli, yinh Komam chextzoteli, maxhtaj yinh yaꞌ Aarón yuto machi yelapno ye yaꞌ, xhi yaꞌ Moisés.

12 Ischejni yaꞌ Moisés ilaxoti naj Datán yebꞌ naj Abiram, ebꞌnaj iskꞌahol naj Eliab, yajaꞌ xin taqꞌwi ebꞌnaj, yalni ebꞌnaj hakaꞌ tiꞌ:

—Machoj, machonhtohanh bꞌey tuꞌ. 13 ¿Tom hanikꞌnhe huneꞌ chonhhawute tiꞌanh yettax konhhawinilojanh sat txꞌotxꞌ Egipto bꞌay kaw ay iskꞌulal? Konhhawinitijanh sat txꞌotxꞌ desierto tiꞌ yunhe kokamanh, chawanipaxiko habꞌa yahawilo jinhanh. 14 Hach tiꞌ, maxhtaj sat txꞌo txꞌotxꞌ kꞌul konhhawitijanh; machi kotxꞌotxꞌanh chawaqꞌa, machipaxo bꞌay chikotzꞌun juvahanh chawaqꞌpaxo jetanh. ¿Tom chawoche chikoyijehanh tzet chawala hakaꞌto mutzꞌan kosatanh? Wal xin mach chonhtohanh jabꞌehanh tzet chawala, xhito ebꞌnaj tet yaꞌ Moisés.

15 Yu huneꞌ tuꞌ, yuxin kaw tit ishowal yaꞌ Moisés, yalni yaꞌ tet Komam:

—Mamin, mach chachah isyebꞌalqꞌabꞌ hunteqꞌan ebꞌnaj tiꞌ. Hanintiꞌan, kaw machi hunu istxꞌojal xawuhan yinh ebꞌnaj, nitam hunu nichꞌan isburro ebꞌnaj xawilojan, xhi yaꞌ. 16 Lahwi tuꞌ, yalni yaꞌ Moisés tet naj Coré:

—Yet hekal, hach tiꞌ yebꞌ ebꞌnaj hawetbꞌi yebꞌ yaꞌ Aarón chexok sata Komam Dios. 17 Yuxin hunun ebꞌnaj hawetbꞌi chiyiqꞌ ebꞌnaj islesén, kat yayto pom yul, kat yinito ebꞌnaj sata Komam, wal xin 250 lesen chiyito ebꞌnaj. Hakpax tuꞌ, hach tiꞌ, yebꞌpaxo yaꞌ Aarón cheyito helesén, kat heyanayo sata Komam, xhi yaꞌ Moisés.

18 Hak tuꞌ xin, hunun ebꞌnaj yiqꞌ islesén, yanayto ebꞌnaj tzaqꞌaqꞌ yul yebꞌ pom, yalaxiko ebꞌnaj iskꞌatanh yaꞌ Moisés yebꞌ yaꞌ Aarón sata istiꞌ Yatut Komam bꞌay chiskutxbꞌa isbꞌa anma Israel. 19 Wal naj Coré kutxanxako sunil anma Israel sata istiꞌ Yatut Komam yu yok howal yinh yaꞌ Moisés yebꞌ yinh yaꞌ Aarón. Yinhnhena tuꞌ isyeni isbꞌa isqꞌaqꞌal yip Komam Dios sata sunil anma tuꞌ. 20 Yalni Komam tet yaꞌ Moisés yebꞌ tet yaꞌ Aarón:

21 —Pohwelo hebꞌa xol hunteqꞌan anma tiꞌ, yuto yinh hunepnhechꞌan chintanhtzelojan, xhi Komam. 22 Hayet yalni Komam hakaꞌ tuꞌ, yay jahno yaꞌ Moisés yebꞌ yaꞌ Aarón, yay nhohno sat txꞌotxꞌ, yalni yaꞌ Moisés tet Komam:

—Mamin, hach tiꞌ, hawaqꞌ iskawil sunil anma yul sat yibꞌanhqꞌinal tiꞌ, ¿tom chatanhtzelo sunil anma tiꞌ yu ismul huneꞌ naj winaj? xhi yaꞌ.

23 Istaqꞌwi Komam tet yaꞌ Moisés, yalni Komam xin:

24 —Hal tet ebꞌnaj Israel tato chishekꞌilo isbꞌa ebꞌnaj yinhla ismantiado naj Coré, naj Datán, yebꞌ naj Abiram, xhi Komam.

25 Yahwano yaꞌ Moisés, yok tzujno ebꞌnaj ichamta winaj Israel yinta yaꞌ, isto ebꞌnaj bꞌay ay ismantiado naj Datán yebꞌ naj Abiram. 26 Yalni yaꞌ Moisés tet anma Israel ayayo bꞌey tuꞌ:

—Hekꞌwelo hebꞌa yinhla ishoyanil ismantiado hunteqꞌan ebꞌnaj txꞌoj isnabꞌal tiꞌ, mach xin chetzabꞌ tzet ye tuꞌ yet ebꞌnaj yehi, yuto kꞌuxantaxka hex hunex chexkam yinta ebꞌnaj yu ismul, xhi yaꞌ Moisés.

27 Ishekꞌnilo isbꞌa anma yinhla ishoyanil ismantiado naj Coré, naj Datán yebꞌ naj Abiram. Wal naj Datán yebꞌ naj Abiram yebꞌ yixal ebꞌnaj yebꞌ yuninal ebꞌnaj ok linhno istiꞌ ismantiado tuꞌ. 28 Yalnipaxo yaꞌ Moisés:

—Haꞌ tiꞌ chiyeniloj tato haꞌ Komam Dios chejnhe hinan inwatxꞌenan sunil hunteqꞌan tiꞌ, maxhtaj yul wetan chiwitijan chinwatxꞌenan. 29 Tato chikam hunteqꞌan ebꞌnaj tiꞌ hakaꞌ chu iskam anma yu hunu komon yabꞌil, chaliloj tato maxhtaj Komam Dios chejnhe hinan. 30 Yajaꞌ tato chisye Komam hunu kꞌaybꞌalkꞌule kat ispohni isbꞌa txꞌo txꞌotxꞌ tiꞌ, kat isto hopna txꞌotxꞌ yalanh ebꞌnaj, itzitz xin ebꞌnaj, kat istokꞌay ebꞌnaj yich txꞌo txꞌotxꞌ yebꞌ sunil tzet aya. Ta hak tuꞌ chiyuhi, cheyohtanheloj tato haꞌ hunteqꞌan ebꞌnaj tiꞌ aniko ismul tet Komam, xhi yaꞌ Moisés.

31 Haꞌ eliko xin, hayet lahwi istzotel yaꞌ Moisés tuꞌ, ispohni isbꞌa txꞌotxꞌ, isto hopna txꞌotxꞌ yalanh ebꞌnaj. 32 Hayet ispohni isbꞌa txꞌotxꞌ tuꞌ, sunil ebꞌnaj tzujan yinta naj Coré yebꞌ yixal yebꞌ yuninal, tohkꞌay sunil ebꞌnaj yich txꞌotxꞌ yebꞌ ismantiado yebꞌ sunil tzet aya. 33 Sunil hunteqꞌan anma tuꞌ, itzitzto istohkꞌay yich txꞌo txꞌotxꞌ bꞌay ay kambꞌal, yebꞌ sunil tzet aya. Lahwi tuꞌ ishunbꞌanpaxayo isbꞌa txꞌotxꞌ hunelxa. Hak tuꞌ yu istanhtzelaxilo hunteqꞌan ebꞌnaj tuꞌ xol anma Israel. 34 Hayet yabꞌen anma Israel ayiko yinhla ishoyanil yel yaw ebꞌnaj yet isto yich txꞌotxꞌ, el anma yinh anhe, yalni hakaꞌ tiꞌ: «Kꞌuxantaxka kotohkꞌaypaxo yich txꞌotxꞌ,» xhi ebꞌnaj. 35 Yelpaxilo qꞌaꞌ sata Komam, istanhtzelaxilo ebꞌnaj 250, ebꞌnaj halten pom tet Komam.

36 Istzotel Komam Dios tet yaꞌ Moisés, yalni Komam: 37 «Hal tet yaꞌ Eleazar iskꞌahol yaꞌ Aarón tato chiyilti yaꞌ chꞌen lesen xol ebꞌnaj matzꞌato tuꞌ, kat xin isqꞌojnito yaꞌ tzaqꞌaqꞌ ayayto yul chꞌen tuꞌ nahat, yuto haꞌ tet Komam yalte ebꞌnaj pom tuꞌ. 38 Haꞌ islesén hunteqꞌan ebꞌnaj kam yu ismul tuꞌ, chiꞌokkano chꞌen wetojan yuto yul chꞌen haltelax pom wetan. Yuxin hunteqꞌan chꞌen lesen tuꞌ chepaqꞌbꞌa chꞌen laminahil, kat heyaniko chꞌen yinhla iskꞌul ismexhahil xahanbꞌal, yunhe isnahniti anma Israel huneꞌ tiꞌ,» xhi Komam.

39 Iskutxbꞌankanh yaꞌ sacerdote Eleazar sunil chꞌen lesen bronce bꞌay yalte ebꞌnaj kam yu qꞌa qꞌaꞌ tuꞌ pom tet Komam. Ischejni yaꞌ Moisés iswatxꞌelax chꞌen lamina yinh chꞌen lesen tuꞌ, yunhe yok yenhelo yinhla iskꞌul huneꞌ mexha yet pom, 40 yunhe yohtanhenkanilo ebꞌnaj Israel tato machi hunu komon mak chihitziko iskꞌatanh ismexhahil yet pom, kat yalten pom tet Komam. Ta hak tuꞌ chikam hakaꞌ yu iskam naj Coré yebꞌ ebꞌnaj tzujan yinta naj, wal xin hanhe ebꞌnaj titna yinh yaꞌ Aarón, haꞌ chihalten pom tet Komam. Sunil tzet yal Komam tet yaꞌ Moisés isyije yaꞌ sacerdote Eleazar.

41 Haxa yet hunxa tzꞌayik yichiko sunil anma Israel bꞌuchwal yinh yaꞌ Moisés yebꞌ yinh yaꞌ Aarón, yalni hakaꞌ tiꞌ:

«Hex tiꞌ, lanhan hetanhtzenilo iskonhobꞌ Komam tiꞌ,» xhi ebꞌnaj.

42 Sunil konhobꞌ Israel iswejbꞌa isbꞌa yinh yaꞌ Moisés yebꞌ yinh yaꞌ Aarón, yajaꞌ tꞌanhxito yaꞌ Moisés yebꞌ yaꞌ Aarón yinh Tabernáculo, haꞌ Yatut Komam bꞌay chiskutxbꞌa isbꞌa anma iskꞌatanh Komam, yinhnhena tuꞌ yayilo moyan yibꞌanh Tabernáculo tuꞌ, isyeni isbꞌa isqꞌaqꞌal yip Komam. 43 Isto yaꞌ Moisés yebꞌ yaꞌ Aarón sata isTabernáculo Komam bꞌay chiskutxbꞌa isbꞌa anma Israel iskꞌatanh. 44 Yalni Komam tet yaꞌ Moisés:

45 «Pohwelo hebꞌa xol hunteqꞌan anma tiꞌ, yuto yinh hunepnhechꞌan chintanhtzelojan,» xhi Komam.

Hayet yabꞌen yaꞌ Moisés yebꞌ yaꞌ Aarón yalni Komam hakaꞌ tuꞌ, yay jahnoj, yaypaxo xulnoj sat txꞌotxꞌ. 46 Yalni yaꞌ Moisés tet yaꞌ Aarón:

«Iqꞌ halesén, kat hawanayto tzaqꞌaqꞌ chawilo sat mexha yet xahanbꞌal yul chꞌen tuꞌ, kat hawanipaxayto pom yul, kat hato iskꞌatanh konhobꞌ Israel yu haqꞌanni nimankꞌulal tet Komam; yuto matit ishowal Komam, maꞌichiko isyaꞌtajil xol jet konhobꞌ tiꞌ tinanh,» xhi yaꞌ Moisés.

47 Isyijen yaꞌ Aarón tzet yal yaꞌ Moisés, isto yaꞌ yinh anhe bꞌay kutxan anma Israel. Haꞌ huneꞌ isyaꞌtajil yati Komam yinh anma tuꞌ, lanhan iskamilo anma yu. Yalten yaꞌ Aarón pom tet Komam, isqꞌanni yaꞌ nimankꞌulal yinh anma. 48 Islinhbꞌan isbꞌa yaꞌ xolbꞌal anma xakami yebꞌ anma itzitzto, hak tuꞌ yu yekꞌayo huneꞌ isyaꞌtajil tuꞌ. 49 Yajaꞌ xin 14,700 anma Israel kami, nanyepaxo anma kam yinta naj Coré yu ismanhkꞌomal. 50 Hayet yekꞌ ismul huneꞌ isyaꞌtajil tuꞌ, ismeltzo yaꞌ Aarón iskꞌatanh yaꞌ Moisés istiꞌ Tabernáculo bꞌay chiskutxbꞌa isbꞌa anma Israel iskꞌatanh Komam.