Chejbꞌanile yibꞌanhilo xahanbꞌal
(Lv. 1–3)
15
Tzotel Komam Dios tet yaꞌ Moisés, yalni Komam hakaꞌ tiꞌ: 2 «Hal hunteqꞌan chejbꞌanile tiꞌ tet ebꞌnaj Israel: Hayet chexapni, kat heyehayo sat txꞌotxꞌ chiwaqꞌan teyet, 3 kat heyalten hunu noꞌ tzehla wakax, maka hunu noꞌ meꞌ yu isnhuslax noꞌ yinh xahanbꞌalil kaw xuqꞌ sam yul insatan; yu heyijen tzet xaheyalte wetan maka yu tonhe chiꞌel yinh hekꞌul cheyaqꞌni, maka yu hunu qꞌinh cheyekꞌtze wetan, hanin Yahawilintiꞌan, 4 yilal haꞌ mak chiꞌaqꞌni isxahanbꞌal tuꞌ, chaqꞌpaxo kanhebꞌ libra ixim harina, ixim kaw kꞌul sombꞌil yebꞌ hunu litro aceite, 5 kat istꞌulnayo huneꞌ litro vino yebꞌalqꞌabꞌe yibꞌanh hunun noꞌ yunin meꞌ chiyaqꞌ yinh xahanbꞌalil. 6 Tato hunu noꞌ winaj meꞌ chiyaqꞌ yinh xahanbꞌalil xin, yilal yaqꞌni waxajebꞌ libra ixim harina yebꞌ xin ekꞌbꞌal huneꞌ litro aceite sombꞌiliko xol, 7 yebꞌpaxo ekꞌbꞌal huneꞌ litro vino chaqꞌ yinta hunun xahanbꞌal huneꞌ yebꞌalqꞌabꞌe kaw xuqꞌ sam yul insatan. 8 Taka hunu noꞌ tzehla wakax cheyaqꞌ yinh xahanbꞌalil yu isnhuslaxi, maka xahanbꞌal yu isyijen tzet xayalte wetan, maka xahanbꞌal yet aqꞌankꞌulal; 9 cheyaqꞌpaxo kabꞌlahonhebꞌ libra ixim harina sombꞌilxa yebꞌ kabꞌ litro aceite, 10 yebꞌ kabꞌ litro vino yebꞌalqꞌabꞌe. Haꞌ hunteqꞌan yebꞌalqꞌabꞌe tuꞌ, kaw xuqꞌ sam yul insatan, hanin Yahawilintiꞌan yet chinhuslaxi. 11 Haꞌ hunteqꞌan tuꞌ, yilal heyaqꞌni yinta hunun noꞌ wakax, maka yinta hunu noꞌ winaj meꞌ, maka yinta hunun noꞌ yunin meꞌ, maka yinta hunun noꞌ yunin chiw cheyaqꞌ yinh xahanbꞌalil. 12 Hakaꞌtikꞌa isbꞌisil noꞌ cheyaqꞌ yinh xahanbꞌalil, haktikꞌapax tuꞌ isbꞌisil hunteqꞌan yebꞌalqꞌabꞌe tiꞌ cheyaqꞌa. 13 Sunil ebꞌnaj Israel chiyijen istxolal chiwaltiꞌan yet chiyaqꞌni isxahanbꞌal chinhuslax wetan. Hunteqꞌan xahanbꞌal tuꞌ, kaw xuqꞌ sam yul insatan.14 »Tato ay hunu mak mach Israelo tonhe chiꞌekꞌ tekꞌatanh maka hunelxa ye texol, chiyoche yaqꞌaꞌ isxahanbꞌal wetan, xahanbꞌal kaw xuqꞌ sam yul insatan, haꞌ huneꞌ mak tuꞌ yilal isyijen chejbꞌanile yinh istxolal hakaꞌ walnihan teyet tiꞌ. 15 Haꞌ hunteqꞌan kuybꞌanile tiꞌ cheyije yebꞌpaxo anma mach Israelo hunel ye texol. Chisyije naj mame yebꞌ ebꞌnaj yuninal ebꞌnaj uninale yul insatan. 16 Huneꞌnhe haꞌ chejbꞌanile yebꞌ istxolal chiwakanojan teyet yebꞌ tet anma mach Israelo ay texol,» xhi Komam.
17 Yalnipaxo Komam tet yaꞌ Moisés: 18 «Halpaxo hunteqꞌan chejbꞌanile tiꞌ tet ebꞌnaj Israel: Hayet ayexxa sat txꞌo txꞌotxꞌ bꞌay chexwitojan; 19 hayet chexichiko hewani ixim trigo chiyaqꞌ sat txꞌotxꞌ tuꞌ, yilal hepohnilo hanikꞌo ixim, kat heyaqꞌni ixim yebꞌalqꞌabꞌehal wetan. 20 Hakaꞌ chu yaqꞌlax ixim sat trigo wetan yinh ixim bꞌabꞌel trigo chixanhlaxiltij, hak tuꞌ chu heyaqꞌni bꞌabꞌel harina chisomlaxi. Haꞌ ixim bꞌabꞌel nime pan chiwatxꞌi tuꞌ, chꞌaqꞌlax ixim yebꞌalqꞌabꞌehal wetan. 21 Haꞌ yinh ixim bꞌabꞌel sat tzꞌunubꞌ chekokꞌtze, cheyaqꞌ huneꞌ ixim nime pan yebꞌalqꞌabꞌehal wetan, hak tuꞌ cheyute yinh sunilbꞌal ej tiempo.
22 »Ta kꞌuxan chito nahul heyu hewatxꞌen hunu tzet halbꞌil tet yaꞌ Moisés wuhan, 23 hunteqꞌan yinhtax bꞌabꞌel tzꞌayik walan tet yaꞌ yu heyijeni yebꞌ yu isyijen yuninal heyuninal bꞌaqꞌinh; haꞌ hunteqꞌan tiꞌ yilal hewatxꞌeni.
24 »Tato ay hunu chejbꞌanile tiꞌ chito nahul heyu hewatxꞌen hesunil, yilal heyaqꞌni hunu noꞌ tzehla wakax chinhuslax xahanbꞌalil wetan; huneꞌ tuꞌ xahanbꞌal kaw xuqꞌ sam yul insatan. Cheyaqꞌnipaxo ixim trigo yebꞌ vino xahanbꞌalil wetan hakaꞌ yu inchejnikanojan heyubꞌ, kat heyaqꞌni hunu noꞌ winaj chiw yinh xahanbꞌalil yinh mule. 25 Haxa xin naj sacerdote chiꞌaqꞌni xahanbꞌal chiqꞌanni nimankꞌulal yinh ismul sunil anma Israel tuꞌ, kat waqꞌnihan nimankꞌulal yinh ismul, yuto mach kꞌulo yubꞌ anma yaniko ismul tuꞌ, kat xin yanipaxiko xahanbꞌal yinh ismul wetan. 26 Chiwaqꞌni nimankꞌulalan teyinh hex Israel hex tiꞌ yebꞌ anma mach Israelo ay texol, yuto mach yinh sunilo hekꞌul heyaniko hemul tuꞌ.
27 »Taka xin, huneꞌnhe mak chiꞌok ismul, yu mach chitit yinh iskꞌul isyijen hunu chejbꞌanile tuꞌ; haꞌ yinh ismul tuꞌ yilal yiniti hunu noꞌ qꞌopo chiw huneꞌ habꞌil yinh xahanbꞌalil. 28 Haxa xin naj sacerdote chihalten noꞌ xahanbꞌal wetan yu waqꞌni nimankꞌulalan yinh ismul mak mach yinho sunil iskꞌul yanikoj ismul, kat waqꞌni nimankꞌulalan yinh. 29 Haꞌ chejbꞌanile chiwalan teyet tiꞌ, haꞌ chisyijepaxo anma mach Israelo ay texol, tato mach yinh sunilo iskꞌul chaniko ismul.
30 »Yajaꞌ tato ay hunujex Israel hex tiꞌ maka mach Israelo ay texol, yinh sunil iskꞌul mach chisyije hunu chejbꞌanile tiꞌ, chaqꞌtij inhowalan yinh, haꞌ huneꞌ mak tuꞌ yilal istanhtzelaxilo xol yet konhobꞌ. 31 Yuto yahwa yinh intzotiꞌan yebꞌ mach isyije inchejbꞌanilan, yuxin chitanhtzelaxilo huneꞌ mak tuꞌ, kat istokano ismul yibꞌanh,» xhi Komam.
Kamikal tit yibꞌanh huneꞌ naj mach isyije istzꞌayikal xewilal
32 Hayet ay ebꞌnaj Israel sat txꞌotxꞌ desierto, yilni ebꞌnaj huneꞌ naj kutxu siꞌ chu yinh istzꞌayikal xewilal. 33 Ebꞌnaj ilchanti naj tuꞌ, yito ebꞌnaj naj sata yaꞌ Moisés yebꞌ sata yaꞌ Aarón yebꞌ sata sunil anma Israel. 34 Yalaxiko istanhemal naj, yuto mach yohtajo ebꞌnaj tzet chiꞌutelax naj. 35 Yalni Komam Dios tet yaꞌ Moisés: «Huneꞌ naj tiꞌ, machi nimankꞌulal yinh naj, yilal iskam naj; qꞌojlaxojabꞌ kamo naj yu sunil anma Israel yintalto campamento,» xhi Komam. 36 Yinilto ebꞌnaj Israel naj yintalto campamento tuꞌ, isqꞌojlaxkanh naj yu ebꞌnaj, iskam naj xin, hakaꞌtikꞌa yu yalni Komam tet yaꞌ Moisés.
Yelawil istiꞌ xil isqꞌap ebꞌnaj Israel
37 Istzotel Komam Dios tet yaꞌ Moisés, yalni hakaꞌ tiꞌ: 38 «Hal hunteqꞌan chejbꞌanile tiꞌ tet ebꞌnaj Israel: Hex Israelex tiꞌ, yebꞌ yuninal heyuninal chipoh yet bꞌaqꞌinh, yilal heyaniko yelawil istiꞌ xil heqꞌap yinh txꞌal txꞌal yax. 39 Chiꞌalaxiko yelawil tuꞌ yunhe hayet cheyilni yelawil tuꞌ, kat henaniti sunil chejbꞌanile walkanojan teyet, hanin Yahawilintiꞌan, kat heyijeni, haxinwal mach cheyije istxꞌojal tzet chiyoche heyanma yebꞌ istxꞌojal tzet cheyila, yuto yu hunteqꞌan tuꞌ, yuxin heyetato hebꞌa yul insatan. 40 Hak tuꞌ chu henaniti sunil chejbꞌanil chiwalkanojan, kat heyijeni, kat heyokkano wetojan, hanin heDiosal intiꞌan. 41 Hanin Yahawintiꞌan, heDiosal wehan kexwilojan sat txꞌotxꞌ Egipto. Hanin Yahawilintiꞌan yebꞌ heDiosal,» xhi Komam.