5 Wal yaꞌ Moisés yebꞌ yaꞌ Aarón ay jahnoj, yay xulno sat txꞌotxꞌ sata sunil konhobꞌ Israel. 6 Walpaxo yaꞌ Josué iskꞌahol yaꞌ Nun, yebꞌ yaꞌ Caleb, iskꞌahol naj Jefone, istzililo ebꞌyaꞌ xil isqꞌap yu isyenilo bꞌiskꞌulal. 7 Yalni tet konhobꞌ Israel hakaꞌ tiꞌ:

—Haꞌ txꞌo txꞌotxꞌ konhbꞌeyanh jilaꞌ tuꞌanh, kaw kꞌulkano txꞌotxꞌ sikꞌlebꞌil. 8 Ta chiyayo Komam iskꞌulal jibꞌanh chonhyiqꞌato sat txꞌotxꞌ, kat yaqꞌnikano Komam txꞌotxꞌ jetoj. Haꞌ huneꞌ txꞌo txꞌotxꞌ tuꞌ, kaw kꞌul txꞌotxꞌ, yebꞌ kaw yax sat txꞌotxꞌ. 9 Yuxin mach manhkꞌomo cheyute hebꞌa tet Komam; mach chexxiwpaxo tet anma ay sat txꞌotxꞌ. Hakaꞌ kowanito hunu pan, hak tuꞌ chu iskꞌayilo ebꞌnaj ju, machi mak chikolwa yinh ebꞌnaj, walonh xin ayko Komam Dios jetbꞌihoj, yuxin mach chexxiwi, xhi ebꞌnaj.

10 Haxa yet yabꞌen anma Israel tzet yal yaꞌ Caleb yebꞌ yaꞌ Josué yichiko yalni anma ta chꞌok isqꞌojoꞌkanh ebꞌyaꞌ. Yinhnhena tuꞌ, isyeni isqꞌaqꞌal yip Komam Dios yinh sat sunil anma Israel yibꞌanh Yatut Komam bꞌay ay qꞌap cortina, bꞌay chiskutxbꞌa isbꞌa anma iskꞌatanh Komam. 11 Yalni Komam tet yaꞌ Moisés:

—¿Bꞌaqꞌinh chisbꞌej anma Israel tiꞌ kinisyahnihan? ¿Bꞌaqꞌinh chisbꞌej iskabꞌkon iskꞌul winhan? Kaw txꞌiꞌalxa kꞌaybꞌalkꞌule xaꞌinyehan yilaꞌ, yajaꞌ xin yexnhetotikꞌa iskabꞌkon iskꞌul winhan. 12 Haꞌ tinanh chiwatijan huneꞌ niman isyaꞌtajil yibꞌanh huneꞌ konhobꞌ tiꞌ, kat iskꞌayiloj. Wal hach xin chaxhwakojan ijbꞌalomal yinh hawikꞌal kaw ekꞌbꞌalto niman isbꞌisil, yebꞌ kaw ekꞌbꞌalto yip sata hunteqꞌan anma tiꞌ, xhi Komam.

13 Yajaꞌ xin, taqꞌwi yaꞌ Moisés tet Komam, yalni yaꞌ:

—Mamin, kaw yohta anma Egipto hanta hawip hayelo tet yet hawinilo huneꞌ konhobꞌ tiꞌ sat txꞌotxꞌ Egipto, 14 kat yok anma Egipto tuꞌ yalaꞌ haqꞌumal yebꞌ anma ay bꞌey txꞌotxꞌ Canaán tiꞌ. Xayabꞌepaxilo hunteqꞌan anma tiꞌ tato hach Yahawil hach, ayachiko yetbꞌiho anma Israel, hayeni habꞌa tet, yebꞌ xin ayachpaxiko xol moyan yibꞌanh. Yohtapaxoj ta hayet tzꞌayikal chawijbꞌanikꞌo anma tiꞌ xol huneꞌ topan moyan, haxa yet aqꞌbꞌalil xin xol huneꞌ qꞌa qꞌaꞌ ayachiko ijbꞌaloj. 15 Tato chatanhtzelo anma tiꞌ yinh hunelnhe, haꞌ ej konhobꞌ xayabꞌe hanta hawip, chimyal hakaꞌ tiꞌ: 16 “Mach isje yu Komam Dios yaqꞌni txꞌo txꞌotxꞌ yalte tet anma Israel tuꞌ, yuxin mastanhtzelo sat txꞌotxꞌ desierto,” xhimi. 17 Yuxin wal tinanh chinqꞌanan tawet Mamin, yelo hawip hakaꞌ yu hataqꞌwenkanoj, yet hawalni hakaꞌ tiꞌ. 18 Komam Yahawil mach yinh anheho chitit ishowal yebꞌ kaw nimankano iskꞌul, yebꞌ chaqꞌ nimankꞌulal yinh anma mulum yebꞌ yinh anma manhkꞌom, waxanhka xin mach chiꞌekꞌto yet yanayo isyaꞌtajil yibꞌanh mak ay ismul; kat yanayo isyaꞌtajil yibꞌanh ebꞌnaj mame manhkꞌom tuꞌ, yebꞌ yibꞌanh iskꞌahol, yebꞌ yibꞌanh yuninal ebꞌnaj kꞌahole tuꞌ, yebꞌ yibꞌanh yuninal yuninal ebꞌnaj, xhi yaꞌ Moisés. 19 Yalnipaxo yaꞌ Moisés:

—Mamin, chinqꞌanan tawet ta chawaqꞌ nimankꞌulal yinh ismul anma Israel tiꞌ hakaꞌtikꞌa kaw istzꞌay hakꞌul yinh. Wal xin xahayelo hanimankꞌulal yettaxtikꞌa hawinilo anma tuꞌ sat txꞌotxꞌ Egipto masanto bꞌey tiꞌ, xhi yaꞌ Moisés tet Komam.

20 Istaqꞌwi Komam Dios tet yaꞌ Moisés, yalni hakaꞌ tiꞌ:

—Kꞌultikꞌa, chiwaqꞌan nimankꞌulal yinh hakaꞌ mayu haqꞌanni tiꞌ wetan. 21 Yajaꞌ chiwaqꞌ hinbꞌahan yinh tzet chiwaltiꞌan, yebꞌ yu wipan nohnayo yibꞌanh txꞌo txꞌotxꞌ sat yibꞌanhqꞌinal tiꞌ, yinh tato 22 machi hunu ebꞌnaj Israel xayil isqꞌaqꞌal wipan yebꞌ xayil sunil kꞌaybꞌalkꞌule inyehan bꞌey Egipto yebꞌ sat txꞌotxꞌ desierto tiꞌ, ebꞌnaj 10 (lahonhelxa) yaqꞌnitij inhowaltiꞌan, machi xin chisje ebꞌnaj isyijeꞌ tzet chiwalan, 23 machi hunu ebꞌnaj tiꞌ chiꞌilno txꞌo txꞌotxꞌ waltehan tet yichmam ebꞌnaj. Machi hunu ebꞌnaj chinyahni tuꞌan chiꞌilno txꞌotxꞌ. 24 Yajaꞌ hanhechꞌan inchejabꞌan yaꞌ Caleb chiꞌapno sat txꞌotxꞌ tuꞌ, yuto yijem yaꞌ wetan yu kꞌul isnabꞌal yaꞌ, haꞌ yaꞌ xin chiꞌok sat txꞌotxꞌ yebꞌ yuninal, txꞌotxꞌ bꞌey yaꞌ yilaꞌ. 25 Haꞌ sat akꞌal hekawilal tiꞌ ayayo ebꞌnaj amalecita yebꞌ ebꞌnaj cananeo, yuxin yet hekal chexmeltzo sat txꞌotxꞌ desierto, kat heto yinh yetkꞌulal haꞌ Kajinh Mar, xhi Komam.

26 Yalnipaxo Komam tet yaꞌ Moisés yebꞌ tet yaꞌ Aarón hakaꞌ tiꞌ:

27 —¡Kaw matxa chitecha wuhan yinh hunteqꞌan anma Israel tiꞌ, kaw txꞌoj isnabꞌal anma, kaw xawabꞌehan isbꞌahwa winhan! 28 Yuxin hal tet anma Israel tato hanan chiwalan hakaꞌ tiꞌ: “Hanin Yahawilintiꞌan, chiwalan ta chiyij isbꞌa tzet wabꞌehan heyalni winhan. 29 Yuxin sunil ebꞌnaj 20 (hunkꞌal) habꞌil yebꞌ xin ebꞌnaj ekꞌbꞌalto yekanh ishabꞌilal, ebꞌnaj ilaxkanh isbꞌisil, ebꞌnaj txꞌoj istzotel winhan, chikam ebꞌnaj, kat iskankano pakꞌno isnimanil ebꞌnaj sat txꞌotxꞌ desierto tiꞌ. 30 Hex tiꞌ, yinh kaw yeli mach chexapni sat txꞌo txꞌotxꞌ waqꞌ bꞌinaho inbꞌihan ta chiwaqꞌan txꞌotxꞌ teyet yet wanikanh inqꞌabꞌan, kachannhe yaꞌ Caleb, iskꞌahol naj Jefone yebꞌ yaꞌ Josué iskꞌahol yaꞌ Nun chꞌapni sat txꞌotxꞌ. 31 Wal xin, haꞌ heyuninal heyala ta chiꞌaykꞌay yul isqꞌabꞌ ebꞌnaj ayko ishowal teyinh chiwitojan sat txꞌo txꞌotxꞌ tuꞌ, yu yochen ebꞌnaj txꞌotxꞌ yahbꞌil heyu tuꞌ. 32 Haꞌ henimanil hex tiꞌ, chikankano pakꞌno sat txꞌotxꞌ desierto. 33 Haꞌ xin sat txꞌotxꞌ tiꞌ chiꞌekꞌ heyuninal 40 (kawinaj) habꞌil hakaꞌ chu yekꞌ ebꞌnaj tanhem meꞌ, hak tuꞌ chu istohlankano ebꞌnaj hemanhkꞌomal tiꞌ, masanto yet chexkamkanilo hesunil sat txꞌotxꞌ desierto tiꞌ. 34 Yet hebꞌey heyilno txꞌotxꞌ Canaán tuꞌ, 40 (kawinaj) tzꞌayik kexekꞌ heyilaꞌ txꞌotxꞌ, hak tuꞌ xin 40 (kawinaj) habꞌil chetohla hemul tiꞌ, haꞌ chal yelapnoj, hunun habꞌil yinh hunun tzꞌayik. Hak tuꞌ chu heyohtanhenilo isyaꞌtajil chiwaqꞌan. 35 Hanin Yahawilintiꞌan chiwalan huneꞌ tiꞌ, hak tuꞌ chexwutehan hex txꞌoj hex tiꞌ, yuto hekutxbꞌa hebꞌa heyaniko howal winhan. Haꞌ sat txꞌotxꞌ desierto tiꞌ, chexkankanoj, kat hetanhkaniloj, kachi tet ebꞌnaj,” xhi Komam tet yaꞌ Moisés.

36 Wal ebꞌnaj ischejto yaꞌ Moisés ilwal yinh txꞌotxꞌ Canaán, hayet ismeltzo ebꞌnaj xin yok ebꞌnaj yalno txꞌojla tzotiꞌ yinh yaꞌ Moisés yebꞌ yinh huneꞌ txꞌotxꞌ tuꞌ tet ebꞌnaj Israel, 37 haꞌ ebꞌnaj ok bꞌuchwal yinh txꞌotxꞌ tuꞌ kam ebꞌnaj yu Komam Dios. 38 Wal yaꞌ Josué, iskꞌahol yaꞌ Nun yebꞌ yaꞌ Caleb, iskꞌahol naj Jefone, machi kam ebꞌyaꞌ xol ebꞌnaj bꞌey ilno txꞌotxꞌ tuꞌ.

39 Hayet yalni yaꞌ Moisés tet anma Israel yinh sunil tzet yal Komam tet yaꞌ tuꞌ, kaw bꞌiskꞌulal yulo iskꞌul anma. 40 Haxa yet hunxa tzꞌayik, kaw sahabꞌ ah ebꞌnaj Israel tuꞌ, isnahni ebꞌnaj isto yinhla istzalanil witz, yalni ebꞌnaj tet yaꞌ Moisés:

—Ayonhxa bꞌey tiꞌ, yu kotoh sat txꞌotxꞌ xayalte Komam Dios ta chiyaqꞌ jet, waxanhka xin kaw yeli jako komul, xhi ebꞌnaj.

41 Yajaꞌ xin taqꞌwi yaꞌ Moisés tet ebꞌnaj hakaꞌ tiꞌ:

—¿Tzet yinh xin chemanhkꞌo tzet yal Komam Dios? Haꞌ tzet cheyoche hewatxꞌeꞌ tiꞌ, mach kꞌulo chiꞌelikoj. 42 Mach chexto yinh huneꞌ hebꞌel tuꞌ, yuto mach ayoko Komam heyetbꞌihoj, yuxin chexaykꞌayo yul isqꞌabꞌ ebꞌnaj chiꞌaniko howal teyinh. 43 Yuto kosatakꞌto tiꞌ ayayo ebꞌnaj amalecita yebꞌ ebꞌnaj cananeo, kat yaniko ebꞌnaj howal teyinh, kat hekam yu ebꞌnaj yu yespada yuto xakexisbꞌejkano Komam, matxa ayoko heyetbꞌihoj, xhi yaꞌ Moisés.

44 Yajaꞌ xin ishipnheto isbꞌa ebꞌnaj yinhla iswonhanil txꞌotxꞌ chewal txꞌotxꞌ tuꞌ; yajaꞌ wal yaꞌ Moisés yebꞌ teꞌ Kaxha yet istꞌinhanil istrato Komam Dios kankano bꞌay aykanh ismantiado ebꞌnaj tuꞌ. 45 Haxa yet ay ebꞌnaj bꞌey tuꞌ, yelilo ebꞌnaj amalecita yebꞌ ebꞌnaj cananeo ay bꞌey tuꞌ yinh ebꞌnaj Israel, yok tzujno ebꞌnaj yinta ebꞌnaj masanta bꞌey txꞌotxꞌ Horma; isqꞌoji ebꞌnaj yinh ebꞌnaj Israel, yaykꞌay ebꞌnaj yul isqꞌabꞌ ebꞌnaj amalecita yebꞌ yul isqꞌabꞌ ebꞌnaj cananeo.