3 Isyijen yaꞌ Moisés sunil chejbꞌanile yal Komam tet yaꞌ. Ischejnito yaꞌ ebꞌnaj sikꞌlaxilo to ilno tzet jilni txꞌotxꞌ Canaán; yel ebꞌnaj sat txꞌotxꞌ desierto Parán, isto ebꞌnaj. Sunil ebꞌnaj chejlaxto tuꞌ, iswiꞌehal ye ebꞌnaj xol ebꞌnaj Israel. 4 Hak tiꞌ isbꞌi ebꞌnaj chejlaxto tuꞌ hakaꞌ tiꞌ: Naj Samúa, iskꞌahol naj Zacur, naj yikꞌal yaꞌ Rubén. 5 Naj Safat, iskꞌahol naj Hori, naj yikꞌal yaꞌ Simeón. 6 Yaꞌ Caleb, iskꞌahol naj Jefone, yaꞌ yikꞌal yaꞌ Judá. 7 Naj Igal, iskꞌahol naj José, naj yikꞌal yaꞌ Isacar. 8 Yaꞌ Oseas, iskꞌahol yaꞌ Nun, yaꞌ yikꞌal yaꞌ Efraín. 9 Naj Palti, iskꞌahol naj Rafú, naj yikꞌal yaꞌ Benjamín. 10 Naj Gadiel, iskꞌahol naj Sodi, naj yikꞌal yaꞌ Zabulón. 11 Naj Gadi, iskꞌahol naj Susi, naj yikꞌal yaꞌ José, ismam yaꞌ Manasés. 12 Naj Amiel, iskꞌahol naj Gemali, naj yikꞌal yaꞌ Dan. 13 Naj Setur, iskꞌahol naj Micael, naj yikꞌal naj Aser. 14 Naj Nahbi, iskꞌahol naj Vapsi, naj yikꞌal yaꞌ Neftalí. 15 Naj Geuel, iskꞌahol naj Maqui, naj yikꞌal yaꞌ Gad.

16 Hak tuꞌ isbꞌi ebꞌnaj ischejto yaꞌ Moisés yilaꞌ hanikꞌ yok txꞌotxꞌ Canaán. Wal yaꞌ Oseas, iskꞌahol yaꞌ Nun, ishel yaꞌ Moisés isbꞌi yaꞌ, yaniko yaꞌ Josué isbꞌiho yaꞌ.^a

17 Hayet ischejnito yaꞌ Moisés ebꞌnaj yilaꞌ txꞌotxꞌ Canaán, yalni yaꞌ tet ebꞌnaj:

«Asiꞌwe xin, heto bꞌey txꞌotxꞌ Neguev, kat heyahto bꞌey txꞌotxꞌ chewal txꞌotxꞌ. 18 Kaw cheyila tzet yok konhobꞌ tuꞌ, kat heyilni tato ay yip ebꞌnaj winaj ay sat txꞌotxꞌ, maka machoj; kat heyilnipaxoj tato niman anma ay sat txꞌotxꞌ, maka mach nimanoj. 19 Cheyilni tato kꞌul txꞌotxꞌ maka mach kꞌulo txꞌotxꞌ, kat heyilnipaxo ta ayko anma yul yatut aykanh qꞌap mantiado yibꞌanh, maka hoyaniko chꞌen kꞌubꞌ yinhla iskonhobꞌ ebꞌnaj tuꞌ. 20 Cheyilni ta yax sat txꞌotxꞌ maka tajin sat txꞌotxꞌ, tato qꞌebꞌtala txꞌotxꞌ mak machoj. Asiꞌwej, mach chexxiwi; kat heyiniti hanikꞌo sat tzꞌunubꞌ ay sat txꞌotxꞌ jilaꞌanh,» xhi yaꞌ Moisés tet ebꞌnaj.

Kꞌuxan xin istzꞌayikal isbꞌabꞌel sat teꞌ uva yet ischejlaxto ebꞌnaj tuꞌ. 21 Isto ebꞌnaj yilno txꞌotxꞌ Canaán tuꞌ; yel ebꞌnaj sat txꞌotxꞌ desierto Zin ayko yinh yetkꞌulal sur, yapni ebꞌnaj bꞌey txꞌotxꞌ Rehob yinh yetkꞌulal norte iskawilal txꞌotxꞌ Hamat. 22 Isto ebꞌnaj sat txꞌotxꞌ Neguev, masanta apni ebꞌnaj bꞌey txꞌotxꞌ Hebrón. Bꞌey txꞌotxꞌ Hebrón tuꞌ, ay naj Ahimán, naj Sesai yebꞌ naj Talmai, ebꞌnaj tuꞌ yikꞌal naj Anac. Haꞌ konhobꞌ Hebrón tuꞌ, hujebꞌxa habꞌil iswatxꞌi bꞌabꞌel sata konhobꞌ Zoán ay yul ismajul Egipto. 23 Lahwi tuꞌ, yapni ebꞌnaj bꞌey huneꞌ hokan chiyij Escol, haꞌ bꞌey tuꞌ istzokꞌilo ebꞌnaj huneꞌ isqꞌabꞌ teꞌ uva chayaniko sat; iskꞌalbꞌaniko ebꞌnaj teꞌ yinh huneꞌ te teꞌ, yinito ebꞌnaj teꞌ yibꞌanh iswixikꞌ, kawanh yuko ebꞌnaj yalanh teꞌ. Yinipaxilo ebꞌnaj sat teꞌ granada yebꞌ sat teꞌ higo. 24 Haꞌ huneꞌ hokan tuꞌ, Escol yako ebꞌnaj isbꞌihoj yuto haꞌ bꞌey tuꞌ yilo ebꞌnaj Israel isqꞌabꞌ teꞌ uva, chayanejiko sat.

25 Lahwi yilni ebꞌnaj txꞌotxꞌ Canaán yinh 40 (kawinaj) tzꞌayik ispaxti ebꞌnaj xin. 26 Ismeltzo ebꞌnaj bꞌay ay yaꞌ Moisés yebꞌ yaꞌ Aarón yebꞌ konhobꞌ Israel sat txꞌotxꞌ Cades yul ismajul txꞌotxꞌ desierto Parán. Yalni ebꞌnaj sunil tzet yil ebꞌnaj, isyenipaxo ebꞌnaj sat tzꞌunubꞌ chiyaqꞌ txꞌotxꞌ. 27 Yalni ebꞌnaj tet yaꞌ Moisés:

«Konhekꞌanh jilaꞌanh txꞌotxꞌ bꞌay konhhachejtojanh; yinh kaw yeli, huneꞌ txꞌo txꞌotxꞌ tuꞌ kaw kꞌulkano txꞌotxꞌ, kaw yax sat txꞌotxꞌ, haꞌ hunteqꞌan sat tzꞌunubꞌ tiꞌ chiyaqꞌ txꞌotxꞌ. 28 Yajaꞌ wal anma ay sat txꞌotxꞌ tuꞌ kaw ay yip, yebꞌ xin nime konhobꞌlaj ayayo sat txꞌotxꞌ, hoybꞌilpaxo konhobꞌ yu kꞌubꞌ. Jilnipaxojanh ebꞌnaj winaj kaw nimej istel, ebꞌnaj titna yinh naj Anac. 29 Haꞌ yul ismajul txꞌotxꞌ Neguev ay ebꞌnaj amalecita, haxa yul ismajul txꞌotxꞌ chewal txꞌotxꞌ ay ebꞌnaj hitita, ebꞌnaj jebuseo yebꞌ ebꞌnaj amorreo; haxa ebꞌnaj cananeo ayko ebꞌnaj istiꞌ haꞌ mar yebꞌ istiꞌ haꞌ niman Jordán,» xhi ebꞌnaj.

30 Yalni yaꞌ Caleb tato chisbꞌej istzotel anma Israel kutxaniko yinh sat yaꞌ Moisés tuꞌ. Yalni yaꞌ Caleb hakaꞌ tiꞌ:

—Tonhwej, kat jinilo anma tuꞌ sat txꞌotxꞌ, kat yokkano txꞌotxꞌ ju, yuto ekꞌbꞌal jip yibꞌanh ebꞌnaj tuꞌ, xhi yaꞌ.

31 Istaqꞌwi ebꞌnaj bꞌeykꞌo ilno txꞌotxꞌ yinta yaꞌ Caleb tuꞌ, yalni ebꞌnaj:

—Machoj, mach chu jahto jinolo hunteqꞌan anma tuꞌ sat txꞌotxꞌ yuto kaw ekꞌbꞌal yip kosataj, xhi ebꞌnaj.

32 Kaw txꞌoj istzotel ebꞌnaj yinh txꞌo txꞌotxꞌ bꞌey yilaꞌ tuꞌ tet anma Israel, chalni ebꞌnaj:

—Haꞌ txꞌo txꞌotxꞌ konhekꞌanh jilaꞌ tuꞌanh, chikam anma yu ebꞌnaj ay sat txꞌotxꞌ tuꞌ; sunil ebꞌnaj winaj jilanh bꞌey tuꞌ, kaw nime istel ebꞌnaj. 33 Jilpaxojanh ebꞌnaj winaj kaw nimej istel, ebꞌnaj titna yinh naj Anac.^b Ta chikolahbꞌa kobꞌa yebꞌ ebꞌnaj, lahan chonheliko hakaꞌ noꞌ qꞌul yich yoj ebꞌnaj, hak tuꞌ konhyilni ebꞌnaj, xhi ebꞌnaj.