Ix María yebꞌ yaꞌ Aarón bꞌuchwa yinh yaꞌ Moisés
12
Ix María ok ix bꞌuchwal yebꞌ yaꞌ Aarón yinh yaꞌ Moisés, yuto yiqꞌkanh yaꞌ huneꞌ ix cusita yixaloj. 2 Yalnipaxo ix yebꞌ yaꞌ Aarón hakaꞌ tiꞌ: «¿Tom hanhe tet yaꞌ Moisés tiꞌ chitzotel Komam Jahawil? Wal xin chitzotelpaxo Komam jet hanhonh tiꞌ,» xhi. Yabꞌen Komam tzet yal ix María yebꞌ yaꞌ Aarón.3 Wal yaꞌ Moisés, yinh kaw yeli hanhkꞌanhe yaꞌ kaw chewchotanhe chiyute isbꞌa xol sunil ebꞌnaj winaj ay sat yibꞌanhqꞌinal tiꞌ. 4 Yuxin yal Komam tet yaꞌ Moisés yebꞌ tet yaꞌ Aarón yebꞌ tet ix María hakaꞌ tiꞌ: «Asiꞌwe heyoxwanhil watutan watxꞌebꞌil yinh qꞌap cortina bꞌay chekutxbꞌa hebꞌa inkꞌatanhan,» xhi Komam.
Isto yoxwanhil Yatut Komam. 5 Yayilo Komam xol moyan, yok linhno Komam istiꞌ ispultahil yatut. Yawten Komam yaꞌ Aarón yebꞌ ix María. Apni yaꞌ yebꞌ ix sata Komam. 6 Yalni Komam hakaꞌ tiꞌ: «Kam cheyabꞌe tzet chiwaltiꞌan: “Hayet chinchejtojan ebꞌnaj inchejabꞌan texol, chintzotelan tet ebꞌnaj yinh sajsatil maka yul wayike. 7 Yajaꞌ wal yaꞌ inchejabꞌan, yaꞌ Moisés, mach hako tuꞌ, yuto kaw yijem yaꞌ xol sunil ebꞌnaj inchejabꞌan. 8 Hayet chintzotelan tet yaꞌ Moisés tuꞌ, chiyilniko yaꞌ insatan, chiwilnipaxikojan sat yaꞌ, chintzotelan yinh kaw habꞌan tet yaꞌ, mach ewan tzotiꞌoj chiwuhan tet yaꞌ. Yuxin ta kaw chiyiliko yaꞌ insatan yet chintzotelan tet yaꞌ, ¿tzet yinh xin txꞌoj hetzotel yinh yaꞌ?» xhi Komam.
9 Kaw tit ishowal Komam Dios yinh yaꞌ Aarón yebꞌ yinh ix María tuꞌ, lahwi tuꞌ isto Komam. 10 Yinhnhena iskꞌaykanh moyan istiꞌ Yatut Komam, yelilo yabꞌil lepra yinh isnimanil ix María, sajwakwoxanhe jilni hakaꞌ chꞌen chew. Hayet yok tꞌanhno yaꞌ Aarón yinh ix, yilni yaꞌ ayxati yabꞌil lepra yinh ix. 11 Yalni yaꞌ Aarón tet yaꞌ Moisés: «Mamin, kaw chinqꞌanan tawet, mach chawayo isyaꞌtajil tiꞌ jibꞌanhanh; yu kosukalanh yuxin majako komul tiꞌanh. 12 Machojabꞌ chachah kamo ix, hakaꞌ nixhte unin kamomxa yet chipitzkꞌa yinh ismiꞌ, etaxnaxato isnimanil,» xhi yaꞌ Aarón.
13 Yah yaw yaꞌ Moisés tet Komam, yalni yaꞌ hakaꞌ tiꞌ: «Mamin, inDiosalan, kaw chinqꞌanan tawet, aqꞌ kawxo ix tinanh,» xhi yaꞌ.
14 Istaqꞌwi Komam tet yaꞌ Moisés: «Ta chitzubꞌliko ismam ix yinh issat, chikan ix yinh txꞌixobꞌalil yinh hujebꞌ tzꞌayik. Yuxin elojabꞌto ix yintalto campamento yinh hujebꞌ tzꞌayik; haxa yet xaꞌekꞌto hujebꞌ tzꞌayik tuꞌ, kat ismeltzo ix yul campamento tiꞌ,» xhi Komam.