4 Txꞌiꞌal anma nananta konhobꞌal ayko xol ebꞌnaj Israel tuꞌ, hanhkꞌanhe waꞌo ayko yinh iskꞌul, bꞌakchato ebꞌnaj Israel yintaj yu tzet chal ebꞌnaj tuꞌ, yuxin ok ebꞌnaj Israel oqꞌoj, chiyalni ebꞌnaj hakaꞌ tiꞌ: «¡Ayxikꞌa ay mak chalni jet kokꞌuxuwe chibꞌe! 5 ¡Kaw chikonabꞌe noꞌ kay kokꞌux matanil bꞌey Egipto! Chikolonipaxo teꞌ pepino, teꞌ melón, teꞌ tuxibꞌ, teꞌ cebolla yebꞌ teꞌ axhuxh. 6 Walpaxo bꞌey tiꞌ xin, chonhkam yu wahil, machi hunuxa tzet wal koloni, kachannhe maná chijil yu kosat,» xhi ebꞌnaj.

7 Haꞌ maná tuꞌ, lahan jilni hakaꞌ yinhatil teꞌ culantro, qꞌantzaqꞌtzonhe jilni hakaꞌ jilni bálsamo. 8 Chiꞌelto anma Israel iskutxbꞌakanh maná, chiskokꞌtzen anma, maka xin chischakꞌpoho yu te teꞌ, kat xin istxikni anma yul xi, maka xin chiswatxꞌe anma panil yul xhaltin yibꞌanh qꞌaꞌ. Kaw xin lahan isxuqꞌal sam maná tuꞌ hakaꞌ akꞌla aceite sombꞌiliko xol harina. 9 Hayet chꞌay yal chew yibꞌanh campamento yet aqꞌbꞌalil kat yaypaxo maná.

10 Hayet yabꞌen yaꞌ Moisés yoqꞌ sunil ebꞌnaj Israel yebꞌ yixal yebꞌ yuninal yul hunun ispultahil ismantiado aykanh yatuto ebꞌnaj; kaw tit ishowal Komam Dios yu huneꞌ tuꞌ, ischiwapaxokanh iskꞌul yaꞌ Moisés. 11 Yalni yaꞌ tet Komam hakaꞌ tiꞌ:

—Mamin, ¿tzet yinh xin chawaqꞌ isyaꞌtajil wilaꞌan, hanin hachejabꞌ intiꞌan? ¿Tzet yinh xin hak tiꞌ chinhawutehan, yu ayiko huneꞌ niman ijatz kaw al wibꞌanhan hawu yu ayinikojan intanhenan hakonhobꞌ tiꞌ? 12 ¿Tom haninan ismam maka ismiꞌ anma tiꞌ, yuxin chawal wetan ta chinlaqꞌtojan hakaꞌ nixhte unin bꞌey txꞌotxꞌ haltebꞌil tet yichmam ebꞌnaj hawu? 13 ¿Bꞌay chintohan wiqꞌaꞌtijan noꞌ chibꞌe chisqꞌan sunil anma tiꞌ iskꞌuxuꞌ? Chiꞌoqꞌ anma chiꞌapni inkꞌatanhan, chalni: “Aqꞌ chibꞌe kokꞌuxuꞌanh,” xhi wetan. 14 Machi techa wuhan inchukilan ijbꞌalo yinh sunil hakonhobꞌ tiꞌ. Kaw huneꞌ niman ijatz nanxa yok yalil yeko wibꞌanhan. 15 Ta chalahiko hawaqꞌni isyaꞌtajil wilaꞌan hak tiꞌ, kꞌulmi ta yinh anhe chinhawaqꞌ kamojan. Tato chaxhtzala winhan, matxahojabꞌ chiwilan isyaꞌtajil, xhi yaꞌ Moisés.

16 Yajaꞌ taqꞌwi Komam tet yaꞌ hakaꞌ tiꞌ:

—Kutxbꞌako 70 (lahonhebꞌ iskanhwinaj) ebꞌnaj ichamta winaj Israel, ebꞌnaj hawohtaj ta ay yelapno xol ebꞌnaj Israel, kat hawinito ebꞌnaj sata istiꞌ watutan watxꞌebꞌil yinh qꞌap cortina bꞌay chekutxbꞌa hebꞌa inkꞌatanhan, kat yok linhno ebꞌnaj takꞌatanh. 17 Kat wayilojan, kat intzotelan tawet bꞌey tuꞌ, kat winilojan hanikꞌo espíritu ayko tawinh, kat wanikojan yinh ebꞌnaj, yunhe iskolwa ebꞌnaj tawintaj yilni konhobꞌ Israel tiꞌ. Hak tuꞌ xin, matxa hachukilo chatanhe ebꞌnaj. 18 Chawal tet konhobꞌ hakaꞌ tiꞌ: “Sajnhewekano hebꞌa yalanhto yet hekal, kat hekꞌuxni chibꞌe. Yabꞌe Komam heyoqꞌi yet heyalni hakaꞌ tiꞌ: ‘¿Mak chiꞌaqꞌni chibꞌe kokꞌuxuꞌ? ¡Ekꞌbꞌal kꞌul je bꞌey Egipto sata bꞌey tiꞌ!’ kexchi. Yuxin Komam Jahawil chꞌaqꞌni chibꞌe hekꞌuxuꞌ. 19 Mach xin huneꞌnheho tzꞌayik chekꞌux chibꞌe, mach kabꞌonhe tzꞌayik, mach howebꞌonhe tzꞌayik, mach 10 (lahonhebꞌonhe) tzꞌayik, mach 20 (hunkꞌalonhe) tzꞌayik. ¡Mach hako tuꞌ! 20 Wal xin huneꞌ ixahaw chiyaqꞌ Komam chibꞌe hekꞌuxuꞌ masanta chiꞌayilo noꞌ yul hetxam, kat yuchbꞌikanh hekꞌul yinh noꞌ. Yuto kexbꞌuchwa yinh Komam Jahawil ayayo koxol. Heyoqꞌpaxo sata Komam heyalni hakaꞌ tiꞌ: ‘¿Tzet yinh xin konhel sat txꞌotxꞌ Egipto?’ kexchi, kachi tet ebꞌnaj,” xhi Komam.

21 Yalni yaꞌ Moisés tet Komam xin:

—Mamin, haꞌ ebꞌnaj hakonhobꞌ tzujan wintatiꞌan 600 mil isbꞌisil ebꞌnaj, nanyepaxo ebꞌix ix yebꞌ nixhte unin. ¡Chawalni hawaqꞌaꞌ chibꞌe iskꞌuxuꞌ sunil anma tiꞌ yulbꞌal huneꞌ ixahaw! 22 ¿Kꞌuxanmi chꞌeliko hunbꞌulan noꞌ meꞌ maka noꞌ wakax iskꞌuxuꞌ anma tiꞌ, kat yeliko noꞌ yinh ebꞌnaj sunil? ¿Machim chꞌeliko sunil noꞌ kay ay xol haꞌ mar iskꞌuxuꞌ sunil anma tiꞌ? xhi yaꞌ.

23 Hak tiꞌ xin yu istaqꞌwi Komam Jahawil tet yaꞌ Moisés:

—¿Ham hawalni tato txannhe inqꞌabꞌan, yuxin mach wipan, haninan heYahawil? Wal tinanh xin chawilaꞌ tato chiyij isbꞌa tzet chiwaltiꞌan makato machoj, xhi Komam.

24 Lahwi tuꞌ, isto yaꞌ Moisés, yalni yaꞌ tet konhobꞌ Israel tzet yal Komam tet yaꞌ. Iskuxbꞌaniko yaꞌ ebꞌnaj 70 (lahonhebꞌ iskanhwinaj) icham winaj Israel, yok hoyno ebꞌnaj yinh Yatut Komam, watxꞌebꞌil yinh qꞌap cortina. 25 Yayilo Komam xol moyan, istzotel Komam tet yaꞌ Moisés. Yaqꞌni Komam hanikꞌ yespíritu yaꞌ Moisés tet ebꞌnaj 70 (lahonh iskanhwinaj) ichamta winaj tuꞌ. Hayet yok yespíritu yaꞌ Moisés yinh ebꞌnaj, yichiko ebꞌnaj istzotel hakaꞌ istzotel ebꞌnaj ischejabꞌ Komam, yajaꞌ hanhe hunel tuꞌ, matxa huneloxa.

26 Ay xin kawanh ebꞌnaj tiꞌ sikꞌlaxilo yinta ebꞌnaj 70 (lahonh iskanhwinaj) tuꞌ, huneꞌ naj Eldad isbꞌi, huneꞌxa naj xin Medad isbꞌi, ebꞌnaj kawanh tuꞌ, mach to ebꞌnaj bꞌey Yatut Komam hakaꞌ yu yalni yaꞌ Moisés; wal xin okpaxo yespíritu yaꞌ Moisés yinh ebꞌnaj, yichiko ebꞌnaj istzotel hakaꞌ istzotel ebꞌnaj ischejabꞌ Komam Dios. 27 Isto huneꞌ naj tzeh yinh anhe yalno tet yaꞌ Moisés hakaꞌ tiꞌ:

—Naj Eldad yebꞌ naj Medad, lanhan istzotel ebꞌnaj yul campamento hakaꞌ istzotel ebꞌnaj ischejabꞌ Komam Dios, xhi naj.

28 Wal yaꞌ Josué, iskꞌahol yaꞌ Nun, huneꞌ yaꞌ nichꞌan tzehto yet yokkano kolwal yinta yaꞌ Moisés, yal yaꞌ hakaꞌ tiꞌ:

—Mam Moisés, kach ebꞌnaj, xhi yaꞌ.

29 Istaqꞌwi yaꞌ Moisés tuꞌ:

—¿Tzet yinh xin tzꞌeꞌ hach winhan yu mach haje chꞌaqꞌlax helanil ayko winhan tet hunxa maka?

»Tzettam saqꞌal ta chiyaqꞌ Komam Dios yespíritu tet sunil anma Israel tiꞌ, kat yok ischejabꞌo Komam, xhi yaꞌ Moisés.

30 Lahwi tuꞌ, ispaxto yaꞌ Moisés yebꞌ ebꞌnaj ichamta winaj Israel tuꞌ yul campamento.

31 Hunepixto xin, istit huneꞌ niman jaqꞌeqꞌ xol haꞌ mar yu Komam Dios, yiniti jaqꞌeqꞌ tuꞌ, noꞌ ahomtzꞌikin. Kaw xin tzetkꞌa noꞌ yiti jaqꞌeqꞌ, yaykꞌay noꞌ xol iscampamento anma Israel, yebꞌ yinh ej ishoyanil. Hakaꞌmi huneꞌ tzꞌayik bꞌel, hak tuꞌ to lehno noꞌ ahomtzꞌikin tuꞌ yinh ishoyanil campamento tuꞌ, etza xin huneꞌ metro yukanh ispimal bꞌay ahtenno noꞌ. 32 Sunil huneꞌ tzꞌayik tuꞌ, yebꞌ sunilbꞌal aqꞌbꞌal yebꞌ huneꞌxa tzꞌayik istzabꞌayo anma Israel noꞌ ahomtzꞌikin tuꞌ. Haꞌ mak hanikꞌnhe noꞌ istzabꞌa, 10 (lahonhebꞌ) tenan noꞌ yiqꞌa. Iswatxꞌenilo anma Israel noꞌ, istajtzen anma ischibꞌehal noꞌ yinhla ishoyanil campamento. 33 Yajaꞌ lanhantotikꞌa anma Israel iskachꞌottanhe noꞌ xin, istit ishowal Komam Dios yinh anma, yaniti Komam huneꞌ yabꞌil kaw how, kaw xin txꞌiꞌal anma Israel kami. 34 Yu huneꞌ tuꞌ, yuxin Kibrot-hataava okkano isbꞌiho huneꞌ txꞌotxꞌ tuꞌ, yuto haꞌ bꞌey tuꞌ mujlaxkano anma ochen hantaj yu peqꞌal.^b

35 Lahwi tuꞌ, yel anma Israel bꞌey Kibrot-hataava, isto yinh isbꞌel, yapni bꞌey txꞌotxꞌ Hazerot, iskankano anma bꞌey tuꞌ.