Chꞌen trompeta plata
10
Istzotel Komam Dios tet yaꞌ Moisés, yalni Komam hakaꞌ tiꞌ: 2 «Watxꞌe kabꞌebꞌ chꞌen trompeta plata, chichakꞌlax yu martillo. Chꞌen trompeta tuꞌ, chꞌoqꞌtzelax chꞌen yu iskutxbꞌaniko isbꞌa anma Israel, yebꞌ yet chito ebꞌnaj yinh isbꞌel. 3 Hayet chiꞌoqꞌtzelax chꞌen iskabꞌil, sunil anma Israel chikutxiko tasataj, sata istiꞌ watutan watxꞌebꞌil yinh qꞌap cortina bꞌay chekutxbꞌa hebꞌa inkꞌatanhan. 4 Haxa yet hunchꞌan chꞌen chiꞌoqꞌtzelaxi hanhe ebꞌnaj iswiꞌehal yinh hunun majan ebꞌnaj Israel chiskutxbꞌako isbꞌa. 5 Haxa yet chꞌoqꞌtzelax chꞌen yinh kaw ip, haꞌ ebꞌnaj ayayo iscampamento yinh yetkꞌulal bꞌay chiꞌahilo tzꞌayik chito ebꞌnaj yinh isbꞌel. 6 Haxa yet chꞌoqꞌtzelax chꞌen yinh iskayelal haꞌ ebꞌnaj ayayo iscampamento yinh yetkꞌulal sur, chito yinh isbꞌel. Hayet chꞌoqꞌtzelax chꞌen trompeta, yebꞌ chiꞌawi ebꞌnaj yinh kaw ip, cheyohtaloj tato chexto yinh hebꞌel. 7 Yajaꞌ tato chꞌoqꞌtzelax chꞌen, machi xin mak chiꞌawi, haꞌ chaliloj tato chekutxbꞌa hebꞌa. 8 Haꞌ ebꞌnaj chiꞌoqꞌtzen chꞌen trompeta tuꞌ, haꞌ ton ebꞌnaj sacerdote titna yinh yaꞌ Aarón. Huneꞌ tiꞌ chejbꞌanile chukaniko texol yinh sunilbꞌal ej tiempo.9 »Hayet chiꞌalaxiko howal yu ebꞌnaj ayko ishowal teyinh, yet ay hex sat hetxꞌotxꞌ kat heyelto heyaqꞌno howal yebꞌ ebꞌnaj, cheyoqꞌtze chꞌen trompeta tuꞌ, kat heyahwi yinh kaw ip, kat kexinnanitijan, hanin Yahawintiꞌan, heDiosal, kat kexinkolnihan yul isqꞌabꞌ ebꞌnaj. 10 Cheyoqꞌtzenpaxo chꞌen trompeta yet tzalahilal heyehi, yet cheyekꞌtzen qꞌinh wetan, yebꞌ yet chiꞌichiko hunun ixahaw; cheyoqꞌtzepaxo chꞌen yet chenhusni hexahanbꞌal, yebꞌ yet cheyalten hexahanbꞌal yet aqꞌankꞌulal, hak tuꞌ chu kexinnanitijan. Hanin Yahawintiꞌan heDiosal chiwalan huneꞌ tiꞌ,» xhi Komam.
2. HUNEꞌ NIMAN BꞌEL MASANTA BꞌEY TXꞌOTXꞌ MOAB
(10:11–21:25)
Anma Israel el bꞌey txꞌotxꞌ Sinaí
11 Hayet ishunkꞌal tzꞌayik yet iskabꞌ ixahaw yulbꞌal iskabꞌ habꞌilxa yel anma Israel sat txꞌotxꞌ Egipto; yinh huneꞌ tzꞌayik tuꞌ, yel moyan yibꞌanh Yatut Komam watxꞌebꞌil yinh qꞌap cortina bꞌay kꞌuwan istrato Komam. 12 Yel ebꞌnaj Israel sat txꞌotxꞌ desierto Sinaí hatatikꞌa tzet yu isbꞌelwi ebꞌnaj. Wal moyan tuꞌ, haꞌ bꞌey txꞌotxꞌ desierto Parán, haꞌ tuꞌ ok linhnoj. 13 Isto ebꞌnaj yinh isbꞌabꞌel isbꞌel hakaꞌtikꞌa yu yalni Komam tet yaꞌ Moisés.
14 BANDERA 1. Ebꞌnaj soldado ayko yinh isbꞌabꞌel txol iqꞌnhe isbandera yaꞌ Judá. Haꞌ naj Naasón, iskꞌahol naj Aminadab, ayko yahawilo yinh ebꞌnaj. 15 Ok ebꞌnaj soldado yikꞌal yaꞌ Isacar yinh isbꞌel, haxa naj Natanael, iskꞌahol naj Zuar ayko yahawilo yinh ebꞌnaj. 16 Haꞌ ebꞌnaj soldado yikꞌal yaꞌ Zabulón ok yinh isbꞌel, haxa naj Eliab, iskꞌahol naj Helón ayko yahawilo yinh ebꞌnaj. 17 Ebꞌnaj titna yinh yaꞌ Gersón yebꞌ yinh naj Merari haꞌ holnayo qꞌap cortina ayko yinh Yatut Komam, yuto haꞌ ebꞌnaj tuꞌ inito Tabernáculo yet isto ebꞌnaj yinh isbꞌel.
18 BANDERA 2. Istopaxo ebꞌnaj soldado iqꞌnhe isbandera yaꞌ Rubén yinh istxolal. Haꞌ naj Elisur, iskꞌahol naj Sedeur, yahawil naj yinh ebꞌnaj. 19 Haꞌ ebꞌnaj soldado yikꞌal yaꞌ Simeón okpaxo yinh istxolal, naj Selumiel, iskꞌahol naj Zurisadai, yahawil naj yinh ebꞌnaj. 20 Haxa ebꞌnaj soldado, yikꞌal yaꞌ Gad okpaxo yinh istxolal. Naj Eliasaf, iskꞌahol naj Reuel yahawilo naj yinh ebꞌnaj. 21 Ebꞌnaj titna yinh naj Coat iqꞌnhe munlabꞌal kaw ay yelapno chiꞌokniko yul Tabernáculo, haꞌ Yatut Komam. Yalanhto maxhto chꞌapni ebꞌnaj ayxanakanh Yatut Komam yinh qꞌap cortina yu ebꞌnaj.
22 BANDERA 3. Tzujan tuꞌ, istopaxo ebꞌnaj soldado iqꞌnhe isbandera yaꞌ Efraín. Haxa naj Elisama, iskꞌahol naj Amiud, ayko yahawilo yinh ebꞌnaj. 23 Haxa ebꞌnaj soldado, yikꞌal yaꞌ Manasés okpaxo ebꞌnaj yinh isbꞌel. Naj Gamaliel, iskꞌahol naj Pedasur, ayko yahawilo yinh ebꞌnaj. 24 Haxa ebꞌnaj soldado, yikꞌal yaꞌ Benjamín ok ebꞌnaj yinh isbꞌel. Naj Abidán, iskꞌahol naj Gedeoni, ayko naj yahawilo yinh ebꞌnaj.
25 BANDERA 4. Tzujan tuꞌ xin istopaxo ebꞌnaj soldado iqꞌnhe isbandera yaꞌ Dan. Naj Ahiezer, iskꞌahol naj Amisadai, haꞌ naj ayko yahawilo yijbꞌali yinh ebꞌnaj. 26 Haꞌ sata issoldado yikꞌal yaꞌ Aser, ok naj Pagiel, iskꞌahol naj Ocrán, yahawil yijbꞌali. 27 Wal yinh ebꞌnaj issoldado yikꞌal yaꞌ Neftalí, yaꞌ Ahira, iskꞌahol yaꞌ Enán ok sata ebꞌnaj.
28 Hak tiꞌ ye istxolal ebꞌnaj soldado Israel yet isto ebꞌnaj yinh isbꞌel.
29 Tzujan tuꞌ istzotel yaꞌ Moisés tet naj Hobab, iskꞌahol naj Reuel, ismam yixal yaꞌ Moisés, naj ah Madián. Yal yaꞌ Moisés hakaꞌ tiꞌ:a
—Hanhonh Israel honhtiꞌanh chonhtohanh sat txꞌotxꞌ haltebꞌil jetanh yu Komam, tonh jintajanh, kaw kꞌul chaxhjilanh, yuto xayal Komam Dios jetanh hanhonh Israelonh tiꞌanh ta kaw kꞌul chonhyilanh Komam, xhi yaꞌ Moisés.
30 Yajaꞌ taqꞌwi naj Hobab, yalni naj:
—Machoj, wal xin chinpaxtojan bꞌey inkonhobꞌan bꞌay ay wikꞌalan, xhi naj. 31 Kaw eliko yaw yaꞌ Moisés yinh naj:
—Chinqꞌanan tawet ta mach chonhhabꞌejtzotojanh, yuto hach tiꞌ hawohta bꞌay chu kokananh sat txꞌotxꞌ desierto, hak tuꞌ xin isbꞌaqꞌ kosatanh chawukoj.b 32 Tato chaxhto jintajanh, haꞌ iskꞌulal chiyaqꞌ Komam Dios jetanh chijaqꞌpaxojanh tawet, xhi yaꞌ Moisés tet naj.
33 Lahwi tuꞌ, yel ebꞌnaj Israel yich witz Sinaí bꞌay tzotel Komam Dios tet yaꞌ Moisés. Oxebꞌ xin tzꞌayik bꞌelwito ebꞌnaj. Haꞌ Iskaxhahil istrato Komam Jahawil, haꞌ bꞌabꞌi sata ebꞌnaj yinh isbꞌel tuꞌ, yu isyenilo bꞌay chiꞌok linhno ebꞌnaj yu isxewi. 34 Haxa yet yel ebꞌnaj bꞌey tuꞌ ijbꞌabꞌil ebꞌnaj yu moyan yet Komam ayko yibꞌanh ebꞌnaj yinh tzꞌayikal. 35 Hayet chibꞌelwi teꞌ kaxha tuꞌ, chalni yaꞌ Moisés tet Komam Dios:
«Mamin, ahanhwanoj, saj tixhojabꞌto ebꞌnaj ayko ishowal tawinh.
Xiwojabꞌilo ebꞌnaj yinh hasat, ebꞌnaj chaxhyahni,» xhi yaꞌ.
36 Haxa yet chiꞌok linhno teꞌ kaxha tuꞌ, chalni yaꞌ Moisés tet Komam Dios:
«Xewanh Mam Jahawil koxolanh hanhonh Israelonh tiꞌanh,
matxa isbꞌi hanta kobꞌisilanh,» xhi yaꞌ Moisés.